Markus 4
4
Ya̱m ni wu ki̱fii chame
(Mat 13:1-9; Luk 8:4-8)
1N Yesu a mweti yungki̱ku we ki̱ti̱ku laangu, tuule ni̱bu nabwen a mura we kakku kangu, yinu n ki̱n a le kwa̱mbi̱re mwe a swe we mure a mwe. Ni̱bu nabwen a muran we ki̱di̱ngu a ki̱ti̱ki̱ laangu. 2A yung chi chitu nabwen ki̱ni baltaku, yinu we yungki̱ kangu a yi chi ko, 3“Ti̱nwe, wuka nii a ya yaka fiiye cham.” 4Yo a yaki̱ fii dume, bi̱kamu cham a twakan a wa̱re, ki̱ni̱biyu a be chiba cham bi̱bu. 5Bi̱kamu a twakan a nani kwanti a ne ki̱ti̱m we nabwen, bi̱nabi̱na n chi a kiye, di̱ne ki̱ti̱mu a newe nabwene. 6Yo kuko a fwenge, a twi chi a kusu, di̱ne ki̱ yinange tiyangu a subu kutan. 7Bi̱kamu cham a twakan a kwa̱da, kwa̱da a kwaba chi a yobu ki̱nuti. 8Bi̱kamu a twakan a ti̱m bi̱yili̱m, n chi a dwiyen a yo ki̱nutiyu, yikayu sungi chamiyu a yo ki̱nutiyu wan ti̱ta bi̱kamu wan turukuun, bi̱kamu kuul. 9Yinu n Yesu a yi ko, “Wu ki̱ni ki̱tele a nwe.”
Chi baltaku ki̱yungde
(Mat 13:10-17; Luk 8:9-10)
10Yo n Yesu a swe n ki̱kune, bi̱kamu ni̱bu n ti miyari̱mi kub chiri burabi̱mu, a bi̱u ki̱n ko a fwa chi baltaku ki̱yungditu. 11Yinu a yi chi ko, “N ti̱n, a ni chi̱n da ta swan ti̱lairi Yaa Kwamatu, aya bi̱bu a newe ti chini̱mu, chiti kwang ka baltaku. 12Nang chi
‘A yo n chi ka ni̱n da̱ngdu,
aya a neka swiru,
n chi ka nwedu aya a neka swaanu,
ka n chi a swane, ka wo ki̱ti̱mu,
ka ya duku ki̱letiyangu.’ ”
13Yinu n Yesu a yi chi ko, “Aya ta swaanbu ki̱ku baltaka? Yinu ta medi yire ta swaan yikayu baltaku? 14Nii wu ki̱wau duume, ki̱wau ya̱m Kwamam. 15Duum bi̱bu a twakan a wa̱remu, a ti we ni̱bu a nwe ya̱m Kwamamu, aya yo n chi a nwenge, bi̱nabi̱na, n Setan a be a yitu ya̱m bi̱bu we a ni̱tu chitu. 16Bi̱kamu ni̱bu yinang ki̱nutiyu a yar a fi a kwantiyemu. Ka n chi a nwe ya̱m bi̱li̱me ki̱yidu ki̱ni furi mwe mwe. 17Aya a lebu ni̱tu chitu yinang yinang, a ne ti ke, ka riye fumake a ya chi di̱ne ya̱m Kwamame, n chi ki̱ki̱la kuteng. 18Bi̱kamu ni̱bu yinang duum bi̱ba swi a fi kwa̱da, n chi nang bi̱bu a nwe ya̱m bi̱li̱mu. 19Aya ti̱kwa̱ma̱n ti̱ti̱nitu n ti baku kulitangu, n ti kubeku chitangu a ri bwi kiyu a yitu ya̱m bi̱li̱mu, a mabu nangang ki̱yilang.”
20Aya bi̱kamu ni̱bu a tiwe duum bi̱bu a fi wu yilemu. N chi a nwe ya̱m Kwamamu, a yiu, ki̱ma nangangi ki̱n, bi̱kamu ki̱ya sukku wan ti̱ta, bi̱kamu wan turukun, bi̱kamu kuul kuul.
Baltaki ki̱ni Fiti̱la
(Luk 8:16-18)
21N Yesu a ki̱la yi chi ko, “Niin da̱u fiti̱la ni sunti̱ kwa̱se, ni di̱ki̱du a bwang kwa̱mbi̱ranga? Ne ni yo fiti̱la a dii, a ti̱dda? 22Chi ti̱yingeritu be ka kwa̱la̱du, ti̱nti̱ne, ti̱tu niyang lailaiyetu ka chire dii kwa̱rikwa̱ri. 23Ka ni ki̱ni ki̱tele, a nwe.”
24Yinu a ki̱la yi chi ko, “Ta̱l chi mun nweditu yinang, kwa̱se mun swe ni̱bu mi̱ndi ki̱ne, n Kwama beka swe mi̱ndi ki̱n. Wuko ka bu mi̱ndi di̱bi̱l. 25Wu ki̱ni chiye ka bu ki̱mi̱n ti̱duwe, wu a ne chi we, ka yitu ti̱tu n ki̱ni ki̱ni bayimitu.”
Duum bi̱bu a kiim
26N Yesu a chakakku ko, “Yaa Kwama kanodi yinang; Ni a wau duum we kuu ko. 27Kum n ti kuko, a yimbu ki̱dangu duum bi̱bu a kiye a dwiye ti̱nangu, ka a ma yire, n ki̱n a yimbu. 28Ti̱mu ki̱yo tiniyu ki̱dwiyedu ki̱tu ti̱kulan. Cham ki̱mwedu we ti̱mwaritu, yinu ka chir duru, yinu fal ki̱nutiyu ka chiredu ti̱changri tu. 29Yo chama biye, ni ka da̱u too ka bidu, di̱ne ki̱swi a lam wa kakke.”
Ki̱kwi mastad
(Mat 13:31-32; Luk 13:18-19)
30N Yesu a yi chi ko, “Ni swe Yaa Kwama ki̱ni wureni? Ni ma nangangu ki̱ni ki̱ki̱le baltaku ke ni swe mi̱n? 31Yinang ki̱kwi ki̱si̱raiye, ki̱kwi wu a mwan a tamme, nii a fi a kuu ko. 32A baki̱swi bayim, a dwiyen a kwam a lati̱ yikayu beti̱ tini we kuu lambu. A ma ki̱yange tiyu nabwen, ki̱ni̱biyu ki̱sungdu we ki̱wulang kangu ki̱ma ti̱ki̱kuli we.”
33We ki̱ku sweku, n ki̱n a fwa chimi̱n ya̱m bi̱bu yinang kangu chi ka swani̱n ya̱m Kwamamu. 34N ki̱n a yung chi chiti kwang ki̱ni sweku, aya yo n ki̱n ki̱ni ki̱kun n ti miyarri̱m ki̱me, ki̱fwa chi mi̱n ya̱m bi̱bi kwa̱rikwa̱ri.
N Yesu a ki̱l ki̱fi̱be
(Mat 8:23-27; Luk 8:22-25)
35We diko ki̱ni me, n Yesu a yi miyari̱m ki̱mu ko, “Ni yabu, nii ya ba̱la̱ng ka bwanangu.” 36Yo n chi a du ki̱tuu ni̱be, miyari̱mu a le kwa̱mbi̱re mwe n chi a yikan ki̱ni ki̱n we mure, yikayu kwa̱mbi̱ri n wetuwe. 37Yinu wuka ki̱fi̱be wuduwe a kune, labi mwetu ki̱baddu ka ri kwa̱mbi̱re mwe ki̱ni mwe. 38N Yesu we kuteng we kwa̱mbi̱re mwe ki̱da duum ki̱ni filo, miyari̱m ki̱mu a kukku ki̱n a yi ko “Naba yungke, mwan twarbu mwiko yanang bwarada?”
39N Yesu a kaban, a kwabu ki̱fi̱be, mwe laange ko, “Tii wudidi.” Ki̱fi̱be a ti, fantiyu kwang, a da wudidi.
40A yi miyari̱m ki̱mu ko, “A mayire ta mwan ta ka̱ta̱ni ye? Ta kebu bi̱yili̱mu a lanta ki̱ka̱nga?”
41N chi a nwe tayu nabwen, yinu n chi a fwa we bwiti chiyu ko, “N wure wu ki̱fi̱be n ti mwe la ki̱nwe ya̱m ki̱me?”
Currently Selected:
Markus 4: Tula
Highlight
Share
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
