Travay 20

Pòl ale Masedouàn ak Lagrès

1Lè dezòd la sispann, Pòl reyini disip yo, li ba yo kèk pawòl ankourajman, li di yo orevwa, epi l pati pou Masedouàn. 2Li pase nan tout zòn lan, li t'ap ankouraje fidèl yo avèk anpil mesay. Apre sa, li pati, l'ale Lagrès. 3Rive la, li pase twa mwa. Li ta pral pran batiman pou peyi Siri lè li vin aprann jwif yo t'ap pare pèlen pou li. Se konsa, li deside tounen pase Masedwàn ankò. 4Men #Tra 17.10; 19.29; Wòm 16.21 non moun ki te avèk li yo: Sopatè, pitit Piris, moun lavil Bere, Aristak ak Sekoundous, tou de moun Tesalonik, Gayis, moun Dèb, Timote, Tichik ak Twofim, tou twa moun pwovens Lazi. 5Yo #Tra 16.8 tout te pran devan, y'al tann nou Twoas. 6Nou menm, apre fèt Pen San Ledven yo, nou anbake pou lavil Filip. Apre senk jou, nou jwenn yo lavil Twowas. Nou rete pase yon senmenn la.

Pòl vizite Twoas yon dènye fwa

7Premye #1 Kor 16.2; Tra 2.42,46 jou nan senmenn lan, nan aswè, nou te reyini pou nou manje ansanm. Pòl t'ap pale ak moun ki te rasanble yo. Li te gen pou li pati bonè denmen maten. Li te minwi, li t'ap pale toujou. 8Nou te rasanble anlè nan chanmòt la. Te gen anpil lanp limen. 9Yon jenn gason yo te rele Etich, te chita sou rebò fennèt la. Mesay Pòl la te long. Etich kite kabicha pran l epi l dòmi nèt ale. Li dòmi sitèlman, li pèdi ekilib, li sòti nan twazyèm etaj la li tonbe anba. Lè yo ranmase l, li te mouri frèt. 10Pòl #1 Wa 17.21 desann, li bese sou li, li pran l nan bra l, epi li di:

— Nou pa bezwen pè, li pa mouri.

11Lè Pòl tounen moute, li kase pen an, epi l manje. Li pale lontan avèk yo ankò jouk solèy leve. Apre sa li pati. 12Yo mennen jenn gason an vivan lakay li. Se te yon ankourajman pou tout moun.

Pòl kite Twoas pou ale Milè

13Nou pran devan, n'al anbake sou yon batiman ki mennen nou Asòs. Se la pou Pòl te vin anbake tou. Se li menm ki te vle l konsa, li te fè lide ale Asòs apye. 14Lè l vin jwenn nou Asòs, nou pran l abò a, epi n'ale Mitilèn. 15Antan nou la, nou fè vwal ankò. Nan denmen nou rive devan Chyo. Apre yon jou, nou rive Samòs. Nan denmen ankò nou debake Milè. 16Pòl #Tra 18.21 te deside pase devan Efèz san rete pou l pat pèdi twòp tan nan pwovens Lazi a. Li t'ap prese, li te vle wè si l te kapab rive Jerizalèm pou jou Lapannkòt la.

Mesay Pòl bay reskonsab legliz Efèz yo

17Antan li lavil Milè, Pòl voye yon mesay lavil Efèz: li mande chèf reskonsab legliz yo pou yo vin jwenn li. 18Lè #Tra 18.19; 19.10 yo rive, li di yo:

— Nou konnen ki jan mwen te mennen bak mwen tout tan mwen te la avèk nou, depi premye jou mwen te mete pye m nan Lazi. 19Mwen #Tra 20.3 sèvi Senyè a san okenn pretansyon, avèk dlo nan je, nan mitan tout move pa mwen jwenn poutèt tout konplo jwif yo. 20Nou konnen mwen pa janm kache nou anyen ki ta ka sèvi nou, mwen te fè nou konnen tout bagay, mwen te moutre nou tout bagay, kit an piblik kit lakay nou. 21Mwen avèti tout moun, jwif kou moun lòt nasyon yo, pou yo chanje lavi yo, tounen vin jwenn Bondye, pou yo mete konfyans yo nan Senyè Jezi. 22Kounyeya mwen #Tra 19.21 pral Jerizalèm. Se Sentespri k'ap pouse m ale. Mwen pa konnen sa k pral rive m la a. 23Yon #Tra 9.16; 21.4,11 sèl bagay mwen konnen: Nan chak vil kote mwen pase, Sentespri avèti m' se prizon ak anpil soufrans k'ap tann mwen. 24Mwen #Tra 21.13 pa pran lavi m pou anyen, li pa gen okenn valè pou mwen. Men, mwen vle ale jouk nan bout nan sèvis mwen, mwen vle fini nèt ak travay Senyè Jezi ban mwen an, pou m anonse bòn nouvèl favè Bondye fè nou an.

25Mwen pase kèk tan nan mitan nou ap anonse Gouvènman Bondye ki wa a. Men, kounyeya, mwen konnen nou yonn p'ap janm wè m ankò. 26Se #Tra 18.6 poutèt sa m'ap di nou jòdi a: si yonn nan nou peri, mwen pa reskonsab. 27Mwen fè nou konnen tout plan travay Bondye a san m pa kache nou anyen. 28Veye #Sòm 74.2; 1 Tim 4.16; 1 Pyè 5.2 kò nou, veye sou tout bann mouton Sentespri a mete sou kont nou. Okipe legliz Bondye a, #20.28: legliz Bondye a: Gen maniskri ki bay legliz Senyè a, osinon legliz Granmèt la. legliz li te achte ak pwòp san Pitit li a. 29Mwen #Mat 7.15; 10.16; Jan 10.12 konnen tou, apre m fin ale, gen moun k'ap vin nan mitan nou pou kraze legliz la, tankou chen mawon nan yon bann mouton. 30Gen #1 Jan 2.19; Gal 4.17 moun k'ap sòti nan mitan nou menm menm, k'ap kanpe pou bay manti, pou chache rale kèk disip dèyè yo. 31Se #Mak 13.35,37; 1 Tes 2.11 poutèt sa, mwen di nou: fè atansyon anpil. Toujou chonje ki jan, pandan twazan, lajounen kou lannwit, mwen pa janm sispann avèti nou tout, ak dlo nan je mwen.

32Kounyeya m'ap #Det 33.3 renmèt nou nan men Bondye avèk mesay favè li a. Se li menm ki ka fòtifye nou, ki ka ban nou tout bon bagay li sere pou tout moun ki pote non li. 33Mwen #Mat 10.8; 1 Kor 9.12; 1 Sam 12.3 pa janm pote lanvi sou lajan pesonn, ni sou lò yo, ni sou rad pyès moun. 34Nou #Tra 18.3; 1 Kor 4.12; 1 Tes 2.9 menm, nou konnen ki jan mwen travay ak men m pou m te ka jwenn tou sa mwen menm ansanm ak kanmarad mwen yo nou te bezwen. 35Mwen moutre nou ki jan pou n travay di nan tou sa n'ap fè pou n ka ede pi fèb yo, pou nou toujou chonje pawòl Senyè a ki te di ak pwòp bouch li: Gen plis benediksyon pou moun k'ap bay pase pou moun k'ap resevwa.

36Lè #Tra 21.5 li fin pale konsa, Pòl mete ajenou ansanm ak yo tout, epi li lapriyè. 37Yo #Tra 21.6; Wòm 16.16; 1 Pyè 5.14 ttout t'ap kriye, yo tout tonbe nan kou Pòl, epi yo t'ap di li orevwa.

38Sa #Tra 20.25 ki te fè yo plis lapenn, se lè li di yo p'ap janm wè l ankò. Apre sa, yo kondi l mennen jouk sou batiman an.

Currently Selected:

Travay 20: HAT98

Highlight

Copy