Ma̱rkut 10

Yesu Tyiet tazwa Tyat Nyeang

(Mat 19:1-12; Luk 16:18)

1Yesu si̱ ghwon Ka̱fanahum, a̱ si̱ nat mi̱ fam a̱byin Yahudiya. A̱ si̱ byia̱k a̱ nat a̱ma̱nyi fam a̱tyin a̱ghyui Urdun. Á̱kpa á̱niet ma̱ a̱di̱di̱t di̱ susot si̱ bu tung da̱ a̱vwuo nggu. A̱ si̱ nwuo tyiet baa, ma̱nang gu mmeang a̱ni.

2A̱fa̱risawa á̱ghyang si̱ bai da̱nian ba̱ ka mak Yesu. Ba̱ si̱ lyip gu nyia̱, “Doka ji̱ shim a̱tyok a̱ tyat nyeang ma̱ng a̱byii̱k gu a?”

3Yesu si̱ nwuak mba shim ma̱ng lyip nyia̱, “Yihwa nang Musa lyuut mi̱ doka ji tazwa tyat nyeang hu?”

4Ba̱ si̱ nyia̱ ma̱ng a̱nggu, “Musa ku shim a̱tyok a̱ lyuut wusika tyat nyeang, a̱wot a̱ ti̱n a̱byii̱k wu a̱ nkat.”#10:4 KDok 24:1-4; Mat 5:31.

5Yesu si̱ nyia̱ ma̱ng a̱mba, “Mat lak fwuong nyin hwa mbyia̱ Musa ku nnwuak nyin doka ji. 6A̱wot neet di̱n tsa swanta hu, A̱gwaza ku mat ba a̱tyok ma̱ng a̱byii̱k.#10:6 A̱ts 1:27; 5:2. 7Mat a̱nia, a̱tyok na ghwon a̱tyia̱ nggu wu ma̱ng a̱yang nggu wu, a̱ ta̱meet da̱ a̱byii̱k gu. 8Mat a̱nia, mba a̱feang ba̱ na yet vam nyiung. Ba̱ bu yet a̱feang bah. Ba̱ yet vam nyiung hwa.#10:8 A̱ts 2:24. 9Mat a̱nia, nyeang nang A̱gwaza la̱p a̱ni, a̱yin gu yok tyat hu bah.”

10Jen nang ba̱ nshya̱ a̱mali ka ma̱nyin mba a̱ni, mman ta̱m na si̱ bu lyip Yesu tazwa a̱lyiat tyat nyeang na. 11Yesu si̱ tak ma̱ng a̱mba nyia̱, “Kuzang a̱tyok a̱ tyat nyeang ma̱ng a̱byii̱k gu, a̱wot a̱ si̱ bwuo a̱ghyang a̱ni; katnaan nia gu nyia̱ a̱yang a̱li nggu wu ndyo. 12Ma a̱nia wa, ka̱ a̱byii̱k ghwon a̱tyok nggu wu, a̱ si̱ nyeang a̱tyok a̱ghyang; a̱ nyia̱ a̱tyok ntsa wu katnaan nia.”#10:12 Mat 5:32; 1A̱ko 7:10-11.

Yesu Tyia̱ A̱chyuang Mman A̱li̱ba̱rka

(Mat 19:13-15; Luk 18:15-17)

13Á̱ghyang á̱tuk á̱ghyang á̱niet si̱ bai ma̱ng a̱chyuang mman da̱ a̱vwuo Yesu, da̱nian a̱ ka byiam baa, a̱ tyia̱ mba a̱li̱ba̱rka. A̱wot mman ta̱m nggu na si̱ kam baa, ba̱ yok tyei Yesu dyem bah.

14Nang Yesu ndi a̱nia a̱ni, a̱ si̱ fa̱k a̱lyia̱ ya ma̱ng mman ta̱m nggu na, a̱ si̱ nyia̱, “Nyi yok a̱chyuang mman wu ba̱ bai da̱ a̱vwuo nung. Nyi yok vwuong mba bah. Mat ntangka̱i mman nani, yet mman Tyok A̱gwaza nia. 15N shei nyin a̱tsak a̱lyiat; konyan wa da̱ a̱ san Tyok A̱gwaza hu nang a̱da̱dei nggwon a̱ni bah, a̱ na̱ shya̱ nwuo ma̱ nhu bah.”

16Nang gu nsaai mba bwak nggu na di̱ pyipyia̱ mba hu a̱ni. A̱ si̱ nang mba a̱tan a̱nu.

Fi̱ng A̱tyu Byia̱ Zwá

(Mat 19:16-30; Luk 18:18-30)

17Nang Yesu ndoot a̱ naat Urusha̱lima a̱ni, a̱tyok a̱ghyang si̱ neet di̱n chung a̱ ba̱ kpaat a̱khwukhwut a̱zaghyi nggu, a̱ si̱ lyip gu nyia̱, “A̱tsatsak a̱tyu tyiet#10:17 Ku: “A̱tan a̱tyu tyiet.”, yihwa n na nyia̱ n shya̱ swuan sang sangba̱p ji?”

18Yesu si̱ lyip gu nyia̱, “Yihwa mbyia̱ a ngyei nung a̱tsatsak? Á̱ mbyia̱ a̱tyu a̱ yet a̱tsatsak#10:18 Ku: “A̱tan.” a̱ni bah; ma̱ A̱gwaza wa ma̱nyin gu#10:18 Wa̱i a̱lyiat: Ma̱ A̱gwaza wa ma̱nyin gu. Shimba a̱da̱dei zwunzwuo wuni na shya̱ á̱niet mi̱ ndyin. Ku li á ngyei Yesu nyia̱ da̱ a̱ yet a̱tsatsak bah. Da̱ a̱kwonu a̱kya, Yesu mai a̱tyu zwa wu di̱ kyang nang gu fa ma̱ng swang a̱lyiat “A̱tsatsak.” A̱tyu zwa a̱wa hyia̱ swang a̱lyiat jini ma̱ tai, a̱ dam nyia̱ ka̱ a̱yin khwi doka jhyang ma̱nyin ji, a̱ si̱ ghwon jhyang, á̱ na kyiak gu a̱ yet A̱tsatsak wa.. 19A lyen doka A̱gwaza ji, ji̱ nyia̱,

‘Yok hyat a̱yin bah;

yok katnaan;

yok nyiin tsang bah;

yok shyi shyishyi a̱ka̱laa tazwa a̱yin bah;

yok shyok a̱yin bah;

nwuak a̱tyia̱ ang ma̱ng a̱yang ang wu shi.’#10:19 Ghw 20:12-16; KDok 5:16-21.”

20Fi̱ng a̱tyok hu si̱ nyia̱, “A̱tyu tyiet, n ku nnyia̱ nkyang nani neet nang n gyet nggwon!”

21Nang Yesu nnwuan gu a̱ni, a̱ si̱ fa̱k da̱ nggu ba̱t. Huhwa gu nyia̱ ma̱ng fi̱ng a̱tyu a̱hwa, “Kyang nyiung hwa bwat ang. Nat a si̱ lyap a̱mgba̱m nkyang zwa ang na a ka̱u á̱kunak kurum hu, a̱wot a na byia̱ zwá Ma A̱gwaza tswazwa. A sii bai a khwi nung.” 22Nang fi̱ng a̱tyu a̱hwa nfa̱k a̱nia a̱ni, a̱ si̱ byian a̱ghyi. A̱wot a̱ si̱ nkat ma̱ng byian fwuo, mat a̱ ku byia̱ zwá gba̱mgbam.

23Yesu si̱ nwuan mman ta̱m nggu na a̱ kaat, a̱ si̱ nyia̱ ma̱ng a̱mba, “Ku na vwuo a̱khwu ba̱t á̱niet zwá ba̱ shya̱ nwuo Tyok A̱gwaza hu!”

24Mman ta̱m nggu na si̱ fa̱k a̱ga̱de da̱ a̱lyiat nggu na. A̱wot Yesu si̱ ya a̱son nyia̱, “Mman nung, ku na vwuo a̱khwu za̱m a̱yin#10:24 Lyuut ghyang mbyia̱: “A̱tyu nzwa,” ku “A̱tyu a̱ nwuak fwuo di̱ zwa a̱ni.” gu nwuo mi̱ Tyok A̱gwaza hu! 25Ku na laai lan a̱lakumi a̱ nwuo a̱ kaat a̱ ghwut mi̱ zwua̱i a̱yop, nang a̱tyu nzwa na nnwuo mi̱ Tyok A̱gwaza hu a̱ni!”

26Mman ta̱m na si̱ mbeang fa̱k a̱ga̱de. A̱wot ba̱ si̱ nyia̱ ma̱ng á̱ghyang mba, “Mi̱ ka a̱nia wa, a̱nyan wa na shya̱ san hu?#10:26 Wa̱i a̱lyiat: A̱nyan wa na shya̱ san hu? Mi̱ taada A̱yahudawa ji, ba̱ kyiak á̱niet ba̱ byia̱ zwa a̱ni, nang A̱gwaza wa nwuak ba a̱li̱ba̱rka wu.” 27Yesu si̱ sak á̱ghyi da̱ mba. A̱wot a̱ si̱ nyia̱ ma̱ng a̱mba, “Ki̱ chet a̱tyubishyi hwa, a̱tyu nzwa na shya̱ san bah. A̱wot chet A̱gwaza hu byia̱ gak bah. Mat a̱mgba̱m kuzang kyang na tyia̱ da̱ a̱vwuo A̱gwaza.”

28Bitut si̱ nyia̱ ma̱ng a̱nggu, “Di, zi̱ ghwon kuzang kyang zi̱ ka khwi ang!”

29Yesu si̱ nwuak mba shim nyia̱, “N tak ma̱ng a̱nyin a̱tsak a̱lyiat; konyan wa ghwon a̱li, ku á̱na̱nyiuk á̱sam ku á̱nap, ku a̱yang ma̱ng a̱tyia̱, ku mman, ku bibyin khap, da̱nian nung ma̱ng A̱sham Nkhang ka; 30kyang gu na san mi̱ jen jini a̱ni, na tat a̱ka̱chyi; a̱ka̱sa, á̱na̱nyiuk á̱nap ma̱ng á̱sam, a̱yaayang, mman, ma̱ng bibyin khap. A̱wot ma̱ng a̱mgba̱m nkyang nani á̱ na ta̱shuk ba ba̱t. A̱wot mi̱ jen chobai ba̱ na san swuan sang sangba̱p.

31“A̱wot á̱niet ma̱ a̱di̱di̱t nang á̱ kyiak ba̱ yet a̱son ka ma̱nini a̱ni, bibya na ngaan. A̱wot á̱niet nang á̱ kyiak ba̱ yet ngaan ma̱nini a̱ni, bibya na yet a̱son ka.”#10:31 Mat 20:16; Luk 13:30.

Yesu bu Tak Á̱zanson da̱ A̱ka̱tat tazwa A̱khwu gu

(Mat 20:17-19; Luk 18:31-34)

32Ba̱ shya̱ di̱n vak naat Urusha̱lima, nang Yesu wa kwak a̱son ka. Mman ta̱m na si̱ fa̱k a̱ga̱de; á̱kum á̱niet ka ba̱ khwi gu a̱ni si̱ fa̱k a̱wun#10:32 Wa̱i a̱lyiat: Fa̱k a̱wun. Á̱niet ba fa̱k a̱wun mat Yesu ku kwak a̱son mba di̱ naat Urusha̱lima, a̱mgba̱m nang gu ndyen a̱ naat a̱ si̱ swuo a̱bung a̱ja a̱ni.. A̱ si̱ bu yorong mman ta̱m nggu na swak ma̱ a̱feang da̱ gbang a̱nyiung. A̱ si̱ tak ma̱ng a̱mba swuo a̱bung ku na shya̱ gu a̱ni. 33A̱ si̱ nyia̱ ma̱ng a̱mba, “Nyi fa̱k! Zi̱ naat Urusha̱lima! A̱ja, á̱ na bwuk ma̱ng Nggwon A̱tyubishyi. Á̱ tyia̱ nka mbwak a̱cha̱chet a̱yaapris, ma̱ng á̱niet tyiet doka A̱yahudawa. A̱wot ba̱ faat nka shi̱ri̱ya a̱khwu. Ba̱ bu tyia̱ nka mbwak Nnwap na̱ nwai yet A̱yahudawa a̱ni.

34“A̱wot ba̱ na mai nkaa. Ba̱ mang nka a̱lyem. Ba̱ tang nka a̱ta̱mpyia̱. Ba̱ tsot ka, ba̱ hyat ka. A̱wot a̱tuk mam tat ka, ka̱ na doot ma̱ng swuan ma̱ á̱niet ba̱ ka̱n kwi a̱ni.”

Yakubu Ma̱ng Yoona Chat Nyia̱ Tyok ma̱ng Yesu

(Mat 20:20-28)

35A̱wot Yakubu ma̱ng Yoona, ba̱ yet mman Za̱ba̱di a̱ni, si̱ bai da̱ a̱vwuo Yesu. Ba̱ si̱ nyia̱, “A̱tyu tyiet, zi̱ chat a nyia̱ nzi̱t kyang zi̱ na lyip ang a̱ni.”

36Yesu si̱ lyip ba nyia̱, “Yihwa nang nyi chat n nyia̱ nyin dyo?”

37Ba̱ si̱ nyia̱, “Zi̱ chat a shim nzi̱t ndyo; a̱tuk a nswan di̱ chuk shi tyok ang ji a̱ni, yok a̱tyo nyiung ma̱ nzi̱t gu swan a̱za yak, a̱tyo nyiung a̱za myian.”

38Yesu si̱ nyia̱ ma̱ng a̱mba, “Nyi lyen kyang nang nyi naai a̱ni bah. Ka̱ doot nyi swuo ma̱ a̱kashyi swuo a̱bung wu nang n na swuo a̱ni a? Ku nyi nyia̱ ba̱ptisman swuo a̱bung, nang á̱ na nyia̱ nung dyo a̱ni a?”#10:38 Luk 12:50.

39Ba̱ si̱ nyia̱, “Ii, zi̱ maai!” Yesu si̱ nyia̱ ma̱ng a̱mba, “A̱tsak a̱lyiat, nyi na swuo ma̱ a̱kashyi swuo a̱bung nang n na nswuo a̱ni; a̱wot ba̱ptisman swuo a̱bung nang á̱ na nyia̱ nung dyo a̱ni, jija á̱ na nyia̱ nyin dyo. 40A̱wot khai a̱tyu a̱ na swan a̱zayak ku a̱zamyian nung a̱ni, yet si̱ nung hwa bah. Ku yet si̱ á̱niet á̱ ka̱n jhyi á̱ sak mba ndyo wa a̱ni.”

41Nang á̱kum mman ta̱m swak ka nfa̱k a̱nia a̱ni, ba̱ si̱ fa̱k a̱lyia̱ ya ma̱ng Yakubu ma̱ng Yoona. 42Mat a̱nia, Yesu si̱ yorong a̱mgba̱m mman ta̱m swak ma̱ a̱feang na dundung, a̱ si̱ nyia̱, “Nyi lyen á̱niet ba á̱ khai ba̱ nyia̱ tyok tazwa nnwap na̱ chyi A̱gwaza a̱ni. Ba̱ nyep mba, a̱wot a̱cha̱chet mba ba ni̱ shei mba tyok. 43A̱wot mami nyin, ku na vwuon. Da̱ a̱kwonu a̱kya, konyan wa chat a̱ yet a̱gba̱ndang ma̱ nyin a̱ni, ku yet ta hwa gu yet a̱khwo nyin. 44A̱wot konyan wa chat a̱ yet a̱kwak a̱son ma̱ nyin a̱ni, ku yet ta hwa gu yet a̱khwo konyan ma̱ nyin. 45Mat, ku Nggwon A̱tyubishyi ma̱ a̱pyia̱ nka, ka̱ bai á̱ nyia̱ nka khwo hwa bah. A̱wot ka̱ ku bai da̱nian ka̱ ka nyia̱ á̱ghyang á̱niet bya khwo hu; a̱wot ka̱ ka nwuak swuan nka ji, ji̱ yet zang da̱nian san á̱niet ma̱ a̱di̱di̱t.”

Yesu Choot A̱tyu A̱fi̱fan nang á̱ ngyei Ba̱timawut a̱ni

(Mat 20:29-34; Luk 18:35-43)

46Á̱ si̱ labeang bah, Yesu ma̱ng mman ta̱m nggu na si̱ bai Yeriko. A̱wot nang ba̱ nghwon a̱keang ka a̱ni, á̱kpa á̱niet ma̱ a̱di̱di̱t si̱ khwi Yesu. A̱tyu a̱fi̱fan a̱ghyang ku swan da̱ a̱beam vak a̱ naai; á̱ si̱ ngyei gu Ba̱timawut nggwon Timawut. 47Nang gu nfa̱k nyia̱ Yesu a̱tyu Na̱za̱ra̱t chobai a̱ni, a̱ si̱ ta̱ngam a̱nwuat ka mi̱ chet, a̱ si̱ nyia̱, “Yesu nggwon Da̱wuda#10:47 Wa̱i a̱lyiat: Nggwon Da̱wuda: A̱yahudawa ba nwuak a̱chuchuk nyia̱ Kristi na ghwut mi̱ kwai A̱gwam Da̱wuda., ma̱sa̱kut n naai ang fa̱k kunak nung!”

48Á̱niet ma̱ a̱di̱di̱t si̱ gba nggu mi̱ chet, nyia̱, “Tyia̱ nywang!” A̱wot a̱ si̱ bu mbeang a̱nwuat ka mi̱ chet ba̱t a̱ swaak, nyia̱, “Nggwon Da̱wuda, ma̱sa̱kut, n naai ang fa̱k kunak nung!”

49Yesu si̱ yong, a̱ si̱ nyia̱, “Nyi yorong gu, gu bai.” A̱wot ba̱ si̱ yorong a̱tyu a̱fi̱fan wu. Ba̱ si̱ nyia̱ ma̱ng a̱nggu, “Gwai ba̱t, doot yong, Yesu yei ang!”

50A̱tyu a̱fi̱fan wu si̱ ti̱n a̱godo nggu wu a̱ ta. A̱ si̱ tyia̱ kwak a̱ nat da̱ a̱vwuo Yesu. 51Yesu si̱ lyip gu nyia̱, “Yihwa a chat n nyia̱ ang dyo?” A̱tyu a̱fi̱fan wu si̱ nyia̱, “A̱tyu tyiet nung, ma̱sa̱kut, n chat n shya̱ nwuan a̱vwuo!” 52Yesu si̱ nyia̱ ma̱ng a̱nggu, “Nkat, nwuak fwuo ang hu da̱ nung choot ang!” Mi̱ di̱ yong a̱hwa, a̱ si̱ kin ta̱bat nwuan a̱vwuo! A̱wot a̱ si̱ khwi Yesu.

Currently Selected:

Ma̱rkut 10: TyapNT

Highlight

Copy