Luka 5

Miyari̱mu n Yesu a mwe swabi̱mu

(Mat 4:18-22; Mar 1:16-20)

1Wuka ki̱di n Yesu a ti, a ki̱ti̱ku la Sanesa̱retang, ni̱bu a mura ki̱mi̱ntuwe ki̱nwe ya̱m Kwamamu. #5:1-3 Mat 13:1-3; Mat 3:9-10; 4:1. 2N Yesu a ku kwa̱mbi̱ri mwei yurau, yiyu ni̱bu ki̱ ta̱n chi̱ngi, a yo, a ki̱ti̱ku laang, yo a yaki̱ nura dwa̱kai chiye. 3N ki̱n a le wuka kwa̱mbi̱re mwe wu, n wu Simun Biti̱r, a yi ki̱n ko, “Sii kwa̱mbi̱re mwe, le mwe, a dudu ki̱tattake we nabwen. N ki̱n a swe we Kwa̱mbi̱re, a miya ni̱bu mi̱n.” 4Yo n ki̱n a ri yungke, a yi Simun ko, “Yika fi a ki̱sulle ki̱ni kwa̱mbi̱re mwe, mar dwa̱kamo we, ke n tau chingiyu.”

5N Simun a yi ki̱n ko, “Nii wuduwe, kumi kwadu ni̱n ti̱rtadu we fi nang tabu chi. Aya di̱ne mwang fwa yiko, mang bunti̱ ya̱m mumu, mang mar dwa̱ka.”#5:5 Yow 21:3.

6Kangu n chi a ma yikongu, n chi a tau chingiyu nabwen, yiyu a yo dwa̱ka chi yakani̱n ngi̱radu ki̱ni chingiyu.#5:6 Yow 21:6. 7Di̱ne yiko, n chi a ma di̱yal we kebuchimu ni̱bu taku chi̱ngi, a wuka kwa̱mbi̱re mwe ko, a be maka chi. Bi̱ki̱mu a be, a maka chi, a ri Kwa̱mbi̱ri mweyu ki̱ni chingiyu. Di̱ne turenangu, kwa̱mbi̱riyu ki̱su mure.

8Yo n Simun Biti̱r a ku chitu a fweete, a sung we kakku Yesungu, a yi ki̱n ko, “Tewuduwe, du mi̱n, m mi̱n naba ki̱letiye.” 9N ki̱n n ti ni̱bu a fikomi kwang a ya̱r yii, di̱ne nabwe chingiyu n chi a tabiyu. 10N Yakubu n ti Yowana bwesi̱m Sa̱badi fati̱bu Simun mu a ya̱r yii ti̱nti̱n. N Yesu a yi Biti̱r ko, “Nwedu tayi we, bwa kake mwang ni̱n bedu ki̱ni ni̱bu ka bumiti̱ni̱m.”

11A kuteng ki̱ku, n chi a chake Kwa̱mbi̱ri mweyu, a yo, a ki̱ti̱ku laang, n chi a du kuli̱ni ti̱ti kwang, a bunti̱ Yesu.

N Yesu a be naba mwa̱liye

(Mat 8:1-4; Mar 1:40-45)

12Ki̱dangu n Yesu n ti Miyari̱m ki̱mu a ya di̱kan bi̱nangu, wuka nii wu mwa̱li#5:12 Mwa̱li: Yisrela a kebu ko naba mwa̱liye a le tibe ni̱be. N chi ki̱madi ying di̱ne wauwade. a chau dukan ki̱ne, a be fi, a di̱Ki̱ne. Yo a ku Yesuwe, a suba sungi ti̱dumi̱n, a wana ki̱n ko, “Tewuduwe, ka mwang kede, n lwe mwang be burang mangu.”

13N Yesu a tar fa̱la̱ng kangu a twai ni wu, a yi ko, “N ke mang benu, ya li̱mang n ya nuraki̱ku.” Bi̱nabi̱na mwa̱liyu a du nii wu.

14Yinu n Yesu a yi ki̱n ko, “Ya, fwa nii mi̱nu we, yung dur munu we fanseti, yang ma niku m Musa a fwangu, ki̱ku a dakan we burang ki̱ka̱ngu mwiko, n ya beku.”#5:14 Fan 14:1-32.

15Ni̱bu bi̱ba nwe ya̱m Yesumu a ti̱r ya̱mu, a yo ni̱bu nabwen ki̱be bwana di̱Yesuwe ko ke chi nwe ya̱mu, chi yati̱ beku we buri̱n chiitu. 16Aya wuka yo n Yesu, ki̱yika fanti yiya ne ni̱bu weyu yaki̱ twa̱ba̱ bunitu we.

N Yesu a be wu ngi̱rmane ni

(Mat 9:1-8; Mar 2:1-12)

17Wuka ki̱di yo n Yesu a yaki̱ ma miyake, bi̱kam ni̱bu Farisamu#5:17 ni̱bu Farisam: Di̱kan kwa̱l di̱du ki̱bunti̱ yili̱n Musan yinang. n ti ni̱bu yungku yili̱n Musantu bi̱bu a be, a kibi Ka̱lili n ti Yafudiyamu n ti bi̱n Wurchalima n we fiko a sweswe. Dukan Tewuduwe we ware n ti ki̱n. A yo Yesu a be ni̱bu buri̱ni̱mu nabwen we fiko. 18We ki̱swi wuko, bi̱kam ni̱bu a be ki̱ni wu ngi̱rmane ni a chi ti̱dari, n chi a ma, ka le lo, ka ni Yesu, ke a be ki̱n. 19Yo n chi a yabu wa̱re, di̱ne ni̱bu a ma nabwene. N chi a ku, a ne dawenge, a fi̱l dii a kane, a wum swa̱mu, a si̱ke ki̱n ki̱ni chi daritu we kakku Yesuwangu.

20Kangu n Yesu a ku keku bi̱yili̱mang chiyangu, a yi ni wu a bubuwe ko, “Bwa̱le, n dumi̱n ki̱leti mwiyu.”

21Ni̱bu yungku yili̱n Musantu n ti ni̱bu Farisamu, n kawure a mwe ki̱fwadu ti keko ko, “N wure ki̱fwa ya̱m swa̱ba̱ni̱me? N Kwama, n ki̱kun ki̱ni da, ka du nimi̱n ki̱letiyu.”

22N Yesu a swaan chi, n chi ki̱kurade, yinu a yi chi ko, “A mayire ti̱kuran chi̱ntu ki̱twa̱ng wa̱re? 23Ti̱ti̱le a la chi, ti̱tu a yi ko, ‘N dumi̱n ki̱letita’, ka ti̱tu a yi ko, ‘Kun, ya yayu ta?’ 24N ke mang ma ti̱tu, ke ti̱yim ti Bwe Nii ki̱ni dukanu ka du nii mi̱n ki̱letiyu we ti̱ti̱nitu.”

Yinu a yi nii wu ngi̱rmane ko, “Mi̱n ya̱nu, kun, da̱u chi ti̱dari mwitu n yikan.”

25Bi̱nabi̱na nii wu, a kun we kakku ni̱bangu, a da̱u chi ti̱dari kitu, a yika lo, ki̱dela Kwama.

26Kanang wuwule niye we fiko a ya̱r yii, tayu a tau chi, n chi a dela Kwama ko, “Diwu ni̱n ku nangang Kwamang!”

Yesu a sutu Lawi

(Mat 9:9-13; Mar 2:13-17)

27A kuteng ki̱ku n Yesu a ku Lawi, wu ki̱yiu sangkale, a swe a kan sangkali̱n, n Yesu a yi ki̱n ko, “Bumite.” 28N lawi a kun, a du kanang ti̱ti̱le chiye ki̱ni kwang, a bung ki̱mi̱n ti̱n.

29N lawi, a sii Yesu mi̱n Yiye wuduwe we loko. Ki̱tuu ni̱be nabwen, wu a ni̱bu ki̱yiu sangkali̱me n ti bi̱kami kwang ki̱chau chabti̱tu ware. 30Aya ni̱bu Farisamu n ti ni̱bu yungku yili̱n Musati̱m bi̱bu a kwa̱l chi̱nu, a be a ma Miyari̱m Yesumu mi̱n ki̱mwiti̱mwi ko, “Di̱ne wule tani̱n chau chitu n ti ni̱bu ki̱yiu sangkali̱mu n ti ni̱bu ki̱letime?”#5:30 Luk 15:1-2.

31N Yesu a ki̱nta chi ko, “Ni̱bu ki̱ni li̱mamu a babu nabari, kana ni̱bu di̱buum ki̱bau nabari. 32Mang bebu di̱ne ni̱bu ki̱tum yilem aya m be di̱ne ni̱bu ki̱letimu, ke a wo ki̱ti̱m, a yiu Kwama.”

Di̱bi̱du a dimwen

(Mat 9:14-17; Mar 2:18-22)

33Bi̱kamu a yi Yesu ko, “Miyari̱m Yowana naba batismamu ki̱ bwa̱ladu we dimwen n ti twa̱ba̱ku buniyangu, miyari̱m ni̱bu Farisamu ki̱ma ti̱ni yiko ti̱n, aya bi̱mumu ditiyu ki̱dang ki̱chadu ki̱noti̱du.”

34N Yesu a ki̱nta chi ko, “Kano fati̱bu bwele ki̱yiu nayemu, ka ma dimwen yo bwele we ware ti chiya? 35Aya ki̱swi ka bedu yo ni̱bu ka da̱u bwele ki̱yiu naye we di̱chiye, yinu n chi ka ma dimwen we diti yikiyu.”

36N Yesu a fwa chimi̱n kaang baltaku ko, “A ne ni wu ka bi di̱fi̱tan luke wufwiye ka tali̱n luke wuka̱re we. Ka fwe yiko, kuli̱n di̱fwinu a kaiyan, di̱fi̱tan luke wufwiyenu ti̱n a ne bikadu n ti kuli̱n di̱ka̱ri̱nu. 37We da ni̱bu Yafudame, a dakabu ni̱bu ka kur mwe yinabi wufwiye we swe wuka̱re, di̱ne ka a fwe yiko, swe wuka̱re ka fwedu yo mwe yinabiye ka fwide, mwe yinabiye ka yudu a ti̱m. 38A dakan ni̱bu ka kur mwe yinabiye wufwiye a swe wufwiye. 39A ne ni ka kedu ka no mwe yinabi wufwiye we, a kuteng ki̱ku n ki̱n a no wu ka̱rengu, aya ni̱bu ki̱yidu ko, wuka̱re a la chi ki̱ni li̱mangu.”

Currently Selected:

Luka 5: Tula

Highlight

Copy