Mark i̱ Holisso 8

Chapta O̱tohchínah (8)

Jesus at Talhípa Sipokni Oshta I̱pachih

1Nittak i̱la achaffa ka̱ hima̱kma̱ oklah alhíha yat lawa kat Jesus oklah áfolótattók. Illi̱pa nánah kiya oklah isht áyah kiyottók. Hitoko̱, Jesus at iyákayya alhíha yásh i̱paya cha oklah i̱makáchihmat, 2“Oklah alhíha yappa̱ i̱ sa nokha̱kloh ókih. Siyápíhat ma̱ya ná nittak tohchína (3) hicha nána apá hi̱nah kat oklah ikimikshot tahah. 3Hikma̱ kaniyómi kato hopáki ho̱ ma̱ya. Oklah hokcha̱fo ho̱ i̱chokka pit chaffichílih okma̱, i̱chokka ilhkólih ósh ittanoho̱watok mákósh im oklhilíkat akka ittolah másh yohmá hi̱nah,” im áchittók.

4Hihma̱, Jesus iyákayya alhíha yat Jesus i̱makáchihmat, “Oklah íma̱yah pat, yakni shila ak ohmih ókih. Oklah móma ka̱, ili̱pacháchi̱ kat katimáko̱, illi̱pa lawa kat o̱naho̱ ilahocháchi̱h?” im áchittók.

5Hihma̱ Jesus at i̱ ponaklot, “Pallaska yat katohmi hash i̱shih choh?” im áchittók. Hihma̱ iyákayya alhíha yat, “Pallaska chipi̱ta o̱tokloh (7),” im áchittók.

6Jesus at oklah binohlachi̱ ho̱ i̱makáchittók. Hihmat pallaska yásho̱ íshi cha Chihówa i̱ yakókittók. Yohmih mat pallaska ma̱ toshtóli cha iyákayya alhíha imattók. Hihmá iyákayya alhíha yat oklah lawa alhíha ya̱ hopílattók. 7Hikmat nani chipi̱ta iskitini ayína ka̱ iyákayya alhíha yat oklah i̱shittók. Yappak máko̱ Jesus at Chihówa i̱ yakókih cha iyákayya alhíha pit ímacha oklah alhíha ya̱ imat folótáchi̱ho̱ i̱ makáchittók. 8Yohmih ma̱, oklah alhíha yat i̱pat im alhpísattók. Hihma̱ Jesus iyákayya alhíha yat illi̱pa áta̱pa ayówat oklah nówattók. Hihma̱, áta̱pa kásh ma̱ taposhshik chito o̱toklo (7) o̱nah alótattók. 9Hattak at lawa kat talhípa sipokni oshtah (4000) o̱nah ósh oklah i̱pattók. I̱pat im alhtahah ma̱, Jesus at oklah alhíha ya̱ i̱chokka pit yolhlhit tahlittók. 10Hihmat Jesus hicha iyákayya alhíha yat ashshali̱t oka píni pit chokkówah mat Dalmanutha yakni itto̱ma áyonattók.

Pharisee Alhíha yat Nán Annówa Chihówa Ámi̱tika̱ Oklah Písah Bannah

11Hihma̱ Pharisee alhíha yat Jesus oklah imóna cha oklah achówat hikít ilhkólittók. Hikmat Jesus a̱ haksichih bannah ósh, nán annówa, Chihówa ámi̱ti ka̱ oklah pisah bannakat oklah i̱ ponaklottók. 12Hihókako̱ Pharisee alhíha yat i̱yimmih kiyoh átoko̱, Jesus at chitólit fiyópacha i̱makáchihmat, “Katína nán annówa, Chihówa ámi̱ti ako̱ pisah hachinnah átoko? A̱lhi hachim áchilíshkih, nán annówa nánah kiya hash pisáchi̱ kiyoh ókih,” im áchittók. 13Hihmat Jesus hicha iyákayya alhíha yat Pharisee alhíha mat ma̱yana oklah kanallittók. Hicha oka píni pit oklah chokkówa cha okhata i̱tannap ilhkólih ósh ittanóho̱wattók.

Pharisee Alhiha Hicha Mi̱ko Herod I̱palaska Isht Shammachih

14Iyákayya alhíha yat hima̱k ma̱ pallaska i̱sht oklah mi̱ti hi̱natok at oklah imiyaksi tokósh, pallaska achaffa illaho̱ oklah i̱shittók. 15Jesus at lha̱kochih ósh iyákayya alhíha ya i̱makáchihmat, “Pharisee alhíha hicha Mi̱ko Herod i̱ pallaska ishit shatammichi (yeast) ya̱ aha! Hash ahnáshkih,” im áchittók.

16Yohmih ma̱ iyákayya alhíha yat oklah itti̱makáchihmat, “Pallaska ik hapimiksho toko̱ yappa̱ hapi̱ makáchih kiyo̱,” oklah áchittók.

17Hikako̱ Jesus at nána ho̱ oklah itti̱makáchi ka̱ ikkánattók hicha áchihmat, “Katína pallaska ik hachimiksho kat isht hash ittimanopolih átoko? Nána isht ano̱políli ka̱ oklah hachik samikkánoh móma ho̱? Hachimanokfila yat alhkama móma ho̱? 18Nána ka̱ mihchili toka̱, hachi nishkin at pi̱sa híkiyoho̱? Hikmat nána makáchilih toka̱, chi haksobis at ha̱kla híkiyo ho̱? Nána mihchilih kasho̱, hachimiyaksiho̱? 19Pallaska talhlhápih (5) toshtólicha talhípa sipokni talhlhápih (5000) i̱pachíli kásh, yamma̱ illi̱pa áta̱pa kat taposhshik alóta katohmi ho̱ hash ayówatokó?” im áchittók. Hihma̱ iyákayya alhíha yat áchihmat, “Taposhshik awahtokloh (12) ósh a̱shatok,” oklim áchittók.

20Hikmat anóti Jesus at áchihmat, “Pallaska yat o̱toklo (7) toshtólicha talhípa sipokni oshta (4000) i̱pa chíli kásh, yamma illi̱pa áta̱pa kat taposhshik hochíto hash ayówatoko?” im áchittók. Hihma iyákayya alhíha yat áchihmat, “Taposhshik o̱tokloh ósh a̱shatok,” im áchittók.

21Hihma̱ Jesus at áchihmat, “Himákkat taha ka̱ nánaho̱ isht hachim anópolilih ka̱ katit hachik samikkáno ki̱shaho̱?” im áchittók.

Bethsaida Tamáhah Ma̱, Jesus at Hattak Inishkin lapa (blind) Ya̱ Masáláchih

22Jesus hicha iyákayya alhíha yat Bethsaida tamáhah osi oklah áyonattók. Hihma̱ kaniyómi kat hattak at inishkin lapa (blind) yo̱, Jesus oklah isht imóna cha potóláchi̱ka̱ oklah im asilhhattók. 23Hihma̱ Jesus at hattak ma̱ ibbak hallicha tamáhah osi ma̱ ákohchittók. Hihmat hattak ma̱ inishkin o̱toffattók. Hicha Jesus at hattak ma̱ inishkin potóli cha nána ka̱ pi̱sa hi̱nak ma̱ i̱ponaklottók.

24Hihma̱ hattak mat aba písa cha áchihmat, “Kanah alhíha pi̱salih, hihókako̱, iti alhíha akósh nówah ósh ittanówah ahóbah,” im áchittók.

25Hima̱k ma̱ Jesus at hattak inishkin ma̱ ibbak isht potólittók. Hihma̱ hattak mat inishkin tiwwattók. Hihma̱ inishkin at masálittók hicha nánah máko̱ ahchokmát pi̱sa hi̱nattók. 26Jesus at im áchihmat, “Himakano chi̱ chokka falámat ish íya hi̱nah, hihókakósh, tamáhah o̱t ish chokkowannah [hicha yamma̱ ma̱ya alhíha ka̱ achofóna kiya im anólinnah],” im áchittók.

Jesus at Kataho̱?

27Hihma̱, Jesus hicha iyákayya alhíha yat tamáhah osi alhíha Caesarea Philippi tamáhah itto̱ma ka̱ oklah ilhkólittók. Hihma̱ nówah ósh ittanóho̱wah ma̱ Jesus at iyákayya alhíha i̱ponaklohmat, “Katah siya miyaho̱ oklah alhíha yat makáchih?” im áchittók.

28Hihma̱ iyákayya alhíha yat áchihmat, “Kaniyómi kato John Baptist ohchásh ma̱ oklah chiyáchih, hikma̱ kaniyómi kato Elijah ohchásh ma̱ oklah chiyáchih. Hikma̱ i̱la kato hopayyi holittópa kanimma ka̱ chiyaho̱ oklah chiyáchih,” áchittók.

29Hihma̱ Jesus at áchihmat, “Hihókako̱ hachishnáto, katah siyaho̱ hash áchih chóh?” im áchittók. Hihma̱ Peter at áchihmat, “Chishnakósh Christ mak chiya ókih,” im áchittók.

30Hihma̱ Jesus at kanah óka̱, kanah kiya oklah ik im anólokáchi̱ka̱ lha̱kochish iyákayya alhíha i̱ makáchittók.

Jesus at Ilbashsháka Hicha Illáchi̱h ósh Isht Ano̱polih

31Hihmat Jesus at nána kat ákanihmáchi̱ka̱ iyákayya alhíha ya̱ im anólit isht hikít iyattók. Hihmat áchihmat, “Jew tikba hikíya alhíha, priest i̱ noshkobóka alhíha, hicha, Moses i̱ Nán Alhpisa im ábachi alhíha yat, Hattak Oshi Holittópa siyaka̱, oklah ik sa bannoh. Hihátokósh oklah salbashálih fihnachi̱h hicha oklah sabáchi̱h. Hihókako̱ nittak o̱t ishit atohchínakma̱ fala̱mat tániláchi̱h ókih,” áchittók. 32Jesus at ná im anólikat ná lohmih kiyoh ósh iyákayya alhíha ya̱ im anóho̱littók. Hihma̱ Peter at Jesus a̱ iláwít kanalli cha im álammit hikit iyat yot anópolit issá hi̱nah im ahnittók. 33Yohmihma̱ Jesus at folóta cha iyákayya alhíha pit pisattók hihmat Peter im álammittók. I̱makáchihmat, “Satan, a̱kanalli! Chishnato Chihówa nán anokfilli ano ish anokfillih kiyoh, hikásh hattak anokfilli yako̱ ish anokfillih ókat,” im áchittók.

34Hihmat Jesus at oklah lawa alhíha, hicha iyákayya alhíha yat itto̱ma áyonáchi̱ im ano̱littók hicha i̱makáchihma, “Kanah ósh siyákayya toba bannah okmat, ilimiyaksi cha anák átok polla ka̱ ilbashshaka hicha illá chi̱kat imalhtahak mak áchi̱h ókih. 35Kanah ósh im áyokcha̱ya ya̱ lhakoffi̱chih bannah okmato i̱ kaniyáchi̱h. Hihókakósh anáko̱ hicha Chihówa im anno̱pa átok polla na̱ isht illik ma̱, áyokcha̱ya billíya isháchi̱h ókih. 36Kanahat yakni ya̱ nána kat áyyasha ka̱ mómi̱chit i̱shi cha áyokcha̱ya billíya ikimikshoh okmat, nátaho̱ isht im achokmáchi̱ho? 37Kanahat im áyokcha̱ya billíya ya̱ i̱ kaniyah okmat nána ishit chilófat falammi̱t ishá hi̱nah kat ikshoh ókih. 38Himak oklah ma̱yah pato Chihówa i̱filammi yósh ma̱yah hikmat nán ayashshachih yósh ma̱yah. Ano, Hattak Oshi Holittópa yat A̱ki̱ imisht lha̱ko áfóyyóka cha angel holittópa alhíha pihlichit a̱yat falámat alálákmat, kanah ósh ano hicha am anno̱pa ya̱ ishit hofáyah tokma̱, anák mákósh i̱ sahofáyachi̱h ókih,” im áchittók.

Currently Selected:

Mark i̱ Holisso 8: CHTW

Highlight

Copy