Ma̱rkut 11

Yesu Nwuo Urusha̱lima nang A̱gwam a̱ni

(Mat 21:1-11; Luk 19:28-40; Yon 12:12-19)

1Nang ba̱ mbai kpa̱mkpaan ma̱ng Urusha̱lima a̱ni, ba̱ si̱ tat kpa̱mkpaan ma̱ a̱ka̱keang Ba̱ti̱faji ma̱ng Ba̱ta̱ni da̱ a̱beam Tsok Za̱itun. Yesu si̱ ta̱m mman ta̱m gu a̱feang ba̱ shya̱ a̱son gu. 2A̱ si̱ nyia̱ ma̱ng a̱mba, “Nyi nat ma̱ a̱bada̱dei a̱keang keniaau. Mi̱ di̱ nwuo nyin hu a̱ja, nyi na li a̱baka̱za̱nki nang á̱ ka̱ nwai nyeak a̱ni. Nyi byii̱k ka nyi bai ndyo.

3“Ka̱ a̱yin lyip nyin, ‘Yihwa mbyia̱ nyi mbyi nka?’ Nyi tak ma̱ng a̱nggu nyia̱, ‘A̱tyoli wa chat ka. A̱wot a̱ na bwuok ndyo ma̱ninika.’ ”

4Ba̱ si̱ nat á̱ si̱ shya̱ nang á̱ la̱p a̱baka̱za̱nki ka a̱zanunwuai a̱li ka da̱ a̱beam vak. A̱wot ba̱ si̱ nwuo bii nka. 5Á̱ghyang á̱niet ba̱ yong a̱ja a̱ni, si̱ lyip ba nyia̱, “Yihwa mbyia̱ nang nyi mbii a̱baka̱za̱nki ka?”

6Mman ta̱m na si̱ hyia̱ ma̱nang Yesu ntak ma̱ng a̱mba a̱ni. Á̱niet a̱bya si̱ ghwon baa, ba̱ si̱ nkat ndyo. 7Ba̱ si̱ bai ma̱ng Yesu a̱baka̱za̱nki ka. Ba̱ si̱ teak a̱yaatoot mba ba a̱zama a̱ka̱za̱nki ka, Yesu si̱ nyeak a̱ nswan.

8Á̱niet ma̱ a̱di̱di̱t si̱ teak a̱yaatoot mba ba di̱n vak hu. A̱wot á̱ghyang á̱niet si̱ ma ntyam mbwak ntswan, ba̱ si̱ teak a̱byin Yesu si̱ nswak. 9Á̱niet ba̱ kwak a̱son Yesu ma̱ng á̱si̱ ba̱ khwi gu lilyim a̱ni, si̱ koot a̱gugong nyia̱,

“Hosana, Hosana!

Zi̱ dyep A̱gwaza!

Shok yet si̱ a̱tyu, a̱ chobai ma̱ng

Tyok A̱gwaza A̱tyoli a̱ni!

10A̱gwaza gu nwuak shok di̱n tyok

a̱tyia̱ a̱khwop nzi̱t hu Da̱wuda ku chobai a̱ni!

Zi̱ dyep A̱gwaza Tswazwa!”

11Nang Yesu ntat Urusha̱lima a̱ni, a̱ si̱si̱ nwuo A̱li Nwuat Za̱nang A̱gwaza. A̱ si̱ nwuan nkyang na a̱ kaat. Nang mam hu nkwa a̱ni, a̱ si̱ ghwon Urusha̱lima. A̱ si̱ bwuok a̱ nat Ba̱ta̱ni ma̱ng mman ta̱m nggu na swak ma̱ a̱feang.

Yesu Shyi A̱kwon A̱bwabwap

(Mat 21:18-19)

12Da̱ a̱tsotson tat ka, nang ba̱ nghwon Ba̱ta̱ni á̱ bwuot á̱ naat Urusha̱lima a̱ni; Yesu si̱ fa̱k zong. 13Yesu si̱ li a̱kwon a̱bwabwap ka̱ yet a̱sham ma̱ a̱kyikyo nang gu ni̱ laai shya̱ gbang. A̱ si̱ teap a̱ nat gu lii ke ka̱ byia̱ sum. A̱wot nang gu si̱ ntat a̱ni, a̱ si̱ li ka̱ yet ma̱ a̱kyikyo bya, mat nang jen koot sum nka ji ka̱n nyia̱ bah. 14Yesu si̱ shyi a̱kwon a̱bwabwap ka nyia̱, “A̱yin bu si̱ mi̱n mak ya sum ang bah, si̱ nat sang sangba̱p!” A̱wot mman ta̱m nggu na si̱ fa̱k si̱sak nang gu nshyi a̱kwon ka a̱ni.

Yesu Vwuong A̱bwuang mi̱ Didyaat A̱li Nwuat Za̱nang A̱gwaza

(Mat 21:12-17; Luk 19:45-48; Yon 2:13-22)

15A̱wot nang ba̱ si̱ nnwuo Urusha̱lima a̱ni, Yesu si̱ nwuo mi̱ didyaat A̱li Nwuat Za̱nang A̱gwaza hu. A̱ si̱ vwuong á̱niet lyiai ma̱ng á̱niet kwai nkyang nwuat za̱nang a̱ ghwut ndyo ta̱usa. A̱ si̱ seang a̱yaatyii á̱niet shai kurum ma̱ng nkyang nswat á̱niet lyiai a̱yaabwa. 16A̱ si̱ bu vwuong á̱niet pyia̱t nkyang a̱bwuang ba̱ sweap mi̱ didyaat A̱li Nwuat Za̱nang A̱gwaza hu a̱ni.

17A̱ si̱ bu gba mba nyia̱, “N gyei á̱ lyuut ma̱ A̱lyiat A̱gwaza na nyia̱, ‘A̱li nung ka na yet a̱li naai A̱gwaza kya a̱mgba̱m nnwap mi̱ swanta naa?’ Da̱ a̱kwonu a̱kya, nyi bwuak ka ntyia̱ kuu á̱niet á̱tsaai!”

18A̱cha̱chet a̱yaapris ma̱ng á̱niet tyiet doka ba si̱ fa̱k a̱lyiat nggu na. Ba̱ si̱ nwuo chat a̱wat nang ba̱ na nhyat gu a̱ni. A̱wot ba̱ si̱ fwuong a̱wun gu. Mat a̱mgba̱m á̱niet ba fwuong a̱ga̱de ma̱ng tyiet gu hu. 19A̱wot nang jenshyung nnyia̱ a̱ni, Yesu ma̱ng mman ta̱m nggu na si̱ ghwut ma̱ a̱keang Urusha̱lima ka.

Tyiet tazwa A̱kwon A̱bwabwap nang Yesu Shyi a̱ni

(Mat 21:20-22)

20Da̱ a̱tsotson tat nang ba̱ sweap, ba̱ si̱ li nang a̱kwon a̱bwabwap ka khwot neet da̱ á̱ni̱nan ba! 21Bitut si̱ kin jhyung shyishyi nang Yesu ku shyi a̱kwon a̱bwabwap ka a̱ni. Huhwa gu nyia̱ ma̱ng Yesu a̱ni, “A̱tyu tyiet, di a̱kwon a̱bwabwap ka nang a ku shyi a̱ni; ka̱ khwot!”

22Yesu si̱ nwuak ba shim nyia̱, “Nyi nwuak fwuo da̱ A̱gwaza. 23A̱tsak a̱lyiat, n hyia̱ ma̱ng a̱nyin, ka̱ a̱yin nyia̱ ma̱ng a̱fan kani, ‘Doot a̱ji, a̱ si̱ kwa mi̱ kyai a̱sa̱khwot!’ Da̱nang gu but mi̱ fwuo bah, a̱ si̱ bu nwuak a̱chuchuk di̱ kyang gu hyia̱ a̱ni; á̱ na nyia̱ gu ndyo. 24Huhwa mbyia̱ nang n nyia̱ ma̱ng a̱nyin, jen nang nyi nnaai A̱gwaza kyang a̱ni, a̱wot ka̱ nyi nwuak a̱chuchuk nang nyi wa ka̱n san hu wa a̱ni; nyi na shya̱ nhu.

25“A̱wot kuzang jen nang nyi shya̱ di̱ naai A̱gwaza a̱ni, nyi si̱ jhyung nang nyi mba̱ng a̱yin mi̱ fwuo, nyi chi gu ndyo. Da̱nian A̱tyia̱ nyin wu a̱ shya̱ tswazwa ka a̱ni, a̱ ma na chi nyin a̱ka̱tuk nyia̱ nyin wu.” 26#11:26 Lyuut ghyang mbyia̱: “Ka̱ nyi lak chi a̱bun nang á̱ghyang á̱niet nyia̱ nyin dyo a̱ni, A̱tyia̱ nyin wu a̱ shya̱ tswazwa ka a̱ni, ma na chi a̱ka̱tuk nyin wu bah.” Mat 6:15.

Á̱ Nwuan Tyok Yesu Gbi̱t

(Mat 21:33-46; Luk 20:9-19)

27Ba̱ si̱ bu bwuok á̱ bai Urusha̱lima. Nang Yesu shya̱ di̱ chong mi̱ didyaat A̱li Nwuat Za̱nang A̱gwaza hu; a̱cha̱chet a̱yaapris, á̱niet tyiet doká, ma̱ng á̱niet khwop á̱niet A̱li Nwuat Za̱nang A̱gwaza ba, si̱ neet á̱ bai ma̱ng a̱nggu. 28Ba̱ si̱ ba̱ lyip gu nyia̱, “Zang tangka̱i tyok hwa nang a byia̱ nnyia̱ nkyang nani? Ke a̱nyan wa ma nang ang tyok nyia̱ nkyang nani?”

29Yesu si̱ nyia̱ ma̱ng a̱mba, “N ma na ndyip nyin kyang nyiung. Ka̱ nyi nwuak nung shim, n na tak ma̱ng a̱nyin tyok hu nang n byia̱ n nyia̱ nkyang nani a̱ni. 30Nyi tak nung, tyok ba̱ptisman Yoona hu neet a̱ji wa; ku neet Ma A̱gwaza Tswazwa kya kee, da̱ a̱vwuo a̱tyubishyi kya?”

31Ba̱ si̱ ya nwuo a̱di̱dam tsi̱tsak mba nyia̱, “Ki̱ zi̱ nyia̱ tyok nyia̱ ba̱ptisman nggu hu neet Ma A̱gwaza tswazwa kya; a̱ na lyip zi̱t nyia̱, ‘Yihwa mbyia̱ nyi ndak nwuak a̱chuchuk da̱ a̱lyiat Yoona na?’ 32A̱wot ka̱ doot zi̱ gbang a̱lyia̱ nyia̱, tyok nyia̱ ba̱ptisman nggu hu neet da̱ a̱vwuo á̱nietbishyi kyaa?” Ba̱ dam a̱nia, mat ba̱ fwuong a̱wun á̱niet ba̱ yong a̱ja a̱ni. Mat a̱mgba̱m á̱niet ba wa ka̱n kyiak nang Yoona ngyet a̱tsak a̱ta̱m a̱kwonu A̱gwaza wa.

33Huhwa ba̱ si̱ nwuak Yesu shim nyia̱, “Zi̱ lyen bah.”

Yesu si̱ ma nyia̱, “Nung meang, n ma na ntak ma̱ng a̱nyin tyok hu nang nnyia̱ nkyang nani a̱ni bah.”

Currently Selected:

Ma̱rkut 11: TyapNT

Highlight

Copy