Roukos 6

6 Ik.

1Orowa, Shini toho ta Shinuma mungi toi kush wa oman, aige, koro koikara utara mungi push tuiba wa tekehe otta noyanoya hine ibe korʼan ruwe ne. 2Koroka, Parisee un utara tumugeta okai utara ene itak-hi :— Shini toho ta aki yak anak ne Kamui ikashpaotte otereke buri nep gusu echi ki ruwe he an? ani itak. 3Orowa, orota Yesu ese wa ene itak-hi :— Dabid anak ne ibe-rusui ita tura no okai utara utura nekon a iki ya sekorʼan orusbpe ka echi oro-oitak shomoki ruwe? 4Shinuma anak ne Kamui kora kenru orota ahun wa, ouse Kamui kora kenru esapane utara patek ibe kuni Kamui otta ayange aep uk wa e, orowa no, tura no okai utara otta koropare wa ere-i echi oro-oitak shomoki ya? 5Ainu Poho anak ne Shini toho koro Utarapa ne ruwe ne, sekorʼan itak ani nei utara otta ye nisa ruwe ne na.

6Orowa no, moshima an Shini toho ta Shinuma Uwekarapa chisei ta ahun wa epakashnu wa an wa an ruwe ne: awa, shimon tek shipeshte shine ainu nei ushiketa an ruwe ne. 7Awa, eiyonnuppa kuni ikkewe kon rusui gusu, Shini toho ta Shinuma ainu iwangere ya shomo ya nukara gusu, kambi-nuye utara newa Parisee un utara Shinuma orun oshikkurukote nisa ruwe ne. 8Koroka, Shinuma nei utara yainu i eramʼan: aige, teke shipeshte guru otta — Hopuni wa utara tumugeta ash yan — ani itak. 9Orowa no, shinuma hopuni wa ash ruwe ne. Utara orota Yesu ene itak-hi :— Orushpe Ku nu; — Shini toho ta pirikap ki hene, wenbe ki hene, ramat shiknure hene, ramat raige hene, inambe kara katu ikashpaotte uweomarepe ne ya? 10Orowa, Shinuma utara orun ingara wa — E tekehe turi yan — nei guru otta ye nisa ruwe ne. Orowa nei no ki chiki tekehe aiwangere nisa. 11Koroka, nei utara wayasap kashpa, awa, Yesu otta nekon a iki kusu ne ya ani utashpa ukoramkon ruwe ne.

12Nei toho ta anak ne inonno-itak ki gusu Shinuma nupuri hemesu, aige, anchikara ebitta Kamui otta inonno-itak ki korʼan nisa ruwe ne. 13Orowa, tokap ne chiki koikara utara shihekote hotuyekara: awa, nei tumuge wano tu niu ikashima wa niu numge wa Apostoro reihei ani reikore ruwe ne. 14Petros ani areikore Simon newa koro ainu iriwak Andreas an; 15Yakob newa Yoannes an; Piripos newa Bartoromaios an; Mattaios newa Tomas an; Arupaios poho Yakob newa Zerotes ani aye Simon an; 16Yakob poho Youdas newa Yesu ekoshi guru ne nisa Kariot kotan un guru Youdas an; 17Shinuma nei utara tura san wa kapara ushketa inne topaha utara, Shinuma nu gusu hemhem, koro tashum aiwangere gusu hemhem akire gusu Yudea moshiri ebitta wano hene, Yerusarem machiya wano hene, Tiros newa Sidon kotan un atui sam wano hene araki inne utara tura no ash wa an ruwe ne; 18orowa, ichakkere ramat orowa no aranrusarakka utara aiwangere nisa ruwe ne. 19Awa; topaha utara obitta Shinuma tomooshma rusui; orowa no kiroro san wa an wa utara obitta iwangere nisa ruwe ne gusu ne na.

20Orowa, Shinuma anak ne koro koikara utara orun ingara wa orota ene itak-hi :— Otek sak utara, echi utara, anunuke echi ne, Kamui moshiri echi korobe ne ruwe ne gusu ne na. 21Tane ibe-rusui utara, echi utara, anunuke ne, echi akironnure kusu ne gusu ne na. Tane chish utara, echi utara, anunuke ne, echi mina kusu ne gusu ne na. 22Ainu Poho rengap gusu, utara echi etunne hemhem ki, echi shinnai no ande hemhem ki, echi sakayokara wa echi reihei anak ne wenbe korachi osura hemhem ki ita anak ne, anunuke an. 23Nei toho ta yaikopuntek wa tereke yan, kando otta an echi koro kuni pummaha porobe ne ruwe ne gusu ne na; utara koro ekashi ne yakka uweingara utara otta shem korachi ki nisa ruwe ne gusu ne na. 24Koroka, oteknu utara echi utara, yaisambepokash humi! aomaoma ambe echi koro okere ruwe ne gusu ne na. 25Tane akironnure wa an utara, echi utara, yaisambepokash humi! echi ibe-rusui ruwe ne kusu ne gusu ne na. Tane mina, echi utara, yaisambe-pokash humi! echi yaituwashkarap wa chish ruwe ne kusu ne gusu ne na. 26Utara obitta echi gusu pirikap ye ita anak ne echi yaisambepokash humi! nei utara koro ekashi anak ne shunge uweingara utara otta nei no ki nisa ruwe ne gusu ne na.

27Koroka, nu wa okai echi otta Ku ye :— Echi epokba utara omap yan, echi etunne utara epirikare yan, echi oitakushi utara nunuke yan, 28echi keshke utara gusu inonno-itak ki yan. 29Echi ara notakam kik guru otta moshima an notakam ne yakka shikiru yan; echi horawashi mip uk guru otta hokannashi mipi ne yakka uk kuni iteki hattoki yan. 30Nen ne yakka ekoramkoro guru an yakun, otta kore; orowa, e korobe koro wa oman guru an yak anak ne iteki nei ambe hoshipire yan. 31Orowa, echi otta moshima an guru orowa no aki kuni echi kon rusuibe, echi utara ne yakka nei utara otta iki yan. 32Echi omap guru echi iyomap yakun, nekon a irenga an ya? chikokatpak utara ne yakka iyomap utara omap ruwe ne gusu ne na. 33Orowa no echi pirikare utara otta echi epirikare yakun, nekon a irenga an ya? Chikokatpak utara ne yakka nei no iki ruwe ne gusu ne na. 34Orowa, shui uk kuni chipachipa wa utara otta echi erusa yak anak ne nekon a irenga an ya? Chikokatpak utara ne yakka chikokatpak utara otta erusa wa shui nei ambe pakno uk ruwe ne. 35Koroka, echi pokba utara omap wa epirikare yan; echi korobe erusa wa iteki nei ambe gusu nishomap yan; yak anak ne echi pummaha porobe ne kusu ne; Iyotta Rikumbe poho echi ne kusu ne na; Shinuma anak ne wen utara otta ne yakka yaiiraige eramushkare utara otta ne yakka e ramu-hauge ruwe ne. 36Echi koro Michi rampokiwen wa kore korachi, echi utara ne yakka rampokiwen wa kore yan. 37Iteki koipishi yan, yakun, echi akoipishi shomoki kusu ne; iteki katpak an sekoro esanniyo yan, yakun echi katpak an sekoro aesanniyo shomoki kusu ne: 38honnere yan, yakun, echi ahonnere kusu ne: kore yan, yakun, echi otta a kore kusu ne: pirika no apakari; ararapa, eshiriotkeotke, ika pakno echi upshoro ta aomare kusu ne. Moshima an guru otta echi pakari wa kore korachi, echi otta ne yakka apakari wa a kore kusu ne na, sekoro itak.

39Orowa, nei utara otta Shinuma itak-maukushte-itak ne yakka ye :— Shiknak guru anak ne shiknak guru ani eashkai ya? Tun kane shui oro oshma shomoki kusu ne ya? 40Koikara guru anak ne koro epakashnu guru kasu no pase shomo ne: koroka, inan guru ne yakka ramuashinnere chiki anak ne koro epakashnu guru korachi an kusu ne. 41Orowa, nep gusu yaikota koro shikihi otta an umanki-ni nukara shomoki no e iriwak shikihi oshiketa an pana e esanniyo ya? 42Naa samata, yaikota shikihi oshiketa an umanki-ni e nukara shomoki, aige, nekon a koro iriwak otta — Ku iriwak, e koro shikihi otta an pana en oashingere yan — ani itak ya? Kankapkapeka guru, yaikota shiki otta an umanki-ni hoshiki no oashinge, orowa no, iriwak shikihi otta an pana oashinge kuni ne irammakaka nukara eashkai nangon na. 43Inambe gusu ne yakun, wen nikaop hetukure pirika chikuni isam; samata, pirika nikaop hetukure wen chikuni ka isam ruwe ne. 44Nep chikuni ne yakka yaikota kashi o nikaop gusu aeramʼan. Aiush ni orowa no ichijiku nikaop auina shomoki; emauri ni orowa no utara anak ne hat uina shomoki ruwe ne. 45Pirika ainu anak ne keutum ta okai pirika ikoro orowa no pirikap sange ruwe ne; wen ainu anak ne wen ikoro orowa no wenbe sange ruwe ne; inambe gusu ne yakun, keutura ta nuye an no an-i wano paroho anak ne itak ruwe ne.

46Orowa, echi utara anak ne Ku yep nei no shomo iki yakun, nep gusu Utarapa, Utarapa, ani En ye ya? 47Nen ne yakka En orun ek hine Ku ye itak nu wa nei no ki guru anak ne, nekon a ambe ukoheraye ya ani an ambe echi epakashnu ash na: 48Nei ainu anak ne chisei kara guru koheraye ruwe ne, ooho pakno ouri wa watara kata asama ande ruwe ne: orowa, pe san wa wakka chiu hine nei chisei epeka yakka moimoigere eaikap: pirika no akara chisei ne ruwe ne gusu ne na. 49Koroka, nu wa nei no ki shomoki gurʼanak ne asamaha sak no toi kata chisei kara guru koheraye ruwe ne; nei chisei epeka wakka chiu wa nani teike; aige, nei chisei awende-i anak poro nisa ruwe ne na.

Currently Selected:

Roukos 6: AINU

Highlight

Copy