Wok 24

Ol laen blong Isrel oli talemaot ol poen we oli gat agens long Pol

1Faef dei i pas, nao Hae Pris* ya Ananaeas i kamdaon long Sisaria. Mo sam elda* blong ol laen* blong Isrel*, mo wan loea we nem blong hem Tetalas, oli kam wetem hem. Taem oli kamtru, oli go stanap long fes blong Filiks, nao oli stap talemaot ol poen we oli gat agens long Pol. 2Nao oli singaot Pol i kam insaed, mo Tetalas i stap talemaot ol poen blong olgeta long Filiks.

Hem i talem se, “Masta*. Yu yu haeman tru. Mo from we fasin blong yu blong lidim mifala i waes gud, ples blong mifala i stap kwaet longtaem finis. Mo yu yu stretem plante fasin long ples ya finis, blong mekem laef blong mifala i kam gud moa. 3Oltaem mifala i stap harem gud tumas from ol samting ya, mo mifala i talem tangkiu tumas long yu from. 4Mi mi no wantem spolem taem blong yu tumas, be mi askem long yu blong yu sore long mifala, yu lesin lelebet long smol tok ya blong mifala. 5Mifala i faenem finis we man ya i wan rabis man, hem i stamba blong plante trabol. Olbaot long wol, hem i stap mekem plante bigfala rao long ol laen blong Isrel, mo hem i wan lida blong krangke kampani ya blong mifala we oli biaen long man Nasaret ya. 6Mo hem i traem mekem haos* blong God i doti long fes blong God. Nao mifala i holem hem.#24.6: Long sam olfala kopi blong Niutesteman long lanwis blong ol man Gris bifo, i gat narafala tok i joenem tok ya, we i talem se, “Mo mifala i mekem plan blong jajem hem, long fasin blong Loa blong mifala. 7 Be komanda ya Lisias, hem i kam insaed long bisnes ya, nao hem wetem ol man blong hem oli pulumaot hem long han blong mifala bakegen. 8 Mo hem i putum wan tok, se ol man we oli gat poen agens long man ya oli mas kam talemaot long yu.” Mo sipos yu askem kwestin long hem, yu save harem ol poen we mifala i stap talemaot, stret long maot blong hem.”

9Nao ol laen blong Isrel oli joen long ol tok ya blong loea, oli talem se, “Olgeta tok ya i tru nomo.”

Pol i talem ansa blong hem, long fes blong Filiks

10Nao hed gavman ya i sakem hed blong hem long Pol, blong hem i toktok. Nao Pol i talem se, “Mi mi savegud, we yu yu stap jajem ol man long ples ya blong mifala, long plante yia finis. Mo from samting ya, mi mi glad tumas blong talemaot ol poen blong mi long fes blong yu. 11I gat twelef dei nomo i pas we mi bin go antap long Jerusalem* blong mekem wosip. Mo yu yu save jekemap tok ya blong mi se i tru no i no tru. 12Ol laen blong Isrel ya oli no luk se mi mi rao wetem sam man long haos* blong God. Mo oli no luk se mi stap mekem ol man oli girap, oli agens long mi insaed long ol haos blong prea, mo long ol ples olbaot long taon, nogat. 13Mo oli no save soemaot long yu, we ol poen ya, we naoia oli talemaot long yu, oli tru.

14“Be mi mi save talemaot long yu, se i tru we mi mi stap mekem wosip long God ya blong ol olfala blong mifala, long Rod ya blong Jisas, we olgeta ya oli stap talem se i krangke. Mo mi bilif tu long olgeta tok we oli raetem long buk* blong Loa* blong Moses, mo long ol buk blong ol profet. 15Mo mi putum tingting blong mi long God blong luk sem samting ya nomo we olgeta ya oli stap tingbaot. Hemia samting ya, we God bambae i mekem olgeta man we oli ded oli laef bakegen, ol man we oli stret, wetem ol man we oli no stret. 16Mo from samting ya, oltaem mi stap traehad tumas blong mekem we long fes blong God mo long fes blong man, bambae mi no mekem wan samting we i save stikim mi, se mi mekem i rong.

17 # Wok 21.17-28 “Mi mi no moa stap long Jerusalem long plante yia. Nao biaen, mi go long ples ya blong tekem mane i go long ol man ples blong mi, mo blong kilim anamol long haos blong God blong mekem sakrefaes. 18Mo taem mi stap mekem samting ya yet, olgeta oli luk mi long haos blong God, biaen long taem ya we mi mekem mi mi klin finis long fes blong God. Mo i no gat plante man oli stap wetem mi, mo i no gat rao tu. 19Be i gat sam laen blong Isrel we oli aot long Esia*, we long taem ya oli stap long haos ya. Mo sipos oli gat ol poen we oli faenem agens long mi, i stret nomo blong olgeta ya oli kam stanap long fes blong yu blong talemaot. 20Sipos no, i gud ol man ya oli talemaot long yu wanem samting nogud we oli faenem long mi, se mi mi mekem long taem ya we mi stanap long fes blong Kaonsel* blong olgeta. 21#Wok 23.6Oli kros long mi from wan tok nomo. Taem mi stanap long fes blong olgeta, mi singaot bigwan se, ‘Yufala i stap jajem mi tede, from we mi bilif we ol dedman bambae oli save laef bakegen.’ ”

22Filiks ya, hem i wan man we i savegud nius blong Rod ya blong Jisas, nao hem i satem kot blong bisnes ya fastaem. Hem i talem se, “Taem komanda ya Lisias i kamtru, bambae mi mi save givim ansa blong mi long bisnes ya.” 23Nao hem i talem long kapten ya we i stap gad long Pol, blong hem i gad gud long hem, be i letem hem blong i fri lelebet. Mo hem i talem long hem blong i letem ol fren blong Pol, oli tekem ol samting we Pol i sot long hem, oli kam givim long hem.

Pol i stap toktok long Filiks mo Drusila

24I gat sam dei i pas, nao Filiks i tekem woman blong hem Drusila i kam. Woman ya i wan laen blong Isrel. Nao Filiks i talem long olgeta blong oli tekem Pol i kam, mo taem Pol i stap tokbaot fasin blong bilif long Jisas Kraes*, hem i stap lesin long hem. 25Be taem Pol i stap tokbaot ol gudfala fasin, mo fasin ya se man i mas blokem ol samting we hem nomo i wantem, mo dei ya we God bambae i jajem olgeta man, Filiks i seksek gud. Nao hem i talem se, “I naf fastaem, yu save goaot. Taem mi mi gat janis, bambae mi singaot yu bakegen.” 26Be long semtaem, hem i stap tingbaot we maet hem i save kasem sam mane long Pol blong letem hem i go fri. Nao from samting ya, oltaem hem i stap singaot Pol blong i kam, nao i stap toktok wetem hem.

27Tu yia i pas, nao Filiks i finisim wok blong hem blong hed gavman, be hem i livim Pol i stap long kalabus, from we hem i wantem mekem ol laen blong Isrel oli harem gud long hem. Nao Posias Festas i tekem ples blong hem, i kam hed gavman.

Pol i wantem go talemaot ol poen blong hem long fes blong Sisa

Currently Selected:

Wok 24: BBR

Highlight

Copy