Egzòd 39

Rad seremoni prèt yo

(Egzòd 28)

1Yo pran twal siperyè koulè ble, vyolèt #Egz 28.2-5; 31.10; 35.19,23,25 ak wouj, yo fè bèl rad seremoni pou prèt yo mete sou yo lè y'ap fè sèvis nan kote ki apa pou Bondye a. Yo fè rad tou pou Arawon mete sou li sèlman lè l'ap fè sèvis Bondye, dapre lòd Senyè a te bay Moyiz. 2Yo #Egz 28.6-12 fè jile a ak lò, ak twal siperyè koulè ble, vyolèt ak wouj, ak twal fen blan tise byen sere. 3Yo pran fèy lò, yo bat yo, yo koupe yo an filang, yo travay yo nan twal ble, vyolèt ak wouj la, ansanm ak nan twal fen blan an. Yo bwode yo byen bèl ak anpil ladrès. 4Yo fè zepòlèt pou jile a. Yo tache yo yonn chak bò jile a pou kenbe moso devan an ak moso dèyè a nan plas yo. 5Bèl sentiwon byen bwode ki mache ak jile a te fè yon sèl pyès ak li, ak menm kalite bodri a. Yo te fè l an lò avèk twal siperyè koulè ble, vyolèt ak wouj, ansanm ak twal fen blan tise byen sere, dapre lòd Senyè a te bay Moyiz.

6Apre sa, yo pran pyè oniks yo, yo moute yo chak sou yon gwo moso lò, yo grave non douz branch fanmi Izrayèl yo tankou lè y'ap grave non moun sou sò. 7Yo moute pyè yo sou de zepòlèt jile a, pou yo toujou chonje branch fanmi pèp Izrayèl yo, jan Senyè a te bay Moyiz lòd la.

8Yo #Egz 28.15-28 fè plastwon an, yo bwode l byen bèl ak anpil ladrès tankou jile a. Yo fè l an lò ak twal siperyè koulè ble, vyolèt ak wouj ansanm ak twal fen blan tise byen sere. 9Yo fè l kare kare, epi yo double l. Li te mezire nèf pous kare kare, li te double. 10Yo moute kat ranje pyè sou li. Nan premye ranje a, yo mete yon pyè woubi, yon pyè topaz ak yon pyè emwod. 11Nan dezyèm ranje a, yo mete yon pyè malachit, yon pyè safi ak yon pyè dyaman. 12Nan twazyèm ranje a, yo mete yon pyè opal, yon pyè agat ak yon pyè ametis. 13Nan katriyèm ranje a, yo mete yon pyè krizolit, yon pyè oniks ak yon pyè jasp. Yo te moute chak pyè sou yon moso lò. 14Te gen antou douz pyè ak non douz branch fanmi pèp Izrayèl yo grave yonn sou chak pyè. Yo te grave yon non sou chak pyè tankou lè òfèv ap grave sò sou bag.

15Yo fè ti chenn pou plastwon an. Ti chenn yo te trese tankou ti kòdon. Yo te fèt ak pi bon kalite lò ki genyen. 16Apre sa, yo fè de moso lò pou moute pyè yo ak de bag an lò. Yo moute de bag yo nan de bout anwo plastwon an. 17Yo mare de ti kòdon an lò yo nan de bag yo, nan bout anwo plastwon an. 18Yo pran de lòt bout chenn yo, yo fè yo pase sou devan jile a. Yo tache yo sou de moso lò yo ki sou zepòlèt jile a. 19Yo fè de lòt bag an lò, yo tache yo nan bout anba plastwon an sou lanvè, nan bòdi a toupre jile a. 20Yo fè de lòt bag an lò ankò, yo tache yo anba de zepòlèt jile a, sou devan, toupre kouti a anwo sentiwon jile a. 21Yo mare de bag plastwon an ak de bag jile a ansanm ak yon kòdon ble pou plastwon an bat sou sentiwon jile a. Konsa, plastwon an p'ap ka sòti detache sou jile a. Yo fè tou sa dapre lòd Senyè a te bay Moyiz.

22Apre #Egz 28.31-34 sa, yo pran twal ble, yo fè rad ki pou ale anba jile a. 23Nan mitan rad la, yo fè yon twou pou pase nan tèt prèt la, epi yo mete yon doubli nan ankoli a tankou yo fè l pou varèz an po bèt yo, pou li pa chire.

24Yo pran twal koulè ble, vyolèt ak wouj ansanm ak twal fen blan tise byen sere, yo fè bodri an fòm grenad sou tout woulèt anba rad la. 25Yo fè ti klòch an lò, yo mete yo nan espas ki separe grenad yo sou tout woulèt rad la. Ti klòch yo ak grenad yo te fè wonn rad la. 26Yon ti klòch, yon grenad, yon ti klòch, yon grenad sou tout woulèt rad la pa anba, jouk yo fè tout tou rad pou Arawon mete sou li lè l'ap fè sèvis la, jan Senyè a te bay Moyiz lòd fè l la.

27Yo #Egz 28.39,40,42 pran twal fen blan, yo fè chemiz pou Arawon ak pou pitit gason l yo. 28Yo pran twal fen blan, yo fè mouchwa tèt la ak ganiti pou bonèt yo pou moun rekonèt grad yo. Epi yo pran twal fen blan tise byen sere, yo fè kalson yo. 29Yo pran twal fen blan tise byen sere ak bon twal siperyè koulè ble, vyolèt ak wouj, yo fè sentiwon bwode byen bèl la, jan Senyè a te bay Moyiz lòd fè l la.

30Yo #Egz 28.36,37 fè ti plak lò ki pou ale sou mouchwa tèt la ak pi bon kalite lò ki genyen. Yo grave pawòl sa a sou li: Apa pou Senyè a, tankou lè y'ap grave sò sou bag. 31Yo mare l ak yon ti kòdon ble anwo nèt sou devan mouchwa tèt la, dapre lòd Senyè a te bay Moyiz.

32Se #Egz 25.40 konsa yo te fin fè tout travay pou Tant Randevou a, kote pou Bondye rete a. Moun pèp Izrayèl yo te fè tout bagay dapre lòd Senyè a te di Moyiz la. Wi, se konsa yo te fè l.

33Yo pran tout bagay, yo pote yo bay Moyiz, depi tant lan, kay kote pou Bondye rete a, ak tout bagay ki mache avè li yo, kwòk li yo, ankadreman li yo, treng li yo, poto li yo ak sipò yo, 34twati ki fèt ak po belye tenn tou wouj yo, twati yo fè ak po bazann ak rido pou kache Bwat Kontra a, 35bwat ki gen de moso wòch kontra yo, manch li yo ak kouvèti a, 36tab la ak tou sa ki pou sèvi ak tab la, pen yo ofri bay Bondye a, 37gwo lanp sèt branch fèt an lò a, ti lanp ki pou moute an liny dwat sou li yo, avèk tou sa ki pou sèvi ak lanp sèt branch lan ansanm ak lwil pou lanp yo, 38lotèl fèt an lò a, lwil pou mete moun osinon bagay apa pou Bondye a, lansan ki santi bon an ak rido pou fèmen kote pou antre nan tant lan, 39lotèl fèt an kwiv la avèk griyaj an kwiv la, manch yo ak tou sa ki pou sèvi ak lotèl la, basin lan ak pye li a, 40rido pou galeri a, poto yo, sipò yo, rido pou fèmen kote pou yo antre sou galeri a, kòd yo, pikèt yo ak tou sa yo bezwen pou fè sèvis nan Tant Randevou a kote pou Bondye rete a, 41bèl rad seremoni pou yo mete lè y'ap fè sèvis nan kote ki apa pou Bondye a, rad pou Arawon, prèt la, mete sou li ansanm ak rad pou pitit gason l yo mete sou yo lè y'ap fè travay prèt yo.

42Se #Egz 35.4,10-19 konsa moun pèp Izrayèl yo te fè tout travay la jan Senyè a te bay Moyiz lòd fè l la. 43Moyiz egzaminen travay yo te fè a, li wè yo te fè l jan Senyè a te bay lòd fè l la. Wi, se konsa yo te fè l. Lèfini, Moyiz beni yo.

Currently Selected:

Egzòd 39: HAT98

Highlight

Copy