JOHAN 17

A Zuitu hae elang Saw A Sang

1E bya hae hynh he a ho koute Jesu nynh vaawlang dothung zah, “Apang, accyh azaw vae; na Ccapaw nynh namaw kha phu ae esah nawlan na Ccapaw hynh phu-esah tua. 2Ccungccaw balyn tungvaw kya kawhoinaw kha amaw na pya vae hawte, nang nynh Ccapaw kalan na pya hae paw ccungccaw miakaw kha Ccapaw nynh zungzae hiinnaw a pya nawlan Ccapaw hynh phu-esah tua. 3Zungzae hiinnaw cipaw tuh, ahmepaw Pachia nang kyalya te na sawpaw Jesu Khri hynh minmin nynh a ny hae paw kha nynh thua. 4Law lan nae pyapaw rya kha thangsahte, laephi vaw kya na phu-enaw kha ka langsah vae. 5Pou Apang, laephi a um mawze namaw te pynkheihlan ka hoibua vae paw phu-enaw kha na malang hin atu yn pyatua.

6“Laephi kyate nae pyapaw ccungccaw hae kya na min kha ka langsah vae, minmin tuh na kya-e thua hae zah kamaw kha nae pya, te na bya kha a zui hae. 7Nae pyapaw balyn tuh namaw kyate nynh yn thua cipaw kha minmin nynh atu a ny vae hae. 8Pawccecize nae pyapaw bya kha mih kalan ka pya hae zah a lawku hae, te kae tuh namaw kyate yn thuapaw cipaw kha nyh ccaccing hae zah, kae tuh namaw nynh nae saw cipaw kha a zyn hae.

9“Minmin hanlan saw ka sang; laephi hanlan saw ka sang khyh; thuasalama nae pyapaw ccungccaw hae hanlan nynh saw ka sang, pawccecize minmin tuh na ccungccaw hae nynh thua hae. 10Ka hoipaw balyn hynh namaw kya-e thua zah, na hoipaw balyn hynh mah ka kya-e nynh thua; minmin kyate ka phu-enaw tuh a langkuh. 11Atu te laephi kya ka um vae lan khyh, thuasalama minmin tuh laephi kya nynh a um hae, kae tuh namaw kalan kae cceih cih. Athyaapaw Apang, aening tuh ccangkheit ah thua hawte, nae pyapaw ccungccaw hae nynh ccangkheit athua nawlan hae minmin kha na min te khynsah hae. 12Nae pyapaw ccungccaw hae ryte ka um lya tuh minmin kha na min te ka khynsah hae; azo lanpaw ccungccapaw holeite, nae pyapaw ccungccaw hae kha ka khynsah hae zah, lu kheit sanmah zo khyh hae, tuh-e tuh Ccathyaa accing nawlan nynh thua.#Sam 41.9; Joh 13.18 13Atu na kalan kae cceih vae cih zah ka kya-e lungtuanaw hynh mih kya phe beih lan a hoi nawlan hae, hynh-e bya hynh laephi kya ka ho. 14Na bya kha minmin ka pya vae hae; kae tuh laephi kya-e ka thua khyh hawte minmin mah laephi kya-e athua khyh hae keiccuze laephi nynh minmin kha a hua hae. 15Minmin hynh laephi kyate na law ccaw hae cite kae ngia khyh, thuasalama ahoy leipaw kyate na khynsah ccaw hae cite nynh kae ngia. 16Kae tuh laephi kya-e ka thua khyh hawte minmin mah laephi kya-e thua khyh hae. 17Minmin hynh na byaccing te thyaasah hae; na bya tuh byaccing nynh thua. 18Nang nynh kae hynh laephi kalan nae saw hawte kae nynh mah minmin hynh laephi kalan ka saw hae. 19Minmin mah byaccing te thyaasah athua nawlan hae, minmin elang kamaw te kamaw kha ka thyaasaku.

20“Minmin elang kyalya saw ka sang khyh; mih bya liate kae yn zyn cih hae paw hanlan mah saw ka sang. 21Mih balynte ccangkheit athua nawlan hae saw ka sang. Apang, nang tuh ka kya na um zah kae mah na kya ka um hawte, minmin mah aening kya umbua hae sah. Nang nynh kae hynh nae saw cipaw laephi nynh a zyn nawlan minmin tuh ccangkheit lang beih tang hae sah. 22Aening tuh ccangkheit ah thua hawte minmin mah ccangkheit athua nawlan hae, nae pyapaw phu-enaw kha minmin ka pya hae, 23minmin tuh ccangkheit ccaccing lang a tang nawlan hae, kae tuh minmin kya ka um zah nang tuh ka kya na um, tuhteze nynh nang nynh kae hynh nae saw cipaw te kae hynh nae sungsah hawte minmin kha mah na sungsah hae cipaw kha laephi nynh a nyh cih. 24Apang, laephi a um mawze nae sungsah zah nae pyapaw ka phu-enaw hynh nae pyapaw ccungccaw hae nynh a muih ccaw hae, ka umnaw kya kamaw ryte um hae sah ci ka ry.

25“Pou adingpaw Apang, laephi ccungccaw hae nynh namaw hynh ae nyh khyh hae, thuasalama kae nynh tuh kae ny; nang nynh kae hynh nae saw cipaw kha hynh-e hae nynh a ny hae. 26Nae sungsahnaw tuh minmin kya um zah kae mah minmin kya ka um nawlan, na min kha minmin ka nysah vae hae zah palei ka nysah ung cih hae,” a ci.

Currently Selected:

JOHAN 17: ZB16

Highlight

Copy