Mak 4
4
Jisas i mekem parabol long man we i planem sid
(Matiu 13.1-9; Luk 8.4-8)
1 #
Luk 5.1-3
Jisas i godaon bakegen long lugun, nao i stap tijim ol man. I gat plante man tumas oli kam long hem, nao hem i klaem long wan bot we i stap long lugun ya, i sidaon long hem. Ol man oli stap olbaot long so, 2nao hem i stap tijim olgeta long plante samting long parabol.
Taem hem i stap tijim olgeta, hem i talem se, 3“Yufala i lesin gud. I gat wan man i go blong planem wit* long garen* blong hem. 4Taem hem i planem ol wit ya, hem i stap saksakem ol sid i go olbaot long graon, nao sam sid oli folfoldaon long rod. Biaen, ol pijin oli kam, oli kakae evriwan. 5Mo sam sid oli folfoldaon long ples we i gat ston daon, be i no gat tumas graon antap. Nao oli gru kwik from we graon i smol nomo. 6Be taem san i kam antap, i bonem olgeta, nao oli drae wantaem, from we rus blong olgeta i no godaon gud. 7Mo sam narafala sid oli folfoldaon long ples blong ropnil. Biaen rop ya i kam bigwan, i kavremap ol wit ya, nao oli no karem kakae. 8Mo sam narafala sid bakegen oli folfoldaon long gudfala graon. Nao oli gru, oli kam bigwan, oli karem kakae. Sam oli karem toti frut, sam oli karem sikisti, mo sam oli karem handred.”
9Nao Jisas i talem se, “Man we i gat sora, hem i mas lesin gud long tok ya.”
Jisas i talemaot from wanem hem i yusum ol parabol blong tijim ol man
(Matiu 13.10-17; Luk 8.9-10)
10Taem Jisas i stap hem wan, ol man we oli harem tok blong hem, oli kam wetem ol twelef man blong hem, nao oli askem mining blong ol parabol ya long hem. 11Nao hem i talem long olgeta se, “Yufala ya, God i openem rod long yufala, blong yufala i kasem ol tok haed blong fasin ya we hem i stap kam King* blong ol man blong hem. Be olgeta we oli stap afsaed, oli stap kasem ol tok blong hem long parabol nomo. 12#Aes 6.9,10Nao long fasin ya
‘bambae olgeta oli save luk, luk, luk,
be oli no save luksave mining long hem,
oli save harem, harem, harem,
be oli no save haremsave.
Sipos olgeta oli haremsave
bambae oli save tanem tingting blong olgeta,
nao God bambae i fogivim olgeta
i tekemaot ol sin blong olgeta.’ ”
Jisas i talemaot mining blong parabol ya
(Matiu 13.18-23; Luk 8.11-15)
13Nao Jisas i talem long olgeta se, “?Olsem wanem? ?Yufala i no save parabol ya yet? ?Sipos i olsem, bambae yufala i save ol narafala parabol olsem wanem? 14Man ya we i planem sid blong wit*, hem i olsem man we i talemaot tok blong God. 15Sam man we oli kasem tok ya, oli olsem graon ya long rod we sid i foldaon long hem. Hemia olgeta we oli harem tok, be wantaem nomo, Setan* i kam i tekemaot tok ya we oli harem. 16Mo sam man we oli kasem tok ya, oli olsem ples blong ston we sid i foldaon long hem. Hemia olgeta we oli harem tok ya, mo wantaem nomo oli glad long hem. 17Be tok ya i no go insaed gud long tingting blong olgeta, nao oli save stap smoltaem nomo. Mo sipos oli gat hadtaem, no ol man oli mekem i strong tumas long olgeta from tok ya, bambae oli foldaon wantaem. 18Mo sam narafala man we oli kasem tok ya, oli olsem ples blong ropnil we sid i foldaon long hem. Hemia olgeta we oli harem tok ya, 19be oli tingting tumas from laef blong olgeta long wol ya, mo oli wantem tumas blong kam rijman, mo oli wantem ol narafala samting tu. Nao ol fasin ya oli kam blokem tok ya, i no karem frut long laef blong olgeta. 20Be sam narafala man bakegen we oli kasem tok ya, oli olsem gudfala graon ya we sid i foldaon long hem. Hemia olgeta we oli harem tok ya, nao oli kasemgud, mo oli gat frut blong hem long laef blong olgeta. Sam long olgeta oli gat olsem toti frut, mo sam oli gat olsem sikisti frut, mo sam oli gat olsem handred frut long laef blong olgeta.”
Laet we oli kavremap long baket
(Luk 8.16-18)
21 #
Mat 5.15; Luk 11.33 Nao Jisas i talem long olgeta se, “?Sipos man i tekem laet i kam insaed long haos, hem i save kavremap long baket? ?No hem i save putum i stap aninit long bed? !Nogat! Hem i mas putum i stap long ples blong laet. 22#Mat 10.26; Luk 12.2Mo long sem fasin, i nomata wanem samting we man i haedem, be bambae God i tekem i kam long klia ples. Sipos man i kavremap, be bambae God i soemaot long ol man. 23Man we i gat sora, hem i mas lesin gud long tok ya.”
24 #
Mat 7.2; Luk 6.38 Mo hem i talem long olgeta bakegen se, “Tok ya we yufala i stap harem, yufala i mas tingting gud long hem. Bambae yufala i save kasem save, i stret long mak blong yufala we yufala i traehad blong kasem. Mo bambae God i givim save long yufala antap bakegen. 25#Mat 13.12; 25.29; Luk 19.26Man we i kasem mining blong tok blong mi finis, hem bambae i save kasem moa bakegen. Be man we i no kasem nating, hem bambae i lusum smol save ya nomo we hem i gat.”
Jisas i mekem parabol long sid we i stap gru
26Nao Jisas i talem se, “Rod we God i stap kam King* blong ol man blong hem i olsem we wan man i planem sid long garen blong hem. 27Long naet, man ya i stap slip, mo long dei, hem i stap wokbaot. Nao sid ya i gru, i stap kam bigwan, be hem i no save se samting ya i hapen olsem wanem. 28Graon nomo i mekem we sid i gru, mo i gat lif blong hem, mo biaen i gat flaoa blong hem, mo i gat frut blong hem. 29#Joel 3.13Be taem frut blong hem i raep, man ya i save go karem, from we taem blong hem i stret.”
Jisas i mekem parabol long sid we i smol tumas
(Matiu 13.31-32; Luk 13.18-19)
30Mo Jisas i talem se, “?Rod we God i stap kam King blong ol man blong hem i olsem wanem? ?Bambae yumi makem long wanem samting blong soemaot? 31Rod blong samting ya i olsem sid blong nambangga. Taem i foldaon long wan tri, hem i smol moa long olgeta narafala sid long wol. 32Be taem i foldaon, i gru, nao i kam bigwan, hem i winim olgeta narafala tri, hem i gat ol bigbigfala han blong hem, nao ol pijin oli save mekem bed blong olgeta aninit long sed blong hem.”
Jisas i yusum parabol nomo blong tijim ol man
(Matiu 13.34-35)
33Jisas i stap tijim ol man long plante parabol olsem, stret long mak we olgeta oli save haremsave. 34Mo ol tok blong hem, hem i no talem klia long olgeta, i talem long olgeta long parabol nomo. Be biaen, taem ol man blong hem nomo oli stap wetem hem, hem i talemaot mining blong olgeta samting ya long olgeta.
Jisas i blokem bigfala win long lugun
(Matiu 8.23-27; Luk 8.22-25)
35Long dei ya, taem san i godaon, Jisas i talem long ol man blong hem se, “Yumi go long narasaed bigfala lugun ya.” 36Ale, oli aot long ol man, oli tekem bot ya we Jisas i stap sidaon long hem, nao oli go. Mo sam narafala bot tu oli biaen long olgeta. 37Nao wan bigfala win i girap, i blu strong, i mekem wota long bigfala lugun ya i raf we i raf. Nao wota i stap kam insaed long bot ya we klosap bot i draon. 38Be Jisas i stap daon long af, i stap slip gud nomo long wan pilo. Nao ol man blong hem oli wekemap hem, oli talem se, “!Tija, yu luk! !Bambae yumi lus nao, be yu yu no wari nating!”
39Nao Jisas i girap, i tok long win ya, i talem se, “!Yu kwaet!” Mo i tok long wota ya we i raf tumas, i talem se, “!I naf! !Yu stap kwaet!” Nao win ya i finis, mo olgeta samting i kwaet. 40Nao Jisas i talem long ol man blong hem se, “?From wanem yufala i fraet olsem? ?Yufala i no bilif yet?”
41Be olgeta oli fraet tumas, oli stap taltalem long olgeta se, “!Olgeta! ?Wanem man ya? !Nating we win mo wota, be tufala i harem tok blong hem, tufala i obei long hem!”
Currently Selected:
Mak 4: BBR
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Bislama Revised Bible © Bible Society of the South Pacific, 2012.