Mateo 26

Namagꞌupa-upakaten i mga pagbayaꞌen it mga Judio it in magꞌuꞌunu maꞌimatay nira si Jesus

[Marcos 14:1-2; Lucas 22:1-2; Juan 11:45-53]

1Pagkapanulduꞌ ni Jesus it mga iti ngayti, maat yat mga alagad ya, 2“Magkaꞌrutan mi nga duwang aldaw mana, Pistaꞌ na it Tiyaꞌliban. Iyan aku nga Taga Langit nga Ipiyanganak it Taw, idagang aku isaꞌun karansang duꞌun it krus.”

3Kat iti ngayting timpu, duꞌun it balay it Piyakamataꞌas nga Sasirduti nga si Caifas, tingped duꞌun i mga pagbayaꞌen it mga sasirduti baw mga mataꞌas nga ginuꞌu. 4Pagrundingen nira nga maꞌakalan nira si Jesus isaꞌun madakep nira kanya baw maꞌimatay. 5Temed maat nira, “Ega itakaꞌ it pistaꞌ ka barang mangiseg baw magkagulu i kadakel it mga taw.”

Biyuꞌbuꞌan it babangluun i bilug ni Jesus

[Marcos 14:3-9; Juan 12:1-8]

6Iyan duꞌun paꞌ na Jesus it Betania, naꞌaduꞌun sira it balay ni Simon ngayti nga piyagayen i bangbang ya. 7Iyan mamagkaꞌen na sira, miyabut i esang babay nga may taban nga ega basta-bastang berebtangan nga punuꞌ it piyakamarga na nga babangluun ka pirmira. Ibiyuꞌbuꞌ ya duꞌun it ulu ni Jesus ngayti.

8Miniseg i mga alagad, pagkalteg nira kayti. Kimidem-kideman nga magꞌaat, “Unuka pagꞌaduꞌadutun i babangluun ngaytu? 9In ipiyaꞌalang sana yan it maꞌal, daꞌga iyan bayad ya makatabang it mga makukuriꞌ.”

10Ega nataguꞌ it ki Jesus i pamagkidem-kidemen it mga alagad ngayti. Aypaꞌ ka maat ya, “Unuka pagsasawun mi i babay ngaytu? Magayen talaga i binwat ya ngaytut aken. 11Seked it kaꞌnu-kaꞌnung timpu kaꞌibaan mi i mga makukuriꞌ, temed aku, ega kaꞌibaan mi it maꞌlay nga timpu. 12Ka biyuꞌbuꞌan ya na nga lagi i bilug ku it babangluun nga bilang pagꞌayusun yang lagi i panlebeng it aken. 13Matuud talagay iꞌaat ku ngaytut imyu. Maski ariyen i pangadalan it Magayen ngaytung Baritaꞌ situt sinirungat langit, masangpit nagaytu i binwat ya ngaytut aken, nga yanay piyakaꞌarandeman it kanya.”

Nagpakiꞌupakat si Judas Iscariote duꞌun it mga kudakep ngaytit ki Jesus

[Marcos 14:10-11; Lucas 22:3-6]

14Bawnga iyan esang alagad ni Jesus nga si Judas Iscariote, nagpakikita kanya it mga pagbayaꞌen it mga sasirduti. 15Maat ya, “Unuy ibgay mit aken in tabangen ku kamu nga madakep si Jesus?” Binilangan kanya nga lagi it kantidad it tulung puluꞌ kat kanirang pirak. 16Ta, gimnaring sikayti, sigi na nga tulus ni Judas it karugar kanya nga isaꞌun makapaꞌalima ya si Jesus duꞌun it mga kudakep ngayti.

Magkaraꞌnen na Jesus it pangiyapun nga Pistaꞌ it Tiyaꞌliban

[Marcos 14:12-21; Lucas 22:7-16; 22:21-23; Juan 13:21-30]

17Miyabut nay aldaw nga papuꞌun nat Pistaꞌ it Tinapay nga Egay Ipagpaꞌalsa.#26:17 Uꞌnang pangiyapun nga pagkaraꞌnen it pistaꞌ ngaytu, pagpangaranat Pistaꞌ it Tiyaꞌliban (Exodo kapitulu 12). Minlep duꞌun it ki Jesus i mga alagad ya. Miningkut nga magꞌaat, “Ari ireg mu nga pagsimpanan namen it adat it pangiyapun ngaytu nga Pistaꞌ it Tiyaꞌliban?”

18Katubag si Jesus, maat ya, “Paꞌaduꞌun kamu it siyudad. Tulusun mi i itu nga taw. Aaten mi nga, ‘Maat bayan it Manigtulduꞌ namen, kayti adeꞌdeng nay ipiyabetang-betang nga timpu. Ireg ku nga puꞌsa kamit mga alagad ku, situt esang seled it balay mu i pagkaraꞌnenan namen it pangiyapun ngaytu nga Tiyaꞌliban.’” 19Namayaꞌ i mga alagad it taꞌeg ngayti ni Jesus. Duꞌun na i piyagsimpanan nira it iti nga pangiyapun.

20Iyan delem na, miyadung na si Jesus duꞌun it papangaꞌnaan, sang siraan naga it sang puluꞌ may duwa ngayting mga alagad ya. 21Iyan mamagkaꞌen na sira, maat ni Jesus, “Matuud tuy isugid ku ngaytut imyu, nga esat imyu i bayaꞌen it mga kuꞌimatay it aken.”

22Talagang nasmek nga banar i mga alagad nga nakagneg kayti. Miningkut sira nga muꞌsa, “Barang aku na, Ampuꞌan, i paꞌaaten mu ngayan?”

23Pagtubag ni Jesus, maat ya, “Talagang esa naga nga kaꞌibaan kut magdiꞌtil situt karung, yanagay bayaꞌen it mga kuꞌimatay ngayan it aken. 24Talagang maꞌimatay aku nga Taga Langit nga Ipiyanganak it Taw, ka simpri matuman i duꞌun it isiyurat nga ampang it Ampuꞌang Diyus. Temed talagang subraꞌ nga makuriꞌ i magꞌaꞌareg it bayaꞌen ngayan. Magayen pay ega na lamang ipiyanganak i iyang taw.”

25Miningkut gasiꞌ si Judas, nga yanayti i bayaꞌen it mga kuꞌimatay ngaytit ki Jesus. “Agalen,” maat ya, “unu, aku na i paꞌaaten mu ngayan?”

Katubag si Jesus, “Eeꞌ, matuud i inaat mu ngayan.”

Piyapuꞌnan ni Jesus i pamwat it apunan nga pagdemdem it kamataynen ya

[Marcos 14:22-26; Lucas 22:14-20; 1 Corinto 11:23-26]

26Iyan mamagkaꞌen paꞌ sira, kimnuꞌmit si Jesus it tinapay bawnga nagpasalamat duꞌun it Ampuꞌang Diyus. Pagkapasalamat ya, biyagiꞌ ya na bawnga ibinggay duꞌun it mga alagad ya ngayti. Maat ya, “Iya, kawaꞌen mi ka kaꞌnen mi, ka bilug kuytu.”

27Iꞌimnan siꞌ i singkel ya. Nagpasalamat naga duꞌut Ampuꞌang Diyus bawnga maat ya, “Minum kamu nga muꞌsa. 28Sabap itu ngaytu, duguꞌ kuytu nga keseg it pakiꞌupakat it Ampuꞌang Diyus kat mga taw. Ka ipaturuꞌ kuy duguꞌ ku isaꞌun dakel i mapasinsiyaan kat mga kasalaꞌan nira. 29Matuud i iꞌaat kut imyu, nga garing kayti daꞌku na minum it pagꞌimnun ngayan nga letes it ubas seked it aldaw nga baꞌgu na nga pagꞌimnun i imnun ku nga kaꞌibaan ku siꞌ kamu duꞌun it kaꞌadiꞌan it Amaꞌ ku.”

30Pagkatupus ni Jesus it pagꞌampangen ya ngayti, namagkantaꞌ sirat sangbat, bawnga napanaw na sira ka paꞌaduꞌun it Mungsuꞌ it Olibo.

Ipagsugid ni Jesus nga payluwan kanya ni Pedro

[Marcos 14:27-31; Lucas 22:31-34; Juan 13:36-38]

31Uyut it mga inampang ni Jesus it iting delem i sasar ya nga magꞌaat, “Kayti nga delem, muꞌsa kamu, kumurang i pamayaꞌ mit aken. Tananan mi nayan aku. Ka subung nat inaat ngayan duꞌun it isiyurat nga ampang it Ampuꞌang Diyus ngayan, nga magꞌaat,

‘Imatayen ku i manigꞌeper.

Aypaꞌ baraꞌan it mga tupa, matari-tariwanak na.’#26:31 Zacarias 13:7.

32Temed pagꞌegen ku it paꞌuliꞌ, muꞌna aku nat imyu duꞌun it Galilea.”

33Mampang si Pedro, maat ya, “Maski kumurang i pamayaꞌ nira nga muꞌsa it imu, temed aku, ega tananan ku ikaw seked it kaꞌnu-kaꞌnu.”

34Pagtubag ni Jesus, maat ya, “Kamatuudan tuy iꞌaat kut imu, Pedro, nga itu nga delem, parabir tumaraꞌuk i manuk, tulu na nga paylu mu sabap it aken.”

35Temed magsusubraꞌ ga si Pedro, maat ya, “Maski baꞌ imatayen aku nga iba mu, ega talaga ipaylu ku ikaw!” Atkayti nagay inampang it muꞌsa ngayting beken nga mga alagad.

Nanalangin si Jesus duꞌut Getsemani

[Marcos 14:32-42; Lucas 22:39-46]

36Bawnga piyabayaꞌ sira ni Jesus duꞌun it esang rugar nga pagpangaranat Getsemani. Pagꞌabut nira duꞌun, maat yat mga alagad ya ngayti, “Sikaytu kamu na daꞌan, ka manalangin aku duꞌut langbu-langbus ngayti.” 37Temed piyabayaꞌ ya naga si Pedro baw duwa ngayting mga anak ni Zebedeo. Nagpapuꞌun it rumaꞌe-raꞌet i nakem ya baw talagang magkasusa kanya. 38Inaat yay tulu ngayti, “Talagang magkasusa aku nga banar nga subung it ipatay ku na. Esa-esa ga, melat kamu na daꞌan sikaytu baw ayaw kamut igaꞌ. Paꞌlek kamu nga iba ku.”

39Nagpaꞌala-alaid si Jesus duꞌut kanira. Kiminleb kanya bawnga nanalangin, nga magꞌaat, “Amaꞌ ku, in mapakay sana, ipaꞌalaid mut aken i itu nga labayen ku nga kakuriꞌan. Takaꞌ ega aken nga kaꞌirgan i masunud, in daꞌga imu nga kaꞌirgan.”

40Pagkapanalangin ya, nagpaꞌuliꞌ duꞌun it tulu ngayti. Abutan ya, mamagꞌigaꞌ na. Siyulag ya sira bawnga maat yat ki Pedro, “Unu, talaga nga ega makapaꞌlek kamu nga iba ku it maski sang uras na lamang? 41Magayen indaꞌegen mi i kuꞌigaꞌ baw manalangin kamu, isaꞌun daꞌkamu daꞌgen it maraꞌe-raꞌet in sukdanan i pamayaꞌ mit aken. Sabap kat nakem mi, kupamayaꞌ kamu nga matuud, temed yay magꞌenget, kaꞌirgan it bilug mi nga subuk ega kupamayaꞌ ka malubay.”

42Nagpaꞌala-alaid siꞌ kanya ka nanalangin siꞌ, nga magꞌaat, “Amaꞌ ku, in ega naga maꞌawaꞌ i kakuriꞌan ngaytu nga labayen ku, masunud talaga i imu nga kaꞌirgan.”

43Nagpaꞌuliꞌ siꞌ kanya duꞌun it tulu ngayti. Abutan ya siꞌ, maeꞌlek na, ka kuꞌigaꞌ na sirang kuꞌigaꞌ. 44Tiyananan ya siꞌ i tulu ngayti nga alagad ya, ka nanalangin siꞌ, it atkayti naga nga panalangin.

45Pagkapanalangin ya, piyaꞌuliꞌan ya siꞌ i tulu ngayti. Pagꞌabut ya, maat ya, “Unu, magꞌigaꞌ kamu paꞌ, kupapaꞌna ga lamang? Siguru naꞌbut nay uras nga nakadagang aku na nga Taga Langit nga Ipiyanganak it Taw. Ipaꞌalima aku na duꞌun it mga taw nga makasalaꞌan. 46Bangun kamu na ka tami na. Wayan nay dimnagang ngayan it aken!”

Diyakep na si Jesus

[Marcos 14:43-52; Lucas 22:47-53; Juan 18:1-12]

47Ega paꞌ natupus i ampang ni Jesus, miyabut na si Judas ngayting kaꞌuyutan naga it sang puluꞌ baw duwa ngayting mga alagad. Dakel nga mga taw i magbabayat kanya nga rangkap it basiꞌ, nga kat beken, pupukul i sekel. Tiyaꞌeg sira it mga pagbayaꞌen it mga sasirduti baw mga mataꞌas nga ginuꞌu. 48Duꞌun paꞌ sirat pagpanawan, ipiyagꞌaat na nga lagi ni Judas it mga kaꞌibaan ya ngayti i buwaten ya. Maat ya, “Iyan in siyuy arkan ku, iyan nay enged ta. Dakpen mi nga lagi.” 49Pagꞌabut nirang lagi, diri-diritsu si Judas duꞌut ki Jesus. “Agalen,” maat ya, “magayeng delem!” Bawnga inarkan ya.

50Kaꞌampang si Jesus, “Iba-iba kut kaꞌlay ngaytu, buwaten mu lamang i pagꞌengden mu.” Ta, riyusuban na kanyat mga magbabayaꞌ ngaytit ki Judas ka diyakep na nira. 51Pagkalteg it sang kataawan nga alagad, pagbarut yat yuꞌgut, pagtigbas. Uripen it Piyakamataꞌas nga Sasirduti i tinigbasan ya. Napalung i talinga nga naꞌiguꞌ.

52Pagkalteg ni Jesus, siyabatan ya. Maat ya, “Iꞌangkap muy yuꞌgut mu ngayan, ka iyan magpamunuꞌ, ipatay ya, bunuꞌun naga. 53Unu, ega magkaꞌrutan mu nga in ireg ku nga patabang, makaꞌangut aku duꞌun it Amaꞌ ku it rinibu-ribu nga mga anghil? Insigida yan nga papaꞌasituun ya sira. 54Temed in angutun ku nga tabangen, magꞌuꞌunu matuman i duꞌun it mga isiyurat nga ampang it Ampuꞌang Diyus, nga magsugid nga talagang magꞌabut i atkaytu ngaytu?”

55Bawnga siyarunga ni Jesus i mga taw ngayti. Inaat ya sira, “Unuytu, adimaat magpangukus aku nga kuntraꞌen i gubirnu, ka rangkap kamu nat basiꞌ, nga kat beken pupukul na, i miyabut ngaytu nga magpandakep it aken? It aldaw-aldaw magpanulduꞌ aku duꞌun it Templo, temed ega naga diyakep mi aku duꞌun. 56Temed nagꞌabut tuy atkaytu isaꞌun matuman i isiyurat it mga prupitaꞌ nga ipiyaꞌampang it kanira.” Egay beken, nagsigpalagyu nay mga alagad ngayti. Tiyananan na kanya.

Siyumarya si Jesus it Piyakamataꞌas nga Sasirduti baw mga kaꞌuyutan it Sanedrin

[Marcos 14:53-65; Lucas 22:54-55; 22:63-71; Juan 18:19-24]

57Tiyaban si Jesus it mga dimnakep ngaytit kanya duꞌun it balay ni Caifas, nga Piyakamataꞌas nga Sasirduti. Tingped duꞌun i mga manigpaꞌyag it urdin baw mga mataꞌas nga ginuꞌu. 58Piyarurumbayaꞌan naga ni Pedro si Jesus seked duꞌun nat balay ngaytit Piyakamataꞌas nga Sasirduti. Siminled kanya duꞌun it pagkakaliputputan nga kamaꞌyagan. Nagpakiꞌadung na kanya duꞌun it mga guwardiya, ka isaꞌun mamuyaan ya naga i mabetangan ni Jesus.

59Ta, mga pagbayaꞌen it mga sasirduti baw muꞌsa ngayting kaꞌibaan nira nga kaꞌuyutan it Sanedrin, sigi nga tulus nira it manistigu kuntraꞌ it ki Jesus ngayti, isaꞌun maꞌimatay nira kanya. 60Temed egay magkaparagan nira, maski na maat dakel na nga nanistigu, ka namelag-belagen it ipagsugid pasar it ki Jesus ngayti. Naꞌlay na, may duwang kataawan nga simnugid, 61nga magꞌaat, “Maat bayan it itung taw, kaya ya kunuꞌ nga ranggaꞌen yay Templo it Ampuꞌang Diyus ka emanen ya it tulung aldaw lamang.”

62Pagkagneg it Piyakamataꞌas ngayting Sasirduti, timnindeg kanya bawnga inaat ya si Jesus, “Unu, may katubag mu it nasugid nira ngaytung panistigu kuntraꞌ it imu?” 63Temed egay tetet ni Jesus.

Inaat kanya it Piyakamataꞌas nga Sasirduti ngayti, “Kayti pasumpaen ku ikaw nga pagdedngegen ka it Ampuꞌang Diyus nga egen it egay kaskedan, ka isugid mut amen in ikaw na talaga i isiyanggup nga Cristo nga Anak it Ampuꞌang Diyus!”

64Katubag si Jesus, maat ya, “Eeꞌ, matuud bay inaat mu ngayan. Temed ituy masugid kut imyu, nga garing kayti mamuyaan mi aku, nga Taga Langit nga Ipiyanganak it Taw, nga magꞌaꞌdung duꞌun it iwanan nga ayun it landaw nga gunaan nga Ampuꞌang Diyus. Baw beken, maltegan mi aku nga magꞌaꞌabut nga gumaring duꞌut langit nga magpangindelangan it kunum.”

65Pagkagneg it Piyakamataꞌas ngayting Sasirduti, piyanrarasik yay sadili yang pakayan it pangise-iseg. Miyampang kanya nga magꞌaat, “Talagang iyan nga ampang, magpangambuꞌ kanya it pagkaDiyus! Ta, unuka kaꞌilangan tami paꞌ i manistigu? Daꞌga baꞌ nagnegan mi na nga muꞌsa i inampang ya ngaytu nga magpasbung kanya it Ampuꞌang Diyus? 66Ta, kayti, unuy makaꞌukuman mi?”

Mampang i muꞌsang kaꞌuyutan it Sanedrin ngayti, “Bagay talagat kanya, imatayen!”

67Egay beken, binwat nira, siyariyan nat supra i rupa ni Jesus. Tiyamar nira nat suntuk. Kat beken, siyariyan nira nat tiꞌkul, 68nga yanay pagꞌampa-ampangen nira, “Cristo, pintuꞌun mu! Siyuy nagpasakit it imu?”#26:68 Tiyagnepan niray rupa ni Jesus isaꞌun ega kalteg kanya (Marcos 14:65).

Piyayluwan ni Pedro si Jesus

[Marcos 14:66-72; Lucas 22:54-62; Juan 18:15-18; 18:25-27]

69Ki Pedro ngayti nga nagparurumbayaꞌ naga, yanayti duꞌun lamang it kamaꞌyagan, magꞌaꞌdung. Inlep kanya it esang manigsirbi nga babay. Inaat kanya nga magꞌaat, “Kaꞌibaan ka nagay imu ni Jesus ngayang taga Galilea!”

70Temed piyayluwan ni Pedro kat adapan nirang muꞌsa. Maat i tubag ya, “Bilaꞌ, ega! Taꞌway in unuy pagꞌaaten mu ngayan.”

71Nagpaꞌugad si Pedro duꞌun it puwirtaꞌan, temed naltegan kanya it esa gasing manigsirbi. Maat yat mga duꞌun ngayti, “Itu nga taw, kaꞌibaan tu ni Jesus ngayan nga Nazaretanen.”

72Nandaꞌga-daꞌga siꞌ si Pedro it sumaꞌup. “Bilaꞌ,” maat ya, “ibet na baꞌ, ega talaga kilala kuy iyang taw, paꞌaaten mi ngayan!”

73Ega naꞌlay, inlep na si Pedro it duꞌun ngayti nga mga taw. Maat nira, “Iba ka naga baꞌ nira! Magkaꞌrutan asat pangangampangan mu ngayan nga taga Galilea ka.”

74“Bilaꞌ, ega baꞌ! Ibet na baꞌ nga matay aku,” maat ni Pedro, “talagang ega kilala kuy iyang taw.”

Sakaliꞌ nga may timnaraꞌuk nga manuk. 75Duꞌun nademdeman ni Pedro i inaat ngayti ni Jesus nga, “Parabir tumaraꞌuk i manuk, tulu na nga paylu mu sabap it aken.” Nanliꞌwan na kanya. Siminggaw kanya it ega pateng nga sugaw.

Currently Selected:

Mateo 26: TBWONT

Highlight

Copy