Markus 13

N Yesu a fwa chi yaka fwede

(Mat 24:12; Luk 21:5-6)

1Yo n Yesu a chire we Kan Kwama di̱dune, wukane we miyari̱m ki̱mu a yi ki̱n ko, “Naba yungke, da̱ng ki̱duum kalim bi̱bu ti yinang ku ti̱mubanta lengu!” 2N Yesu a yi ki̱n ko, “Ka we ti̱ku ti̱muban ti̱yili ti̱te? Ki̱swi ki̱bedu wu a ne kale ka swedu a di a keko we, ka tungadi kwang.”

Riye wu kakke

(Mat 24:3-14; Luk 21:7-19)

3Kangu n Yesu a swe we Kun di̱du a tini Setuniye, di̱du ki̱da̱ng Kan Kwamana Wurchalimanu, m Biti̱r, n ti Yakubu, n ti Yowana, n ti Andi̱riya a bi̱u ki̱n a bura ko, 4“Fwa ni̱mi̱n, ti̱chitu wu ka fwedi fere? Nang ku di̱mwal di̱du i yire yoko ti̱tu kanodu yaka fwede?”

5Yinu n Yesu a yi chi ko, “Ti̱twar, wuka ni a buti̱du chi̱n we. 6Ni̱bu nabwen ka bedu ki̱ni di̱n mi̱n, ka yidu ko n chi nangki̱n, ka butu ni̱bu nabwen. 7Ka ti̱ nwe ya̱mi kumbiyu n ti ya̱mi ki̱ngasiyu a kunniye, ti̱wulu we. A kau ti̱chitu wu ka fwedi yiko. Aya di swa̱n kute a lanbu didin. 8Kuu ka makadu n ti kuu. Yaa ka kuladu n ti yaa. Ti̱mu ka mi̱kadu we fantiyu dangtidangti, sunu ka ma ni̱bu. Aya ti̱tu n ke riye siine. Ti̱tu mweku riyeng.

9“Ti̱ma dandan ki̱ni dur chi̱nu, ni̱bu ka tau chi̱nu ka yikan kambi mwataki̱, ka twala chi̱nu we kambi murakitu, ni̱bu ka yikadu ki̱ni chi̱n a kakku mati̱m, we fiko ta kau chi mi̱n ni̱bu di̱mwari̱m. 10Aya di̱mwar ya̱m bi̱li̱mi̱nu ka mwedu ka le ki̱teli ni̱biyu didiin we kuuti ki̱ni kwang. 11Yo ni̱bu ka tau chi̱nu ka yikan bwana kan mwataki̱ne, ti̱wulu tayi we, ti ta fwadu ko wule. Chi ka chiredu a yii chi̱ne ti̱fwa, di̱ne n ke bi̱chim, ya̱m Fi̱ki̱m Kwamam.

12“Ke ka ni keko ni̱bu ka chidu. Te ka madi yiko n ti bweko, bwesi̱mu ka makadu n ti tebi̱bu ka nebe, ka yo bwa chi. 13Ni̱bu ka ko chi̱nu di̱ne di̱n mi̱ne. Aya nii wu ka mu ni̱ru ka lami̱nti̱ di swan kute, ka swidu.”

Riye wu bwila

(Mat 24:15-28; Luk 21:20-24)

14N Yesu a chakakku ko, “Ki̱swi ki̱bedu yo ta ku chi danduriye ti̱tu ki̱bedu ki̱ni kaiyakitu we fi a no dakabe. (Nii ki̱ kii ya̱m bi̱be a swaan) bi̱ba ti̱m Yafudiya a wul a fi̱l kuni.#13:14 Yinangu n Daniyel fa̱ku Kwama a fwangu. Dang Dan 9:27; 11:31; 12:11. 15Nii wu a ya, a fi̱l kwere a yifi̱la, a ki̱ladu lo we ko da̱a̱ ti̱kan chi.” 16Nii wu a ya, a chir kuuwe, a ki̱ladu lo we ko beka da̱u luke. 17A no chi̱n! Nati̱m lubimu n ti bi̱bu ki̱ka̱r bwesi̱mu we ki̱swi wuko. 18Ti̱twa̱ba̱ bunitu, ti̱chitu a fweduwe yi sa̱nang. 19Nangki̱n, riye diti yikiye ka bwiladu, a ne ni swe ki̱nu ki̱ni wuka riye yinangu n Kwama a yo mi̱ne ti̱ti̱nitangu. A neka fwenti̱nuwe ki̱da. 20Ki̱kumang ka n ke, n Tewuduwe ka ki̱tu ki̱swi riye, kuuti ti̱ti̱niyu ki̱ni kwang ka twiyadu. Aya di̱ne bi̱suti̱ri̱m ki̱mu, n ki̱n ka ki̱tu ditiyu a dubi bayim.

21“We ki̱swi wuko, ka ni a ya̱n ko, ‘Da̱ng m Masiya nang wuwe, Ka ka yidu ko da̱ng n nang wu a bwa, ti̱kedu we.’ 22Nangki̱m Masiyati ti̱kwaniyu n ti fa̱kubu ti̱kwanimu ka chiredu ka yung di̱mwal chi ka̱ta̱kitu n ti chi ya̱r yiitu ke a butu ni̱bu, kasi no nang bi̱suti̱ri̱m Kwamamu ka, ka kadde. 23Di̱ne yiko, ti̱ti yinang! Di̱ne n tu n fwa chimi̱n yo ki̱swi a tibi̱ lande.

Ki̱laku Bwe Niyang

(Mat 24:29-31; Luk 21:25-28)

24“Aya we diti riye yikiyu, a kuteng riyengu,

Dii ka madi chitu,

swangu a ne yii ti̱mu

25Ki̱switiyu ka twakadu,

kwali̱n chi̱n di̱du a dii twiyenu

ka mi̱kadu.

26“Yinu ka nang wuwule niye ka ku Bwe Nii ka fwedu a ti̱twini ki̱ni nabwe dukane n ti dwiyen. 27N ki̱n ka tum ni̱bu ti̱tumbi̱ri ki̱mu ka mure bi̱suti̱ri̱mu Kwamamu we fwiti̱neti ti̱ti̱niyu, we bwa ti̱ti̱nitu a kur mi̱ne n ti bwa ti̱ti̱ni twiyetu a kur mi̱ne.

Miyaku a tiyang Sinang

(Mat 24:32-35; Luk 21:29-33)

28“Ki̱ka̱ngu ti̱miya chi we tiyang sinangu; ka ki̱yange ti kiyu a mwe ki̱sute yikiye, yinu lwangi̱n kitu a mwe ki̱twa̱de, ti̱yindu tiko didi̱be a mwatawe. 29We yiko, ka ti̱ku ki̱chitu wu a mwe ki̱fwede, taswan ti̱nu tiko ki̱laki̱ kangu a mwatawe, a lam kwa̱r. 30Mi̱n fwa chimi̱n bi̱yili̱m, yo ki̱dang ki̱ku a tibi̱ sude, ki̱chitu wu kwang ka fwedu. 31Dii n ti ti̱mu ka twiyadu. Aya ya̱m mi̱mu a ne ka twiyadu ki̱diya kwadu.

Di n ti ki̱swi ki̱lake a ne ni a yime we

(Mat 24:36-44)

32“A ne nii a yim di n ti ki̱swi ki̱lake we, kono nang ni̱bu ti̱tumbi̱ri Kwamamu, ka Bwe Kwama, aya kana Kwama Te n ki̱kun. 33Aya yo ta yimbu yo ki̱chitu wu ka fwede, ti̱swe sobu ti̱nang ma ki̱yolang.”

34“Ni swe ki̱laki̱ Bwe Nii yangu ki̱ni nii wu a du loko a yika di̱bwale. Yo yaka yikade, a kera ni̱bu nanganmu mi̱n nangangitu n kawure ka madangu. Yinu a yi naba nii ki̱to kwa̱re ko a ma ki̱yolang we di ki̱lake ko.

35“Di̱ne yiko, ma ki̱yolang yinang, di̱ne ta yimbu ki̱swi Tewuduwe ka ki̱lade, ka menge, ka kume, ka ki̱tangti̱lang kumange, ka kunsine ka si̱ne. 36A yanuwe mun da duum, di̱ne ka ki̱ladu a ne di̱mwar we. 37Chi mi̱n mang fwa chimi̱ne, n fwa ka nang wuwule niye mi̱n ti̱n. Ti̱ma ki̱yolang!”

Currently Selected:

Markus 13: Tula

Highlight

Copy