Juan 15

Si Jesus i subuk puꞌun baw tangkayan it luwak, mga magpamayaꞌ i subuk sanga ya

1Ipiyasigi naga ni Jesus i panulduꞌ yat mga alagad ya ngayti, ka tupusun ya daꞌan i ipagkusugid yat kanira. Maat ya, “Aku i matuud nga subuk puꞌun baw tangkayan it luwak nga ubas, baw iyan Amaꞌ ku, kanya i Manigꞌarigra. 2Pagsapiꞌen yay kada sanga ku nga ega magbuwaꞌ, baw pagꞌawanan ya gasiꞌ i kada sanga nga magbuwaꞌ isaꞌun subraꞌ nga dumakulaꞌ i buwaꞌ it pamayaꞌ kat pangaꞌgenan ya. 3Kayti maꞌawan kamu na, ka ampang ku nga panulduꞌ kut imyu i nagꞌawan. 4Teꞌteꞌan mi aku. Teꞌteꞌan ku naga kamu. Ka ega magkabwaꞌ i sanga it esa-esa ya lamang in daꞌga magpupꞌun duꞌun it begtek. Kamu, atkayan naga. Daꞌkamu magtarubwaꞌ in daꞌga maneꞌteꞌ kamu situt aken.

5Aku i puꞌun baw tangkayan it luwak nga ubas. Kamu i subuk sanga ku. Iyan temeꞌteꞌ it aken, aku gasiꞌ i temeꞌteꞌ it kanya. In atkayan, pirmi nang dakulaꞌ i buwaꞌ ya. Ka yay matuud, egay maski unu nga mabwat mi in magpablag kamut aken. 6Iyan ega maneꞌteꞌ situt aken, ibuntal na ka ipablag subuk sanga nga siyapiꞌ. Ta, yang mga sanga, in patay na, rinutun baw idaꞌpug duꞌut apuy isaꞌun maꞌanteng. 7In maneꞌteꞌ kamu situt aken baw maneꞌteꞌ gasiꞌ i ampang ku asat imyu, nga pirmi mi nga pagsunudun, marway in unuy angutun mi duꞌut Ampuꞌang Diyus. Talagang ibgay it imyu. 8Matanyag i kabantugan it Amaꞌ ku in tarubwaꞌ baw magpanggayen i buwaꞌ it pamayaꞌ kat pangaꞌgenan mi. In atkayan, kamatuudan nga alagad ku kamu.

9In magꞌuꞌunu pagmaꞌalen aku it Amaꞌ ku, atkayan nagay pagmaꞌal kut imyu. Teꞌteꞌan mi aku isaꞌun magkamuyaan mi nga pirmi i pagmaꞌal kut imyu. 10In pagsunudun mi nga pirmi i mga urdin ku, subrang magkamuyaan mi i pagmaꞌal ku ngaytut imyu. Subuk aken, siyunud ku nga muꞌsa i mga urdin it Amaꞌ ku, aypaꞌ magkamuyaan ku nga banar i pagmaꞌal yat aken.

11Ipiyagsugid kut imyu i itu nga mga bagay isaꞌun mabagiꞌan kamu it magꞌuꞌunay nga kasagyaan ku, baw sumagya kamut kasagyaan nga egay kakurangan. 12Ka itu nay ipagꞌurdin ku, magsigraras kamu it esa may esa subung nagat raras kut imyu. 13Yay kamatuudan nga raras nga ega nay kasubraꞌ, iyan raras it esang taw nga iganti yay ginawa ya kat ginawa it mga iba-iba ya. 14Kamu i magayen nga iba-iba ku in pagsunudun mi i ipagꞌurdin ku. 15Ega na taꞌwagen ku kamu nga mga manigsirbi, sabap ega magkaꞌrutan it manigsirbi in unuy pagpikiren it agalen ya. Mga iba-iba nay panaꞌwag kut imyu kayti, sabap iyan muꞌsa nga mga bagay nga nagnegan ku duꞌun it Amaꞌ ku, ipiyagꞌaat ku nat imyu. 16Ega maat kamu i miniliꞌ it aken. Akuy miniliꞌ it imyu, baw tiyaꞌeg ku kamu nga subuk muwaꞌ kamu it mga buwaꞌ nga maneꞌteꞌ.#15:16 Galacia 5:22-23. Aypaꞌ in unuy angutun mi duꞌun it Amaꞌ kat keseg it pakilagpit mit aken, ibgay ya talaga it imyu. 17Ituy ipagꞌurdin kut imyu, nga magsigraras kamung pirmi.”

Iyan mga magpamayaꞌ it ki Jesus, pagꞌisgan sirat kadakel nga ega magpamayat kanya

18“Talagang isgan kamu nat kadakel nga ega magpamayat aken, temed dedemdemen mi tu nga aku, inisgan aku it kadakel ngayti parabir inisgan nira kamu. 19In beteꞌ kaꞌuyutan kamu paꞌ it mga ega magpamayaꞌ ngayti, simpri pagmaꞌalen nira kamu ka sang kamuwan. Temed it ega na, sabap it piniliꞌ ku kamu baw subuk ipiyapinpin na kat kadakel ngayti. Aypaꞌ ka isgan nayan nira kamu. 20Dedemdemen mi i ipiyagꞌaat ku ngaytut imyu nga egay manigsirbi nga mataꞌas pat agalen ya. In aku, pagpakuriꞌan nira, simpri kamu atkayan naga yan, pakuriꞌan nira gasiꞌ. In pagsunudun niray ipagpanulduꞌ ku, sunudun nira gasiꞌ yan i imyung mga ipagpanulduꞌ. 21Temed paribasay ega magkakilalaan nira i nagtaꞌeg it aken it paꞌasitu, aypaꞌ pakuriꞌan nira yan kamu sabap it pamayaꞌ mit aken.

22In daꞌga naꞌasitu aku baw nangadal it kanira, egay turubagen nira sabap it pandaꞌga nirat aken. Temed kayti, ega nay makadaꞌawa nira sabap it kasalaꞌan nira ngaytu. 23Iyan magꞌiseg it aken, pagꞌisgan nira gasiꞌ i Amaꞌ ku. 24In beteꞌ daꞌga minwat akut mga buwat nga nagpasar kat mata nirang muꞌsa, nga ega nabwat it maski siyu it yanaytuy kaꞌlay, egay turubagen nira sabap it kasalaꞌan nga pandaꞌga nirat aken. Temed ta, talagang naltegan nira aku, baw subung nagat naltegan nira gasiꞌ i Amaꞌ ku kat nagpasar na kat mata nira nga mga buwat ku ngaytu. Temed yanagang, pagꞌisgan nira aku, pati Amaꞌ ku ngayti. 25Temed nagꞌabut tu isaꞌun lamang matuman i magbebtang duꞌun it kasuratan nira ngayang ampang it Ampuꞌang Diyus nga magꞌaat,

‘Pagꞌisgan nira aku maski egay binwat ku nga dapat isgan.’#15:25 Awit 35:19, Awit 69:4.

26Temed pagꞌabut situ it Manigtabang nga papaꞌasituun ku nga garing duꞌut Amaꞌ, kanya i pamatuud it aken. Kanya, Espiritu Santo ngaytu, i manigpaꞌrut it kamatuudan baw pagtaꞌgen it Amaꞌ ku. 27Baw kamu, kaꞌilangan nga ipamatuud mi gasiꞌ aku, sabap garing it pagpapuꞌun it buwat ku ngaytu nga magpangadal, kaꞌiba-iba ku na kamu.

Currently Selected:

Juan 15: TBWONT

Highlight

Copy