Markus 3

N Yesu a be nii wu a ngi̱rma fa̱la̱nge

(Mat 12:9-14; Luk 6:6-11)

1Yo n Yesu a le kan murakangu, a ya wuka nii wu fa̱la̱ngu a ngi̱rmane ne we kannu. 2Bi̱kamu ni̱bu a kurti̱ nuiyi chiyu we di̱Yesuwe ko ka, ka be ni wu we difi̱kare, ke chi ya fi̱li wu chi tan ki̱ne. 3Yinu n Yesu a yi ni wu ko, “Chire, tii tas.”

4N Yesu a bi̱u chi ko, “Ti̱ti̱le a da ni madu we yilang Musangu, ni ma chi ti̱yili we difi̱kare ni̱bu Yafudama ka ni tum bwila? Ni yu ti̱kuriya ka ni chi̱u ti̱kuriya?” Ni̱bi wudidi, a yibu ki̱n ya̱m.

5N Yesu a da̱ng chi ki̱ni ki̱fwini, di̱ne ki̱ngki̱nge ni̱tu chiye aya ki̱nweti̱ ki̱bune chi we ki̱leti chiyu. N ki̱n a yi nii wu ko, “Tare fa̱la̱ng mwangu,” fa̱la̱ngu a be ti̱n. 6Kangu ni̱bu Farisamu a chirengu, bi̱nabi̱na n chi a di̱ka ya̱mu ti kwa̱l Yirudu we dur ki̱nu yinang kangu chi chi̱u Yesungu.

Ki̱tuu ni̱be a nabu Yesu

7N Yesu a kun ti miyari̱m ki̱mu a du bi̱nu a yika ki̱ti̱ku la Ka̱liliyang. Ki̱tu ni̱be nabwen bi̱bu a chire a Ka̱lili n ti Yafudiya a nabi̱ ki̱n. 8Kangu n chi a nwe chitu n Yesu ki̱maditangu, bi̱bu a Wurchalimamu n ti bi̱bu a ba̱la̱ng Yudiyamu n ti bi̱bu a yabu la wurduni̱mu n ti bi̱bu a Tayamu n ti bi̱bu a Sidon mu. Ni̱bu nabwen a mura ki̱mi̱ntuwe ke chi nwe, chi kuti̱ chi ki̱maditu.

9Di̱ne ki̱wulu ko ke ni̱bu a fumadi̱ ki̱n we, a yi miyari̱m ki̱mu ko, “Ti̱be ki̱ni kwa̱mbi̱re mwe wuti̱re wiin ke ti̱fumantu a swe bunge.” 10A ma ying di̱ne n ki̱n a be ni̱bu nabwen. Ni̱bu buri̱ni̱mu nabwen ki̱bedu we di̱ki̱ne ke chi twai ki̱n, chi ya beku. 11Yo ni̱bu ki̱ni ki̱fi̱btimu ki̱ku Yesu we, ki̱yaru we ti̱mu ki̱ni kemi ko, “M mun Bwe Kwama!”

12N Yesu a ngau chimi̱n ki̱kure ki̱ni dukan ko, “A yidu ni̱bu we ka n ki̱n n wure.”

N Yesu a sutu miyari̱mi kub chiri burau

(Mat 10:1-4; Luk 6:12-16)

13Yinu n Yesu a fi̱l kunu, a yale bi̱bu n ki̱n ki̱baddi̱mu n chi a be fi a di̱ki̱ne. 14A sutu ni̱bi kub chiri burau, bi̱bu n ki̱n kani̱n tundi̱mu ka nang chikiye fandu, a yi chi ko, “N sutu chi̱n niing swedu ware.” Ma ni̱n tum chi̱nu we a di̱mwaru. 15A ni chi dukan, ka chaku ki̱fi̱bti yi bwilayu. 16N ki̱n a sutu Simun, wu n ki̱n a ni di̱nu ko Biti̱r.

17N ti Yakubu bwele Sa̱badiye wu ke ko n Yowana, a chau ki̱mi̱n di̱nu ko Buwarnachis ka nang chikiye, bwesi̱m ki̱yalem, 18n Andi̱riya, n ti Filibu, n ti Bartolomi, n ti Matta, n ti Toma, n ti Yakubu, bwele Alfiyus, n ti Tadiyu, n ti Simun naba Kana.#3:18 Simun: wu ki̱bau ti̱m ki̱mu yinange. Di̱n di̱du ki̱swe ni̱r Simuni̱nu n ti chi n ki̱n ki̱made we siiku Kwamangu. We wuka ki̱swi ki̱yung kwa̱l ni̱bu ki̱ma chitu yinang ni̱bu ki̱rangi̱n bi̱bu a babu ka bunti̱ku mati̱n Romamu, 19n ti Yafuda Yiskariyoti wu a mii ki̱ne.

N Yesu n ti Mai Ki̱fi̱btiye

(Mat 12:22-32; Luk 11:14-23; 12:10)

20Yinu n Yesu a le lo. Ki̱tu ni̱be nabwen a mura ki̱mi̱ntuwe ti̱nti̱n. N ki̱n n ti miyari̱m ki̱mu a yabi̱ da tiyangu ka chau chabti̱tangu. 21Yo kebu ki̱mu a nwe ya̱me, n chi a ya, yaka taa ki̱nu, di̱ne ni̱bu ki̱yidu ko, “N ki̱n a newe li̱mang.”

22Ni̱bu yungku yili̱ni̱m bi̱bu a be a Wurchalimamu a yi ko, “Bayalsebul we bwi kiyu, tikake Mai ki̱fi̱btiye nang wu a ni ki̱n dukan di̱du ki̱chaki̱n ki̱fi̱btinu.”

23N Yesu a yal chi, a swe chimi̱n ko, “Setan ka chaku Setani yire? 24Ka bi̱ngaiyu a le ti̱mu ki̱kula bwiti chiye, ti̱m bi̱ki̱mu a ne ya dukanu. 25We yiko, ka bi̱ngaiyu a le di̱kur lone, lo wuko a ne dukan we. 26Ka yaa Setane a le bi̱ngaiye, yaa a ne yin tidu, yare a be chimi̱ne, wu yaa ko ka fi̱ri̱nde. 27A ne ni ka le lo naba dukane yinang Setane, ka kaar kuli̱n ki̱ne we, ka n ke ka tau ki̱nu ka kwadu, yinu ka yindu ka le lo ka wur nii we. 28Mi̱n fwa chimi̱n bi̱yili̱m, Kwama ka du chimi̱n ki̱letiyu n ti swa̱ba ku Kwamangu. 29Aya wu a swa̱ba Fi̱ki̱m Kwamame, a ne du ki̱mi̱n ki̱leti kiyu, bwila ko a swe ki̱diya kwadu.”

30N ki̱n a fwa bi̱bu di̱ne n chi ki̱yidu ko n ki̱n ki̱ni ki̱fi̱be wu bwila.

Ne Yesuwe n ti kebu Yesum

(Mat 12:46-50; Luk 8:19-21)

31Yinu n ne Yesuwe n ti kebu ki̱mu a be, a ti a fi̱lang. A tum chitu ko a yale Yesu. 32Aya ki̱tuu ni̱be a di̱bi̱l ki̱n. N chi a yi ki̱n ko, “N ne mun n ti kebu mumu a fi̱lang, ki̱yali̱nu.”

33Yinu n ki̱n a ke chi mi̱n ko, “N wure nang nemi, m bi̱wure nang kebu mi̱mu?”

34N ki̱n a da̱ng ni̱bu bi̱bu a bwa̱l ki̱ni di̱bi̱li̱mu, a yi chi ko “N nemi nang wu n ti kebu mi̱mu!” 35“Kanang wuwule niye, wu ki̱ma chi n Kwama a keete, n ki̱n nang kemi wubare, n ti wuwiye, n ti nemi.”

Currently Selected:

Markus 3: Tula

Highlight

Copy