Revitiko 8

Aroni naʋanakomana ʋake ʋanogadzwa paʋuprista.

1Ɀino Jehova wakataura naMosesi, akati: 2Tora Aroni, naʋanakomana ʋake, neŋguʋo, namafuta okuzodza nawo, nenzombe yecipiriso ceɀiʋi, namakondobge maʋiri, neɗeŋgu reɀiŋgwa ɀisina‐kuʋiriswa; 3uʋuŋganidze ʋuŋgano yose pamukoʋa wetente rokusoŋgana. 4Mosesi akaita seɀaakarairwa naJehova, ʋuŋgano ikaʋuŋganidzwa pamukoʋa wetente rokusoŋgana. 5Ɀino Mosesi akati kuʋuŋgano: Ndiɀo ɀakarairwa naJehova kuti ɀiitwe. 6Mosesi akaʋuya naAroni naʋanakomana ʋake, akaʋashambidza nemvura, 7akamufukidza jasi, ndokumusuŋga ciʋuno nebanhire, akamufukidza ŋguʋo, akamuisa efodi, nokumusuŋga ciʋuno nebande reefodi rakarukwa noʋucenjeri, ndokurisuŋgira kwaari naro. 8Akamuisa homboɗo yecifuʋa, ndokuisa Urimi neTumimi muhomboɗo yecifuʋa. 9Akaisa ʋo ŋgoani pamusoro wake; paŋgoani necemberi akaisa hwendefa rendarama, ndiyo korona tȿene; seɀakaŋga ɀarairwa Mosesi naJehova. 10Ɀino Mosesi akatora mafuta okuzodza nawo, akazodza tabernakeri, neɀose ɀakaŋga ɀiri’mo, akaɀitsaura. 11Akasasa mamŋe kanomŋe paartari, nenhumbi dzayo dzose, nomudziyo wokushambidzira, necigadziko cawo, kuti aɀitsaure. 12Akaɗira ʋo mamŋe mafuta okuzodza nawo pamusoro waAroni, akamuzodza kuti amutsaure. 13Ipapo Mosesi akaʋuya naʋanakomana ʋaAroni, akaʋafukidza majasi, akaʋasuŋga ɀiʋuno namabanhire, akaʋaisa ŋgoani, seɀakaŋga ɀarairwa Mosesi naJehova. 14Akaʋuya nenzombe yecipiriso ceɀiʋi, Aroni naʋanakomana ʋake ʋakaisa maʋoko aʋo pamusoro wenzombe yecipiriso ceɀiʋi; 15akaiɓaya; Mosesi ndokutora ropa, ndokuriisa panyaŋga dzeartari kunhiʋi dzose nomunwe wake, akanatsa artari, ndokuɗururira ropa mujiŋga meartari, akaitsaura, kuti aiyananisire. 16Akatora mafuta ose akaŋga ari pamsoro poʋura, namafuta akaŋga ari pamsoro peciropa, netȿo mbiri, namafuta adzo, Mosesi akaɀipisa paartari. 17Asi nzombe neɗebge rayo, nenyama yayo, namaɀiɀi ayo, wakaɀipisa nomŋoto kunze kwemisasa, seɀakaŋga ɀarairwa Mosesi naJehova. 18Akaʋuya negondobge recipiriso cinopiswa; Aroni naʋanakomana ʋake ʋakaisa maʋoko aʋo pamusoro wegondobge. 19Akariʋuraya; Mosesi akasasa ropa pamsoro peartari kunhiʋi dzose. 20Akagura‐gura gondobge, Mosesi akapisa musoro nenhindi namafuta. 21Akasuka ʋura namakumbo nemvura, Mosesi akapisa gondobge rose paartari, cikaʋa cipiriso cinopiswa cainhuwira ɀakanaka; cikaʋa cipiriso cakaitirwa Jehova nomŋoto; seɀakaŋga ɀarairwa Mosesi naJehova. 22Ɀino akaʋuya ʋo nerimŋe gondobge, gondobge rokugadza naro, Aroni naʋanakomana ʋake ʋakaisa maʋoko aʋo pamusoro wegondobge. 23Akariɓaya, Mosesi akatora rimŋe ropa raro, akariisa pamuceto wezasi wenzeʋe yaAroni yorudyi, napagunwe roruʋoko rwake rworudyi, napagunwe rorutsoka rwake rworudyi. 24Akaʋuyisa ʋanakomana ʋaAroni, Mosesi akaisa rimŋe ropa pamiceto yezasi yenzeʋe dzaʋo dzorudyi, napamagunwe amaʋoko aʋo orudyi, napamagunwe etsoka dzaʋo dzorudyi; Mosesi akasasa ropa pamsoro peartari kunhiʋi dzose. 25Akatora mafuta neɓemhe, namafuta ose akaŋga ari pamsoro poʋura, namafuta akaŋga ari pamsoro peciropa, netȿo mbiri, namafuta adzo, neɓandauko rorudyi; 26akatora muɗeŋgu reɀiŋgwa ɀisina‐kuʋiriswa, ɀaiʋa pamberi paJehova, ciŋgwa cimŋe ciɗuku cisina‐kuʋiriswa, neciŋgwa cimŋe ciɗuku ceɀiŋgwa ɀakazodzwa mafuta, neciŋgwa citete cimŋe, akaɀiisa pamsoro pamafuta, napamsoro peɓandauko rorudyi; 27akaisa ɀose pamaʋoko aAroni, napamaʋoko aʋanakomana ʋake, akaɀizuŋguzira pamberi paJehova, kuti ciʋe cipiriso cinozuŋguzirwa. 28Ipapo Mosesi akaɀitora ɀose pamaʋoko ake, akaɀipisa paartari pamsoro pecipiriso cinopiswa; ɀikaʋa ɀokugadza naɀo, ɀikanhuwira ɀakanaka; cikaʋa cipiriso cakaitirwa Jehova nomŋoto. 29Ɀino Mosesi akatora cityu akacizuŋguzira pamberi paJehova, kuti ciʋe cipiriso cinozuŋguzirwa; ndiwo waiʋa mugoʋe waMosesi pagondobge rokugadza naro; seɀakaŋga ɀarairwa Mosesi naJehova. 30Ipapo Mosesi akatora mamŋe mafuta okuzodza nawo, nerimŋe ropa rakaŋga riri paartari, akarisasa pamsoro paAroni napamsoro peŋguʋo dzake, napamsoro paʋanakomana ʋake, napamsoro peŋguʋo dzaʋanakomana ʋake pamŋe cete naye; akatsaura Aroni neŋguʋo dzake, naʋanakomana ʋake, neŋguʋo dzaʋanakomana ʋake pamŋe cete naye. 31Mosesi akati kunaAroni naʋanakomana ʋake: Ƃikai nyama pamukoʋa wetente rokusoŋgana, muidyire’po neciŋgwa ciri muɗeŋgu rokugadza naro, seɀandakaraira ndiciti: Aroni naʋanakomana ʋake ʋanofanira kuɀidya. 32Asi ɀakasara ɀenyama neciŋgwa munofanira kuɀipisa nomŋoto. 33Musaɓuɗa pamukoʋa wetente rokusoŋgana mazuʋa manomŋe, kuȿikira mazuʋa okugadza kwenyu apera; nokuti iye ucakugadzai mazuʋa manomŋe. 34Seɀakaitwa zuʋa ranhasi, Jehova wakaraira kuti ɀiitwe saiɀoɀo, kuti muyananisirwe. 35Garai pamukoʋa wetente rokusoŋgana masikati noʋusiku mazuʋa manomŋe, muceŋgete ɀamakarairwa naJehova, kuti murege kufa; nokuti ndiɀo ɀandakarairwa. 36Ɀino Aroni naʋanakomana ʋake ʋakaita ɀose ɀakaŋga ɀarairwa naJehova nomuromo waMosesi.

Currently Selected:

Revitiko 8: SUB1949

Highlight

Copy