Lucas 6:27-49
Lucas 6:27-49 TBWONT
“Itu siꞌ i iꞌaat kut imyu nga mga magpagneg. Rarasan mi i mga magpakikuntraꞌ it imyu. Paltegan mi it magayeng adat i mamagꞌiseg it imyu. Ipanalangin mi nga ildawan i magpanumpa it imyu baw ipanalangin mi i magpakuriꞌ it imyu. In beteꞌ may tumampaling it imu kat iwanang ayun nga basingil mu, pataꞌnan mu na lamang nga tampalingen ya gasiꞌ i sang bali. Ta in agawun i gulamen mu, ibgay mu nay pati badyuꞌ mu. Talagang iyan i magayen, begayan mu i magꞌangut asat imu, baw in beteꞌ may misiꞌ it kusas mu, ega na maat baiꞌen mu paꞌ. Aypaꞌ, buwaten mi duꞌun it beken, iyan nga ireg mi nga yanagay buwaten nira gasiꞌ it imyu. Ka in iyan lamang, mga magraras it imyu i rarasan mi, unu paꞌ i tumbas nga pagꞌeꞌlaten mi? Ka maski mga makasalaꞌan, pagrarasan nira nagay iyan may raras it kanira. Baw in iyan lamang i pagpaltegan mi it magayeng adat, iyan nga magpalteg gasiꞌ it imyu it magayen nagang adat, ta unu pay tumbas nga pagꞌeꞌlaten mi? Ka maski mga makasalaꞌan, pagbuwaten nira nagay atkaytu. Ta, in iyan lamang i paꞌutangen mi, iyan taw nga pagsisiguruun mi nga makabayad asat imyu, ta unu pay tumbas nga pagꞌeꞌlaten mi? Ka maski mga makasalaꞌan, kat paniguru nira nga makabayad mamagpaꞌutang naga sira. Iyan talagay magayen, rarasan mi i mga kakuntraꞌ mi, baw paltegan mi sira it magayeng adat. Paꞌutang kamu maski egay pagsisiguruun mi nga may pamamayad ya. Ka basta atkaytu i buwaten mi, siguradu nga dakulaꞌ i tumbas nga tanggapen mi, baw maꞌyag nga mga anak kamu na it Ampuꞌang Diyus nga Subrang Piyakamataꞌas. Sabap pagꞌildawan ya nagay mga ega magkaꞌrut pasalamat baw mga maraꞌe-raꞌet i adat. Kaꞌilangan magmaꞌildaw kamu, ka pasbung kamu it Amaꞌ mi nga maꞌildaw.” “Paꞌalaidan mi i adat nga pirming pagsitaren i maꞌiba mi, isaꞌun daꞌkamu naga magkasitaran. Atnagay adat nga ega basta-basta ukumanan i maꞌiba mi, isaꞌun daꞌkamu naga ukumanan. In daꞌga, pasinsiyaen mi i masigkataw mi isaꞌun pasinsiyaen kamu nagay imyu. Magmaꞌatag kamu, ka basta atkayan, pagꞌatagan kamu nagay imyu it ega kurang nga pagtakes, in daꞌga tanes baw pagyenggeken baw urumbung paꞌ. Sabap tatakes nga paggamiten mi duꞌut beken, yanagay gamiten in kamu siꞌ.” Iningkut sira ni Jesus it ipiyaꞌalimbawa ya nga magꞌaat, “Unu, mapakay nga manigdundun it beleg i kasubung ya nagang beleg? Daꞌga baraꞌan ya in atkayan, makataptap sira nga duwa duꞌun it kali? Matuud nga iyan alagad, ega kasubraꞌ it manigtulduꞌ ya. Temed basta natulduꞌan na nga banar, simpri makasbung na kanya it manigtulduꞌ ya. Taꞌway in unuka, in puling gat beken nga kapu-kapu lamang, iyan i pagsisigmataen mu nga pirmi. Temed in sadili mu nga puling nga magbabangkar nat mata mu, pagpataꞌnan mu lamang. Ta, magꞌuꞌunu mu maꞌaat i maꞌiba mu, ‘Daliꞌ, awaꞌen kuy puling mu ngayan nga kapu-kapu,’ it may magbabangkar asat mata mu? Aypaꞌ ikaw nga ipagpabetang mu nga egay magkaꞌiway kat pangaꞌgenan mu, gayen-gayenen mu daꞌan i sadiling adat bawnga mapakay nga iwayen muy ega magayeng buwat it maꞌiba mu. Awaꞌen mu daꞌan i magbabangkar ngayan, isaꞌun makalteg ka it magayen. Magayen-gayen mut kaꞌawaꞌ i puling it maꞌiba mu.” “Iyan magayen nga kayu, simpri ega muwaꞌ it maraꞌe-raꞌet nga buwaꞌ. Baw ega gasiꞌ muwaꞌ it magayeng buwaꞌ i kayu nga magsarut. Simpri, magkakilalaan i kada kayu duꞌun it buwaꞌ ya. Ka ega muwaꞌ it igos i sapinit, u muwaꞌ it ubas i dikut nga madugiyen. Ta atkayan naga i taw. Sabap taw nga magayen i adat, pirmi nga magayen i magliꞌwan kat baꞌbaꞌ ya, sabap purus magayen i ipagdawaꞌ ya kat nakem ya. Takaꞌ taw nga purus maraꞌe-raꞌet i magdadawaꞌ kat nakem ya, purus naga maraꞌe-raꞌet i magliꞌwan kat baꞌbaꞌ ya. Ka makilalaan kat ampang it taw i in unuy magdadawaꞌ kat nakem ya.” Bawnga miningkut si Jesus, nga magꞌaat, “Ta, unuka pagtaꞌwagen mi aku nga Ampuꞌan, it ega naga pagbuwaten mi i mga ipagꞌaat kut imyu? Kayti ipatantu kut imyu in unuy masbungan it iyan, taw nga magpaꞌasitut aken, ka pagpagnegan ya i pagꞌampangen ku, bawnga pagsunudun ya. Subung kanya it esang taw nga nagpatindeg it balay, nga talagang ipiyatꞌed ya i mga arigi ya duꞌun it lugtaꞌ nga nagragiꞌ it batu. Pagꞌabut it dimnaꞌet, nga liminyud it dimnakulaꞌ na nga luyud baw naꞌampung i balay ya ngayti, temed ega naꞌunu-unu, ka talagang piyapaꞌgen yat kamatuudan. Temed iyan taw nga, lamang magkagnegan yay panulduꞌ ku, temed ega pagsunudun ya, kanya i subung it taw nga rumang-rumang lamang i pagpatindeg yat balay, ka ega piyapaꞌgen ya nga ipiyatꞌed duꞌut lugtaꞌ. Ta pagluyud, naꞌampung gasiꞌ. Unupat paribasay ega mapaꞌgen, gimimbaꞌ nga lagi baw naꞌukar it ukar banar.”