AMTAW 18

Korinth y kalop sa nai

1Hunai bo y ly mymy ly Atheni avang i dengdairei theu iy Korinth avang y tym bo. 2Naibaly amyn Akuila, Juda leaungrei ai niu; huni khumi ly Ponto pri y tapen nai i, Klawdia my Juda bawibawichi Rom avang i dengdairei theu ai nai leu pei nai deaungkho y, mymy i aju Priskila hawi Itali pri i dengdairei tym angvawi nai ne; naibaly Pawla ly nini teng y tym bo. 3Naibaly mymy i kalop sa nai sai vanrei ne nai deaungkho y myni teng y anga ryp i kalop sa hawi teang; myni i kalop ly kanih yhm sa ai nai kanih sa nai ne. 4Naibaly mymy ly Anawn Kani tleirei achura yhm y leu hawihai ka-thui thui pi i, Judachi hawi Krikchi ai py parawi tanga bo.

5Na i py Sila nini Timothei ly Makedonia pri i dengdairei tym kathiu kha ly Pawla ly paleung am-yh pajau y nai awm i, Isu ly Krista ne, nanai Judachi teng y thui pi pachai. 6Na i py nichi my khri pa-rei paka i thui tamawn nai kha y Pawla ly mymy i kanih takhym i mymychi teng y, “Nangchi i thi ly nangmychi i lu y tym sy, kai ly chai bo; kai ly vai i dengdairei Cheng Takhrachi teng y kachei ai,” napi. 7Naibaly hu i nai ly chei iy khumi leaungrei, amyn Tita Justa napi nai i yhm y kun, mymy ly Tameuh ai chiu reng, mymy i yhm py achura yhm hawi kamtawm ryp. 8Naibaly achura yhm krykeung Krispa hawi mymy i dengtheaungchi bawibawi py Areng ai ym; Korinth avang i khumi neangneangchi py thai i ym iy, baptisma nga u bo. 9Naibaly vum y Areng my Pawla teng y ly amang kamta amang i, “Jei moh, anawn y naimy leu thui jojo; 10kai ly nang teng y kang awm chy bo, nang ai no hai ai nai nang i tlang tleaung y ami i kiu py tym y leang mang, ati mana nai mo nabaly hini avang y ly kai i khumi neangneang awm,” napi. 11Naibaly mymy ly mymychi theung y Tameuh i leu patiu ai nai hu y sanengrei bo y lo tariurei awm bo. 12Na i py kaliona, Akaia pri y samrang i jeng y awm nai thym khala y Judachi my Pawla ai ly ni akrai krup i, tara chih nai atehra mo y pahawi iy, 13“Hini khumi ly Reita kamta ny y naimy Tameuh ai chiu ai nai khumichi ai parawi lawh ly,” napi. 14Naibaly Pawla my pathang ai nai khala y Kaliona my Judachi teng y ly, “Judachi awi, hini atiti teng y nai leu mo, atiti hawi y parai sa nai leu mo ne i khyly kang dawn pi takengkei ai; 15na i py leuchi hawi amynchi, nangmychi i Reita i leura y teu baly, nangmychi my chih u ryp; kai ly hunai ka-tawm leu ly chih ai nai ngai y leang,” napi. 16Naibaly mymy ly nichi ai tara chih nai atehra i dengdairei paryh pawn. 17Naibaly nichi bawibawi ly achura yhm krykeung Sosthena ai ly patiu iy, tara chih nai atehra mo y ni ai pakhau; na i py Kaliona my ly mymychi i atiti sa naichi ly ati sai py dawn pi y.

Pawla ly Antiokei y tym ali teang nai

18Naibaly Pawla ly huni bo y kani kra parai awm rai; hunai bo y ly amjo amnauchi hawi leu kahawi y amprei iy, hu i dengairei Suria pri y paleaung mang chei, Priskila nini Akuila py mymy teng y chei teang, mymy ly leu adeu nai awm nai deaungkho y Kenkriai avang y sam vau veng.#Kati 6.18 19Naibaly nichi ly Ephesi avang y tym i, nini ai ly hu y daw iy, mymy ly achura yhm y kun i Judachi teng y ka-thui thui pi. 20Naibaly mymy ai ly kani kra kyh awm ai nai takeng u nai khala y mymy ly avo y napi i, 21“Tameuh my pei baly nangchi teng y kang jeu bi ai mang,” napi iy leu kahawi y amprei i, Ephesi avang i dengdairei paleaung mang chei bo. 22Naibaly Kaisari avang y angkhyh iy Jerusalem y chei kalau i palau takhra kamkawmchi ai ly kawn ba, napi; naibaly huni pajau iy Antiokei avang y chei kathiu bo. 23Naibaly hu y kra kyh awm nai bo y ly khuleaung chei bi i, Kalatia pri hawi Phrukia pri ly amki be iy, abangnaichi bawibawi ai khaw hai bo.

Apolo ly Ephesi hawi Korinth y leu thui nai

24Naibaly Juda leaungrei amyn Apolo napi nai, Aleksandria avang y tapen nai, leu thui kawp parai nai khumi ly Ephesi avang y tym, mymy ly Tameuh i leu py khrikhri pa-rei pany. 25Huni khumi ly Areng i reita amtiu bo; naibaly mymy ly khri pa-rei paleung y dawn patyp nai deaungkho y Isu i satang thui pi i patiu chumchi, na i py mymy ly Johan i baptisma leu harei pany khyh; 26naibaly mymy ly achura yhm y vam parai pa-rei leu thui amteaung bo. Hunaibaly Priskila nini Akuila ly mymy i leu thui nai ly thai i, myni i yhm y pahawi iy mymy teng y ly Tameuh i reita chai tleaung y chai ra nai thui pi pachai bo. 27Naibaly mymy ly Akaia pri y chei ai nai tau i, amjo amnauchi my ni ai pachei iy mymy ai kawn ai nai abangnaichi teng y cha py tajiu pi; naibaly mymy ly tym iy pahenra deaungkho y ym naichi ai ly khrikhri pa-rei sabawm; 28mymy ly khumi bawibawichi i ka-thai y Judachi ai tlaura by y pa-rei khym, Tameuh i cha-iu leu teaung iy Isu ly Krista ne, nanai thui pi jojo.

Currently Selected:

AMTAW 18: KCL02

Highlight

Copy