Luuk 8
8
Miduuri sɛɛlii wia
1Denii u izi gaagi ra la bolzenaa ni boljigzi maa, di ra ŋɔ Kɔraawiizi wia, di ra lizi Kɔraawiizi Kora wia amaniyesuma ra tɛɛ baa. U hiŋra fidibanɛɛ la du u be, 2di kpa haana baŋhina uŋ faa duŋŋi tinnanchɔgaa ba ni ani baŋhina ge uŋ faa chaa ba wiila jaa. Bɛl sɔnnɛ Magdala hinuu Mɛɛri. Yeesu faa duŋŋi tinnanchɔgaa aniidaanɛɛrɛ u ni.#Jɔɔn 19:25 #Mat 27:55-56 3Bɛl ge sɔnnɛ Joana. Koori Hɛrɔd balii bɛl banna yir Chuza haannɛ. Bɛl ge sɔnnɛ Suzaana. Bannii ni hahkpila du ba be, di ɔɔ ra hiini baa lii ba kundɔɔlaa wia.
4Nɛra lii bola maa chaali werge Yeesu be, di su bɔr maa. Denii u ta sɛɛlii bɛl, di ŋɔ,#Mat 13:1-9; Maak 4:1-9 5“Baal bɛllɛ izee la koo ú ga mizi u mia. Uŋ gaa mizi u mia la, aŋhina chogli ŋmɛnɛɛ, ba ra fɛrgaa. Zumbizi ge ba wa hɔɔzaa di. 6Aŋhina ge chogli bii bɔr di lii. Ka a bɔr n hillɛ wia a yɔl di siu. 7Aŋhina ge chogli sɔɔhri biini lii. A ni sɔɔhri la ge kpau hel. 8Aŋhina ge chogli hɛri bɔnanii di lii di hel di du bee kalfazi.”
Uŋ wa ŋɔ guŋ tuŋ, u ŋɔ bɔkpega ni, “Hinla maa n dɔɔ digna di ra nuu wia, gil á ra nuu nɛnnɛ.”
A sɛɛlii zɛɛ
(Mat 13:10-17; Maak 4:10-12)
9Denii u hiŋra pɛɛzuu u sɛɛlii la zɛɛ. 10U ŋɔ, “Kɔraawiizi tɛɛ iabuu zumaa ií wer zum u Kora wolo. Ka banla n waa hoo yaa be lawaa, sɛɛliizii n ɔɔ ta ra tɛɛ baa,
‘Bá ra nuu, á zuu ba digna, ka bá zum a zɛɛ huhzi
di kaa aah siwii
bá zum a wia ŋmɛnɛɛ,
ka zumuu huhzi.’#Aiza 6:9-10
11A sɛɛlii zɛɛrɛ keŋ. Mia la ɛɛwɔɔ lugɔ Kɔraawiizi wiŋɔɔlii.#Mat 13:18-23; Maak 4:13-20 12Anla n chogli ŋmɛnɛɛ la, aabuu banla n nuuwɛ, ka Sitaani ɛɛ manaŋ ba wa lizi a wiŋɔzi ba bampiree biine, bá gilɛɛ waa sɛɛ, Kɔ́raawiizi lɛɛ baa la. 13Anla n chogli bii bɔr la ge, aabuu banla n nuuwɛ di sɛɛ. Ba bɔra sɔɔni, ba hiŋ tama. Ka saŋa la baŋ waa di tɔɔrɔɔ la, ba vɛɛ. Ba waa kaa ra hiŋ. Ba wia ɛɛwɔɔ lugɔ mia la n waa lunne dɔɔwɛ la. 14Anla n chogli sɔɔhri biini la, aabuu banla n nuu wiŋɔzi la ka izi ra la. Ba miibɔɔni wia zuu ba nyuuni. Ba kpa kebinyiŋŋaa ni bahinaa dii wia du ba bampiree. Wiŋɔzi la waa wette na bɔr chɔɔ ba bampiree. Ba wia ɛɛwɔɔ lugɔ mia la n du bee huhzi la. 15Anla ge n chogli hɛri bɔnanii la, aabuu banla n nuu wiŋɔzi la, ba bampiree lawaa ni wibii, ba ra hiŋ ani kanyitti. Ba wia ɛɛwɔɔ lugɔ mia la n du bee la.
Fintina sɛɛlii wia
(Maak 4:21-25)
16Di ba choŋŋi fintina, ba wàá kpa kuŋ chig u ni. Ba wàá kpau suah gado zɛɛ. Ka ba daŋ kpaubuu hɔŋ chiŋ, ú wer ra chaani banla maa n niŋ zuu de la. 17Wii la maa n suahwɛ, ka u daŋ ŋmɛnɛ lii bɔchaaŋ. Wii la maa ge n ɛɛ woltɔi wii, ka u daŋ ŋmɛnɛ pilli nɛra zumuu. 18Awia, ií ra dazi gunla iinna nuu wiŋɔzi la. Nɛr la n dɔɔwɛ daŋ kaa bir na jaa anla un dɔɔwɛ la ni. Nɛr la n waa dɔɔwɛ werge ge, u kuntama la un zummɛ lugɔ u dɔɔwɔ la gba, ba daŋ kaa lɛɛa u nonii biini.”
Yeesu maa ni u niuna wia
(Mat 12:46-50; Maak 3:31-35)
19Denii u maa ni u niuna ba u be, ka nɛkpila la wia, ba waa wette hel u be. 20Nɛbɛl ŋɔ u be, “I maa ni i niwizii chigɛ bossee di ra nyiŋŋi ba nai.”
21Yeesu ŋɔ ba be, “N maawaa ni n niwizii ɛɛ banla n nuu Kɔraawiizi wiŋɔɔlii di ra hiŋ la.”
Yeesu n hau pekpeg ni wia
(Mat 8:23-27; Maak 4:35-41)
22A hɔl bɛl, Yeesu ŋɔ u hiŋra be, “Ya gi muuzeŋ naa baŋgia.” Ba zuu muugbera ra la. 23Banna la la, Yeesu ra chɔɔ dɔɔ. Denii pekpeg izi ba di wa lɔ nii la, ba muugbera ra mɔŋ a nii di ra su. A jaa ɛɛ baa siaahmu.
24Ba la ga lalli Yeesu di ŋɔ, “Yaa Dɔɔri, yaa Dɔɔri, yaa ra nyiŋŋi ya siwuu.”
Yeesu izi dɔɔ hau peu la ni nii la ni, dí a siigi. Peu la teŋ, nii la ge waa kaa ra ziigi. 25U pɛɛzi baa, “Ii dɔɔ yardaa naa?”
A tir baa ba ra ɔm di ra pɛɛzi dɔŋa, “Beedee nɛdeere kennei, haali u wer ŋɔ wia tɛɛ peu ni nii, a wer nuu u nua di siigɛi?”
Tinnanchɔgaa hiŋ chaai wia
(Mat 8:28-34; Maak 5:1-20)
26Denii ba wa hel Gɛrasa hina hɛri la n dugli Galilii hɛri la. 27Yeesu n wa lii muugbera la biini, bol la baal bɛl wa chem u ni. Tinnanchɔgii hinnɛ. A birgoo uŋ kaa laali laala. Waa ɔɔ du dia ka ɔɔ du bɔr la banna hug ba lalaa la. 28Ba faa kpa yɔlɔzenaa ni ajigzi maa vɔɔzi u nonee ni u naazi maa. Ka di tinnanchɔgii la haŋ wa izuu, u ɔɔ lau a maa chaahzi. Ŋmɛnɛbɛl tinnanchɔgii la ɔɔ gil u zuu pir ga du de.#Maak 3:11
29Uŋ wa chem Yeesu ni la, Yeesu ŋɔ dí, tinnanchɔgii la lii baal la ni. Baal la pogzi ka giŋŋi u see ŋɔ kpegzi ni, “Bɛɛ i ra nyiŋŋi n benei, hìŋ́ Kɔraawiizi La N Kaali Kummaa la Biibaal Yeesu? N na fɔrgiibuu, gilɛɛ waa tɔɔriŋ.”
30Yeesu pɛɛzuu, “I sɔnnɛ ɛrɛɛ?” U ŋɔ, “N sɔnnɛ Kuŋkpila.” Tinnanchɔgaa kpilakpila n lawuu la wiarɛ u ŋɔ gunla.
31A ra fɔrgi Yeesu werge lugɔ ú gilɛɛ waa duŋŋaa á ra la bɔɔluŋ la.
32Perekukpila ge faa du giŋgimii la nyuu di ra di. Tinnanchɔgaa la fɔrgi Yeesu dí u gil a zuu perekuzi la ni. U tɛɛa ŋmɛnɛɛ. 33A lii baal la ni di la ga zuu perekuzi la ni. A perekuzi chɔ tuu a waluu ga zuu muuzeŋ la biini. A nii dia.
34Perekunɔɔna la n wa na wii la n ɛɛwɛ la, ba kɛɛhzi ga ŋɔ a wia tɛɛ banla n du bol ni banla baŋ huuzee pir la biini. 35Ba lii bá ga na a wii di ba Yeesu be, di baal la tinnanchɔgaa n lii u ni la tɔ wɛjɛ so Yeesu naazi zɛɛ. Waa kaa ra chugli. Ɔnsii lau baa. 36Banla n faa na gunla Yeesu n duŋŋi tinnanchɔgaa baal la ni la, bagli a wia maa tɛɛ a nɛra.
37Denii nɛra la maa n du Gɛrasa hɛri la fɔrgi Yeesu lugɔ ú lii ba be, dikuubɛɛwiai, ɔnsii lau baabuu werge maa. Yeesu zuu muugbera la ú bir kaali.
38Uŋ faa ra nyiŋŋi u kaali la, baal la un duŋŋi tinnanchɔgaa u ni la fɔrguubuu lugɔ ú wer duu la. Ka Yeesu vɛɛ ka ŋɔ, 39Bir kaali i dia, di ga ŋɔ ba be gunla Kɔraawiizi n hiinii werge la. U bir kaali gaa ŋɔ gunla Yeesu n ɛɛwɛ hiinuu werge, a wia yaari a bol maa.
Biihambie bɛl siu ni hahwiilahiŋ bɛl wia
(Mat 9:18-26; Maak 5:21-43)
40Yeesu n kaa wa ba a bol di a bol hina maa ra kpaŋuu, ba lɛɛu ni bɔsɔna. 41Baal bɛl ba Yeesu be. U sɔnnɛ faa Jairus. U ɛɛ nabɔmaa ba jaamaa dia biini. U giŋŋi Yeesu see di fɔrguu ú ba u dia, 42dikuubɛɛwiai, u biikpaŋkpannɛ faa ra nyiŋŋi ú siu. A bie ɛɛ biihambiere di di binni fidaanɛɛ. Yeesu hiŋuu ra la.
Banna la, nɛra faruu ba ra la. 43Haaŋ bɛl du ba be. A haaŋ faa ra wiiu di ra ɛɛ doŋa binni fidaanɛɛ biini ka a waa teŋŋe. Nɛr maa chaau huhzi. 44A haaŋ wa hel Yeesu harbɔɔ di gbɔgzi u wɛjɛ nua. Uŋ wa gbɔgzuu la, kakpaŋ u doŋa la teŋ.
45Yeesu pɛɛzi, “Anɛɛ n gbɔgziŋ naanɛi?” Ba maa ra hɔɔ. Denii Pitta ŋɔ, “N Dɔɔri, na gunla nɛkpila maa n barii di ra farii.”
46Ka Yeesu ŋɔ, “Nɛbɛl gbɔgzimbuu. N zum n biinii lugɔ n fɔŋŋa yeŋ liwɔɔrɛ.”
47Denii haaŋ la zum lugɔ wàá wer suah. U ba Yeesu be. U bɔra maa ra sa. U giŋŋi u see di bagluu wii la n baani u gbɔgzuu la ani gunla uŋ wette na alaanfia kakpaŋ la. Nɛra la maa ra nuu. 48Yeesu ŋɔ u be, “N bie, hiŋ yardiŋ wiarɛ i nyaagi la. Kɔ́raawiizi la i ni di tɛi bampirsɔna.”
49Uŋ haa ra ŋɔ a wia di baal bɛl lii jaamaa dia nabɔma la dia ba wa ŋɔ a jaamaa dia nabɔma be, “I biihaaŋ la siuwɔɔ. Gilɛɛ ka gil nabɔma naa tɔɔri u hiŋ la de.”
50Yeesu nuu gunla uŋ ŋɔwɛɛ la, di ŋɔ, “Gilɛɛ gil a tirii. Haa yardiŋ. U daŋ izi.”
51Ba ga hel dia la. Yeesu waa sɛɛwɛ nɛr maa hiŋuu zuu, di Pitta, Jɔɔn, Jems ani a bie mɛɛ ni u maa lɛi. 52Nɛra maa ra wii di ra kɔɔ. Yeesu ŋɔ, “Ií gilɛɛ ra wii. A biihambie waa siuwɛ. Dɔɔrɛ u ra chɔɔ.”
53Uŋ wa ŋɔ guŋ, ba ra mamuu. Ba zummɔ lugɔ u siuwɔɔ. 54Yeesu lau u nonii ka yiruu, “N bie, izi.” 55U duma kaa zuu u ni, u izi kakpaŋ. Yeesu ŋɔ bá tɛu diwee ú di. 56U mɛɛ ni u maa chi kinchaŋ. Yeesu ŋɔ ba be werge maa dí ba gilɛɛ waa ŋɔ gunla n ɛɛwɛ nɛr maa be.
Currently Selected:
Luuk 8: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
