Lucas 22

Nagpakiꞌupakat si Judas Iscariote duꞌun it mga kudakep ngaytit ki Jesus

[Mateo 26:1-5; 26:14-16; Marcos 14:1-2; 14:10-11]

1Magꞌadeꞌdeng-magꞌadeꞌdeng i Pistaꞌ it Tinapay nga Egay Ipagpaꞌalsa, nga pagtaꞌwagen it Tiyaꞌliban.#22:1 Uꞌnang pangiyapun nga pagkaraꞌnen it pistaꞌ ngaytu, Pistaꞌ tu it Tiyaꞌliban. Bawnga seledat pitung aldaw, Pistaꞌ it Tinapay nga Egay Ipagpaꞌalsa. Temed sumang kaꞌanu pagtaꞌwagen i muꞌsa ngaytu it Tiyaꞌliban. 2Iyan mga pagbayaꞌen it sasirduti baw mga manigpaꞌyag it urdin, sigi nga pagrundingen nira in magꞌuꞌunu maꞌimatay si Jesus it ega dalaꞌan sirat mga taw. Sabap yanayti, magꞌiꞌlam sira naga it mga taw ngayti nga magkasaga it panulduꞌ ya.

3Ta, piyanakman na ni Satanas si Judas Iscariote, esa kat sang puluꞌ baw duwa ngayting mga alagad, nga idagang ya si Jesus. 4Aypaꞌ ka napanaw na si Judas ngayti, nga nagpakiꞌupakat duꞌun it mga pagbayaꞌen it sasirduti baw mga pagbayaꞌen it guwardiya it Templo, nga in magꞌuꞌunu makadagang ya si Jesus duꞌut kanira. 5Namagkasagya sira baw simnanggup nga begayan kanya it pirak. 6Siyagyaan ni Judas i isiyanggup nira ngaytit kanya. Ta, gimnaring sikayti, timnulus na kanya it timpu nga makapaꞌalima ya si Jesus duꞌun it mga kudakep ngayti, it ega mamuyaan it kadadaklan.

Ipiyasimpan na ni Jesus i pangiyapun nga Pistaꞌ it Tiyaꞌliban

[Mateo 26:17-19; Marcos 14:12-16]

7Miyabut nay aldaw nga papuꞌun nat Pistaꞌ it Tinapay nga Egay Ipagpaꞌalsa, aldaw nga ipagꞌimatay it uꞌuybun it tupa nga kaꞌadatan it Pistaꞌ it Tiyaꞌliban. 8Singkat ni Jesus si Pedro baw si Juan ngayti nga mga alagad ya. Maat yat kanira, “Mapanaw kamu ka simpanen mi i adat it pangiyapun ngaytu nga Tiyaꞌliban isaꞌun makaꞌen tami.”

9“Ay ari, Agalen, i ireg mu nga pagsimpanan namen?” maat nira.

10“Atkaytuy buwaten mi,” maat ni Jesus, “paꞌaduꞌun kamu it siyudad. Pagꞌabut mi yan duꞌun, may maꞌanuꞌan mi yan nga esang lalaki nga magtitibeng it bangaꞌ nga sasaꞌgeban. Dasunun mi na kanya seked duꞌut balay nga abutun ya. 11Baw aaten mi i tagbalay, ‘Ipagpaꞌingkut bayat amen it Manigtulduꞌ namen in ari seled nga mapakay nga pangaꞌnan yat pangiyapun ngaytu nga Tiyaꞌliban, nga sang siraan nagat mga alagad ya.’ 12Ta, itulduꞌ ya nayan it imyu i esa nga malayaw nga seled duꞌun it dibwat, nga kumplitu nat garamiten. Duꞌun nat iyan nga seled i pagsimpanan mi.”

13Napanaw nay duwa ngayti, baw naꞌanuꞌan nira nga matuud i kumpur inaat ngayti ni Jesus it kanira. Egay beken, nagsimpan na sira it pangiyapun nga adat it iti nga pistaꞌ.

Piyapuꞌnan naga ni Jesus i pamwat it apunan nga pagdemdem it kamataynen ya

[Mateo 26:26-30; Marcos 14:22-26; 1 Corinto 11:23-26]

14Iyan naꞌbut nay uras, miyadung na si Jesus duꞌun it papangaꞌnan, sang siraan it mga alagad ya ngayti. 15Maat ni Jesus it kanira, “Subrang ireg ku nga ireg nga sang tamiyan i magkaraꞌnen it Tiyaꞌliban ngaytu nga pangiyapun, parabir aku lumabay it kakuriꞌan. 16Ka matuud talagay iꞌaat kut imyu nga ega naytu kumaꞌen akut sumaꞌup it itu ngaytu seked it ega paꞌ matuman i pagpapuntuꞌan kaytu duꞌun it kaꞌadiꞌan it Ampuꞌang Diyus.” 17Singkel na ni Jesus i iꞌimnan. Pagkaskel, bawnga nanalangin ka nagpasalamat. Pagkatupus ya, ipiyakawaꞌ ya. Maat ya it mga alagad ya ngayti, “Iya, pagbagiꞌ-bagiꞌan mit minum. 18Ka matuud talagay iꞌaat kut imyu nga garing kayti, daꞌku na minum it letes it ubas ngaytu seked it ega paꞌ miyabut i kaꞌadiꞌan it Ampuꞌang Diyus.”

19Bawnga kimnuꞌmit si Jesus it tinapay. Pagkapasalamat ya duꞌun it Ampuꞌang Diyus, biyagiꞌ ya na bawnga ibinggay duꞌun it mga alagad ya ngayti. Maat ya, “Ituꞌun, bilug kuytu nga buwateng salisi kat ikaribri mi. Buwaten mi tu nga pirmi nga pagdemdem mi it kamataynen ku.”

20Pagkakaꞌen nira, iꞌimnan siꞌ i singkel ya. Maat ya, “Rugud it iꞌimnan ngaytu, keseg it baꞌgung pakiꞌupakat it Ampuꞌang Diyus kat katataawan, nga egay beken nga keseg ngaytu in daꞌga sadili ku nga duguꞌ nga ipaturuꞌ ku sabap it imyu.

21Temed kayti, kaꞌibaan ku naga it magkaꞌen i bayaꞌen it mga kuꞌimatay it aken. 22Talagang maꞌimatay aku nga Taga Langit nga Ipiyanganak it Taw, ka simpri matuman i ipiyabetang-betang it Ampuꞌang Diyus. Temed talagang subraꞌ nga makuriꞌ i magꞌaꞌareg it bayaꞌen ngayan!” 23Pagkagneg it mga alagad ngayti, magꞌingku-ingkutun sira in siyu manggid it kanira i muwat it atkayti ngayti.

Panulduꞌ nga ega mapakay i adat nga mapiyataꞌas-taꞌas

24Beken paꞌ nga binwat it mga alagad ngayti, magdaꞌe-daꞌegen sira in siyu manggid it kanira i kilalaen nga piyakamataꞌas. 25Pagkamuya ni Jesus kayti, maat ya it kanira, “Iyan mga adiꞌ it mga taw nga ega magkilalat Ampuꞌang Diyus, maꞌigpit i pamegbeg nira it mga pagsasakpen nira ngayti. Baw iyan beken nga mga magpupudir ngaytu, ireg nira nga panaꞌwag it kanira, Nakman nga Manigtabang it Katataawan. 26Temed kamu, ega atkayan. In daꞌga iyan piyakamataꞌas, dapat nga ipabetang yay sadili ya nga timawaꞌ lamang, baw iyan magpamaalaꞌ, manigsirbi naga it mga kaꞌibaan ya. 27Ka siyu bay subraꞌ nga mataꞌas, iyan magꞌaꞌdung duꞌun it papangaꞌnan u iyan manigtarakan? Daꞌga baꞌ iyan nga pagtarakanan? Temed aku nga Ampuꞌan mi, kaꞌiba-iba mi nga bilang manigsirbi mi.

28Talagang kamu, naneꞌteꞌ nga iba ku kat mga nalabayan ku nga kakuriꞌan nga bilang sukdan it aken. 29Ta, in magꞌuꞌunu pagꞌaꞌargan akut Amaꞌ ku nga duꞌun it langit it pagkaꞌadiꞌ, atkayan naga pagꞌaꞌargan ku kamu ngaytu it pagkaꞌadiꞌ, 30isaꞌun sang tamiyan i magkaꞌen baw magꞌinum duꞌun it kaꞌadiꞌan ku. Baw kaꞌibaan ku na kamu kat pamegbeg ku ngaytut mga taawan ku nga bilang tungtung-inapuꞌ it sang puluꞌ may duwang iriyasyaꞌ ni Israel.”

Ipagsugid ni Jesus nga payluwan kanya ni Pedro

[Mateo 26:31-35; Marcos 14:27-31; Juan 13:36-38]

31Bawnga maat ni Jesus it ki Simon Pedro, “Simon, pagꞌangutun kamu ni Satanas nga sukda-sukdanan ya. Ta, ipagpalugut nga kamung muꞌsa, masukdanan i pamayaꞌ mi. 32Temed ta, ipiyanalangin ku naga, Simon, nga ega kapangindiꞌ ka it pamayaꞌ mut aken. Bawnga in kasinguliꞌ ka na baw makaꞌuliꞌnang kemseg i pamayaꞌ mut aken, paksegen mu i pamayaꞌ it mga kaꞌibaan mu ngaytu nga mga sulsug mu kat pamayaꞌ.”

33Katubag si Pedro, “Yay matuud, Ampuꞌan, ega patuduꞌan ku ikaw. Maski pirisuun u imatayen ka paꞌ, iba mu yan aku.”

34Temed pagtubag ni Jesus, maat ya, “Kamatuudan tuy iꞌaat kut imu, Pedro, nga parabir tumaraꞌuk i manuk mabway nga kukuꞌ-aldaw, tulu na nga paylu mu sabap it aken.”

Magayen ega palimbay i mga alagad in mapanaw

35Bawnga iningkut ni Jesus i mga alagad ya ngayti, maat ya, “Ta unu, iyan tiyaꞌeg ku ngayan kamu nga mapanaw nga maat ku ngayan, ayaw kamut pagbalun it ipagꞌalang, pagbetangan it ipagꞌildaw it imyu, u panggaganti it talumpaꞌ, unu, nakuriꞌan kamu?”

“Ta, ega,” tubag nira.

36“Temed kayti,” maat ni Jesus, “magayen ega palimbay kamu. In may ipagꞌalang mi u pagbetangan ngayan, pirisiꞌnen mi na. Iyan egay yuꞌgut baw egay iꞌalang ya kaytu, magayen ipaꞌalang yay gulamen ya ka malang it kanyang yuꞌgut. 37Sabap ipagꞌaat kut imyu nga matuman situt aken i pagꞌaaten it kasuratan ngayan nga magꞌaat,

‘Ipiyabetang kanya nga kaꞌuyutan it mga mamagbuwat it karaꞌe-raꞌetan.’#22:37 Isaias 53:12.

Sabap iyan mga magsusurat nga pasar it aken, magkatuman na.”

38Maat i mga alagad ngayti ni Jesus, “Ampuꞌan, wayni na bay duwa nga kayuꞌgutan.”

“Seked na daꞌan sikayan,” maat ni Jesus.

Nanalangin si Jesus

[Mateo 26:36-46; Marcos 14:32-42]

39Subung nat pagbuwaten ni Jesus garing it pagꞌabut nira duꞌun, napanaw siꞌ kanya nga gimnaring duꞌun it siyudad, ka naꞌaduꞌun it Mungsuꞌ it Olibo. Miyayat kanya i mga alagad ya ngayti. 40Pagꞌabut nira duꞌun, maat ya it kanira, “Magayen manalangin kamu isaꞌun daꞌkamu daꞌgen it maraꞌe-raꞌet in sukdanan i pamayaꞌ mit aken.”

41Bawnga nagpaꞌala-alaid si Jesus duꞌut kanira it may sang buntal. Limningkuꞌud kanya baw nanalangin. 42“Amaꞌ,” maat ya, “in mapakay mu, sana ega na ipatabus muy pagdadarapaꞌen ku ngaytu nga kakuriꞌan. Temed ega aken nga kaꞌirgan i masunud, in daꞌga imu nga kaꞌirgan.” 43Iyan magpanalangin na ngayti kanya, miyabut i esang anghil nga garing duꞌun it langit. Piyakseg yay nakem ni Jesus ngayti. 44Ereꞌeret nga keber-keber it seled ya. Aypaꞌ nanalangin kanya it pagꞌubsu-ubsun ya nay kat nakem ya. Magrarapatak duꞌut lugtaꞌ i liꞌnget ya nga magturuꞌ nga may uyut na nga duguꞌ.

45Timnindeg kanya pagkatupus yat panalangin, baw nagpaꞌuliꞌ duꞌun it mga alagad ya ngayti. Abutan ya, mamagꞌigaꞌ na, ka mamagkasmek sira gasing banar. 46Siyulag ya sira baw maat ya, “Unuka magꞌigaꞌ kamu na? Magbangun kamu ka manalangin isaꞌun daꞌkamu daꞌgen it maraꞌe-raꞌet in sukdanan i pamayaꞌ mit aken.”

Diyakep na si Jesus

[Mateo 26:47-52; Marcos 14:43-50; Juan 18:1-12]

47Magꞌampang paꞌ si Jesus, miyabut nay dakel na nga pagtaw nga magbabayaꞌ it ki Judas ngayti nga kaꞌuyutan it sang puluꞌ baw duwa ngayting alagad ya. Diri-diritsu si Judas duꞌun it ki Jesus ka arkan ya. 48Temed kaꞌampang si Jesus, maat ya, “Unuytu, Judas, pagꞌarkan mu aku nga Taga Langit nga Ipiyanganak it Taw ka, tandaꞌ ngaytut pagmaꞌal, ipagpakilala mu aku kat mga kudakep ngayat aken?”

49Pagkamuya it beken ngayting mga alagad ya it atkayti na palan, maat nira, “Ampuꞌan, unu, manigbas kami na?” 50Pagbarut it sang kataawan nga alagad it yuꞌgut ya, pagtigbas. Uripen it Piyakamataꞌas nga Sasirduti i tinigbasan ya. Napalung i naꞌiguꞌ nga talinga nga ayun kat iwanan.

51Pagkalteg ni Jesus, maat ya, “Ayaw. Pataꞌnan mi na lamang sira.” Bawnga tiyapal yay talinga ngayti ka ipiyaꞌuliꞌnan.

52Bawnga inaat ni Jesus i mga pagbayaꞌen it sasirduti, mga pagbayaꞌen it guwardiya it Templo baw mga mataꞌas nga ginuꞌu nga duꞌun, nga magpandakep na ngaytit kanya. Maat ya it kanira, “Unuytu, adimaat magpangukus aku nga kuntraꞌen i gubirnu, ka rangkap kamu nat basiꞌ, nga kat beken pupukul na, i miyabut ngaytu? 53It aldaw-aldaw magpanulduꞌ aku duꞌun it Templo, temed ega naga diyakep mi aku duꞌun. Takaꞌ kayti na ngaytu nga delem, piyaꞌintulutan kamu nga makatimpu. Baw piyabayaꞌan na si Satanas nga tabusun yay kubwaten ya nga karaꞌe-raꞌetan.”

Piyayluwan ni Pedro si Jesus

[Mateo 26:57-58; 26:69-75; Marcos 14:53-54; 14:66-72; Juan 18:12-18; 18:25-27]

54Egay beken, tiyaban si Jesus it mga dimnakep ngaytit kanya duꞌun it balay it Piyakamataꞌas nga Sasirduti. Ki Pedro, nagparurumbayaꞌ naga. 55Pagꞌabut duꞌun, binwat it mga guwardiya ngayti, nagduꞌput nat apuy duꞌun it pagkakaliputputan nga kamaꞌyagan, ka dagpiꞌan nira. Ta, nagpakidagpiꞌ na duꞌut kanira si Pedro. 56Naltegan it esang manigsirbi nga babay si Pedro ngayting nagpakidagpiꞌ. Pagkalteg ya, liniling yat magayen baw maat ya, “Kaꞌibaan naga ni Jesus ngayan i itung taw.”

57Temed piyayluwan ni Pedro, nga magꞌaat, “Bilaꞌ, daꞌga! Ega bayan magkakilalaan ku kanya.”

58Ega siꞌ naꞌlay, may sang kataawan siꞌ nga nakalteg it kanya. Maat ya, “Kaꞌuyutan ka naga baꞌ nira!” Temed nandaꞌga-daꞌga siꞌ si Pedro.

59Nagtaꞌlib i mga sang uras, ipagpadaꞌeg nat sang kataawan nga magꞌaat, “Talagang kaꞌibaan ya naga bay itung taw, ka taga Galilea baytu.”

60Temed tiyubag kanya ni Pedro nga magꞌaat, “Bilaꞌ, taꞌway in unuy pagꞌaaten mu ngayan!” Magꞌampang paꞌ si Pedro, dengan it timnaraꞌuk nay manuk. 61Ta, duꞌut seled it balay ngayti, limningaw si Jesus duꞌun it ki Pedro baw tiyermek yat semyek. Pagkalteg ni Pedro, nademdeman ya i ipiyagꞌaat ngayti ni Jesus it kanya, nga “Parabir tumaraꞌuk i manuk mabway nga kukuꞌ-aldaw, tulu na nga paylu mu sabap it aken.” 62Nanliꞌwan na kanya. Siminggaw kanya it ega pateng nga sugaw.

Pagteger-tegeren si Jesus it mga magtatandaꞌ it kanya

[Mateo 26:67-68; Marcos 14:65]

63Si Jesus ngayti, pagteger-tegeren na baw pagtiꞌkulan na it mga magtatandaꞌ ngaytit kanya. 64Tiyagnepan niray rupa ya baw pagsariyen it ingkut, nga magꞌaat, “Pintuꞌun mu! Siyuy nagpasakit it imu?” 65Baw dakel-dakel na nga panibabaꞌ nirat ki Jesus ngayti.

Siyumarya si Jesus it Piyakamataꞌas nga Sasirduti

[Mateo 26:59-66; Marcos 14:55-64; Juan 18:19-24]

66Magpangyag, nagtingped i muꞌsang kaꞌuyutan it Sanedrin, nga mga mataꞌas nga ginuꞌu, mga pagbayaꞌen it sasirduti baw mga manigpaꞌyag it urdin. Baw piyaꞌadap nira si Jesus duꞌut katingpedan nira ngayti. 67Bawnga maat nira it ki Jesus ngayti, “Isugid mut amen in ikaw na talaga i isiyanggup nga Cristo!”

Katubag si Jesus, maat ya, “Maski isugid kut imyu, ega naga yan pakimatuudun mi. 68Bawnga in ingkutun ku gasiꞌ kamu, daꞌkamu naga yan tumubag. 69Temed yay matuud, garing kayti madung aku na nga Taga Langit nga Ipiyanganak it Taw duꞌun it iwanan nga ayun it landaw nga gunaan nga Ampuꞌang Diyus.”

70“Ta in atkayan palan, ireg mung sugiden, Anak ka it Ampuꞌang Diyus!” maat i muꞌsa ngayti nga nagtingped.

“Eeꞌ, matuud bay inaat mi ngayan,” maat siꞌ ni Jesus.

71Bawnga maamaatan sirang muꞌsa, “Ta, unuka kaꞌilangan tami paꞌ i pamatuud it beken, it talinga ta nay nakagneg it ega bela-belag nga baꞌbaꞌ i liniꞌwanan it iyang ampang ka kanya na?”

Currently Selected:

Lucas 22: TBWONT

Highlight

Copy