Matta 23

N Yesu a kwa̱l ni̱bu yilangmu n ti ni̱bu Farisamu

(Mar 12:38-39; Luk 11:43-46; 20:45-46)

1Yinu n Yesu a yi ki̱tuu ni̱be n ti miyari̱m ki̱mu ko, 2“Ni̱bu yungku yilangmu n ti ni̱bu Farisamu nang bi̱bu ki̱ni dukan di̱du ka miya yili̱n Musati̱mu. 3Di̱ne yiko, ti̱ma chitu a yi chinitu, ti̱bunti̱ yili̱ntu, aya ti̱madu nangi̱n chitu we, di̱ne n chi a mabu chi ki̱fwaditu. 4N chi ki̱yo ni̱bu ki̱ma chi ki̱ni bware, aya n chi a kebu ka madu kasi no ka twayu ki̱ni bewure. 5N chi ki̱ma nangi̱n chi̱ntu ko ke ni̱bu a ku ko we chi madu, ki̱bwa̱ba ti̱labti̱ri ya̱m Kwamami we kabi̱ni chiyu ki̱ dorati̱ lukeyu ki̱yung dwiyeni. 6N chi ki̱bau kana fanti sweri yidui we fi a yeniye n ti fanti yidui we kambi muraki̱ Kwamatu, 7ki̱bau di̱siir dwiyeni̱n kasi no a kwa̱ma̱r, ki̱badu ni̱bu a nang yal chidu ko, ‘Tete, naba yungke.’

8“Aya ti̱kedu ni̱bu a yal chi̱nu we ko ‘naba yungke,’ di̱ne Tete chire wiin, ti̱ni kwang kana kebu. 9Ti̱yalu wuka nii we ti̱ti̱nitu ko ‘Naba yungke,’ di̱ne Te chire wiin, n ki̱n nang wu a diye. 10Ti̱keti̱nu di̱yalu ko ‘naba yungke,’ di̱ne wu kake chi̱ni wiin nang Masiya. 11Wuduwe we tibe chi̱n ka kau ka̱be chi̱n. 12Kanang wuwule niiye wu ka ri̱ka yikiye, ka kwala ri̱kaki̱ku, wu ka si̱ku dur ki̱ne, ka ya ri̱kaku.

13“A no chi̱n, ni̱bu yungku yili̱nmu n ti ni̱bu Farisamu, ni̱bu di̱bebelin! Di̱ne ti yinge ni̱bu mi̱n Yaa Kwama. N ti̱n ta leti̱bu, ti̱dangti̱ bi̱bu ki̱baddu ka ledi̱mu. 14[A no chi̱n, ni̱bu yungku yili̱nmu n ti ni̱bu Farisamu, ni̱bu di̱bebelin, di̱ne ti̱da̱u nati̱m buni̱mu mi̱n chitu n chi ki̱nitu, twa̱ba̱bune chi̱n a lebu ni̱ru, riye n Kwama ka ni chi̱ne ka la bi̱kamu.]

15“A no chi̱n, ni̱bu yungku yili̱nmu n ti ni̱bu Farisamu, ni̱bu di̱bebelin, ti̱yabbu Wima, ti̱ya fantiyu kutani ke ti̱ya wu ka wo ki̱ti̱me. Yo ta yange ti̱ mul ki̱nu a la chi̱n ki̱ni bwila kwang.

16“A no chi̱n, tikaketi ki̱dubu! Ti̱yidu ko, ‘Ka ya wu ka twa̱m chi ki̱ni Kan Kwamana Wurchalima ne, a ne ki̱lewe, aya wu a twa̱m chi ki̱ni si̱nariya a Kan Kwama ne, a mwintuwe kama chi n ki̱na twa̱mitu.’ 17N ti̱n di̱bu ki̱dubi̱mu! Ti̱ti̱le a la chi, si̱nariya ka Kan Kwamanu a yo wauwade si̱nariyana? 18Ti̱fwa ti̱n ko, ‘Wu ka twa̱m chi ki̱ni se Kwama a mabu chi, aya wu a twa̱m ki̱ni ni ki̱ku a se Kwamange, a kau di̱twa̱mbi̱r di̱tabi̱ri̱n.’

19“N ti̱n ki̱dubi̱bu! Ti̱ti̱le a la chi, niki̱ka, ka se Kwama wu a ni ki̱ki wauwada? 20Di̱ne yiko, wu a twa̱m ki̱ni se Kwama, a twa̱mi ki̱ni chi a dur ki̱nitu ti̱nti̱n. 21Aya wu a twa̱m ki̱ni Kan Kwamane, a twa̱mi ki̱n, a twa̱m ti̱n ki̱ni Kwama wu ki̱sweduwe mure. 22Aya wu a twa̱m ki̱ni diye, a twa̱m ki̱ni dwiyen Kwamatu n ti wu a swe we.

23“A no chi̱n, ni̱bu yungku ti̱ka yili̱ni̱mu n ti ni̱bu Farisamu, ni̱bu di̱bebelin. Ti̱ni wu wiine we kube we kuli̱n di̱du ki̱ni lwangi̱n yinang kwekwe. Aya ti̱du bunti̱ku kasi yilang ti̱duitu yinang bi̱yili̱m n ti ki̱bune n ti bwanu. A no dakan ta ma ti̱tu, a ne ti̱kati kwang. 24N ti̱n bi̱bu ki̱wuba ki̱dubi̱mu! Tadubu ki̱yunge a subu kwa̱ri̱m we nori̱ntu aya ti̱mi twali̱m!

25“A no chi̱n, ni̱bu yungku yili̱ni̱mu n ti ni̱bu Farisamu, ni̱bu di̱bebelin. Ti̱nura kuteng kwa̱sengu ka chibenge, aya we bwa mure a rii ki̱ni ka ki̱fule ti bwila. 26Ki̱dubu ni̱bu Farisamu! Ta mwedu ta nura mure kwa̱se yinang, ke bwa kute a le.

27“A no chi̱n, ni̱bu yungku yili̱ni̱mu n ti ni̱bu Farisamu, ni̱bu di̱bebelin! N ti̱n yinang futu ti̱tu a lelei we bale fi̱lange aya mure a ri ki̱ni ti̱kutu kwa̱mi n ti dutu dangtidangti. 28Yinu yiko ti̱n, we a tibe ni̱be, ti̱yungdu tiko n ti̱n ni̱bu yilem aya we bwa mure ti ri ki̱ni di̱bebelin n ti muli̱n.

N Yesu a fwa riye ka ya chide

(Luk 11:47-51)

29“A no chi̱n, ni̱bu yungku yili̱ni̱mu n ti ni̱bu Farisamu, ni̱bu di̱bebelin! Aya ti̱muba fa̱kuti mi̱n futu, ti̱dosa futu ni̱bu yile. 30Ti̱yidu tiko, ‘Ka a no ni̱n we ki̱swi tukebu ni̱me a no nang chibebu fa̱kubi̱bu!’ 31We yiko, ti̱yung tiko n ti̱n nang bwesi̱m ni̱bu bi̱bu a chiben fa̱kubu. 32A ri fal, ti̱swan nangitu tukebu chimu a mwentu!

33“N ti̱n sotiyu! N ti̱n beti̱ soti bara̱ka̱m! Ka madi yire ta swidu we far ki̱rangi̱ne? 34Di̱ne yiko, mi̱n tum chimi̱ne fa̱kubi̱bi n ti ni̱bu yungki̱m n ti ni̱bu mwataku. Bi̱kamu ta chidu ta kuda ki̱yang bwang, bi̱kamu ta twaladu we kambi muraku chitu yinu ta bunti̱du we binti̱tu.

35“Di̱ne yiko, ti̱welan ki̱tum ni̱bu yile mi kwang ka ki̱la dutu chi̱n, ka mweti̱nuwe ki̱tum Abila naba yile ka lanti̱na Sakariya bwe Barakiya, wu ta chi̱u a tibe fi wauwade n ti se Kwama wa twike. 36Bi̱yili̱m mi̱n fwa chimi̱nu ti̱welan ni̱bu bi̱bu a kau dutumu ka wuran bwi ki̱ni di̱kalan di̱du.”

Yinangu n Yesu a mi̱la Wurchalimangu

(Luk 13:34-35)

37“Wo, Wurchalima! Ti̱chibe fa̱kubi̱bu, ti̱kwelati̱ bi̱tumbi̱ri̱mu n Kwama a tum chimi̱nemu. Ki̱da yile mi̱n baddu mang mur chi̱nu yinangu na yibbe ki̱mur bwesi̱m ki̱mu a ti̱ki̱ni kiyangu aya ta kebu. 38Kan Kwamana Wurchalima ka di̱ngledu, kano a ne ni we! 39N fwa chimi̱n, a mwetuwe diwu, a ne ta kui ti̱nu ki̱da ka lami̱nti̱ yo ta yidu ko, ‘Kwama a dela ki̱n wu ki̱bedu a di̱n Tewuduwe ne.’ ”

Currently Selected:

Matta 23: Tula

Highlight

Copy