AMTAW 22

1“Amjo amnauchi hawi ngaaichi awi, vai nangchi teng y kai i eaung nai leu kang thui pi ai i tangai u ba,” napi. 2Naibaly mymy ly Hebrai leu y mymychi teng y leu thui, nanai pany baly nichi leu anawn tleaung y anawn ra: 3naibaly mymy ly, “Kai ly Juda khumi ne, Kilki pri i Tarsa avang y tapen nai, na i py hini avang achi i amsi sangumchi i Reita kamta kypkyp Kamaliela i kheu keung y amtiu naira y tleaungri ka-veang nai ne, vaini ly nangmychi bawibawi ka-tawm khyp naimy Tameuh i vui y kadawn pathyp nai ne:#Ataw 5.34–39 4naibaly hini Lam i khumichi ai padei ai nai pa-rei kai ana iy, neampacho neampachychi ai kawm nai, theaung y kakhai reng.#Ataw 8.3, 26.9–11 5Pathyp pi nai keung kalen keh hawi miteaung kehchi bawibawi my py huni leu ly ang pany hai pajau mang: mymychi teng i dengdairei py amjo amnauchi ai pei ai nai vui cha kanga iy, Damaska avang y awm nai ngiereichi ai kapajeng hai ai nai kawm i, Jerusalem y pahawi ai nai kachei nai ly.

Pawla mymy i paleung amtlau nai sai thui pi nai

(Ataw 9.1–19, 26.12–18)

6Naibaly hina nai awm, kai chei i kanithun kha y Damaska avang ahawi y tym iy, tlenrei khyh my kani mang i dengdairei kangvang ka-teng ny y nai kai i ahawi y angvang phang na; 7naibaly kai ly khaileaung y atlym i kai teng y, ‘Sawla, Sawla, nang ly ati mana nai kai ai ana ryry lawh?’ nanai raawi kathai. 8Naibaly kaimy, ‘Areng, nang ly ami mo?’ nanai pathang. Naibaly ni my ly kai teng y, ‘Kai ly Nazaret Isu nang i ana nai ne,’ napi. 9Naibaly kai i ahawichi ly kangvang mang ly niu i py, kai ai ang thui pi nai raawi ly thai y leang. 10Naibaly kaimy, ‘Areng, kai mana sa ai mo?’ kanapi. Naibaly Areng my ly kai teng y, ‘Angthau ly, Damaska avang y kun:atiti bawibawi nang i sa ai nai khai rym nai ngierei ang thui pi ai mang,’ napi. 11Naibaly huni kangvang nang parai nai sai deaungkho y kai ly kani kangvang niu thai y bo, kai i ahawichi my kiu y ang pahawi i Damaska avang y kakun bo.

12“Naibaly khumi leaungrei, Anania, Reita y Tameuh ai tahm khai nai hawi, hu y awm nai Judachi bawibawi teng y amyn kahawi amthang nai ly kai teng y ang jeu iy, kai i ahawi y angdo i, kai teng y, 13‘Be Sawla, mei angvang jau ba,’ ang napi. Naibaly hunai thym khyp khala y ly mymy ai kaniu bo. 14Naibaly ni ly, ‘Achi i amsi sangumchi i Tameuh my mymy i kangai pany ai nai hawi, Khumi Kahawi ai niu ai nai hawi, mymy i labeaung i raawi thai ai nai py nang ai ang khai rym nai bo. 15Nang i niu nai hawi thai naira y py mymy i vui khumi bawibawichi teng y nang ly pany hai nai keung lawn ai. 16Naibaly ati mana nai nang ly vai ajeng jo rai mo? Angthau ly, mymy i amyn palau nai tarawi y baptisma nga iy nang i kamngochi chai hai bei,’ ang napi.

17“Naibaly hina nai awm, kai ly Jerusalem y vawi teang nai bo y achura yhm kalen pui y chiu sa nai thym khala y atiti tahm bo; 18naibaly, ‘Awn ly, Jerusalem i dengdairei theu jau, kai i satang nang thui ai nai ly nichi tangai ai ny y leang he, ang napi thym nai kaniu. 19Naibaly kaimy, ‘Areng, achura yhm tleirei y nang ai ym nai ngiereichi ai theaung y kakhai iy kapakhau reng nai ly nichi pany; 20naibaly nang i leu pany hai nai keung Stephana i thi patheu nai khala y py kai py ahawi y kangdo i avo, napi iy, padei nai keungchi i kanihchi py kaimy katyp,’ kanapi.#Ataw 7.58 21Naibaly ni my, ‘Chei ly, hi i dengdairei palo parai naira Cheng Takhrachi teng y kang pato ai,’ ang napi,” napi.

22Naibaly nichi ly huni leu tym pa-rei tangai; naibaly athorei my, “Hina nai khumi ai ly hini khaileaung pri i dengdairei lo veng; heng ai nai py avo y leang,” napi bo. 23Naibaly aeu nai mychi i kanih aphi pawn i spryh hawi kani mang y pachaw nai thym khala y, 24tavaimi lu areng keh ly Pawla ai apai theung i yhm y pakun ai nai thui pi; mymy i tlang tleaung y huna tanrei aeu nai sai pany ai nai chip nai tarawi y deng ai nai leu pei. 25Naibaly nichi ly mymy ai mawipeih vui y kawm rang pajau iy, Pawla ly mymy ahawi i angdo nai tavaimi chungvairei lu teng y ly, “Rom khumi nanai ai ly pasum nai bo y ny y naimy chip ngau a?” napi. 26Naibaly tavaimi chungvairei lu my ly huna nai thai baly tavaimi lu areng keh teng y chei i, “Nang ly ati sa ai nai tau mo? Hini khumi ly Rom khumi na a,” nanai thui pi. 27Naibaly tavaimi lu areng keh ly chei i mymy teng y, “Kai ai thui pi kyh. Nang ly Rom khumi a?” napi. Naibaly mymy ly, “Ne na a,” napi. 28Naibaly tavaimi lu areng keh my ly “Kai ly huni avang i khumi lawn ai nai tangka neangneang kakhei rai chy bo,” nanai pathang. Naibaly Pawla my ly, “Kai ly Rom khumi ne angchi yb nai tapen lyhlyh nai bo,” napi. 29Hunaibaly deng ai tau naichi ly mymy ai khai su ryp; tavaimi lu areng keh my py ni ly Rom khumi ne, nanai pany i, ni ai kawm nai deaungkho y jei bo.

Pawla Juda tara chih nai kamkawm mo y tym nai

30Naibaly khawn mang y Judachi my ati mana nai y Pawla ai seu mo, nanai hawihai pany ai ngai nai, mymy ly ni ai su; naibaly pathyp pi nai keung kalenchi hawi tara chih nai keung bawibawichi achu ai nai leu pei i, Pawla ai pahawi kathiu iy mymychi i mo y angdo hai bo.

Currently Selected:

AMTAW 22: KCL02

Highlight

Copy