Aesea 56
56
Bambae i gat ol man blong ol narafala kantri oli kam joen long ol man blong Hae God
1Bakegen, profet i talemaot long ol man blong hem we Hae God i talem se, “!Ol man blong mi! Yufala i mas mekem ol fasin we i stret mo i gud, from we i no longtaem, mi bambae mi sevem yufala, mi soemaot we fasin blong mi i stret olgeta. 2Mo long taem ya, bambae mi mi mekem i gud long olgeta we oli stap holem Sabat* dei, we oli stap mekem ol fasin nomo we i stret blong mekem long dei ya. Bambae mi mi mekem i gud long olgeta we oli no mekem ol fasin we i nogud.”
3-7 #
Mat 21.13; Mak 11.17; Luk 19.46 Bakegen, profet i talem se, “I no stret blong man we oli mekem natamap* long hem i stap ting se bambae hem i no save go joen wetem ol man blong Hae God, from we hem i no save bonem pikinini. Hae God i talem se, ‘Yufala we oli mekem natamap long yufala, sipos yufala i stap holem Sabat dei, mo yufala i stap ona gud long mi, mo oltaem yufala i stap holem ol tok blong promes* blong mi, nating we yufala i no gat pikinini, be bambae mi mi mekem we long haos* blong mi, mo long fes blong ol man blong mi, nem blong yufala bambae i stap longtaem moa, i winim we yufala i gat ol pikinini blong yufala. Bambae ol man blong mi oli no save fogetem yufala samtaem.’
“Mo ol man blong narafala kantri oli stap talem se, ‘Hae God bambae i no save letem mifala i go mekem wosip wetem ol man blong hem.’ Be hem i talem se, ‘Yufala ol man blong ol narafala kantri, we yufala i kam joen long ol man blong mi, sipos yufala i lavem mi, mo yufala i mekem wosip long mi, mo yufala i mekem wok blong mi, mo yufala i holem Sabat dei, we yufala i mekem ol fasin nomo we i stret blong mekem long dei ya, mo oltaem yufala i holem ol tok blong promes blong mi, bambae mi mi tekem yufala i kam long hil ya Saeon,* we i tabu, i ples blong mi. Bambae mi mekem yufala i glad long haos blong mi, mo sipos yufala i kam mekem sakrefaes long olta blong mi, bambae mi mi glad long ol sakrefaes ya, from we haos ya blong mi, bambae ol man oli stap talem se hem i ples blong prea blong ol man blong olgeta kantri.
8“ ‘Mi mi Hae God, mi Masta* blong yufala. Bifo, yufala ol laen* blong Isrel,* yufala i stap wok slef* long narafala kantri we i longwe, be mi tekemaot yufala i kambak bakegen long ples blong yufala. Mo mi mi promes se bambae mi tekem plante narafala man bakegen oli kam, blong oli save joen wetem yufala.’ ”
Hae God bambae i jajem ol lida blong ol man blong hem
9Bakegen, profet i talemaot tok blong Hae God long ol man blong hem. Tok ya i blong ol man blong ol narafala kantri, mo profet i talemaot we Hae God i singaot olgeta se, “Olgeta. I gud yufala i kam spolem ol man blong mi, olsem we ol wael anamol oli stap kam blong kakae ol man. 10Ol lida blong ol man blong mi we wok blong olgeta i blong oli tok blong wekemap ol man blong mi, be olgeta evriwan oli blaen. !Olgeta oli no luksave wan samting! Olgeta oli olsem dog we i stap gad be i no save singaot, oltaem nomo i stap slip, mo i stap drim. Olgeta oli olsem dog we i wantem slip oltaem nomo. 11Oli olsem ol dog we oli hanggri tumas, we oltaem nomo oli wantem kakae. Ol man ya oli no gat hed. Olgeta evriwan oli stap folem ol tingting blong olgeta wanwan, oli stap folem ol rod we oli ting se oli save win long hem. 12Olgeta oli man blong dring, we oltaem oli stap talem se, ‘!Yumi go tekem waen! !Bambae yumi dring gogo yumi fuldrong! !Tede i wan nambawan dei, mo tumora bambae i gud moa!’ ”
Currently Selected:
Aesea 56: BBR
Highlight
Share
Copy
Want to have your highlights saved across all your devices? Sign up or sign in
Bislama Revised Bible © Bible Society of the South Pacific, 2012.
