AMTAW 23

1Naibaly Pawla ly tara chih nai keungchi ai khen ryry i, “Amjo amnaichi awi, vaini khrairei Tameuh i mei ka-niu y kai i pany nai ngierei sa naira y paleung kahawi mang y kaawm jo rai,” napi. 2Naibaly pathyp pi nai keung kalen keh Anania my ly ni i ahawi y angdo naichi teng y ly ni i labeaung y tabeang pi ai nai leu pei. 3Naibaly Pawla my ly mymy teng y, “Nang an kangleung paju nai ampang awi, nangmy ai naini Tameuh my ang tabeang ai mang; nang ly Reita kamta kai ai chih ai nai ateh nai iy, Reita ny y nai kai ai tabeang ai nai leu pei lawh a?” napi.#Mt 23.27–28 4Naibaly ahawi y angdo naichi my, “Nang ly Tameuh i pathyp pi nai keung kalen keh ai jo lawh a?” napi. 5Naibaly Pawla my, “Amjo amnauchi awi, mymy ly pathyp pi nai keung kalen keh ne, nanai kai pany y; ‘nang i chengchi ai krykeung i tlang tleaung y leu hawi y nai thui moh,’ nanai py tajiu nai awm,” napi.#Theu 22.28

6Naibaly phyrei ly Saddukaichi, phyrei ly Pharisaichi ne, nanai Pawla niu iy, tara chih keungchi theung y aeu i, “Amjo amnauchi awi, kai ly Pharisai ne, Pharisai i chapo py ne ryp; kadeichi i vui athang khai naira hawi angthau bi naira py kai ai ang deng nai he,” napi.#Ataw 26.5; Phil 3.5 7Naibaly huni leu thui pajau baly Pharisaichi hawi Saddukaichi ly aei u i, tara chih nai keungchi ly amji u bo. 8Ati mana nai mo nabaly Saddukaichi ly kadeichi angthau bi ai nai ha py by y, kani pri i amtaw thau nai py, phailo py by y leang, napi; na i py Pharisaichi ly huni nyhrei ly awm, nanai thui pi.#Mt 22.23; Mk 12.18; Lk 20.27 9Hunaibaly khrikhri pa-rei khrukhra bo; Pharisaichi mang i Reita patiu nai keung phyreichi ly angdo iy khri pa-rei aei i, “Hini khumi ly tamang naira kaichi ati sai py pany y leang; phailo mo kani pri i amtaw thau naimo mymy teng y atiti thui pi lawh baly mana sa ai mo?” napi. 10Naibaly aei nai ty ra ty ra nai deaungkho y tavaimi lu areng keh my ly nichi my Pawla ai lawm meimeaung ai nai jei hai i, tavaimichi teng y, “Chei u ly, nichi theung i dengdairei ni ai athorei my la vui iy, apai theung i yhm y pahawi u kalau,” nanai leu pei. 11Naibaly huni vum y Areng ly Pawla i ahawi y angdo iy, “Ham parai naimy awm ly, Jerusalem y nang ly kai i leu pany hai nai kamta ly, Rom avang y py nang pany hai ai nai tla,” napi.

Pawla ai kangviu y padei ai nai tau nai

12Naibaly kani si iy Judachi ly vanrei asa krup i, Pawla ai padei y ryrei ly ati sai py cha nei ai ny y, nanai vaineng abeu bo. 13Huni leu thui nai keungchi ly vui palyhrei chang y. 14Naibaly nichi ly pathyp pi nai keung kalenchi hawi miteaung kehchi teng y chei iy, “Kaichi Pawla ai padei y ryrei ly ati sai py pateng y ai nai vaineng abeu khei bo. 15Hunai deaungkho y nangchi hawi tara chih nai keungchi py leu hawi nai tleaung y hawi ra chih ai tau nai kamta, ni ai nngchi teng y pahawi kathiu ai nai tavaimi lu areng keh teng y thui u; naibaly mymy ly nangchi i ahawi y tym y rai kha y my kaichi ly mymy ai padei ai nai ajeng yb ai mang,” napi.

16Na i py Pawla i meaungcha ly nichi my o nai satang ly pany i, apai theung i yhm y kun iy Pawla ai thui pi. 17Naibaly Pawla ly tavaimi chungvairei lu leaungrei ai palau i, “Hini thawndeang ai ly tavaimi lu areng keh teng y pahawi ba; ni teng y ati leu sai mo thui ai nai awm,” napi. 18Hunaibaly tavaimi lu areng keh teng y ni ai pahawi i, “Pawla, theaung tla nai khumi my kai ai palau i, hini thawndeang ai nang teng y hawi ai nai ang hnei, nang teng y ati leu sai mo thui ai nai awm ngaw khyh,” napi.

19Naibaly tavaimi lu areng keh my ly ni i kiu y amkhaw nai pahawi takhra iy deng paviu i, “Kai teng y thui ai nai ly ati mo?” napi. 20Naibaly ni my ly, “Pawla ai ly leu hawi nai tleaung y hawi ra chih ai tau nai kamta, khawndam tara chih nai keungchi teng y pahawi kathiu ai nai hnei ai nai Judachi my avo, napi bawibawi. 21Na i py mymychi i leu ly tangai moh ba; nichi theung i leaung vui palyhrei chang y naichi ly o yb bo, nichi ly ni ai padei y ryrei ly ati sai py cho nei y ai nai vaineng abeu bo; vai nang i leu ajeng nai awm u ryhryh jo,” napi. 22Naibaly tavaimi lu areng keh my thawndeang ai ly tako hai i, “Hini leu ly kai ai thui pi bo, nanai ami teng y py thui moh,” napi kheng.

Pawla ai aripeang Felika teng y tha nai

23Naibaly mymy ly tavaimi chungvairei lu leaung nyhrei ai palau i, “Vum y i syh nai khala y Kaisari avang y tym pa-rei chei ai nai tavaimi chungvai nyhrei hawi, keaungngo tleaung y atang nai khumi vui saryhrei hawi, tivi syn nai khumi chungvai nyhreichi ai angvei hai rym,” napi; 24naibaly aripeang Felika teng y chymme naimy tym hai thai ai nai Pawla atang ai nai vui mawichi py khai u rym ai nai leu pei. 25Naibaly mymy ly hinai kamta cha tajiu i,

26“Klawdia Lusia ly aripeng kahawi keh nai Felika teng y kawn ba. 27Hini khumi ai ly Judachi my patiu i padei ai nai thym khala y, mymychi teng y kai tavaimichi ai hawi iychei i, Rom khumi ne, nanai kai pany i kapalawi bo. 28Naibaly nichi i seu nai leu kapany ai nai ngai i, nichi i tara chih nai keungchi teng y kapahawi kathiu; 29hunaibaly mymychi i Reitara y ati mo seu, nanai kai pany, na i py nichi i seu nai ly dei ai nai hawi kawm ai ataing nai kai ati sai py pany y leang. 30Naibaly Judachi my ni ai amo jojo nanai khumichi my ang thui pi nai kapany baly, mymy ai ly nang teng y kang pato praw nai bo, mymy ai seu nai keungchi py mymy i tlang tleaung y leu awm nai ngierei ly nang i mo y thui ai nai leu kapei. Noso kahawi awm ba,” napi.

31Hunaibaly tavaimichi ly mymy i leu pei nai kamta ly Pawla ai hawi iy, vum aneng y Antipatri avang y tym hai bo. 32Naibaly khawn mang y mymy hawi chei veangveang ai nai keaungngo tleaung y atang naichi ai ly khai su i, nichi ly apai theung i yhm y vawi ali teang. 33Naibaly nichi ly Kaisari avang y tym iy aripeng teng y cha pei i, Pawla ai py mymy i mo y angdo hai. 34Naibaly aripeng my phain pajau iy, ni i awm nai pri deng. 35Naibaly Kiliki pri i khumi ne, nanai pany baly, “Nang ai ang seu nai keungchi tym iy nang i satang kang dawn pi ai,” napi. Naibaly Heroda i yhm y typ ai nai leu pei.

Currently Selected:

AMTAW 23: KCL02

Highlight

Copy