Jenesis 23

Sera i ded, mo Ebraham i pemaot pis graon blong berem hem long hem

1Nao Sera i stap gogo kasem we hem i olfala we i olfala, nao i ded. Mo long taem ya, hem i gat wan handred twanti seven yia blong hem. 2Hem i ded long kantri ya Kenan,* long taon ya Kiriataba, we naoia, oli kolem Hebron. Mo Ebraham i stap krae bigwan long hem.

3Nao hem i aot long haos tapolen blong hem, i go luk ol haeman blong taon ya. (Ples ya i ples blong ol laen* blong Het.) Nao hem i talem long olgeta se, 4#Hib 11.9,13; Wok 7.16“Olgeta. Mi mi stap long ples blong yufala, be mi mi wan strenja nomo. Woman blong mi i lus, mo mi wantem pemaot wan pis graon long yufala, blong mi save berem hem long hem.”

5Be olgeta oli talem se, 6“Masta, plis yu lesin long tok blong mifala. Mifala i stap luk yu se yu yu wan bigfala haeman blong mifala. Yu save go nomo long wan beregraon blong mifala we yu luk se i beswan, yu save berem woman blong yu long hem. Sipos yu wantem tekem wan beregraon* blong mifala blong berem woman blong yu long hem, bambae i no gat wan long mifala i save blokem yu.”

7Be hem i stanap, i bodaon long fes blong olgeta, 8nao i talem se, “Sipos yufala i glad blong letem mi mi berem woman blong mi long ples ya, plis yufala i askem long Efron ya we papa blong hem Joha, 9blong i salemaot wan smol pis graon blong hem long mi. Mi wantem smol pis graon ya we hol blong ston ya i stap long hem, we nem blong hem Makpela, we i stap long saed blong wan garen blong hem. Plis yufala i askem long hem blong i letem mi mi pemaot graon ya long fes blong yufala, long ful praes blong hem, blong mi save holem i kam beregraon blong mifala.”

10Nao olgeta ya oli stap sidaon long doa* blong bigfala stonwol blong taon ya, we hemia i prapa ples long kastom blong olgeta blong tokbaot ol bisnes olsem. Mo long taem ya, Efron tu i stap sidaon wetem olgeta. Nao long fes blong olgeta, hem i talemaot tok blong hem se, 11“Masta, tok blong mi i olsem. Mi mi glad blong givim olgeta graon long ples ya i go long yu, wetem hol ya blong ston we i stap long hem. Mi glad blong givim i go nomo long yu naoia, long fes blong ol man ples ya blong mi, blong yu save berem woman blong yu long hem.”

12Be long fes blong olgeta, Ebraham i bodaon bakegen, 13mo i talem long man ya se, “Plis yu lesin long tok blong mi bakegen. Mi mi wantem pemaot olgeta graon long ples ya wantaem nomo naoia. Plis yu tekem mane ya, blong mi save go berem woman blong mi long graon ya.”

14Nao Efron i talem se, 15“Masta, praes blong graon ya, tu handred taosen vatu* nomo. Hemia i nating long yumi. Yu gohed, yu go berem woman blong yu long hem.” 16Nao Ebraham i agri blong pem praes ya we man ya i talemaot long fes blong ol man ples blong hem. Nao long fes blong olgeta, hem i skelem ol silva blong hem blong kasem stret praes ya, olsem we ol bisnesman oli stap mekem oltaem long taem ya.

17Taswe pis graon ya long ples ya Mamre#23.17: Yu luk futnot N long 20.1., long saed i go long is, we nem blong hem Makpela, we fastaem i graon blong Efron, hem i kam graon blong Ebraham. Pis graon ya i finisim olgeta graon blong Efron long ples ya, wetem hol blong ston, mo olgeta tri we oli stap long hem. Tufala i mekem ol bisnes blong hem long stret fasin nomo, 18mo ol laen blong Het we oli stap long miting ya oli savegud we long taem ya, graon ya i kam graon blong Ebraham.

19Nao Ebraham i go berem* woman blong hem long hol ya blong ston, long Kenan. 20Nao long fasin ya, graon ya we fastaem i blong ol laen blong Het, wetem hol ya blong ston we i stap long hem, hem i kam graon blong Ebraham, nao hem i stap yusum hol ya blong ston blong berem ol famle blong hem long hem.

Currently Selected:

Jenesis 23: BBR

Highlight

Copy