AMTAW 19

Ephesi y Pawla tym nai

1Naibaly Apolo ly Korinth avang y awm nai sala y Pawla ly tleng mang i ka-peang amki be pajau nai Ephesi avang y tym iy, 2abangnai amichi ai mo niu; naibaly mymy ly nichi teng y, “Nangchi ym angchei khala y Phailo kachai nga u a?” napi. Naibaly nichi my ly mymy teng y, “Ngo y leang, Phailo kachai awm, nanai py pany y,” napi.

3Naibaly mymy ly nichi teng y, “Tumbaly ati baptisma nga u mo? napi.

4Nichi my ly “Johan i baptisma y,” napi. Naibaly Pawla my ly, “Johan ly khumichi teng y, ‘Kai i nithun jeu ai nai keung Isu ai ly nangchi ym ai nai tla,” nanai uikhei nai baptisma y baptis sa na a,” napi.#Mt 3.11; Mk 1.4, 7–8; Lk 3.4, 16; Jh 1.26–27

5Naibaly huna nai leu thai bo nabaly Areng Isu i amyn y baptisma nga ryp bo. 6Naibaly Pawla my mymychi i tlang tleaung y kiu tamam i, Phailo Kachai ly mymychi i tlang tleaung y tym ryp bo; hunaibaly nichi ly leu athai y naimy leu thui iy, Tameh i leu py thui bo.

7Nichi bawibawi ly neampacho leaung holai nyhrei mo awm.

8Naibaly ni ly achura yhm y kun reng i, Tameuh i peang nai satang ka-thui thui pi nai hawi, parawi tanga nai hawi lo thom ryrei vam parai pa-rei leu thui. 9Na i py phyreichi ly paleung apatang i ym ngai y nai, khumi mipuichi i mo y huni Lam thui tamawn khala ly mymy ly nichi ai tako pi vui, abangnaichi ai py khai takhra, kani tleirei Turana i cheaung y khumichi ai ka-thui thui pi. 10Hunai kamta ryry naimy saneng nyhrei sa; hunaibaly Asia pri i awm nai bawibawi Judachi hawi krikchi py Areng i leu thai u bo.

Sakiva i chapochi

11Naibaly Tameuh my Pawla i kiu y atiti rengrang ka-teng ny y nai sa hai na; 12hunaibaly mymy i tlang i atamui nai kanih mo baichu mo no naichi teng y syn i, nichi i no naira ly lawi bo, mymychi taku theung i dengdairei vawinamchi py theu.

13Na i py atam kakawp ajau ryry nai Juda amichi mo ly, Pawla i thui pi nai Isu i amyn y kang ram he, nanai vawinam my nam naichi i tlang tleaung y Areng Isu i amyn palau u lawh veng. 14Naibaly Juda khumi, pathyp pi nai keung kalen leaungrei, Skiva napi nai ly chapo leaung saryhrei awm; nichi py huna nai sa reng. 15Naibaly vawinam ly nini teng y, “Isu ai kapany, Pawla ai py kapany, na i py nangni ly ami mo?” nanai pathang. 16Naibaly vawinam my nam nai khumi ly nini ai taba i pajau lawh; hunaibaly nini ly huni yhm i dengdairei tlang ka-keu hawi tamo nga naimy angpreng hawi bo. 17Hunaibaly Ephesi avang i awm naichi bawibawi, Judachi hawi Krikchi teng y py huni satang ly amthang bo; hunaibaly nichi bawibawi jei i, Areng Isu i amyn ly tahm pasang bo.

18Naibaly ym naichi theung i neangneangchi ly jeu iy, mymychi i atiti sa naichi ly ahui i atapheaung bo. 19Nichi theung i atam teaung nai nawi rawm naichi py mymychi i cha-iu syn achu iy, khumi bawibawi i mei ka-niu y veang u bo, naibaly hunichi i vang ly dawn pasym i, tangka cho meaungkateaung pangrei awm nai pany. 20Huna tanrei Areng i leu ly ahei iy pajau bo.

Ephesi avang khrukhrala nai

21Naibaly huna nai pajau iy Pawla ly Makedonia pri hawi Akaia pri y amki i Jerusalem y chei ai nai paleung awm i, “Hu y chei pajau nai bo y Rom avang py kakhen ai nai tla,” napi. 22Hunaibaly mymy ai sabawm nai keungchi theung i leaung nyhrei, Timothei nini Erasta ai ly Makedonia pri y pato veng i mymy ly Asia pri y awm jo rai.

23Naibaly huna nai thym khala y ly Lam molam y khrukhra ala nai khrukhra y alam na bo. 24Ami mo khumi leaungrei. Demetria, tangka thip nai, tangka hawi Diana i myn sa nai keung ly, sa kawp naichi i vui kamran neangneang nga hai; huni khumi my ly nichi ai hawi, 25mychi i kalop kamta sa teang naichi ai palau achu iy, mymychi teng y, “Arengchi awi, hini kalop ly kaichi i nang naira ne, nanai nangmychi my pany. 26Naibaly hini Ephesi avang y khyh py ny y naimy Asia pri verei vi y py hini Pawla ly, ‘Kiu y sa nai tameuhchi ly tameuh ny y leang,’ nanai khumi neangneangchi ai parawi iy, hi hai bo, nanai nangmychi kypkyp my niu py niu, thai py thai bo; 27hunaibaly kaichi i kalop phra ai, nanai jei nai khyh py ny y leang; tameuh nu len parai nai Diana i achura yhm py tahm khai y ai nai hawi, Asia pri i khumi bawibawi hawi khaileaung pri y awm naichi my chiu reng nai i nang parai nai sai ly tahm anem ai nai py ka-jei awm teang,” napi.

28Naibaly huni leu thai u baly khrikhri pa-rei kado theu u i, “Ephesi avang khumichi i Diana ly len parai na a,” nanai aeu. 29Hunaibaly nichi avang theaungrei khrukhrala be i, Kaia hawi Aristarka, Makedonia pri i khumi, Pawla hawi vanrei khuleaung chei ahawi nai, nini ai ly patiu iy, tlenrei khyh my vanrei khen kahawi ra y angpreng hai mar. 30Naibaly Pawla ly khumi mipuichi theung y kun ai nai tau iy abangnaichi my ly pei y. 31Naibaly Asia pri i miteaung kehchi theung y phyrei amichi mo ly Pawla i ahawichi ne, nichi py mymy teng y khumi pato i, khen kahawira y kun ta-li y ai nai khri pa-rei takeng.

32Hunaibaly phyreichi ly leu harei y, phyreichi ly leu takhra y aeu i, awm achu naichi ly khri pa-rei khrukhra na ly; khumi nawi keh naichi ly achu nai sai py pany y. 33Naibaly khumi mipuichi theung i Aleksandria ai la i, Judachi ly ni ai nawi bawibawi. Naibaly Aleksandria ly kiu y paka iy, khumi bawibawichi teng y eaung nai leu thui ai nai tau. 34Na i py ni ly Juda khumi ne, nanai niu baly, nari nyhrei tahm mo raawi vanrei my, “Ephesi avangchi i Diana ly len parai nai na a,” na ryry naimy aeu. 35Naibaly avang i cha tajiu nai keung ly khumi mipuichi ai awih pajau iy, “Ephesi avang i khumichi awi, len parai nai Diana i achura yhm hawi, kani mang i dengairei myn tla nai py Ephesi avang i khumichi ly typ nai keung ne, nanai pany y nai khumi ami awm mo? 36Hunaibaly hini satang ly aei pajau y nai deaungkho y nangchi awm u pypy ai nai tla, leu dawn y nai my ly nangchi ati sai py sa u ai nai tlo y leang. 37Hini khumi nini hi y nangchi my hawi nai ly achura yhm i atitichi paviu nai khumi ny y leang, achi i tameuh nu ai thui tamawn nai py ny y leang. 38Hunaibaly Demetria hawi mymy ahawi i sa kawp naichi py ami teng y atiti seu ai nai awm baly, tara chih nai yhm py ang paeaung pi chy bo; samrang i jeng y awm nai khumichi py awm, aseu u sy. 39Nangchi ly atiti takhra leu aly awm ryry nai baly, reita kamta achu naira y aly ai. 40Vaini ly tukulula nai deaungkho y seu ai nai ka-jei awm lawh bo he, pakeung by y pui nai deaungkho y huna nai awm lawh veng; hini achu nai py thui thai ai nai ny y leang he,” napi. 41Naibaly hunai kamta leu thui pajau baly achu naichi ai amprei hai bo.

Currently Selected:

AMTAW 19: KCL02

Highlight

Copy