Mattaios 21

21 Ik.

1Orowa, nei utara anak ne Yerusarem kotan ehange no araki wa Betpage kotan un Kanran-ush nupuri orota shirepa chiki, Yesu tu koikara utara teshkara wa orota ene itak-hi :— 2Ikushketa an kotan orun paye, yakun, nani ashirikote wa an roba po tura anukara kusu ne: pita wa En orun tura wa araki yan. 3Nen ka echi otta nep ka ye chiki, Utarapa tambe kon rusui, ani ye yan; yatun, nani omande kusu ne na, sekoro itat. 4Tapne aki katu anak ne,

Sion matne po otta ene ye yan,

Ingarʼan, e esapane guru anak ne ramu-rotcha,

Roba newa roba poho ne pon roba

Kashiketa o wa e otta ek ruwe ne,

5sekoro uweingara guru ani chi itakte itak auweomare kuni ne aki nisa ruwe ne na. 6Orowa, koikara utara paye wa Yesu orowa akashpaotte nei no poka ki hine, 7roba newa pon roba tura wa araki, aine, kata koro mipi ande, awa, Shinuma nei kashiketa o nisa ruwe ne. 8Orowa, inne utara poro sereke anak ne koro raipi ru otta pirasa; moshima okai utara chikuni ni-tek otuiba wa ru otta piraspa nisa ruwe ne. 9Orowa, Shinuma kotchaot paye inne utara hemhem, oshi araki utara hemhem hawe ashte wa ene itak-hi :— Dabid koro poho otta Hosanna an na; Utarapa reihei ani ek guru anak ne anunuke ne; iyotta rikun ushiketa Hosanna an na; ari itak. 10Orowa, Yerusarem kotan orota Shinuma ek chiki, machiya un utara obitta keutum chiukopoye wa ene itak-hi :— 11Tan guru nen ne ruwe he an? Tan guru anak nei Gariraya un Nazaret kotan wano ek Yesu ne ruwe ne, sekoro inne utara ye nisa ruwe ne.

12Orowa, Yesu Kamui kora kenru orun ahun wa nei oshiketa okai eihok utara newa hok utara obitta esoyun okeuba, orowa, kani itasari utara koro set hene, kusuwep eihok utara koro set hene hokushte nisa ruwe ne; 13aige, utara otta ene itak-hi :— Ku kora kenru anak ne inonno-itak kuni chisei ani aye kusu ne, sekorʼan itak anuye wa an, koroka, echi utara anak ne nei kenru ani ikka guru chisei ne kan nisa ruwe ne, sekoro itak. 14Orowa, shik-nak utara newa hera utara anak ne Kamui kora kenru ta an Shinuma orun ahup nisa ruwe ne; aige, Shinuma nei utara iwangere nisa ruwe ne. 15Korota, Kamui kora kenru esapane utara newa kambi-nuye utara anak ne Shinuma iki iyokunnure ikip hene, Kamui kora kenru ta okai wa, — Dabid poho otta Hosanna an na, — ari an itak ani, poho utara hawe ashte-hi hene nukara chiki, irushka hine Shinuma otta ene itak-hi :— 16Tan utara ye itak E nu ya? ari itak. Orota Yesu ene itak-hi :— O un: Aiai utara newa tonun utara paroho orowa no Aokai anak ne ramuyere kuni ambe eramushinnere nisa ruwe ne, ari an itak echi oro-oitak shomoki ruwe he an? 17Orowa, Shinuma nei utara ande wa nei machiya ekohopi wa oman hine Betania kotan ta reushi nisa ruwe ne na.

18Orowa, kunneiwano Shinuma machiya orun hoshipi ita, ibe rusui ruwe ne. 19Awa, ru paruruta shine ichijiku chikuni an wa nukara hine orota oman wa ibehe sak chikuni ne, ouse ham patek an ruwe ne; nei ambe orota Shinuma ene itak-hi :— Tewa no hembara pakno ne yakka iteki nikaop hetukure yan, ari itak. Orowa, nani nei a ichijiku chikuni shumumge nisa ruwe ne. 20Aige, koikara utara nei ambe nukara chiki enushkari wa ene itak-hi :— Nep tunashi no nei ichijiku chikuni shumumge ruwe? 21Orowa, Yesu ese wa nei utara otta ene itak-hi :— Son no echi otta Ku ye, echi utara anak ne utumashi shomoki no eisho-toro yakun tan ichijiku chikuni otta aki korachi echi ki kusu ne ambe patek shomo ne, koroka, tan nupuri otta poka — Eani auk wa atui oshiketa aosura wa okai yan — ani echi ye chiki, aki kusu ne. 22Orowa, nep ne yakka echi eishokoro wa inonno-itak ani ko-ramkoro yakun obitta akore kusu ne na.

23Orowa, Shinuma Kamui kora kenru orun ahun chiki nei kenru esapane utara hemhem utara koro ekashi utara hemhem Shinuma epakashnu wa an rapoketa orota araki wa ene itak-hi :— Nep mondum e koro gusu tap okaibe e iki ya? Tan mondum e kore guru nen ne ruwe he an? ari itak. 24Orota Yesu ese wa ene itak-hi :— Kuani ne yakka echi otta shine itak Ku uwepekennu kusu ne, echi En nure chiki anak ne Kuani ne yakka nep mondum Ku goro wa gusu tap okaibe Ku iki ya echi nure ash kusu ne. 25Yoannes kore Baptisma nei wano ekbe ne ruwe? Kando orowa no ekbe ne ruwe? Ainu orowa no ekbe ne ruwe he an? Orowa, nei utara utashpa upaure wa ene itak-hi :— Kando orowa no ekbe ne ani chi ye chiki, Nep, gusu echi utara Yoannes eishokoro shomoki ya? 26Ari Shinuma itak nangoro. Koroka, ainu orowa no ekbe ne ani an itak chi ye yak anak ne inne utara koishitoma ash ruwe ne, inambe gusu ne yakun, obitta no okai utara anak ne Yoannes uweingara guru ne sekoro yainu wa okai ruwe ne. 27Orowa, nei utara Yesu otta ese wa ene itak-hi :— Chi eramushkari, ari itak. Orota Shinuma ne yakka ene itakhi :— Nep mondum Ku goro wa gusu tap okaibe Ku iki ya ne yakka echi nure ash shomoki ruwe ne. 28Koroka, nekon a echi yainu? Shine ainu tu po kon ruwe ne; awa, kiyanne-po orota shinuma oman wa ene itak-hi :— Ku poho, tanto e oman wa ku kot toi otta monraige yan. 29Nei guru ese wa :— shomo ku oman, ari itat: orowa, okaketa shinuma yaikokatpak wa oman nisa ruwe ne. 30Orowa, shinuma anak ne tutanu an poho otta ukorachi an itak ani ye nisa ruwe ne. Orowa, poho ese wa :— Nishpa, ku oman kusu ne ari itak: koroka, oman shomoki. 31Tan tun ututta inan guru michi korʼirenga ki nisa ruwe he an? Nei utara :— Hoshiki an gunʼne, ari itak. Orota Yesu ene itak-hi :— Son no echi otta Ku ye, yaku-etaye utara newa ramupekere shiwentep utara anak ne echi etokota Kamui moshiri orun ahup ruwe ne. 32Inambe gusu ne yakun, Yoannes anak ne oupeka an ru kari echi otta ek nisa ruwe ne, awa, echi eumbipka nisa ruwe ne: koroka, yaku-etaye utara newa ramupekere shiwentep anak ne eishokon nisa ruwe ne: aige, echi utara nei ambe nukara, chiki okaketa shinuma eisho-koro kuni ne yaikokatpak ka shomoki nisa ruwe ne.

33Naa shine itak-maukushte itak nu yan. Chisei koro ainu shinen an, awa, shinuma hat toi kara wa okari ankura roshki, orowa, toi oshiketa ani tonoto orun akara nishu ande, naa samata, shiniwe kuni chisei kara, aige, toi kara utara otta eirusa wa oya moshirʼotta oman nisa ruwe ne. 34Orowa, nikaop okai ushi epa ehange ko anak ne nei ambe uina kuni gusu toi kara utara orota koro usshiune utara payere nisa ruwe ne, 35awa, toi kara utara anak ne koro usshiune guru shinen shirikik, shinen raige, shuma ani shinen kopiyekara nisa ruwe ne. 36Shui, hoshiki no apayere ausshiunere utara kasu no pase utara payere, 37awa, kanna-shui orota nei no iki nisa ruwe ne. Koroka, okaketa, nei utara anak ne ku poho ko-oripak kusu ne ari ye wa orota koro poho omande nisa ruwe ne. 38Koroka, toi kara utara nei poho nukara chiki utashpa ene itak-hi :— Tan guru anak ne eikeshkoro guru ne: hetak, raige wa nei eikeshkoro ambe aukro, ari itak. 39Aige, nei utara Shinuma kishima wa hat toi orowa no eyomak wa raige nisa ruwe ne. 40Tambe gusu, hat toi kon nishpa ek chiki, nei a toi kara utara otta nekon a iki nangoro ya? 41Orota nei utara ene itak-hi :— Shinuma nei wen utara wen no isamka, orowa nikaop epa ita iotta koropare kuni moshima okai toi kara utara orun hat toi eirusa kusu ne, ari itak. 42Nei utara otta Yesu ene itak-hi :—

Chisei kara utara emaka shuma auak ne

Chisei shikkeu Sapanep ne akan nisa ruwe ne:

Tambe anak Utarapa orowa no an ap ne:

Chi shik samata aehomatup ne ruwe ne,

sekorʼan itak Kamui kambi-sosh kashiketa echi oro-oitak shomoki ya? 43Tambe gusu, echi otta Ku ye, Kamui moshiri anak ne echi orowa no auk wa gusu hetukure kuni nikaop hetukure uirup otta akore kusu ne. 44Orowa, nei shuma kashiketa hachiri gurʼanak ne hurane apereke kusu ne: koroka, nen ne yakka kashiketa tan shuma hachiri guru anak ne, toitoi koponchi apatu korachi apatu kusu ne, ari itak. 45Orowa, Kamui kora kenru esapane utara newa Parisee un utara koro itak-maukushte itak nu chiki, shinuma utara epeka no aye itak ne-i sekoro eraman nisa ruwe ne. 46Orowa, Shinuma kishima kuni hunara chiki, inne utara koishitoma ruwe ne, inambe gusu ne yakun, Shinuma anak ne uweingara guru ne sekoro esanniyo nisa ruwe ne na.

Currently Selected:

Mattaios 21: AINU

Highlight

Copy