Esikel 17
17
Parabol blong tufala pijin ya igel mo rop ya grep
1Hae God i Masta* blong yumi, mo hem i toktok long mi bakegen, 2i talem se, “Man blong wol ya. Yu talem wan parabol long ol laen* blong Isrel,* 3blong mekem olgeta oli save wanem samting mi mi stap talem long olgeta. Parabol ya i olsem. I gat wan bigfala pijin ya igel* we i bigwan we i bigwan, mo gras blong hem i gat plante kala long hem. Tufala wing blong hem i bigbigwan, mo taem hem i stretem tufala, tufala i longfala we i longfala. Nao hem i flae i go antap long ol bigfala hil blong Lebanon, i brekem top blong wan sida,* 4nao i karem i go long wan kantri we ol man blong hem oli wokem plante bisnes long hem, mo i putum long wan taon blong ol bisnesman. 5Nao hem i pulumaot wan smol gru blong rop ya grep* long kantri ya Juda,* i go planem long wan ples we graon blong hem i gud, mo oltaem i gat wota blong mekem i gru gud. 6Nao grep ya i gru, i kam bigfala, be i no go antap tumas. Hem i kavremap bigfala ples, mo ol han blong hem oli poen i go antap long bigfala igel ya, mo ol rus blong hem oli godaon we i godaon olgeta. Grep ya i gat plante han long hem we oli fulap gud long lif blong hem.
7“Nao i gat wan narafala igel bakegen we i bigwan we i bigwan, mo gras blong hem i fulap, mo tufala wing blong hem i bigbigwan. Nao ol rus blong grep ya oli poen i go stret long igel ya, mo ol top blong hem tu oli poen i go stret long hem, from we hem i ting se maet igel ya i save givim moa wota long hem, i winim we hem i stap kasem long ples ya we i stap gru long hem. 8Be grep ya, fas igel i planem finis long gudfala graon ya we i gat plante wota long hem, blong bambae i save kam wan nambawan grep, we i save gat plante han blong hem, mo i save karem plante frut.
9“Mo yu talem long olgeta we mi mi talem se, ‘?Olsem wanem? ?Bambae grep ya i gru? !Nogat! Bambae fas igel ya i pulumaot grep ya, mo i tektekemaot ol frut blong hem, nao i brebrekem ol han blong hem, i livim olgeta blong oli drae. Bambae hem i no nidim paoa, mo i no nidim plante strong man tu blong oli pulumaot. 10I tru, igel ya i planem finis. ?Be yufala i ting se bambae i gru? Bambae win i blu strong i kam long is, nao grep ya bambae i ded. Bambae i drae long ples ya we i stap gru long hem.’ ”
Mining blong parabol ya
11Nao Hae God i talem long mi se, 12#2 King 24.15-20; 2 Kron 36.10-13“Ol man ya oli stap agens long mi. Yu askem long olgeta se, ‘?Yufala i save mining blong parabol ya?’ Yu mas talemaot long olgeta se, ‘King blong Babilonia i go long Jerusalem,* mo i karemaot king#17.12: King long ples ya i King Jehoeakin. Yu luk 2 King 24.8-16. blong yufala wetem ol haeman blong taon ya, oli kam wetem hem long Babilonia. 13Nao hem i tekem wan man we i famle blong king#17.13: Wan famle blong king, hem i wan papa blong King Jehoeakin, mo King Nebukadnesa i putumap hem i kam king blong Juda, nao i putum nem blong hem se King Jedekia. Yu luk 2 King 24.1-20., nao tufala i mekem promes se tufala kantri blong tufala i save stap gud, tufala i no faet, mo hem i mekem man ya i mekem wan strong promes blong holem promes ya blong hem. Mo hem i holem ol lida blong kantri blong yufala, nao hem i karem olgeta i kam long ples ya, blong oli stap wok slef* long ples ya, 14blong ol man ples blong yufala oli mas holem promes ya, oli no save girap bakegen blong mekem wan samting. 15Be naoia, man ya i girap, i brekem promes ya, mo i sanem sam man blong wok blong hem oli go long Ijip, blong oli tekem ol hos wetem bigfala kampani blong ol soldia, blong oli kam faet agens long king blong Babilonia. ?Be olsem wanem? ?Bambae hem i save win? Sipos hem i mekem olsem, bambae hem i no save ronwe long panis. Man we i brekem promes blong hem, hem i mas kasem panis from.
16“ ‘Mi mi Hae God, mi Masta* blong yufala, mo mi laef, mi stap we mi stap. Mo naoia, mi mi talem stret long yufala, se long nem blong mi, man ya i mas ded long Babilonia. Hem i no moa holem tok blong hem, mo i no wantem stap fren gud wetem king blong Babilonia. Hem i brekem promes ya we i mekem wetem king ya, mo bambae hem i mas ded from. 17Mo sipos ol man Babilonia oli go digim hol i goraon long Jerusalem, mo oli hivimap graon blong oli haed biaen long hem blong kilim ol man oli ded, nating we ol soldia ya blong Ijip we oli strong tumas oli kam blong givhan long man ya we i stap rul, be bambae oli no save givhan long hem blong faet agens long olgeta ya. 18Hem i brekem promes ya we hem i mekem, mo hem i no holem tok blong hem we i mekem wetem king blong Babilonia blong i stap fren gud wetem hem, mo from samting ya, bambae hem i no save ronwe long panis.
19“Naoia mi mi talem stret long yufala, se long nem blong mi, mi bambae mi panisim hem. Hem i brekem promes ya we i mekem long nem blong mi, blong i stap fren gud wetem king blong Babilonia, mo from samting ya, hem i mas lus. 20Bambae mi putum trap blong mi blong kasem hem, nao bambae mi tekem hem i go long Babilonia. Long ples ya, bambae mi panisim hem, from we tingting blong hem i no moa stap strong long mi, i tanem baksaed long mi. 21Mo bambae ol enemi oli kilim ol nambawan soldia blong hem long faet, mo olgeta we oli stap laef, bambae ol enemi ya oli ronem olgeta oli go olbaot long evri ples. Nao bambae yufala i savegud we mi mi Hae God, mo hemia tok blong mi.’ ”
Parabol blong sida
22-23Hae God i Masta* blong yumi, mo hem i talem se,
“Mi bambae mi holem top blong wan sida*
we i longfala,
mi brekemaot top blong hem
we i sofsof,
nao bambae mi tekem i go long Isrel,*
mi go planem antap long wan hil
we i hae we i hae.
Bambae hem i gat ol han blong hem,
mo i karem frut,
mo bambae i kam wan nambawan sida.
Mo bambae ol naranarafala pijin
oli kam stap long ples ya,
oli haed long hem.
24Nao bambae olgeta tri long kantri ya
oli savegud we mi mi Hae God.
Mi nao mi stap katemdaon
ol longlongfala tri,
mo mi stap mekem ol sotsotfala tri oli gru,
oli kam longlongfala.
Mo mi stap mekem ol tri we oli stap gru,
oli kam drae,
mo mi stap mekem olgeta we oli drae finis,
oli gru bakegen.
Mi bambae mi mekem samting ya.
Mi mi Hae God, mo hemia tok blong mi.”
Currently Selected:
Esikel 17: BBR
Highlight
Share
Copy
Want to have your highlights saved across all your devices? Sign up or sign in
Bislama Revised Bible © Bible Society of the South Pacific, 2012.
