GENESIS 8
8
Tuipayn A Kynaw
1Thuasalama Pachia nynh Noah te sanphalung kya umkheih hae paw sarangpaw balyn te sahiin-awvaw balyn kha ning khyh hae. Te Pachia nynh laephi vawlan khivae zawsah zah tui tuh akybung; 2myarya khunaw kya umpaw tuinaw hae te vaawlui kya-e thanlan-aw hae kha oun khawkuh zah vaawlui kya-e khuaa tuh akan vae, 3te tui tuh laephi kyate byabyate akybung. Te nin za kheit sung pangaw aro tuh tui tuh aky vae; 4te sawpaw sah sarinaw#8.4 Sawpaw sah sarinaw tuh Tishri ci hae zah, September te October loukaw nynh thua. , nin haw lae sari nin kyakhe sanphalung tuh Ararat mua kya a tinkuh. 5Tui tuh sawpaw sah hawnaw#8.5 Sawpaw sah hawnaw tuh Tebeth ci hae zah, December te January loukaw nynh thua. , cia po akybung; sawpaw sah hawnaw, masaty nin kya mua dung hae tuh oun langkuh hae.
6Nin sung pali aro te Noah nynh a raepaw sanphalung kya-e thanlan-aw kha hung zah, 7va-aw sa kheit kha a saw; tuh-e va-aw nynh laephi vawlan tui arou makhia a khiakuh. 8Oute Noah nynh laephi vawlan tui aky vae tah cipaw ny khylan vahu sa kheit kha a saw; 9thuasalama vahu nynh ccunaw kha muihkuh khyh zah Noah umnaw sanphalung kalan phe a ki, pawccecize laephi vawlan balyn tui a um ung. Tukeiccuze Noah nynh a kuih kha dyngte vahu kha kyng zah amaw umnaw sanphalung lungkhu lang a nung. 10Noah nynh nin sari a ngaw koute vahu kha sanphalung kyate bua a saw; 11zete khe vahu tuh Noah kalan yn ki zah a mung te a teipaw hinlalyhpaw oliv naw kha yn thuakhae; tukeiccuze Noah nynh laephi vawlan tui aky vae cipaw a ny. 12Oute Noah nynh nin sari a ngaw koute vahu kha bua a saw; vahu tuh Noah kalan yn ki vae khyh.
13Noah za taruh kum kheit a ci kum, sawpaw sah kheitnaw#8.13 Sawpaw sah kheitnaw tuh Nisan ci hae zah, March te April loukaw nynh thua. , kyaze masaty nin kyakhe laephi vawlan tui tuh karae aky vae; te Noah nynh sanphalung adawkuhpaw kha phou zah he a do tuh, arou takawpaw laephi kha a muih. 14Sawpaw sah ningnaw kya nin kuin lae sari nin khe laephi tuh arou vae. 15Oute Pachia nynh Noah kha, 16“Namaw ryte na zu, na ccapaw hae te na ccapaw hae zu hae ryte sanphalung kyate pou ccavae oh. 17Laephi vawlan pungthung khylan te pungzae khylan namaw ryte a um hae paw ahiinpaw miakaw, pavaw hae te sarangpaw hae te laephi vawlan a vawthyapaw miakaw kha namaw ryte poukhae hae,” a cipya. 18Tukeiccuze Noah tuh a zu, a ccapaw hae te a ccapaw hae zu hae ryte a pou hae. 19Te sarangpaw miakaw, avawpaw miakaw, te pavaw miakaw, laephi vawlan apiathyapaw miakaw tuh mimaw phuin thathyhte aphuphute sanphalung kyate a pou vae hae.
Noah kya Pachia Byakinpyakunaw
20Oute Noah nynh Bawipaw hanlan silawhang ccangkheit kha rae zah athyaapaw sarangpaw te athyaapaw pavaw phuin takyh kya-e sa kheit cci kha lah zah silawhang vawlan khe maee-ute silawnaw kha a rae. 21Te Bawipaw nynh lungrythuasah paw amynkhuhpaw kha he a thae tuh, Bawipaw nynh, “Ccungccaw keiccuze laephi hynh mazi thya bua ka law vae lan khyh, pawccecize ccungccaw thinlung tuh a di lya mawte hoy khyh; vaekheit ka la cyi vae hawkhate ahiinpaw ahysuepaw miakaw kha kharouh bua ka roh vae lan khyh.
22Laephi she athang makhia,
ccou ccyh te rue ccyh,
akyaapaw ccyh te asopaw ccyh,
hawnin te khuaccih,
khuadae te khuazi,
thang boi vae lan khyh,”
cite a thinlung kya bua a ciku.
Currently Selected:
GENESIS 8: ZB16
Highlight
Share
Copy
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
