Luuk 7
7
Room hina nabɔma bɛl balii chaai wia
(Mat 8:5-13)
1Yeesu n wa ŋɔ wia naa maa nɛra la be tuŋ, u jaa zuu Kapɛniɔm. 2Di soojazi kalfa nabɔma bɛl du de di dɔɔ u balii bɛl. U balii la ra wii di ra nyiŋŋi ú siu. A nabɔma faa nɔŋŋi u balii labuu werge. 3Uŋ wa nuu Yeesu wia, u hum Jus hina nabɔnzi baŋhina u be, dí ba ga suŋŋuu ú ba wa chaa u balii la tɛu. 4Ba la u be ga fɔrguu werge maa di ŋɔ, “A baal dɛkkɔɔ hin niŋ ɛɛ guŋ tɛu, 5dikuubɛɛwiai, u ra nyiŋŋi yaa nɛra wiarɛ werge. Waabuu ma yaa jaamaa dia la tɛɛ yaa.” 6Yeesu hiŋ baa ra la.
Baŋ ga dugli u dia la, nabɔma la hum u dammuzi baŋhina Yeesu be, di ŋɔ, “N Dɔɔri, gilɛɛ kaa tɔɔri i hiŋ. Maa dɛg hin niŋ zuu n dia. 7Awiarɛ maa sɛɛwɛ n himmaa ba i be la. Haŋ ŋɔ ú nyaagi. Di i ŋɔ guŋ ɛŋ gba, ka n balii la daŋ nyaagi, 8dikuubɛɛwiai, nɛra dɔɔ n fɔŋŋaa, n ge dɔɔ nɛra fɔŋŋa. Di n ŋɔ n sooja bɛl be lugɔ ú izi la yembɛl, u daŋ la. Di n kaa ŋɔ lugɔ ú ba, u daŋ ba. Di n ŋɔ n balii bɛl be lugɔ ú ɛɛ keŋ, u daŋ ɛɛu.”
9Yeesu n wa nuu guŋ, a tiruu werge. U bir ŋɔ nɛkpila la n na hiŋuu la be, “Ií gil n ŋɔ wibii maa tɛɛ ia. N haa waa nɛr maa n yardiŋ kennaa nawɛɛ Izrɛl hina biini.” 10Banla a nabɔma n hummɛ la bir la u dia. Baŋ ga hel de di u balii la nyaagɔɔ.
Yeesu n lalli luhaaŋ bɛl biibaal siu biini wia
11Hɔpizi, Yeesu kaa izi ra la bol bɛl banna yir Neen. U hiŋra ni nɛkpila hiŋuu ra la. 12Banna la gaa dugli a laŋgara, di nɛra baŋhina chigɔ lalii bɛl ra lii a bol biini bá ga hug. Baal la n siuwɛ la faa ɛɛ u maa biikpaŋkpannɛ. U maa ge ɛɛ luhaannɛ. A bol hina kpilakpila maa lii ra la. 13Yeesu n wa nau, u wia dɔɔu sinyɛna. U ŋɔ u be, “Gilɛɛ ra wii.”
14Ka la ga gbɔgzi dakka baŋ kpawɛɛ chi lalii la. Banla n faa chigɛu la chi. Yeesu ŋɔ, “Biipɔllii, n na ŋɔ i benii, Izi!” 15Lalii la izi so di ra ŋɔ wia. Yeesu kpau tɛɛ u maa.
16Kafɔŋ lau nɛra la maa. Ba ra chɔli Kɔraawiizi, di ra ŋɔ, “Kɔraawiizi dɔgtɛɛzenzeŋ bɛllɛ ba yaa be. Kɔraawiizi daani u nɛraa na.” 17Nɛra la n du Juda hɛri ni de maa ra nuu Yeesu wia.
Yeesu ni Jɔɔn Kɔraawiizi Niisɔɔri wia
(Mat 11:2-19)
18Jɔɔn Kɔraawiizi Niisɔɔri hiŋra ge bagli wia naa maa tɛu. 19U yir u hiŋra la banɛɛ di hum baa Yeesu be bá ga pɛɛzuu, “Hinuu unla n niŋ faa ba la gɛɛ ya haa ra binni bɛl ŋmɛnɛɛi?”
20Ba ba wa ŋɔ u be, “Jɔɔn Kɔraawiizi Niisɔɔri labuu hum yaa lugɔ ya wa pɛɛzii, ‘Hinuu unla n niŋ faa ba la gɛɛ ya haa ra binni bɛl ŋmɛnɛɛi?’ ”
21A guŋ saŋa, di Yeesu chaa nɛkpila la n faa ɛɛ gɛrga, wiila hina ani tinnanchɔgaa hina, di kaa pilli nyuŋŋa ge siwee. 22Awia, u ŋɔ Jɔɔn hiŋra la be, “Ií la ga bagli Jɔɔn la wii la maa iin nawɛɛ ani wii la maa iin nuuwɛ. Nyuŋŋa ra nau, gbɛraa ra vol, bɔchɔgaa hina nyaagi, dignitaŋa hina ra nuu wia, lalaa ra nyiŋ, nyaara ra nuu amaniyesuma wia.#Aiza 35:5-6 23Nɛr la maa n waa n wia ra aani, waabuu nuu sumaa.”
24Jɔɔn huŋhunna la kaali. Baŋ wa kaalɛɛ tuŋ, Yeesu jaa ra ŋɔ Jɔɔn wia ra tɛɛ nɛkpila la di pɛɛzi baa, “Iiŋ faa lii ii bola la hɛribɔduma la, beedee kundeere ii faa lii ií ga na de lai? Koorii bɛllɛ ii faa lii ŋɔ ií ga na peu n ta u ni u willi gɛɛ? 25Gɛɛ baal bɛl n kpa kunnanaa bɔg u hinnɛ ii faa lii ií ga nai? Akai. Koora diinii nɛra ɔɔ du laali laalinanaa ra di bahinaa. 26Ka beedee ii faa lii ií ga na lai? Kɔraawiizi dɔgtɛɛ bɛllɛ gɛɛ? Wibiire. Ií gil n ŋɔ wibii maa tɛɛ ia. U ɛɛ Kɔraawiizi dɔgtɛɛ bɛllɛ, di ɛɛ nɛzeŋ kaali guŋ gba. 27U wiarɛ ba faa sɛbi Kɔraawiizi Hɔŋ biini di ŋɔ,
‘A nuu! N daŋ hum n huŋhunni bɛl ú tɔ i see
di gaa ɛɛ sirya i ra ba.’#Mala 3:1
28Ií gil n ŋɔ wibii maa tɛɛ ia. Newea biilullaa biini, bɛl maa faa waa nɛzeŋ ɛɛwɛ lugɔ Jɔɔn naa. Ama nɛduma la maa n du Kɔraawiizi Kora biini ɛɛ nɛzenne kaaluu.”
29Banla n du de ra nuu Yeesu wiŋɔzi la, haali lampolɛɛra gba maa sɛɛ ra tɛu lugɔ Kɔraawiizi wia la deŋloore, dikuubɛɛwiai, baabuu faa la Jɔɔn la be u sɔ baa Kɔraawiizi nii la. 30Ka Farisizi la ni Gbɔgzunna lawaa waa sɛɛwɛ. Ba vɛɛ Kɔraawiizi kipar ŋmɛnɛɛ la uŋ faa ra nyiŋŋi ba hiŋ la, dikuubɛɛwiai, ba faa waa gillɛ Jɔɔn sɔ baa a nii.
31Yeesu pɛɛzi nɛra la, “Bɛɛ ń kpa filaŋkeŋ hina naa mɛgzɛi? Ɛrɛɛ ba duɛi? 32Ba ɛɛwɔɔ lugɔ bichalli n soge yawa ra dua ka ra pɛɛzi babalaa,
‘Ɛrɛɛ wiarɛ yaa huuh haŋfalii bensuno,
ka ii waa sɛɛwɛ ii sai.
Yaa kaa wii,
ka ii waa
sɛɛwɛ ii wiiyei?’
33Jɔɔn Kɔraawiizi Niisɔɔri la faa waa paanuu ra hee, u faa waa sinna nyɔɔ, ii ŋɔ, ‘Tinnanchɔgii hinnɛ.’ 34Mìŋ́ Newee Biibaal ge ra di, di ra nyɔɔ, ii ŋɔ, ‘Ií na nɛr naa dee n ɛɛ diunyiŋŋi ni sinnyɔɔri. Ií na lampolɛɛra ni wichɔgɛɛra dammu.’ 35Ka u biizi la n ɛɛ nunzunna daŋ zum wia la n ɛɛ nunzuma wia.”
Yeesu n du Farisi Saimɔn dia wia
36A Farisizi bɛl ŋɔ Yeésu ba wa di. U la u dia ga so u diiribɔr di ra di. 37Haaŋ bɛl du a bol di ɛɛ wichɔgɛɛri. U nuu lugɔ Yeesu du Farisi la dia ra di. U izi kpa pirintua ni tulaale bɛl 38di wa chi Yeesu naazi zɛɛ, di ra wii u sinii ra toŋzi u naazi ni. Haaŋ la nyuhuna faa jaŋŋɔɔ werge. U lawaa ra billi Yeesu naazi ka ra tɔgzuu di ra suuzi u naazi, ka kpa tulaale la fug waari a ni.
39Farisi la n yir Yeesu ú ba wa di la fɛ nfɛrɛ u biini, “Di baal naa faa ɛɛ Kɔraawiizi dɔgtɛɛ bɛllɛ wibii maa, u daŋ vii zum haaŋ la dee haaŋ naa n na gbɔgzuu naa n ɛɛwɛ. Wichɔgɛɛrii.”
40Yeesu ŋɔ u be, “Saimɔn, n dɔɔ wii bɛl min niŋ ŋɔ i be.”
U ŋɔ, “N Nabɔma, beedee wii deerei?”
41Yeesu ŋɔ, “Baal bɛllɛ du de. Nɛra banɛɛ di u kim. Bɛl kim kaali u dɔŋ hor bufi.
42Ka bɛl maa waa wette turgi ba kima la. Awia, u gil ba maa kima la tɛɛ baa. Too. Ubɛliirɛ n niŋ nɔŋŋuu werge kaali u dɔŋhiŋ naanɛi?”
43Saimɔn ŋɔ, “Aŋhinabe, unla kim n kannɛ ka u gil tɛu la, waabuu niŋ nɔŋŋuu werge kaali u dɔŋhiŋ la.”
Yeesu ŋɔ, “Wibiire i ŋɔ.”
44Denii Yeesu kɛɛ binni haaŋ la, ka ŋɔ Saimɔn be, “Na haaŋ naa. Miŋ zuu i dia, han tɛɛwɛ nii ń sanzi n naazi. Ka unnii wettoo kpa u sinii sanzaa, di kaa lau u nyuhuna ge di billaa. 45Hiŋwaa wan jaamɛɛ di suuziŋ. Ka haaŋ naawaa, di haŋ chi saŋa la miŋ zuu i dia naa, u hanna suuzi n naazii. Waa sɛɛwɛ u gil maa. 46Hiŋwaa waa nuu ɛɛwɛ du n nyuu. Ka unnii waa ɛɛ tulaale waari n naazi ni. 47Awia, gil n ŋɔ i be, u wichɔgaa la un dɔɔwɛ werge maa la, Kɔraawiizi gil a maanii tɛu. Awiarɛ u nɔŋŋiŋ werge la. Ka nɛr la n waa wichɔgaa ɛɛwɛ werge lugɔ Kɔraawiizi n niŋ gil tɛu werge, waabuu waa nɔŋŋaa dɔɔwɛ werge.”
48Denii Yeesu ŋɔ haaŋ la be, “Kɔraawiizi gil i wichɔgaarɛ tɛi.”
49Nɛra la n soge u be ra di la jaa ra ŋɔ dɔŋa be, “Beedee nɛdeere baal naa, u gil nɛra wichɔgaa ra tɛɛ baai?”
50Yeesu kaa ŋɔ haaŋ la be, “Yarda naa hiŋ tɛŋ naa wiarɛ i na lɛɛi la. Kɔ́raawiizi la i ni, di tɛi bampirsɔna.”
Currently Selected:
Luuk 7: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
