Гелип чыкыш 28

28‑нҗи бап

1Ысхак Якубы өз янына чагырып, оңа пата хем табшырык берип, шейле дийди: «Сен хет гызларына өйленме! 2Сен Паданарама, бабаң Бетувелиң өйүне гит-де, шол ерде дайың Лабаның гызларындан бирине өйлен. 3Гой, Гудратыгүйчли Худай сени ялкап, өрңедип, көпелтсин. Гой, Ол сенден энчеме халклар дөретсин. 4Худайың Ыбрайыма берен юрдуны өзүмизиң хәзирки гелмишек болуп яшап йөрен юрдумызы эелемегиң үчин, гой, Ол саңа ве сениң несиллериңе Ыбрайыма берен патасыны берсин!» 5Шондан соң Ысхак Якубы иберди. Якуп Бетувел месопотамиялының оглы, Якубың ве Ысавың эҗеси Ребеканың доганы Лабаның янына Паданарама гитди.

Ысав башга аяла өйленйәр

6-7Ысхагың Якуба пата берип, Паданарамдан бирине өйленери ялы, оны ол ере иберендигини ве «кенган гызларына өйленме!» дийип, Якуба табшырык берендигини ве онуң какасыдыр эҗесиниң сөзүне гулак асып, Паданарама гидендигини Ысав эшитди. 8-9Ысав Кенган гызларыны какасының халамаяндыгыны билип, Ысмайылың янына гитди ве бейлеки аялларының үстүне Ыбрайымың оглы Ысмайылың гызы, Небаётың аял доганы Махалата өйленди.

Якуп Бейтелде дүйш гөрйәр

10Якуп Беершебадан чыкып, Харана тарап гитди. 11Гүн яшанда, ол бир ерде дүшледи. Ол бир дашы яссанып, шол ерде ятды. 12Якуп дүйшүнде ерден асмана узалып гидйән басганчаклары гөрди. Худайың перишделери шол басганчаклардан ёкары чыкып, ашак дүшүп йөрмүшлер. 13Басганчакларың чүр башында дуран Реб шейле диййәр: «Атаң Ыбрайымың ве Ысхагың Худайы Реб Мендирин. Шу ятан топрагыңы Мен саңа ве сениң неслиңе берерин. 14Сениң неслиң ер йүзүниң чәгелери кимин сан-саҗаксыз болар. Олар гүндогара, гүнбатара, демиргазыга хем-де гүнорта яйрарлар. Ер йүзүниң әхли халклары сен аркалы хем-де неслиң аркалы пата аларлар. 15Мен хемише сениң билен биледирин. Сен ниреде болсаң-да, Мен сени горарын ве сени ене-де шу юрда гайтарып гетирерин. Мен сени терк этмерин ве саңа берен вадамы ерине етирерин». 16Якуп оянып: «Хакыкатдан-да, Реб шу ерде. Мен муны билмәндирин!» дийди. 17Ол горкуп: «Бу нәхили горкунч ер! Бу Худайың өйи, гөгүң дервезеси» дийди. 18Якуп даң билен турды ве келлесиниң ашагына гоюп ятан улы дашыны алып, оны ядыгәрлик хөкмүнде дикди ве онуң үстүне зейтун ягыны гуйды. 19Якуп бу ере «Бейтел»#28:19 Бейтел – бу сөз Худайың өйи диймеги аңладяр. дийип ат дакды. Бу гала озал Луз дийип атландырылярды. 20-21Ол соңра ант ичип, шейле дийди: «Эгер Худай мениң ене-де саг-аман атамың өйүне доланып гелерим ялы, мениң билен биле болуп, мени ёлда горап, маңа иймәге нан, геймәге эшик берсе, онда Реб мениң Худайым болар. 22Ядыгәрлик дикен бу дикме дашымы Худайың өйи дийип хасапларын. Эй, Худай, Сениң маңа берен хер бир задың ондан бирини мен Саңа берерин».

Currently Selected:

Гелип чыкыш 28: TukCyr16

Highlight

Copy