Luka 4

Fwakware a swe Yesu

(Mat 4:1-11; Mar 1:12-13)

1N Yesu a ki̱lawe la Chodan ki̱ni Fi̱ki̱m Kwamamu a rii ki̱ni chib. Fi̱ki̱m Kwamamu, a twa̱ku ki̱n, a yikan di̱kir. 2N Setan a swe ki̱n ditiyu wan taana we bwako. We ditiyu wan taanayu, n ki̱n a chabu chi, yinu a nwe chun we kuteng ki̱ku.

3N Setan a yi ki̱n ko, “Ka mun nang Bwe Kwama, yo kale wu a kau ki̱dane.”

4N Yesu a ki̱nta ki̱n ko, “Ya̱m Kwamamu a mwal ko, ‘Chi ka yu ti̱kuriye n ke ka chabtu.’ ”#4:4 Chs 8:3.

5N Setan a twa̱ku ki̱n, a yikan fi, a su, a la chiye, yinu a yung ki̱n kutiyu a ti̱ti̱niyu, a ki̱swi bayim. 6N Setan a yi Yesu ko, “Mang ni̱n mati̱n kitu n ti dwiyen kiti kwang. Kuli̱n di̱du a fa̱la̱ng mang, ni mang ke, mang nidu ka tadu. 7Di̱ne yiko, ka n sung, n siiye, mang ni̱nu, mwang tadu.”

8N Yesu a ki̱nta ki̱n ko, “A mwalmwale ko, ‘N Kwama Tewuduwe nang naba siike, ni sii ki̱nu n ki̱kun.’ ” #4:8 Chs 6:13.

9Yinu Setan a yikani ki̱ni Yesu a Wurchalima, a ti a fi wu swa̱me, we Kan Kwamanu, a yi ki̱n ko, “Ka mun nang Bwe Kwama, kun we fi, ri a ti̱m. 10Ya̱m Kwamamu a fwa ko, ‘N Kwama ka yi ni̱bu ti̱tumbi̱ri ki̱mu ka a koonu ke nwedu burang we. #4:10 Sa̱b 91:11. 11N chi ka koonu we fa̱li chiyu, ko ke n nwedu burang we kasi no a nang.’ ” #4:11 Sa̱b 91:12.

12N Yesu a yi ki̱n ko, “A mwal ko, ‘Swedu Kwama Tewuduwe mo we.’ ” #4:12 Mwa 6:16.

13Yo n Setan a ri swa̱ka̱ku Yesungi kwange, a yikan, a du Yesu, ka lami̱nti̱ yo ka ya wuka da, wu beka sween ki̱ne.

Yesu a mwe nangangu a Ka̱lili

(Mat 4:12-17; Mar 1:14-15)

14N Yesu a ki̱la Ka̱lili, dukan Fi̱ki̱m Kwamamu we ware n ti ki̱n. Ti̱nti̱ne, ya̱m ki̱mu a ti̱ran we bi̱ntu ti̱duitu n ti ti̱ti̱riti kwang. 15N ki̱n ki̱miyadu we kambi muraku ni̱bu Yafudamitu, ka nang wuwule niye wu a nwe ya̱m ki̱me, ki̱weru.

Ni̱ba ko Yesu we Nasa̱ret

(Mat 13:53-58; Mar 6:1-6)

16N Yesu a ki̱la Nasa̱ret bwa n ki̱n a dwiye mi̱ne. We difi̱kare, n ki̱n a le kan muraki̱n ni̱bu Yafudame yinang ka n ki̱n a meki̱madi kwadangu, a kun ka kii ya̱m Kwamam. 17Ni̱ba ni ki̱n Taki̱da fa̱ku Yichaya. N ki̱n a wudu, a ya fi, a mwal ko,

18“Fi̱ki̱m Tewuduwe

we ti mi̱n,

di̱ne n Ki̱n a suti.

Ko, n fwa ni̱bu mi̱n ya̱m bi̱li̱m,

N Kwama a tum mi̱ne ki̱ni ya̱m bi̱bu,

ke a chaku bi̱bu a le di̱bi̱nti̱li̱mu.

Ke ki̱dubi̱bu a ku di.

Ke bi̱bu ki̱nwe riyemu a ya chirku.

19Ke n fwa ni̱bu mi̱n mi, a ne ti ke,

n Tewuduwe ka yu ni̱bu ki̱mu.”

20Yo n ki̱n a ri kiki̱ke a dal taki̱da Kwama, a niti̱ wuduwe fanseti wu ki̱to kan muraki̱ne we, a ya sweswe. Ni̱bu we fikomu n kawure a kur ka nui ki̱da̱ng ki̱nu. 21Yinu n ki̱n a yi chi ko, “Ya̱m Kwamam bi̱bu a ri di, yinang ka ti̱nwedi yangu.”

22Kanang wuwule niye, wu a nwe ya̱m ki̱me, a ya̱r yi a fwa chi a dakane we dur ki̱nu, di̱ne ti̱kwa̱li yiikitu ta li̱mangi. N chi ki̱bi̱du ko, “Wu n ke bwe Yusufuwa?”

23N Yesu a yi ni̱bu ko, “N yim ta fwami ya̱m seli̱bi̱m bi̱bu ko, ‘Nabari, be yimwiyu didiin, ke ni̱n yim ko m mun nabariye,’ ti̱nti̱ne ta yi mi̱nu tiko, ‘Mati̱ chi ka̱ta̱kitu we bi̱n munu, yinang kangu nang nwe mwang ma we Kafanawu mangu.’ ”

24Yinu n ki̱n a yi chi ko, “A ne fa̱ku Kwama ni̱bu ka yiddu kani yurau, a bi̱n ki̱ne we.”#4:24 Yow 4:44. 25“We bi̱yili̱mu, nati̱m buni̱mu nabwen we Yisrela, we ki̱dang fa̱ku Yiliyangu. We ki̱dang kangu, a ma swa̱tuti ti̱ta ki̱ni swarti turukun a swibu mwe, a kuteng swa̱tu ti̱tangu, chun a ma ti̱m Yisrelami kwang.#4:25 1Ma̱t 17:1. 26Aya, n Kwama a tumbu fa̱ku Yiliya we nati̱m buni̱m bi̱bu ko wiin we Yisrela. N ki̱n a tum, a kana nabune wiin, wa bi̱n Serifan di̱du a ti̱m Sidoni̱ne.#4:26 1Ma̱t 17:8-16. 27Ti̱nti̱ne, we ki̱dang fa̱ku Yelichangu, ni̱bu mwa̱limu we Yisrela nabwen, aya a ne wa ya beke we, ka n ke Naman naba ti̱m Suriyam n ki̱kune.”#4:27 2Ma̱t 5:1-14.

28Kangu ni̱bu a nwe ya̱m bi̱bu we kan muraku ni̱bu Yafudame, n chi a fwiren. 29N chi a kun, a yo Yesu ko a du bi̱nu. N chi a yikani ki̱ni Yesu a bwa a kun di̱du n chi a mun Nasa̱reti̱nu. N chi a no ki̱baddu ko, ya chi tungda, ke a bwa. 30Aya n ki̱n, a sabran, a letuwe tibe chi, a yikan.

N Yesu a chaku ki̱fi̱be wu bwila a bwi nii

(Mar 1:21-28)

31Yinu n Yesu a yika bi̱n di̱du ki̱yalu ko Kafanawu, di̱du a ya Ka̱lili. Ki̱miyadu we ka nang wuwuwle difi̱kare.

32Miyaku kangu, a ya̱r ni̱bu yii, di̱ne ya̱m ki̱mu ki̱ni dukan.#4:32 Mat 7:28-29.

33Wuka nabani wu ki̱ni ki̱fi̱bti wu bwila, we mure kan muraki̱n ni̱bu Yafudamu, a kuku ker ki̱nu dukan ko, 34“Wa Yesu naba Nasa̱rete! Lwanga mwangu wule we ti ni̱n? Be mwang chi̱u ni̱na? Mun wu wauwade wu Kwama!”

35Yinu n Yesu a wela ki̱fi̱be wu bwila ko, “Lemi̱n! Chirmi̱n we nii wu!”

Ki̱fi̱bti a yo nii wu, a yar, a ti̱m, a chir, we kakku ni̱bangu, a nwe ki̱mi̱nbu burang.

36Ya̱m bi̱bu a ya̱r ni̱bu yi, n chi ki̱bi̱be yichiyu we fiko ko, “Bi̱bu ki̱dum ya̱m wulem bi̱bu? N ki̱n kiyi ki̱fi̱be ki̱ni dukan ko a chir, ki̱chir ti̱ni̱mu.” 37Ya̱m Yesumu, a ti̱ran ka nang bwa̱le we yaa wuko.

N Yesu a be ni̱bu nabwen

(Mat 8:14-17; Mar 1:29-34)

38N Yesu a chir we kan muraki̱n ni̱bu Yafudamu, a le lon Simune. Nela Simune a bubuwe, bwiyu a sireni bud, we mure lo. Miyari̱m Yesumu a yi Yesu ko, a be naye wu. 39Yinu n Yesu a ya, a ti ki̱dwang n ti chi ti̱dari kitu, a fwa ya̱mu ki̱ni dukan, a yo sireku bwiyangu n ti burangu a du naye wu. Bi̱nabi̱na naye wu a kun, a sii chimi̱nti̱ chabtu.

40Yo di a lenge, ni̱bu a be Yesu mi̱ne ki̱ni ni̱bu buri̱ni̱mu, a bwinbu bi̱kam duum. N ki̱n a yo chi mi̱n fa̱la̱ngu, a be ka nang wuwule niye mi̱n burangu. 41Ti̱nti̱ne, a kakan ki̱fi̱bti, n chi a chir we ni̱bu nabwen. Ki̱bwe keme ko, “M mun Bwe Kwama.” Aya n Yesu a dubu chi ko a wudu yii, a fwati̱ bi̱kam ya̱m, di̱ne n chi a yim ko n Yesu Masiya.

N Yesu a chakakku ki̱ni di̱mwar

(Mar 1:35-39)

42Yo ti̱mu a kwiyane, n Yesu a du bi̱nu, a yika fi, a ne ni̱bu we. Ki̱ni yiko, ni̱bu ki̱babba ki̱ni chiku. Yo n chi a ya ki̱ne, n chi a funti̱bwi ka yo ki̱nu a neka du bi̱n chi̱nu. 43Aya n ki̱n a yi chi ko, “A mwintuwe mang fwa ya̱m bi̱li̱mu mi, n Kwama Mai we ni̱bu a ti̱kan bi̱nti̱mu ti̱nti̱n, di̱ne nang chi a yo n ki̱n a tuyenge.” 44Yinu n Yesu a yikan, a chakakku ki̱ni di̱mwaru we kanbi muraku ni̱bu Yafudam ti̱tu a yaa Yafudiya.

Currently Selected:

Luka 4: Tula

Highlight

Copy