HEBRU 10
10
Accingpaw Khri Silawnaw
1Pawccecize kawbya tuh yn thua cih paw ahoypaw uccaw hae mynlyh thua zah uccaw hae muinsan ccaccing thua khyh, kum takyhte pyapaw alokuhpaw silawnaw liate amaw kalan a naekuh hae paw kha kharouh ccingsah kho khyh hae. 2A ccingsah kho lanze, silawkunaw kha phe a la umtaw vae cih hae khaw? Pawccecize a beiktu hae tuh zungzae hanlan vaekheit te sei thyaasah athua hae ze, mih seinaw nykunaw thinlung hoi vae lan khyh hae. 3Thuasalama tuh-e silawnaw kya tuh seinaw bua liathuinaw kum takyhte a um. 4Pawccecize tangnuapaw hae te miaa hae chii nynh seinaw po lawpya lanpaw tuh thua kho khyh. 5Tukeiccuze laephi kalan Khri yn thua lyaze aning nynh,
“Silawnaw te pyapaw uccaw kha
na rypaw thua khyh,
thuasalama kamaw hanlan pyn kha
phe nae paccynpya vae.#Sam 40.6-8 (LXX)
6Maee-ute silawnaw te
seithyaanaw silawnaw kyakhe
na lungrythua khyh.
7Tuinte kae nynh,
‘Ccauh kuekuhpaw kya
kamaw konglang azeiku thyhte,
pou Pachia, na rynaw
rae khylan nynh kae tuh
kae thua,’ ka ci,”
cite a ho. 8Luki langkhe, “Silawnawpaw hae te pyapaw uccaw hae, maee-ute silawnawpaw uccaw hae te seishawnaw silawnawpaw hae kha na ry khyh, tuh-e hae kya na lungrythua khyh,” (tuh-e hae tuh kawbya thyhte pyapaw nynh thua) cite a ho koute, 9aning nynh, “Ngaetua, pou Pachia, kae tuh na rynaw rae khylan nynh kae thua,” a ci. Vaeningnaw e kha tynsah khylan vaekheitnaw e kha phe a vua. 10Tuh-e rynaw liate, Jesu Khri pyn kha zungzae hanlan vaekheit kyalya pyanaw liate aening tuh thyaasah ah thua vae oh.
11Ranpibawi miakaw tuh mih ryalaw kya nin takyh a thadyn hae, seinaw kharouh a thyaasah kho leipaw alokuhpaw silawnaw kha palei a rae hae.#Exo 29.38 12Thuasalama Khri tuh seinaw elang silawnaw ccangkheit kha zungzae hanlan a pya koute, Pachia ranglang khe a dahung vae.#Sam 110.1 13Tuh-e ccyh kyate a rhaw hae kha a ccusy lang rae athua makhia phang a ngaw vae. 14Pawccecize pyapaw uccaw ccangkheit liate thyaasah athua hae paw kha zungzae accingpaw lang a rae hae. 15Thyaa Muisaw mah aening kya ccaekia nynh thua; pawccecize,
16“Tuh-e nin hae koute
minmin ryte ka rae lanpaw
byakinnaw tuh hynhte nynh thua:
Ka kawbya hae kha
mih thinlung kya ka nung cih zah
tuh-e hae tuh mih lungkhu kya
ka zei cih,”
cite Bawipaw nynh a ho koute,#Jer 31.33
17“Mih seinaw hae te
kawbya pawlangria leipaw
mih cyisahnaw hae kha
ka liathui vae lan khyh,” a ci.#Jer 31.34
18Atu hynh-e seingaethyanaw a umnaw kya, seinaw hanlan pyapaw uccaw ho vae khyh.
Pachia kalan Naekuh Oh Sih
19Tukeiccuze uteno hae, Jesu chii liate beikinnthyaa lungkhu lang tee lan zynkunaw ah hoi vae oh. 20Tuh-e a chii liate aning nynh amaw pyn athuapaw zokhawpaw boei khate aening hanlan ahiinpaw laanpi thawpaw kha oun hungpya. 21Pachia inn a uktupaw Ranpibawi Lupi ah hoi oh keiccuze, 22ahoy leipaw mawtemaw nykunaw thinlung kha thyaasaku khylan tui theikute, ah pyn kha tui ccipaw te singkute, thinlung ccaccing te zynnaw atynpaw te Pachia kalan naekuh oh sih.#Lev 8.30; Eze 36.25 23Ngaehoinaw kong ccaekia ah khan oh paw kyate voikheit voikheit lang pu leite varyng kyngkuh oh sih, pawccecize bya oun kinpakuhpaw tuh a lungzipaw nynh thua. 24Sungsaku nawlan te ahoypaw rya kha law khylan lu kheit te lu kheit pawtemou lungthosaku lan cipaw kha tua kalang oh sih. 25Ccungccaw abang nynh leih a cyimae hae hawte pynkheihlan pumkunaw kha umtaw leite, lu kheit te lu kheit thawzung pyakuh oh sih, Ninsaw tuh houhouh yn naekuh vae cipaw kha na muih oh hawte thawzung houhouh pyakuh oh sih.
26Pawccecize byaccing nynaw kha aening nynh phe ah mue kou oh te lungraroute ah sei oh ze, seinaw hanlan silawkunaw umlae vae khyh. 27Thuasalama ri lan umpaw byapianaw yn thua lanpaw te rawsetu hae kha phe ccung lan a u cih hae paw, bungpawnaw maee rou nynh a um vae.#Isa 26.11 (LXX) 28Moses kawbya kha a zui leipaw ccungccaw tuh ccaekia lu ning khyhze lu thum nynh ccaekia a khan hae thyhte ngaethyaumsahnaw mue leite a chih.#Deu 17.6, 19.15 29Pachia Ccapaw kha a ccu kaw syde zah, amaw a thyaasahpaw byakinnaw chiise kha athyaa leipaw uccaw lang ria zah, thawccinaw Muisaw kha a saryapaw ccungccaw tuh pawcih alepaw detahnaw mou mue lan accan cite na tua oh?#Exo 24.8 30Pawccecize, “Liarunaw tuh kamaw kya-e nynh thua, kae nynh amee ka sangru cih,” cite Bawipaw nynh a ci. Te, “Bawipaw nynh a ccungccaw hae kha bya a pia cih hae,” bua a ci, cite a hotupaw kha aening nynh ah ny oh.#Deu 32.35, 36 31Ahiinpaw Pachia kuih lungkhu lang ccaw lanpaw tuh ri lan umpaw nynh thua.
32Thuasalama nanning kha awsah na thua kou oh te, alepaw vawsawnaw na teing oh zah na ngaesang oh paw, langmaw e nin hae kha bua liathuitua oh. 33Vaekhakheit vae ze ccungccaw hae malang saryanaw te vawsawnaw kha na teing oh zah, vaekhakheit vae ze tuhcite a teing hae paw ryte mungkute na teingkheih oh. 34Pawccecize thongccah hae paw kha thaw na cci oh, te ahoy huapaw te atynpaw uccaw na hoi oh paw kha na nyku oh keiccuze na hoi oh paw uccaw hae ae luade oh paw kha lungtuate na ngaesang oh. 35Tukeiccuze myarya lepaw lasung a thuakhaepaw nae rawhoynaw kha vua nan oh. 36Pawccecize Pachia rynaw kha na rae kou oh te, byakinpyakupaw na mue nawlan oh ngaesangnaw na hoi oh aho.
37“Pawccecize yn thua cih paw
aning tuh thysung leite
sosohtari aro koute
yn thua vae cih.#Hab 2.3-4 (LXX)
38Adingpaw ka ccungccaw tuh
zynnaw liate a hiin cih;
thuasalama lukhakheit nynh
nulang a sihku lanze
ka muisaw tuh tuh-e paw kya
a lungrythua lan khyh,” a ci.
39Thuasalama aening tuh ronaw kalan nulang a sihkuh hae paw ah thua khyh oh, thuasalama zynnaw hoite khumnaw a ccou hae paw nynh ah thua oh.
Currently Selected:
HEBRU 10: ZB16
Highlight
Share
Copy
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
