Matta 25

Baltaku a fwa̱ni kubu

1N Yesu a chakakku ko, “Ni swe Yaa Kwama ki̱ni, ti̱kan fwa̱ni kubu ti̱tu a chir ki̱ni ti̱nungri we fiti̱lati chiyu yaka tekadu n ti bwele ki̱yiu naye. 2Bi̱bi bunumu a kasabu, bi̱kami bunumu ki̱ni kasantu. 3Bi̱bu a kasa̱bi̱mu a chir ki̱ni fiti̱lati chiyu, a da̱u ti̱bu kaang ki̱nung we belure. 4Aya bi̱bu a kasani̱mu a da̱u ti̱nungritu a beti̱lureti chiyu. 5Bwele ki̱yiu naye a bebi̱ datu, di̱ne yiko n chi a le ki̱dara dumi.

6“Ki̱ni kum n chi a nwe di̱yalu ko, ‘Bwele nang wu,’ ti̱chire ni yiu ki̱n. 7Fwa̱ni ti̱tu a kun ki̱do fiti̱ti̱lati chiyu. 8Bi̱bu a kasa̱bi̱mu a yi bi̱bu a kasani̱mu ko, ‘Ti̱ni ni̱mi̱n ki̱nung, fitilati niyu ki̱dumedu.’ 9Aya bi̱bu a kasani̱mu a yi chi ko, ‘Ki̱nungu a ne ka lwe ni̱nu n ti chi̱n. Bunge ti̱ya ti̱ta̱ne we bwa ni̱bu ki̱miinde.’ 10Yo n chi a yikan yaka ta̱ne ki̱nunge, bwele ki̱yiu naye a be. Bi̱bu we fiko a do bwimu n chi a le lo ni̱bu ki̱mulen tiniye ware, a yingeti̱ kwa̱ru.

11“A kuteng ki̱ku bi̱bu a kasa̱bi̱mu a ki̱lawengu, a yi ko, ‘Tewuduwe, wudu ni̱mi̱n kwa̱ru.’ 12Aya a ki̱nta chi ko, ‘Bi̱yili̱m mi̱n fwa chimi̱nu, mang yin chinbu.’

13“Di̱ne yiko, ti̱ma ki̱yolang, di̱ne ta yimbu, dii ka ki̱swi Bwe Nii ka bemi̱nede.”

Miyaku a bi̱kam ka̱bi bi̱ta

(Luk 19:11-27)

14Yinu n Yesu a chakakku ko, “Yaa Kwama ni swedu tiyang ni wu yaka chir di̱bwale, a yal ka̱bi kiyu, a kera chimi̱n kuli kitu. 15A ni wuka ka̱mbi̱ru swa̱ngi yunu, a ni wuka ka̱mbi̱ru swa̱ngi yurau, a niti̱ wuka ka̱mbi̱ru swe wiin. A ni ka wuwule niye yinang kangu a dakanang. Yinu a yikan. 16Bi̱nabi̱na, n ki̱n wu a yiu ka̱mbi̱ru swa̱ngi yunuwe a yikan a ya ma di̱be ki̱n a yawe yikai swa̱ngi yunu we mure. 17Wu a yiu ka̱mbi̱r swa̱ngi yurabe, n ki̱n a ya ma di̱be ki̱n a yawe yikai swa̱ngi yurau ti̱nti̱n. 18Aya n ki̱n wu a yiu swe wiine, a ya wu bwang a lai ka̱mbi̱r Tewuduwe konu we.

19“A kuteng ki̱ku niyang dami̱ni bayimangu, Tewuduwe ka̱biye a be, ka yiu chi ka nang wuwule niye a mange. 20Wu a yiu swa̱ngi yunuwe a be ki̱ni yikai swa̱ngi yunu ko, ‘Tewuduwe n nii swa̱ngi yunu, n yate yikai yi yunu.’ 21Tewuduwe a yi ki̱n ko, ‘Kwele bwe wu yile, n mun ka̱be wu yile, muni ki̱ni kwa̱mbi̱r we ti̱ti bayimitu. Mang yonu a ti̱tu nabweni. Be ni ma furi mwenu ware.’

22“Yinu wu a yiu swa̱ngi yurabe, a be a yi ko, ‘Tewuduwe, swa̱ngi mwiyi yurau, n yati̱ yikai swa̱ngi yi yurabu.’ 23Tewuduwe a yi ki̱n ko, ‘Kwele! M mun ka̱be wu yile, wu ki̱ni kwa̱mbi̱re. Muni Ki̱ni kwa̱mbi̱r we ti̱ti bayimitu. Mang yonuwe ti̱nabwenitu. Be ni ma furi mwemwe n ti mun.’

24“Yinu wu a yiu swe wiine a be a yi ko, ‘Tewuduwe, n yim damo a ma bwar. Mun kau chi mwan fibe, mun kubeti̱ ti̱ta fa̱li ni̱bii. 25N nwe tayi, n lai swe mwang niye a bwang. N nang wu mang bemi̱ne ki̱ne.’

26“Tewuduwe a ke ki̱mi̱n ko, ‘Mun kasi nii wu bwila, fwiti a la mi̱n la! A mwang yim mi̱n kada fi mang fibe, mi̱n chati̱ Fa̱li ni̱bi. 27Ngo, a no mwang yo midu a bi̱ne ka̱mbi̱re. Yo no mang be ye a no mang yadu a bwi a la fiko. 28Di̱ne yiko ti̱yiu we di̱ki̱ne, ti̱ni wu ki̱ni swa̱ngiyi kube. 29Wu ki̱ni chiye, ni su ki̱mi̱nu, ka kadu nabwen. Aya wu a newe ki̱ne, kasi no nang ti̱ti bayimitu, ka yiti̱du. 30Ti̱mar nii wu bwila wu a ki̱liki̱liye wu kwane. We bwa ki̱kii wii ka ni̱n ki̱rti̱ti̱ num.’

Mwataku di swang kute

31“Aya yo Bwe Nii ka bedu ki̱ni dwiyen kite n ti ni̱bu ti̱tumbi̱rimi kwange, ka swedu we ki̱di̱ng mati̱ne wu a yaa ko. 32Ka mur kuuti ni̱bu ti̱ti̱nimu we kakku kangi kwang. Ka kera chidu yinangu naba toke ki̱kera kwanti n ti sitiyang. 33Ka yo kwantiyu a kan ki̱yilang aya sitiyu a kwanta kwelang.

34“M Mai ka yi bi̱ba kangki̱yilamu ko, ti̱be ni̱bu bi̱bu n Temi a yo chimi̱n delaku, ti̱chau kula yaa n Kwama a do chimi̱n yo a tibu yo ti̱ti̱nite. 35Di̱ne yo chunu ki̱buye, ti̱nii chabti̱tu n chau, dimwen a dai, ti̱nii mwe n no, m be rungkoi, ti̱yii fa̱li yurau. 36Mi̱ni twatwadu, ti̱swe mi bwi. N bubuwe, ti̱be ti̱da̱ngi. Mi̱n a di̱bi̱nti̱l ti̱be ti̱sii ti̱n.

37“Yinu ni̱bu ni̱r dini̱mu ka ke ki̱mi̱nu ko, ‘Tewuduwe, ni̱n kuun a fi̱re mun nwe chuun, yinu nang ni̱n chabte? Ka dimwene yinu nang ni̱n mwe mwang no? 38Ti̱nti̱n, ni̱n kuun a fi̱re m mun rungko, yinu nang yin fa̱li yurabe? Ni̱n kuun a fi̱re m muni twatwadu yinu nang swemi̱n bwiye? 39Yi fere na kuun m bubuwe ka a di̱bi̱nti̱l, yana siine.’

40“M Mai ka ke chi mi̱nu ko, ‘Bi̱yili̱m mi̱n fwa chimi̱nu, kasi no ti̱ti̱le chi ta ma bi̱ti̱ri̱mu mi̱ne, ti̱mami.’

41“N ki̱n fal ka yi bi̱bu a kwatakwelamu ko, ‘Ti̱yika mi̱n a fi, n ti̱n bi̱bu ni̱bu kaiyimu, ti̱le ki̱rangu ni̱bu a do Setan mi̱n n ti ni̱bu ti̱tumbi̱ri ki̱mu. 42Di̱ne, n nwe chun, ta niibu chabtu. N nwe dimwenu, ta niibu mwe mang node. 43M ma rungkoi, ta yiibu. Mi̱ni twatwadu, ta swemibu bwi. N bubuwe, n le di̱bi̱nti̱l, ta siibu.’

44“Yinu n chi ka ke ki̱mi̱nu ko, ‘Tewuduwe ni̱n kuun a fi̱re ki̱ni chun, ka ki̱ni dimwene, ka a rungkoye, ka muni twatwade, ka a lo di̱bi̱nti̱lenge, nang ma mi̱nbu chiye?’ 45Yinu ka ke chi mi̱nu ko, bi̱yili̱m mi̱n fwa chimi̱nu, yo ta mabu wuka mi̱nbu we bi̱ti̱ri̱m bi̱bu ko wiine bi̱bu a mwan a tami̱mu, a yung ta ma mi̱mi̱nbu. 46Bi̱bu a tau wa̱re ki̱yika faru a ki̱rangin, fi ka le nwe riye wu ki̱diya kwade, aya ni̱bu yilemu ka ya ti̱kuri ki̱diya kwadi.”

Currently Selected:

Matta 25: Tula

Highlight

Copy