HEBRU 11
11
Zynnaw Asuilan
1Zynnaw tuh ngaehoipaw uccaw hae kha ka mue ccaccing cih cite phe riasakunaw te, muih loh leipaw uccaw hae kha a um ccaccing cite nynaw nynh thua. 2Pawccecize tuh-e zynnaw liate langmawlya e ccungccaw hae tuh Pachia lungry a tung hae. 3Laephi tuh Pachia bya liate rae athua cipaw kha zynnaw liate ah thaethya oh; muihpaw uccaw hae hynh muih leipaw uccaw hae kyate raepaw nynh thua hae.#Gen 1.1; Sam 33.6, 9; Joh 1.3
Abel, Enok te Noah kha Dosuinkunaw
4Abel nynh zynnaw liate Kain silawnaw laeze ahoy huapaw silawnaw kha Pachia kalan a pya. Tuh-e zynnaw liate aning tuh miding lante ccou athua, pawccecize a lasung kha Pachia nynh a ccoupya; aning tuh a chi vae zemah tuh-e zynnaw liate bya a ho ung.#Gen 4.3-10 5Enok tuh chinaw a tung vae khyh ccaw cite zynnaw liate lawthung athua. Pachia nynh amaw kha a lawthung vae keiccuze aning tuh muih lan um vae khyh. Pawccecize lawthung athua maw, “Aning tuh Pachia lungry a tung,” cipaw ccaekia kha a hoi.#Gen 5.21-24 (LXX) 6Zynnaw leite Pachia lungrytung lanpaw tuh thua kho khyh; pawccecize Pachia kalan yn naekuhpaw ccungccaw nynh tuh Pachia a um cipaw te amaw a ccung hae paw kha amee a pya hae cipaw kha a zyn hahe cih. 7Noah tuh muih loh leipaw uccaw hae kong kha Pachia nynh raeringnaw a pya koute a innbyn khumnaw hanlan Pachia rawrinaw te zynnaw liate sanphalung kha a sak, tuh-e zynnaw liate laephi kha seibe zah zynnaw liate yn thuapaw dingnaw rho a ccoutu lang yn tang.#Gen 6.13-22
Abraham Zynnaw
8Abraham nynh rho lang a ccou cih paw ram langkhe ccia khylan ko he athua tuh, zynnaw liate kaw a ngae; teilang nynh ka ccia cipaw ny leite a cceih.#Gen 12.1-5 9Byakinpyakupaw loram kyakhe ramccangpaw hawte zynnaw liate a um. Tuh-e byakinpyakunaw kha amaw ry, rhoccoutu athua hae paw Isak te Jakob ryte bu kya a um hae.#Gen 35.27 10Pawccecize Pachia nynh a sakpaw te a raepaw, atynpaw athonaw a hoipaw khuapi kha aning nynh a ngaehoi. 11Abraham tuh myarya taw vae zah Sarah mah a tiinnung athua zemah zynnaw liate ccaawpoi khonaw thawzung a mue; pawccecize bya a kinpakuhtupaw tuh a lungzipaw nynh thua cipaw a zyn.#Gen 18.11-14, 21.2 12Tukeiccuze achihpaw hawte athua vae paw Abraham kyate vaawlui e awsi hae zeih alungpaw te rili kin e riatae leipaw laesia zeih alungpaw ciihan patae a pui hae.#Gen 15.5, 22.17, 32.12
13Hynh-e ccungccaw hae balyn tuh byakinpyakupaw kha ccou leite zynnaw hoite a chih hae. Thuasalama minmin nynh asawpi te tuh-e tuh muihlang hae zah a cciadue hae, te minmin tuh laephi vawlan mikhia hae te khuaccong hae paw nynh kae thua cipaw ccaerarih lan a nyku hae.#Gen 23.4; 1Sh 29.15; Sam 39.12 14Pawccecize tuh-e uccaw kong a hotu hae nynh minmin tuh mimaw ram nynh a ccung hae cipaw ccaerarih lan a langsaku hae. 15Minmin nynh a poutaw hae paw ram kha palei a la tuathui hae ze, tuh-e ram lang bua kithui lan ccyhhoypaw phe a hoi cih hae paw. 16Thuasalama minmin nynh ahoy huapaw ram kha a ngae hae, tuh-e ram tuh vaawram nynh thua. Tukeiccuze mih Pachia cite koku lanpaw kha Pachia tuh a maethah khyh; pawccecize Pachia nynh minmin hanlan khuapi kha a paccynpya vae hae.
17Abraham tuh syntawtua athua lyakhe zynnaw liate Isak kha silawku nawlan a pya; byakinpyakupaw a muetupaw nynh a hoi thypaw a ccapaw kha a pya.#Gen 22.1-14 18Amaw kong lante asekuhte, “Isak kya nynh na ciihan tuh atyn cih,” cite hopya athua.#Gen 21.12 19Pachia tuh achihpaw heize a thosathui kho cite varyng a zyn; aning nynh muihsahnaw lante a chih hae paw kyate Isak kha mah a mue. 20Isak nynh yn thua cih paw uccaw hae kong lante Jakob te Esau kha zynnaw liate hythua a pya hae.#Gen 27.27-29, 39-40 21Jakob nynh a chi dyn khe Josef ccaaw hae kha zynnaw liate hythua ccarou a pya hae, te a hoitang dung kya phang ngeikute Pachia kha a beik.#Gen 47.31 (LXX), 48.1-20 22Josef nynh a chi dyn khe, Israel ccaaw hae nynh a pou lan hae paw kong kha zynnaw liate hosya zah amaw a ru konglang te bya a tawsya hae.#Gen 50.24-25; Exo 13.19
Moses Zynnaw
23Moses he a pui tuh, apuithyapaw imua nynh thua cipaw kha a muih hae keiccuze zynnaw liate siapharan nynh kawthopaw kha ri leite a nung te a paaw nynh Moses kha sawpaw sah thum a thuruh hae.#Exo 1.22, 2.2 24Moses nynh piccan he thua tuh, Faro ccanung a ccapaw cite koku lanpaw kha zynnaw liate phe a ei.#Exo 2.10-12 25Seinaw te asekuhpaw lungrythuanaw kya sosoh hoysah lanpaw laeze Pachia ccungccaw hae ryte vawsawnaw teing lanpaw kha a poku paleih. 26Izip ram kya-e sisua hae laeze Khri keiccuze saryakunaw tuh asung huapaw hoirumnaw nynh thua cite a tuaku. Pawccecize nyalang mue lanpaw lasung kha nynh a tua. 27Siapharan thinrianaw kha ri leite Izip ram kha zynnaw liate a cciataw; pawccecize muih kho leipaw Pachia kha a muihpaw hawte aning nynh phang a ngaesang. 28Ccatawccaw hae a rohtupaw nynh Israel ccatawccaw hae kha a ty khyh nawlan, Moses nynh Kawtaw Poi te chii theinaw kha zynnaw liate a rae.#Exo 12.21-30
Ccangpaw Israel Rawhoytu hae Zynnaw
29Israel hae nynh laerou kya ccia hawte zynnaw liate Rili Se kha po a zua hae. Tuhcite Izip hae nynh he a zuabua hae tuh tui nynh pong a vu hae.#Exo 14.21-31 30Jeriko khualungrua kha nin sari a voilu kou hae te, zynnaw liate khualungrua tuh pong atin.#Jos 6.12-21 31Ohhuanung Rahab tuh dophitu hae kha ahoyte innccong a thuasah hae keiccuze zynnaw liate aning tuh kawngae lei hae paw kya chihbua khyh.#Jos 2.1-21, 6.22-25
32Tuhlaelan pawmou ka ho ung cih? Gideon, Barak, Samson, Jefthah, David, Samuel te profeh hae kong honaw ccyh ka zaw lan khyh.#Bpt 6.11—8.32, 4.6—5.31, 13.2—16.31, 11.1—12.7; 1Sa 16.1—1Si 2.11; 1Sa 1.1—25.1 33Tuh-e hae nynh peenaw hae kha zynnaw liate a tae hae, dingnaw rya kha a law hae, byakinpyakunaw kha a mue hae, chindeih hae khalang kha a myhsah hae,#Dan 6.1-27 34Maee aruapaw kha a the hae, thaloi haw kyate a lue hae, thawzyanaw kyate a thawsaepaw lang a tang hae, rhawdounaw kya a rawthungpaw lang a tang hae, ramccang rhawkaw hae kha a ccuesah hae.#Dan 3.1-30 35Nopi hae nynh mih michi hae kha hiinnaw kalan thoosahthuinaw te bua a mue hae, te mingccang hae tuh ahoy huapaw thoothuinaw kha mue khylan luesahnaw kha lawku leite tuaasahnaw kha a teing hae.#1Si 17.17-24; 2Si 4.25-37 36Abang tuh saryanaw te ziakunaw kha a teing hae, sivawrui te khii hae zah thongsaw hae.#1Si 22.26-27; 2Sh 18.25-26; Jer 20.2, 37.15, 38.6 37Lung te a deih hae, thing-aw te ccangning lang a aw hae, thaloi te a chia hae, tuu phua te miaa phua kha kikuh hae zah a khiakuh hae; boeining leite ae van ae leite vawsaw a teing hae, ming hae nynh a tuaa a sah hae.#2Sh 24.21 38Laephi tuh minmin te ngaekuh khyh. Minmin tuh ramkaw kya, mua hae kya a la khiakuh hae, lungkarung te laekarung hae kya a la um hae.
39Minmin balyn tuh zynnaw liate thehoynaw a ccou hae zemah byakinpyakupaw kha mue khyh hae. 40Minmin tuh aening leite accingpaw lang rae athua khyh nawlan hae Pachia nynh ahoy huapaw uccaw kha aening hanlan oun paccynpya vae.
Currently Selected:
HEBRU 11: ZB16
Highlight
Share
Copy
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
