Luka 3

Di̱mwar Yowana Naba Batisma

(Mat 3:1-12; Mar 1:1-8; Yow 1:19-28)

1We swa̱r di̱di kub chiri tunu di̱du n Tiberiya Kaisar wu ki̱chau mati̱n a Romamu, ki̱dangu m Babuntu Bi̱latu kwabna Yafudiyangu, n Yiridu nang wu ki̱chau mati̱n a Ka̱lili ye, ke ko n Filibu ki̱chau mati̱n Yituriyatu n ti Tarakunita. Ti̱nti̱ne, Lisaniya ki̱chau mati̱n Abilenes, 2We ki̱dangu Anana n ti Kayafa tikaketi fansetiyu, n Kwama a fwa ya̱m n ti Yowana bwe Sa̱kariya we di̱kiru. 3N Yowana a le ka nang wuwule fiye we ti̱m chimu, a kana laa Wurdunu, ki̱mwa ni̱bu ko, “Ti̱wo ki̱ti̱m, ti̱ma batisma ke n Kwama a du chimi̱n ki̱leti chiyu.” 4Yinang ka a mwal we ti̱kwa̱liyi fa̱ku Yichaya ko,

Ker niin ki̱ma

di̱mwar we di̱kiru ko,

“Ti̱do ni̱tu chi̱ntu

ke Tewuduwe a be swe we,

ti̱ma nangang ki̱yilang.

5Kanang wuwule la ka ridu.

ka nang ki̱ki̱le bange ti kunitu

ka dadi wam.

wa̱ri yi kanariyu, ka yadi der.

Wa̱ri yi cha̱ki̱li cha̱ki̱liyu ka dadi twai.

6Kuu ti̱me ki̱ni kwang

ka ku yuku Kwamangu.”

7N Yowana a yi muraki̱ ni̱bangu ki̱bau ki̱nu ka ma chimi̱n batismamu ko, “N ti̱n bi̱kwani̱m, yinang soti yi kwaniye! N wure a rung chi̱ne, ko ti̱wul mi̱n we ki̱fwini Kwama ki̱bede? #3:7 Mat 12:34; 23:33 8Ti̱ma nangang ki̱ku ka yungdu ti̱wo ki̱ti̱mang. Ti̱yidu tiko n te chi̱n nang Yibrayim, n ni̱ni wauwadu. N Kwama ki̱ni dukan kasi no nang kali yiyu, ka yodu ka kau Yibrayim mi̱n Bwesi̱m.#3:8 Yow 8:33. 9N Kwama a tu a do bwi ka swita tini we ki̱yineng tiyang kangu ka fwalu a ti̱m. Ka n chi a ki̱labu a duwebu ki̱letiye, n Kwama ka wela chidu nabwen, yinang ni wu ki̱swita tini yiyu a tubuchiyu ki̱twida ki̱range.”#3:9 Mat 7:19.

10Ni̱bu a bi̱u Yowana ko, “Yoye nang ma wureni wu ka yung duku ki̱letiyange?”

11N ki̱n a ki̱nta chi ko, “Ka nii ki̱ni lukei yurabe, a keran n ti wu a newe ki̱ne. Yinu nii wu ki̱ni chabte a maka wu a newe ki̱ne.”

12Ni̱bu ki̱yiu sangkali̱mu a be ki̱baddu ka ma batisma, n chi a bi̱u Yowana ko, “Naba yungke, yoye nang ma wureni, ka yungdu ni̱n wo ki̱ti̱me?” #3:12 Luk 7:29.

13N ki̱n a yi chi ko, “Ti̱yiddu sangkal di̱du a la yilangnu we.” 14Bi̱kam ni̱bu ki̱rangmu ti̱nti̱n a bi̱u ko, “N ni̱n ti̱n nang ma wureni ka yungdu ni̱n wo ki̱ti̱me?”

N ki̱n a yi chi ko, “Ti̱yidu ka̱mbi̱ru we ni̱bu ki̱ni dukan, ti̱mwedu ti̱kwanituwe a dur niin, ti̱ma bwanu ki̱ni chi ni̱bu ki̱fe chi̱ne.”

15Ni̱bu ki̱yam beku Masiyamu, n chi ki̱kamadu ko ka kano n Yowana nang ki̱ne. 16N Yowana a yi chi ko, “Mi̱n ma chimi̱n batisma ki̱ni mwe, aya wukani ki̱bedu wu mang mwatanbu chi n ti ki̱ne, mang lwebu mang chuku ki̱wami kiyu, wu dwiyen kitu a su ti̱tu ni̱bu ka swe mi̱nu warete. N ki̱n ka ma chimi̱n batisma ki̱ni Fi̱ki̱m Kwamam n ti ki̱rang. 17N ki̱n ki̱bedu ki̱ni swaye ka chaku bi̱yili̱mu ni̱bu we bi̱bwilamu, kanodu yinang yo nii ki̱chaku ki̱nuti a furi chaam n ti tui kiye. Ka yo bi̱yili̱mu ni̱bu a fi wu yile, yinang ka ni̱bu ki̱yang ki̱nuti baliyang. Aya ka ni bi̱bwilamu riye yinang ka ni̱bu ki̱twi furitu n ti tuitu a ki̱rang ki̱ku a dumebudumene.”

18N Yowana a ma nangangu ki̱ni wa̱riyu nabwen, ko ke ni̱bu a swaan, a yiu ya̱m bi̱li̱mu.

19Aya n kwabna Yiridu wu n Yowana a wela ki̱n di̱ne a da̱u Yirudiya, naye ke ko n ti ti̱kantu chi ti̱tu n ki̱n ki̱madu a lebite. #3:19-20 Mat 14:3-4; Mar 6:17-18. 20A kuteng ki̱ku, n Yirudu a su bwila, a yi ni̱bu ko a tau Yowana a mar a di̱bi̱nti̱l, ni̱bu a mati̱n.

Batisma Yesuwe

(Mat 3:13-17; Mar 9:11)

21Aya yo n Yowana a tibu le di̱bi̱nti̱le, n ki̱n a ma ni̱bu mi̱n batisma, yinu a ma Yesu mi̱n ti̱n. Yo n Yesu a le twa̱ba̱ ke, di a wuden. 22Fi̱ki̱m Kwamam yinang ki̱kube a sub we dur Yesunu, yinu di̱kan ker a chire a bwadi ko, “M mun nang bwemi, wu mang mi̱lane, mi̱n nwe ta̱ma̱ng mwangu yinange.”#3:22 Mwe 22:2; Sa̱b 2:7; Yic 2:2; Mat 3:17; Mar 1:11; Luk 9:35.

Ki̱kuwang Yesung

(Mat 1:1-17)

23Ki̱dangu n Yesu a mwe nangang kangu, a ya swa̱tu kitu wan ti̱ta. Ni̱bu ki̱yal Yesu ko bwe Yusufuwe, n Yusufu, bwe Yeliye. 24Yeli bwe Mattat, bwe Lawi, bwe Malki, bwe Yana, bwe Yusufu, 25Matatiya, bwe Amos, bwe Nawum, bwe Asaliya, bwe Nachaya. 26N nachaya bwe Maata, bwe Matatiya, bwe Chimeyen, bwe Chosek, bwe Yafuda.

27Yoda bwe Yonana, bwe Refaya, bwe Sarubabel, bwe Chatila, bwe Neri, 28N Ni̱ri bwe Malki, bwe Adi, bwe Kosama, bwe Almada, bwe Er. 29N Yer bwe Chochuwa, bwe Yeliyeseer, bwe Yorim, bwe Mattat, bwe Lawi.

30N lawi bwe Simiyon, bwe Yafuda, bwe Yusufu, bwe Yonam, bwe Yeliyakim. 31N Yeliyakim bwe Malaya, bwe Mainana, bwe Matata, bwe Natan, bwe Dauda. 32N Dauda bwe Yesse, bwe Obed, bwe Bwas, Bwas bwe Salmon, bwe Nasun.

33N Nasun bwe Aminadab, bwe Aram, bwe Yesruna, bwe Feresa, bwe Yafuda. 34N Yafuda bwe Yakubu, bwe Yichaku, bwe Yibrayime, Bwe Tera, bwe Nangor. 35N Nangor bwe Seruk, Seruk bwe Reyu, bwe Felek, bwe Eber, bwe Chela.

36N Chela bwe Kenan, bwe Arfacha, bwe Chem, bwe Nufu, bwe Lamek, 37n Lamek, bwe Metusela, bwe Yenok, bwe Yareb, bwe Malalel, bwe Kenan. 38N Kenan bwe Enosi̱k, bwe Chetu, Chetu bwe Adamu, Adamu Bwe Kwama.

Currently Selected:

Luka 3: Tula

Highlight

Copy