Mark i̱ Holisso 16

Chapta Awah Hannali (16)

Jesus at Falámat Tánih

1Nittak Holittópa nittak at o̱t tahahma̱, Mary Magdalene, Mary, James ishki ma̱, hicha Salome yómi kat Jesus i haknip a̱ ná baláma (spices) oklah fokkícháchi̱ kat oklah cho̱pattók. 2Takhollo nittak hikít íya (week), nittak ammona onnahi̱li fihna ma̱, hashi (sun) yat tokwikílit mi̱tih ma̱, Jesus im áholloppi ma̱ oklah ilhkólittók. 3Ilhkólih ósh ittanóho̱wah mat oklah ittimáchihmat, “Tali chito at áchokkówa itikba hiki̱ya kásh ma̱ katah ósh tonollichit kani pit hapi̱ hilícháchi̱h chi?” oklah áchittók.

4Hihókako̱, áholloppi ma̱ pit oklah pisahma̱, tali chíto wíki ásh mat, tonollit naksika hi̱kiya na̱ oklah pisattók. 5Hihmat, ohóyoh alhíha mat áholloppi anóka ma̱ oklah chokkówattók. Hicha, isht a̱lhi imma ma̱, hattak himitta yat náfokka tohbi faláya fokkah ósh bini̱liho̱ oklah pisattók. Makohma̱ ohóyoh alhíha mat oklah nokalhka̱cha fihnattók.

6Hattak mat áchihmat, “Hachi nokshópannah! Jesus, Nazareth ámi̱ti ma̱, iti ittayyokkana ahónalhlhichih ósh takáchi kásh ma̱, hash hoyo ka̱ ikkánalih. Chihówa yat falammi̱t tánichitok ókih, hitoko̱ yappano̱ ikshoh ókih. I haknip a̱ kanímma oklah o̱t bohli kásh ma̱, iksho ka̱ pit ho písah. 7Hicha, himaka̱, íya cha Jesus iyákayya alhíha o̱t im anólih, hikmat Peter akfihna ka̱ im anóli Jesus at hachi ti̱kba Galilee íyah ósh a̱yaka̱. Jesus at hachim anóli kasho̱ yammako̱, Jesus o̱t hash pisáchi̱h,” im áchittók.

8Hihma̱ ohóyoh alhíha mat oklah noklhaka̱cha áyalhicha wannichit kaniyah ósh áholloppi ma̱ bali̱t oklah ákanallittók. Hicha nána kat kaniyohmi toka̱ oklah nokshópah fihnah átokósh kanah kiya oklah ik imanólottók.

Anno̱pa Ilappat Holisso Hopáki Kanimika̱ Takohma̱ya

9Jesus at takhollo nittak hikít íya, nittak ammóna onnahi̱li fihna yo̱ falámat tánitok at Mary Magdalene ti̱kba i̱ hayákattók. Ohóyoh pa̱ nittak kani fokká chásh ma̱, Jesus at shilombish okpolo, o̱tokloh (7) ho̱ ákocháwihlittók. 10Mary at íya cha, Jesus iyákayya alhíha átokmat nokha̱klot yáyah ósh ma̱yah ma̱ nánah ósh kanihmitoka̱ o̱t im anólittók. 11Mary oklah ik i̱yimmottók, Jesus at falámat táni toka̱ hi cha pi̱satok at i̱makáchikako̱.

12Ahchíhbat tahah ma̱, Jesus iyákayya toklo kat tamáhah ákohchat íyah ósh a̱yat oklah ma̱, Jesus at i̱ hayákattók. Hikásh pisaka̱ áyi̱lattók. 13Iyákayya tokloh mat falámat ittaláchihmat nána kat kanihmitok kásh ma̱, anólit oklattók hihókako̱ i̱la kat ik i̱yimmottók.

14Jesus at iyákayya awah achaffa (11) alhíha yat i̱pah ósh ma̱ya o̱t i̱ hayákattók. Hicha falámat táni toko̱ oklahat pi̱satok ósh makáchikako̱, oklah itcho̱kash at kallo hatokósh oklah ik yimmotoka̱ im álammittók.

15Hihmat, Jesus at oklah im áchihmat, “Yakni móma ka̱ íya cha kanah moyyóma ka̱ anno̱pa achokma, ano isht imma ya̱ hash im anóho̱lashkih. 16Hikmat, kanah ósh a̱yimmi cha baptismo okmat áyokcha̱ya billíya isháchi̱h. Hihókako̱, kanah ósh ik sa̱ yimmotok mato, oklah ilbashshákáchi̱h ókih. 17-18Kanahat a̱ yimmi okmat nán achokma yómi ka̱ mihchá hínáchi̱h. Sa hohchifo yo̱ álhopollichih ósh shilombish okpolo ya̱ kocháwihlá hínáchi̱h. Hikmat, anno̱pa ittimilayyoka oklah anópolá hínáchi̱h. Hikmat, si̱ti ya̱ ibbak ishit ayowah másh hottopáchi̱h kiyoh. Hicha nán ishkot illi, ishkoh okmásh oklah hottópáchi̱h kiyoh. Hikmat, abíka alhíha ya̱ ibbak o̱bohlikma̱, abíka alhíha mat masáláchi̱h ókih. Nána yakómi ka̱ oklah míchih átoko̱, i̱la kat oklah ikkánáchi̱h, oklah a̱yimmi alhíhah óka̱,” áchittók.

19Chitókaka, Jesus at yakómi ka̱ i̱makáchit im alhtahmat, aba yakni iyattók. Hicha, Chihówa ibbak isht a̱lhi imma o̱t binílittók. 20Yohmi ma̱, iyákayya alhíha yat yakni móma ka̱ ilhkólittók. Hicha Jesus isht imma oklah anóho̱littók. Hihma̱, Chitókaka yat oklah anokfo̱kkat apiláha̱chittók. Hikmat Chitókaka yat isht lha̱ko ímana̱ nána kat yómahi ik hobo ka̱ oklah míhi̱hchittók. Yammat nánah anólikat anno̱pa mat áya̱lhi hóka hayákachittók.

Currently Selected:

Mark i̱ Holisso 16: CHTW

Highlight

Copy