Matta 24

N Yesu a fwa wureku Kan Kwamana Wurchalimanu

(Mar 13:1-2; Luk 21:5-6)

1N Yesu a chir we Kan Kwamanu ki̱yikadu, miyari̱m ki̱mu a yal ki̱n, a yung leran mukku a Kan Kwamanitu. 2N Yesu a yi chi ko, “Ti̱da̱ng leran mukku Kan Kwamanu. Bi̱yili̱m mi̱n fwa chimi̱nu, a ne du wuka kale a di a keko, ka wuredu ki̱ni kwang.”

Riye wu ki̱bede

(Mar 13:3-13; Luk 21:7-19)

3Yo n Yesu a swe a Kun setune, miyari̱m ki̱mu a be n chikun a yi ko, “Fwa ni̱mi̱n, ti̱tu ka fwedi fere? Wureni ka kau di̱mwal beki̱nu n ti di̱du a di swan kuten.”

4N Yesu a yi chi ko, “Ti̱ma daan, wuka ni a buti̱du chi̱n we.” 5Ni̱bu nabwen ka bedu a di̱n mi̱n, ka ni̱n yi chi̱nu ko, “Ni̱n nang Masiya.” Ka butu ni̱bu nabwen. 6Ta nwe ya̱mi kumbiyu n ti dirdi kunin ya̱mi kumbiye n ti yo kumbitu yaka fwede, ti̱wulu tayi we, a mwituwe ti̱tu ka fwedu, aya n ke di swan kute ti̱ti̱niye. 7Kuu ka kuladu n ti kuu, yaa ti yaa, chun ka ma ni̱bu, ti̱mu ka mi̱kadu a fantiyu dangtidangti. 8Aya ti̱tu mweku, riye siine a tibu bedu.

9Ka ni chi̱nu a fa̱li ni̱bi, ke a ni chi̱n riye, ka chi̱u chi̱nu, kuuti nabwen ka ko chi̱nu di̱ne mi̱n. 10We ki̱dang kangu, nabwen ka ki̱ladi kuteng we keku bi̱yili̱mang chiyangu, ka kwa̱l yichiyu, ka koti̱ yichiyu. 11Fa̱kubu ti̱kwanimu nabwen ka chiredu, ka butu ni̱bu nabwen. 12Di̱ne nabwe muli̱ne, nabwen ka du mi̱laku kebu chimangu. 13Aya wu ka mu ni̱ri ki̱ri̱ng ka lami̱nti̱ di swan kute, ka swidu. 14Ti̱nti̱ne, ya̱m bi̱li̱m bi̱bu a Yaa Kwama, ka le ki̱teli kuuti ni̱bi kwang, yinu di swan kute ka bedu.

Riye wu bwila

(Mar 13:14-23; Luk 21:20-24)

15Ta ku chi danduri ti̱bwilai ti̱tu fa̱ku Kwama n Daniyal a fwaatu, a ti we fi wauwade, ni ki̱kide a swaan. 16Bi̱bu a Yafudiyamu a wul kunni. 17Wu a fi̱lang ki̱fi̱kadu a kane, a lewedi̱ lo we ko be ka da̱u chi a tarre. 18Wu a kuuwe, a ki̱ladu we ko beka da̱u luke ko. 19A no nati̱bu ki̱ni lubimu n ti bi̱bu ki̱bwa̱u bwesi̱m mi̱mu we ki̱swi wuko!

20Ti̱twa̱ba̱ bunitu ke bananiyu a kaduwe sa̱na̱ng ka difi̱kare ni̱bu Yafudam. 21Di̱ne we ki̱swi wuko, riye wu a fweenbuwe yo ti̱ti̱nitu a mwe lanta ki̱kang, duum ki̱mu a ne fweenti̱nu we. 22Ka no n ke di̱ne a ki̱tu ditikiye, a no a ne ni wu a ti̱m ka swide we. Aya di̱ne bi̱kamu bi̱suti̱ri̱m Kwamam ka ki̱ti̱n diti chiyu. 23We ki̱swi wuko, ka wuka ni ka ya̱nu ko, “Da̱ng Masiya, nang we! Ti̱keduwe.” 24Nangki̱n, ni̱bu Masiya ti̱kwanimu n ti Fa̱kubu ti̱kwanimu nabwen ka chiredu, ka yung chi ya̱r yiitu nabwen, ke chi butu ni̱bu kono nang bi̱suti̱ri̱mu, ka no medu ka fwede. 25Ti̱da̱ng, n fwa chimi̱ni fi̱la.

26“Di̱ne yiko, ka bi̱kam ka yi chi̱nu ko, Masiya nang wu a di̱kire a bwa, ti̱keduwe. Ka, ka yidu ko, a bunge, ti keduwe.” 27Nangki̱n, tiyangu ki̱yile a yile we bwa twa̱re ki̱swanati̱nu a ki̱twalengu, nang tiyangu Bwe Nii ka ki̱la mi̱nedangu.

28Fi kwa̱me we mi̱ne, nang fi ki̱sungti̱ kwasi ki̱murande.

Ki̱laku Bwe Ni

(Mar 13:24-27; Luk 21:25-28)

29A kuteng riyengu, bi̱nabi̱na dii a ne yii kuko, swangu a ne ka fwiyedu. Ki̱switiyu ka twakadu we dii, dukan kwali̱n chi̱nu a twiyenu ka mi̱kadu.

30A kuteng ki̱ku, Bwe Nii ka fwedu we twiye. Ni̱bu we kuuti ti̱ti̱ni yi kwang ka ma furi ki̱liki̱li. N chi ka ku Bwe Nii ki̱bedu a di̱twin ki̱ni dukan n ti dwiyen ti̱dui. 31Ka tume ni̱bu ti̱tumbi̱ri ki̱mu ka ku sum ki̱ni dukan, n chi ka mure bi̱suti̱ri̱m Kwamamu we twa̱ru n ti ki̱twale n ti twa̱r wuli̱nu n ti kir kulanu.

Miyaku a tiyang sinang

(Mar 13:28-31; Luk 21:29-33)

32Ti̱miyan we tiyang sinangu. Yo ki̱yange a mwe ki̱sutedu, ki̱twaba lwangi̱n ti̱fwiye. Ti̱yin ti̱nu tii didi̱be a lame. 33We yiko, ka ti̱ku ki̱chiti̱wu mang fwa chimi̱ne, ti yim ki̱swi a mwatawe, a tu a lame kwa̱r. 34Bi̱yili̱m mi̱n fwa chimi̱nu, di̱kalan di̱du a ne sudu, ki̱chitu wu kwang a mwintuwe ka fwedu. 35Dii n ti ti̱mu ka sudu, aya di̱kwa̱l yii mi̱nu a ne yara ti̱m.

A ne nii a yim di ki̱lake we

(Mar 13:32-37; Luk 17:26-30,34-36)

36A ne nii a yim dii n ti awa wu ti̱tu ka fweende we, kasi no nang ni̱bu ti̱tumbi̱rimu, kasi no nang Bwe, kana Te n ki̱kun a yim. 37A lakanbu n ti ki̱dang Nufuwangu, beki̱ Bwe Nii kanodi yiko. 38Yinang ki̱dang kangu, yo mwe bambi̱li̱me a tibu bede, ni̱bu ki̱chadu, ki̱nodu, kwartabu ti nati̱bu ki̱ma ki̱nati a lami̱nti̱ yo n Nufu a le kwa̱mbi̱re mwe.

39N chi a yimbu chi ki̱fweditu, mwe bambi̱lake a be a wo chi kwang. Nang tiyangu di Bwe Nii ka ki̱lade kanodu we mi̱nangu. 40We ki̱swi wuko, ni̱bi burau kanodu a kuu, ka da̱di wiin ka dudi wiin.

41Nati̱bi burau kani̱n kwa chaam ware, ka da̱du wiin, ka dudi wiin.

42Di̱ne yiko, “Ti̱swe ki̱ni doku bwiyang di̱ne ta yimbu di Tewuduwe chi̱n ka ki̱la mi̱nede. 43Aya ti̱yim, ka naba lo a no yim yo daaku ka bedu ki̱ni kume, a no neka da duum ki̱ni kum ka ma ki̱yolang, a ne dudu ko daaku a le lo. 44Di̱ne yiko, ti̱swe ki̱ni doku bwiyang, di̱ne a ki̱swi ta yimbe Bwe Nii ka ki̱ladu.”

Ka̱be wuyile n ti wubwila

(Luk 12:41-48)

45N wure ka̱be wuyile ki̱ni yingku, wu Tewuduwe a yo ka to lo, yinu ki̱ni bi̱kamu ka̱bi chabti̱tu a ki̱swi a dakane? 46Naba delake ka̱be wu Tewuduwe ko beka ya ki̱nu we yii nange di ka ki̱lade. 47Bi̱yili̱m mi̱n fwa chimi̱nu, ka yo ka̱be wu kani̱n da̱ng ki̱mi̱n kuli̱n ki̱ni kwang we lo. 48Aya ka ka̱be wubwila, a kur we ni̱r ki̱nu ko, Tewuduwe ko a ne ki̱ladi datu.

49N ki̱n a le ki̱basu kal ki̱nu ni̱bu nangangi̱mu, ki̱chadu, ki̱nodu n ti ni̱bu ti̱norani̱mu. 50Ka n ki̱n a ma yiko, Tewuduwe ko ka bedu a di n ti ki̱swi n ki̱n a yimbe. 51Naba loko ka ngau ki̱nu ka mwata ki̱mi̱nu n ti ni̱bu di̱bebeli̱ni̱mu. We fi n chi ka kiwii n ti ki̱rti̱ku numang.

Currently Selected:

Matta 24: Tula

Highlight

Copy