JOHAN 9

Mei kamju naimy tapen nai khumi ai hawi sa pi nai

1Naibaly Isu my tako nai tarawi y tapen khyp khala i dengdairei mei pajau nai leaungrei ai niu. 2Naibaly abangnaichi ly mymy teng y, “Rabbi, mei kamju naimy tapen nai ly kamngo sa nai ami mo? Hini khumi my a, amhm ampo my a?” nanai deng. 3Isu my, “Hini khumi my py kamngo so y, amhm ampo my py so y; Tameuh i atiti sa naichi ly mymy i tlang tleaung y amteng ai naira teu. 4Kanithun khala y ly kai ai pato nai keung i kalop achi sa ai nai tla, vum ne ai bo he, hunai khala y ly ami py kalop sa thai ai ny y. 5Kai ly khaileaung pri y awm nai khala y ly khaileaung pri i kangvang kai ne,” nanai pathang.#Mt 5.14; Jh 8.12 6Hunai ka-tawm thui nai bo y mymy ly khaileaung y pachi pathawi i, pachi hawi aneaung sa iy, aneaung ly ni i mei y kaleu; 7naibaly ni teng y, “Siloam ang y amju chei,” napi. (Siloam ly Pato Nai, nanai sai ne.) Naibaly ni ly chei i amju iy mei angvang naimy vawi teang.

8Hunaibaly mymy i saleaungchi hawi, jangni y mymy i cheaung nai niu reng naichi my ly, “Hini khumi ly ateh naimy cheaung reng nai ny y lawh a?” napi. 9Khumi takhrachi my ly, “Ne chy, ne na a,” napi. Khumi takhrachi my ly, “Ny y leang, ka-tawm teu,” napi. Na i py ni my ly, “Huni ly kai ne na a,” napi. 10Hunaibaly nichi my ly mymy teng y, “Nang i mei ly mana sa iy angvang mo?” napi. 11Mymy ly, “Isu napi nai ly aneaung sa iy kai i mei y kaleu i, ‘Siloam ang y amju chei,’ ang napi. Hunaibaly kai chei iy amju i, mei kangvang kanga nai bo he,” napi. 12Naibaly nichi ly mymy teng y, “Mymy ly ma y awm mo?” napi. Ni ly, “Pany y,” napi.

Pharisaichi ly mei angvang nai molam deng chumchi nai

13Naibaly nichi ly ti y rai kha i mei kamju ai ly Pharisaichi teng y chei hai. 14Naibaly Isu my aneaung sa iy, ni i mei angvang hai nai kani ly Anawn Kani tla khyp. 15Hunaibaly Pharisaichi ly mymy i mei kangvang nga nai satang ly deng bi i, mymy ly nichi teng y, “Ni ly kai i mei y aneaung kaleu i, kai ly amju iy mei angvang bo,” napi. 16Hunaibaly Pharisai phyreichi my ly, “Huni khumi ly Anawn Kani ja y nai deeaungkho y Tameuh teng i theu nai ny y leang,” napi. Na i py phyreichi my ly, “Khumi kamngo my ly hina nai rengrang sa nai ly mana sa thai mo?” napi. Naibaly amprei u i amkawm u takhra bo. 17Hunaibaly nichi ly mei kamju teng y, “Mymy ly nang i mei angvang hai nai deaungkho y ni ai ly nang mana dawn mo?” napi bi. Naibaly mymy ly, “Amo ne,” napi.

18Na i py Judachi my mei kangvang nga nai i amhm ampo ai heang y ryrei ly mei kamju ne i, mei kangvang nga, nanai ly mymy i satang ym y. 19Naibaly nini teng y, “Hini ly nangni i chapo, mei kamju naimy tapen nai napi hawi nai ly ne a? Vai ly mana niu thai mo?” nanai deng. 20Naibaly amhm ampo my ly, “Hini ly kaini i chapo ne, nanai pany, mei kamju naimy tapen nanai py pany; 21na i py vai mana niu thai mo, nanai ly pany y, mymy i mei angvang hai nai keung ai py pany y; mymy teng y deng u; miteaung na a, mymy i satang ly mymy thui sy bei,” nanai pathang. 22Mymy i amhm ampo my ly Judachi ai jei nai deaungkho y huna nai leu thui nai teu: Judachi my ly ti y rai khala y py, ami py mymy ly Krista ne, nanai asa hai nai khumi ai ly achura yhm i dengdairei patheu ai, nanai arum u yb bo. 23Huna nai deaungkho y mymy i amhm ampo my ly, “Miteaung na a mymy teng y deng u,” napi.

24Hunaibaly mei kamju ai pa-nyh heang bi i mymy teng y, “Tameuh ai palo, huni khumi ly kamngo ne, nanai kaichi pany,” napi. 25Naibaly mymy ly, “Ni ly khumi kamngo ne mo ne y mo, nanai pany y; lamrei kapany, jangni ly mei kapjau i vai ly kaniu thai,” nanai pathang. 26Nichi ly mymy teng y, “Nang i tlang tleaung y mymy ly ati sa mo? Nang i mei mana sa iy angvang hai mo?” napi. 27Mymy ly nichi teng y, “Vaichi kang thui pi chy bo, nangchi tangai ngai u y be! Ati mana nai y tangai ai ngai u bi lawh mo? Nangchi py mymy teng y abang ai ngai u teang a?” nanai pathang. 28Naibaly mymychi ly ni ai jo i, “Nang ly mymy teng y abang nai ne, kaichi ly Mosi teng y abangnaichi ne na a. 29Tameuh my Mosi ai arum hai nanai kaichi pany, na i py hini khumi ly ma i nai theu nai mo, nanai kaichi pany y,” napi. 30Naibaly huni khumi ly nichi teng y, “Huni na a, lyh ai awm nai ly, ma i nai theu nai mo, nanai nangchi pany y naimy, kai i mei angvang hai lawh nai ly. 31Tameuh my khumi kamngo i leu tangai pi y, nanai achi pany; na i py ami py Tameuh ai chiu iy mymy i kangai sa baly, Tameuh ly mymy ai tangai pi reng. 32Khaileaung pri awm khyp khala i dengdairei ami py mei kamju naimy tapen nai i mei angvang hai, nanai tlen py thai vai y. 33Hini khumi ly Tameuh teng i theu nai ny y baly ati sai py sa pajau ai ny y,” nanai pathang. 34Nichi my ly mymy teng y, “Nang ly kamngo naimy tapen nai na a, kaichi ai patiu lawh a?” nanai pathang i, ni ai ly atho y my patheu bo.

Phailo y mei paju nai

35Nichi ly mymy ai patheu, nanai Isu my thai iy mymy ai hau i, “Nang ly Tameuh i Chapo ai ym a?” napi. 36Naibaly mymy ly, “Areng, ni ly ami mo, kai ym thai ai nai ly,” nanai pathang. 37Isu my ly ni teng y, “Nang ly mymy ai niu veng bo, vai nang ai arum hai dudu nai ly ne na a,” napi. 38Naibaly mymy ly, “Areng, kai ym mang,” napi i chiu bo. 39Isu my ly, “Mei kamjuchi mei angvang thai ai nai hawi mei kangvangchi ly mei paju thai ai nai py kai ly hini khaileaung pri y tara chih ai nai kang jeu nai ne,” napi. 40Mymy teng y awm nai Pharisaichi my ly huni atitichi thai i ni teng y, “Kaichi py mei paju teang a?” napi. 41Isu my nichi teng y, “Nangchi i mei paju baly kamngo by y ai bo, na i py vai ly, ‘Kaichi ly niu thai,’ na u nai deaungkho y kamngo awm jo rai,” napi.

Currently Selected:

JOHAN 9: KCL02

Highlight

Copy