JOHAN 18

Jesu Pheenaw te Kyngnaw

(Mat 26.47-56; Mar 14.43-50; Luk 22.47-53)

1Jesu nynh hynh-e bya a ho koute, a zuitu hae ryte Kedron vaw khuraw lang a zua hae, tuin kya khokhu ccangkheit um zah Jesu te a zuitu hae tuh tuh-e kalan a tee hae. 2Amaw a pheetupaw Judas Iskariot nynh tuh-e hmin tuh a ny; pawccecize Jesu tuh a zuitu hae ryte tuin kyakhe leih a tungkuh hae. 3Ranpibawi lepaw hae te Farasi hae nynh oun saw hae paw beikinn ngawtu hae te rhawkaw hae phu kheit kha Judas Iskariot nynh oun cciakhae hae zah maeekhua, maeccaw te zunghe hae kha ccyngkute oun thua hae. 4Jesu nynh a tungvaw kya yn cyihkuh cih paw balyn kha marya a ny keiccuze cceih zah minmin kha, “Hummou na ccung oh?” cite a khia hae. 5Minmin nynh, “Nazareth khuapaw Jesu,” cite a khung hae. Jesu nynh, “Kae hynh amaw nynh ka thua,” a cipya hae. Amaw a pheetupaw Judas Iskariot mah minmin ryte a thadynbua. 6Minmin kha, “Kae hynh amaw nynh ka thua,” cite he a hopah hae tuh, minmin tuh nulang sihkuh hae zah laekhu kya a khuliakuh hae. 7Jesu nynh, “Hummou na ccung oh?” cite bua a khia hae. Minmin nynh, “Nazareth khuapaw Jesu nynh kae ccung,” a ci hae. 8Jesu nynh, “Kae hynh amaw nynh ka thua cite phe kae hopya vae oh; tukeiccuze kae hynh nae ccung oh ze, hynh-e ccungccaw hae tuh la cceih hae sah,” cite a khung hae. 9“Nae pyapaw ccungccaw hae kha lu kheit sanmah ka zosah khyh hae,” cite a hopaw bya kha accing nawlan nynh hynhte a ho. 10Simon Peter nynh a ccyngkupaw thaloi kha thuaakuh zah ranpibawi a seepaw kha bae zah a ranglang nakua thoh pae. Tuh-e seepaw a min tuh Malkhas acikuh. 11Jesu nynh Peter kha, “Na thaloi kha a bu lungkhu lang sang, ka Paaw nynh yn pyapaw banang tuh ka neih lan khyh tou?” a cipya.#Mat 26.39; Mar 14.36; Luk 22.42

Annas malang Jesu

(Mat 26.57-68; Mar 14.53-65; Luk 22.63-71)

12Rhawkaw hae, rhawbawi hae te Judah palih hae nynh Jesu kha kyng hae zah a khii hae. 13Annas kalan masaty a cciakhae hae, pawccecize Annas tuh tuh-e kum kya ranpibawi lupi Kaiafas a zu paaw nynh thua. 14Kaiafas tuh, ‘Ccungccaw hae hanlan lu kheit nynh a chipaw tuh ahoyhua,’ cite Judah hae kya tuanaw a pyatu nynh thua.#Joh 11.49-50

Peter nynh Jesu A Vua

(Mat 26.69-70; Mar 14.66-68; Luk 22.55-57)

15Simon Peter te ccangpaw zuitu lu kheit nynh Jesu kha a zui hae; tuh-e zuitu tuh ranpibawi lupi nynh a nypaw thua zah Jesu ryte ranpibawi lupi umnaw maepaw lang a tee hae. 16Peter tuh sakoih pe atolang khe a thadyn. Tukeiccuze ranpibawi lupi nynh a nypaw tuh-e ccangpaw zuitu tuh pou zah sakoih a ngawtu nopinung kha hopah zah Peter kha a lungkhu lang a teekhae. 17Sakoih a ngawtu nopinung nynh Peter kha, “Nang so hynh-e ccungccapaw a zuitu hae kyaze lu kheit na thuabua khyh tou?” cite a khia. Peter nynh, “Ka thua khyh,” a ci. 18Tuh ccyh lya tuh akyaa keiccuze see hae te palih hae tuh maeehue te maeetuakuh hae zah thadyn lante maee a ekuh hae; Peter tuh mih kya thadynbua zah maee a ekuh bua.

Annas nynh Jesu Bya A Khia

19Tetuh ranpibawi lupi nynh Jesu kha a zuitu hae kong te a ccangpyanaw kong bya a khia. 20Jesu nynh, “Laephi ccungccaw hae kya alangkuh lante phe ka ho vae; Judah hae nynh leih a tungkunaw hae sinakok hae kya te beikinn kya palei ka ccangpah hae. Aphiruh lante ka ho boi khyh. 21Pawccemou kae hynh bya nae khia? Ka hopya hae paw bya a thaetu hae kha khiatua hae; minmin tuh ka hopaw kha a nyh hae,” cite a khung. 22Tuhte he a ho tuh a pe thadynpaw palihpaw nynh Jesu mae kha bia zah, “Ranpibawi lupi kha pawtemou tuhte na khung ngan?” a cipya. 23Jesu nynh, “Ahme leipaw ka ho ze, ahme leinaw kong ccaekia langsaku tua; ahmepaw ka ho ze pawccemou nae bia?” cite a khung. 24Annas nynh Jesu kha phang heekuh lante ranpibawi lupi Kaiafas kalan a ky.

Peter nynh Bua A Vua

(Mat 26.71-75; Mar 14.69-72; Luk 22.58-62)

25Simon Peter tuh thadyn zah maee a ekuh. Minmin nynh, “Nang mah a zuitu hae kyaze lu kheit na thuabua khyh tou?” cite a khia hae. Peter nynh, “Ka thua khyh,” cite a pheiku. 26Peter nynh a nakua thoh pae lan a baepaw te vaeccawtang hae paw, ranpibawi lupi see hae kyaze lu kheit nynh, “Nang tuh Jesu ryte khokhu kya na um oh paw kha mang kae muih rei?” a ci. 27Peter nynh bua a pheiku, tuh ccyh lyakhe aw ccahe yn khua.

Pilat malang Jesu

(Mat 27.11-14; Mar 15.1-5; Luk 23.1-5)

28Minmin nynh Jesu kha Kaiafas kyate Pilat inn lang a cciakhae hae; tuh lya tuh awkhua takaw nynh thua. Mimaw tuh Kawtaw Poi kya aebua kho nawlan, phe kae thusei cih cite Pilat inn lungkhu lang teebua khyh hae. 29Tukeiccuze Pilat nynh minmin kha toinuakuh hae zah, “E ccungccapaw hynh paw seinaw mou na be oh?” a ci. 30Minmin nynh, “E ccungccapaw hynh miseipaw athua khyh ze, na kalan kae ap lan khyh,” a cipya hae. 31Pilat nynh minmin kha, “Amaw hynh cciakhae oh lah naemaw phung thyhte bya la pia oh,” a cipya hae. Judah hae nynh, “Kaening tuh hum sanmah chianaw kaw kae hoi khyh,” cite a khung hae. 32Tuhte a ho hae paw tuh, Jesu nynh pawcihawpaw chinaw te nynh ka chih cih cipaw a la hotypaw bya kha accing nawlan nynh thua.#Joh 3.14, 12.32

33Pilat tuh inn lungkhu lang bua tee zah Jesu kha ko zah, “Nang hynh Judah hae Siapharan na thua tou?” cite a khia. 34Jesu nynh, “E bya hynh namaw lung te na hopaw tou? Tuhkhyhze ming hae nynh tou kamaw kong hynh ae hopah hae?” cite a khung. 35Pilat nynh, “Kae tuh Judah paw ka thua zawtou? Na minphuin hae te ranpibawi lepaw hae nynh nang hynh ka kalan ae ap hae, nang nynh pawmou na cyi?” cite a khia. 36Jesu nynh, “Ka peenaw tuh hynh-e laephi kya-e thua khyh, ka peenaw tuh hynh-e laephi kya-e a la thua ze, kae tuh Judah hae kalan ap ka thua khyh nawlan ka ccungccaw hae nynh rhaw yn tukpah cih hae; thuasalama ka peenaw tuh hein kya-e thua khyh,” cite a khung. 37Pilat nynh, “Tuhteze nang tuh siapharan na thua tou?” a cipya. Jesu nynh, “Kae tuh na ho hawte siapharan nynh ka thua. Kae tuh byaccing kha ccaekiakhan khylan kae pui zah hynh-e khylan nynh laephi kalan kae thua. Byaccing te asekuhpaw ccungccaw miakaw nynh ka bya hynh a ngae,” cite a khung. 38Pilat nynh, “Byaccing tuh pawmou?” cite a khia.

Jesu Chia lan Byapaenaw

E bya hynh a ho koute Pilat tuh Judah hae kalan bua cceih zah, “A seinaw pawpaw mah ka muih khyh. 39Thuasalama Kawtaw Poi kya ccungccaw lu kheit leih kae luesahpya oh paw phung kha na hoi oh; tukeiccuze Judah hae Siapharan hynh kae luesahpya oh ze na ry oh tou?” a cipya hae. 40Minmin nynh siabia hae zah, “Hynh-e paw tuh kae luesah ry khyh, Barabbas nynh kae luesah ry,” a ci hae. Tuh-e Barabbas tuh damiah nynh thua.

Currently Selected:

JOHAN 18: ZB16

Highlight

Copy