Jenesis 22

God i talem long Ebraham blong i kilim Aesak blong mekem sakrefaes long hem

1 # Hib 11.17-19 Nao biaen, i no longtaem, God i traem bilif blong Ebraham. Hem i singaot i kam long hem se, “Ebraham.”

Mo Ebraham i ansa se, “Yes.”

2 # 2 Kron 3.1 Nao God i talem long hem se, “Pikinini ya blong yu Aesak, hem i wan nomo we yu yu gat, mo yu yu lavem hem tumas. Mi wantem blong yu tekem hem, yu go long ples ya Moria. Nao long ples ya bambae mi mi soemaot wan hil long yu, mo long hil ya, bambae yu kilim pikinini ya, yu bonem hem long faea, blong mekem sakrefaes long hem blong mekem wosip long mi.”

3Nao long nekis dei, long eli moning, hem i go katem faeawud blong bonem sakrefaes, mo i putum long baksaed blong dongki blong hem. Nao i tekem pikinini blong hem wetem tu man blong wok blong hem, nao oli aot, oli stap wokbaot blong go long ples ya we God i talem long hem. 4Nao long namba tri dei blong hem, hem i luk ples ya, be i stap longwe lelebet yet. 5Nao hem i talem long tufala man ya blong hem se, “Yutufala i stap wet long ples ya fastaem, wetem dongki ya. Mi wetem Aesak, bambae mitufala i go long ples ya longwe, blong mekem wosip. Nao biaen, bambae mitufala i kambak long yutufala bakegen.”

6Nao hem i holem naef mo baket sakol we i laet, mo i givim faeawud long Aesak blong i karem, nao tufala i wokbaot i go. 7Nao taem tufala i stap wokbaot i go, Aesak i talem se, “Papa.”

Mo papa blong hem i talem se, “?Yes, wanem?”

Nao hem i talem se, “Yu luk. I gat faea mo faeawud, be i no gat smol sipsip* blong mekem sakrefaes long hem. ?Bambae i olsem wanem?”

8Nao papa blong hem i talem se, “God nomo bambae i givim smol sipsip blong sakrefaes.” Nao tufala i stap wokbaot i go, 9#Jem 2.21mo taem tufala i kamtru long ples ya we God i talem, Ebraham i wokem wan olta, mo i putumrere ol faeawud antap long hem, mo i fasem pikinini ya blong hem, i putum hem antap long faeawud ya. 10Nao hem i tekem naef blong stikim hem i ded. 11Be enjel* blong Hae God i blokem hem. Hem i stap long heven, nao i singaot i kam long hem, i talem se, “!Ei! !Ebraham! !Ebraham!”

Mo Ebraham i ansa se, “!Yes!”

12Nao enjel ya i talem se, “!Yu no spolem boe ya! !Yu no mekem wan samting long hem! Naoia mi mi save we yu yu stap onatru long God. Yu yu gat wan pikinini ya nomo, mo nating we hem wan nomo we yu yu gat, be yu rere nomo blong letem hem i ded.”

13Nao Ebraham i luklukraon, mo i luk wan man sipsip we hon blong hem i fas long han blong wan smol tri. Nao hem i go tekemaot, mo i kilim i ded, nao i bonem long olta ya blong mekem wosip long God, we sipsip ya i tekem ples blong pikinini blong hem. 14Nao hem i putum nem blong ples ya se “Hae God i stap givim evri samting.”#22.14: Narafala rod blong tanem nem blong ples ya i olsem. “Hae God i stap luk evri samting.” Taswe, kam kasem tede, ol man oli stap talem se, “Antap long hil blong Hae God, hem i stap givim evri samting.”#22.14: Narafala rod blong tanem tok ya blong ol man i olsem. “Antap long hil blong Hae God, yumi save luk hem.”

15Nao enjel ya blong Hae God i tok bakegen, 16#Hib 6.13,14i talemaot long Ebraham se, “Hae God i talem se, ‘Long nem blong mi, mi mi promes* se bambae mi blesem yu bigwan. Pikinini ya blong yu i wan nomo we yu yu gat, be yu yu no holemtaet hem, yu rere nomo blong letem hem i ded. Mo from we yu yu mekem olsem, 17#Hib 11.12mi mi promes long yu se olgeta we bambae oli kamaot biaen long yu, bambae oli plante we plante. Bambae oli plante olsem ol sta long skae, mo olsem sanbij daon long solwota. Olgeta ya bambae oli stap winim ol enemi blong olgeta. 18#Wok 3.25Bambae ol man blong ol narafala kantri oli save prea long mi blong mi blesem olgeta, olsem we bambae mi blesem olgeta ya. Be bambae mi mi mekem i gud tumas long olgeta we bambae oli kamaot biaen long yu, from fasin ya we yu yu mekem tede, we yu obei long tok ya blong mi.’ ”

19Nao Ebraham wetem Aesak tufala i kambak long tufala man ya blong hem, nao olgeta oli kambak bakegen long Bereseba. Nao hem i mekem ples blong hem long ples ya.

Ol laen blong Naho

20Biaen long taem ya lelebet, Ebraham i harem nius we brata blong hem Naho wetem woman blong hem Milka tufala i gat eit pikinini boe blong tufala. 21-23Ol pikinini ya, i gat Uj we i fasbon, mo Bus, mo Kemuel, we i papa blong Aram, mo Kesed, mo Haso, mo Pildas, mo Jidlaf, mo Betuel, we i papa blong Rebeka. Hemia nao nem blong ol eit pikinini boe blong Naho we Milka i bonem. 24Mo Naho ya i gat wan narafala woman blong hem, we nem blong hem Rumaha, mo hem i bonem fo pikinini boe blong hem bakegen, we nem blong olgeta, Teba, mo Gaham, mo Tahas, mo Mahaka.

Currently Selected:

Jenesis 22: BBR

Highlight

Copy