Luka 2

Bi̱be Yesuwe

(Mat 1:18-25)

1We ki̱swi wuko n Kaisar Akustu a na yilang ko, ni̱ba ki ka nang wuwule niye wu a ti̱m Romammu, n ki̱n ki̱chan mati̱ni̱mu. 2Ki̱ku nang mweku ki̱kang, ni̱ba ma yo n Kiriniyu, a tau ba̱la̱ng ki̱ku a Suriyange. 3Kanang wuwule niye a yika bi̱n chi̱n, ko ke ya chi di̱ke di̱mbi chiitu.

4N Yusufu ti̱n a chir we Nasa̱ret wu a ba̱la̱ng Ka̱lili a yika Beti̱lami wa Yafudiya, bi̱n Mai Daudanu. N ki̱n a ma yiko di̱ne n ki̱n a chire a ki̱kuwang Mai Dauda. 5N ki̱n a yika Beti̱lami n ti Maryamu yaka di̱ke di̱nbi chitu. M Maryamu a tu a bwa̱u fati̱ntu n ti Yusufu, ti̱nti̱ne n ki̱n a ma lur. 6Yo n chi a tibu du Beti̱lamiye, luru a lam ka bi̱du. 7N ki̱n a bi̱u bwe wu kake, bwe kwarta, a dal bwe ki̱ni ti̱lukteni, a yo a chuki̱r. Di̱ne a ne kan we, di̱du n chi ka si̱ki̱ndi̱nu.

Ni̱bu toki̱m n ti ni̱bu ti̱tumbi̱rim Kwamam

8Bi̱kam ni̱bu toku kwantim we ki̱twalang kaangu ki̱to kwanti ki̱ni kum. 9Naba di̱tumbi̱re Kwama a chir chimi̱ntuwe fwad, ki̱ni dwiyen ti̱tu a be ki̱n a Tewuduwe we fiko, a yii ti̱mi ki̱chichi. Ni̱bu toki̱mu a nwe tayi. 10Yinu Naba di̱tumbi̱re a yi chi ko, “Ti̱nwedu tayuwe, m be chimi̱ne ki̱ni ya̱m bi̱li̱m Ya̱m bi̱li̱m bi̱bu ta ma furi mwen, di̱ne chi̱n n ti ni̱bi kwang. 11Diwu we Beti̱lami, a bi̱n Dauda, ni̱bu a bi̱u chimi̱n naba yuke, n ki̱n nang Masiya#2:11 Masiya: Masiya yii ni̱bu Yibraniyame. Masiya nang Ki̱risti ki̱ni yii ni̱bu Yelenamu. Masiya yii ni̱bu Yibraniyame, Ki̱risti yii ni̱bu Yelename. Tewuduwe. 12Chi ka̱ta̱kitu ta kuditu n ti̱u: Ta ya bwe ki̱lwi, a daal ki̱ni ti̱lukteni, a yo ki̱n a chuki̱r di̱du kwanti ki̱ chan chabti̱n.”

13Bi̱nabi̱na, kwa̱l ni̱bu ti̱tumbi̱ri a dimu a fwete n ti naba di̱tumbi̱re, ki̱dela Kwama ki̱yidu ko:

14“Dwiyentu n ti̱u Kwama wu a diye.

We ti̱ti̱nitu li̱mangu a swe ti

bi̱bu n Ki̱n ki̱nwe ki̱bune chimu.”

15Yo ni̱bu ti̱tumbi̱rimu a du chi a ki̱la diye, ni̱bu tori̱mu a fwa we yichiyu ko, “Ni ya Beti̱lami yani da̱nge chi a fwetu, ti̱tu n Tewuduwe a mangitu.”

16N chi a kwanti̱n a ya, a ya Maryamu n ti Yusufu n ti bwe wu n chi a ti̱u a chuki̱re. 17A kutengu n chi a kuwangu, n chi a fwa ni̱bu mi̱n chitu Naba di̱tumbi̱re a fwa a dur bwenitu. 18Ni̱bu a nwe ya̱m bi̱bumi kwang we ni̱bu tori̱me, a ya̱r yi. 19M Maryamu a tabi̱bu chitu a fwetu. N ki̱n a chakakku ki̱ma ti̱kurantu nabwen we dur ki̱nu.

20Ni̱bu tori̱mu a ki̱lati̱ nachangu we ki̱ni ti̱mi̱lan nabwen, ki̱dela Kwama ki̱ni ki̱n dwiyentu we chi a nwe ti ti̱tu a kuutu. Yinangu naba di̱tumbi̱re a fwa chimi̱nangu.

Chakku di̱n Yesunu

21We wu nari̱be di, wu a biku laarange, ni̱bu a chau ki̱mi̱n di̱nu ko n Yesu. Nang di̱nu Naba di̱tumbi̱re Kwama a fwa yo a tibu ma lur ki̱ne.#2:21 Fan 12:3; Luk 1:31.

Niku Yesung a kan di̱duna Wurchalimanu

22Yo da chi wa nurake a suwe yinang ka yili̱n Musangu a fwangu, n Yusufu n ti Maryamu a yika Wurchalima ki̱ni bwe a se Tewuduwe.#2:22-24 Fan 12:5-8. 23N chi a ma ying di̱ne yilang Kwamangu a fwa ko, “Ka naye a bi̱u bwe wu kake ko, a ni Tewuduwe.”#2:23 Chi̱ 13:2; 12. 24N chi a ya, ke chi ri, chi yilang a fwa we ya̱m Tewuduwe. N chi a ka ma niku ki̱ni ki̱kubtiyi yurau ka ki̱luti yurabe.

25We ki̱swi wuko, a ya wuka nabani ki̱swedu we Wurchalima, di̱n ki̱nu n Simun. N ki̱n nii wu yile, wu ki̱buntu Kwama, n ki̱n ki̱yandu ka kudu yinangu n Kwama ka tume naba yuke Yisrela, Fi̱ki̱m Kwamamu we di̱ki̱ne. 26Fi̱ki̱m Kwamamu a yung ki̱n ko, n ki̱n a ne ka bwadu, a ya ka ku Masiya Tewuduwe. 27Fi̱ki̱m Kwamam a twai Simun, a yo ki̱n a le Kan Kwamanu yo n Yusufu n ti Maryamu a be ki̱ni Yesu we fi ko, ko ke a ri ki̱ke yili̱ne. 28N Simun a kwar bwe we fa̱li kiyu ki̱ dela Kwama ko:

29Tewuduwe, ka̱bemo

a ku bwa̱ki̱ mwangu,

yo ti̱kuri mitu a ya li̱mang.

30Di̱ne nui miyu

a ku yuku mwangu.

31Yuku mwangu ki̱ku

mwang do a kakku ni̱bi kwangangu.

32“N ki̱n yiiku we

yikayu kuuti yinu,

ka bedu ki̱ni ri̱kaku

we ni̱bu Yisrelamu.”#2:32 Yic 42:6; 49:6; 52:10.

33Te n ti ne bwe, a ya̱r yi di̱ne taye we chitu n Simun a fwa a dur bwenitu. 34Yinu n Simun a yo chimi̱n delaku, a yi Maryamu ne bwe ko: “N Kwama a chake bwe wu di̱ne ka kau chi yarki we bi̱kamu ni̱bu Yisrela. N ki̱n ka kau di̱mwal a di̱Kwama di̱du ni̱bu nabwen a ne kedi̱n. 35We yiko n Kwama ka kwa̱l ti̱kuran ni̱ri kawuretu. Ti̱tu ka yoni kayan ni̱re yinang yo kul a kuri̱n a ni̱re.”

36Wukane fa̱ku Kwama we, di̱n ki̱nu n Anatu. N ki̱n fwa̱n Fanuweli̱n, wu a ki̱kuwang Acher. N Anatu fa̱ku, n ki̱n a ma swa̱tu ti̱dibin we ki̱nako. 37A tatuwe ki̱dangu kwartako a bwangu, n ki̱n a swe nabunitu swa̱ti̱tu wan nari̱bu chiri taana. N ki̱ni kwad ki̱ya Kan Kwamanu ki̱ sii Kwama ki̱ twa̱ba̱ti̱ bunitu kum ti kuko, wuka yo ki̱ma dimwen, yo ki̱twa̱ba̱ buniye. 38We Ki̱dang kangu n ki̱n a ki̱re ki̱dwan we fi a di̱Yusufu n ti Maryamuwe, a wana Kwama di̱ne bi̱be Yesuwe. N ki̱n a fwa ni̱bu ki̱yam yuku Wurchalimamu mi̱n ya̱m bi̱bu.

39Yo n Yusufu n ti Maryamu a ri chitu yilang Tewuduwe a fwaate, n chi a ki̱late Nasa̱ret bi̱n chi̱nu a yaa Ka̱lili. #2:39 Mat 2:23. 40Bwe a dwiyen, a ma dukan, ki̱miyadu, ka ridu ki̱ni kassantu nabwen. Li̱me Kwama we ti ki̱n.

N Yesu, a mure Kan Kwaman

41Kanang di̱di̱le swa̱re, te n ti ne Yesuwe, ki̱ya Wurchalima di̱ne Yiye Yabake. #2:41 Mwa 16:1-8 . 42Yo n Yesu a lam swa̱ti̱ti kub chiri turabe, n chi a yika Yiye, yinang ka da chi wemi̱nangu. 43Yo Yiye a riye, Yusufu n ti Maryamu a tau wa̱re ki̱ki̱la lo, a yimbu ko chi duwe Yesu we Wurchalima. 44N chi a da̱u ko kanodu n we ki̱nabu chiyedu n ti ni̱bu, n chi a di kuko diko a kana yayu, yinu n chi a mwe ki̱babba ki̱nu we tibe kebu ki̱mu n ti fati̱bi̱bu chimu. 45Yo n chi a kubi̱ ki̱ne, a ki̱lati̱ Wurchalima we ki̱babbadu we bwako. 46N chi a ya ki̱n, a di wu yitta, a swe a Kan Kwaman, a swe ti ni̱bu yungki̱mu, ki̱nwe chidu, ki̱ma chimi̱nti̱ ti̱bi̱di̱ritu. 47Ni̱bu ki̱nwe ki̱ni̱mi kwang, a ya̱r yii we yingki̱ku bwe yi ki̱nangu n ti kangu ki̱ni di̱ki̱li̱n yinangu. 48Yo n Teki̱n n ti neki̱n a ya ki̱ne, a ya̱r bi̱ki̱mu yii. N neki̱n we fiko ko, “Bwemi, a mayire mwang ma ni̱niye? M mi̱n n ti temun ni̱n babbanedu.”

49Yesu a ki̱nta chi ko, “Wule yo ti̱baba mi̱ne? Ta yinbu tiko m mi̱n, mang swedu a lon Temiya?” 50Aya n Yusufu ti Maryamu a swaanbu chi bwe ki̱fwaditu.

51A kuteng ki̱ku, n ki̱n a kun a nabu chi a yika Nasa̱ret ware, a kwilabu chi. N ne ki̱n a le ki̱kura ya̱m bi̱bu. 52N Yesu a dwiyen we bwiyu n ti ti̱kuran ti̱yilitu, n Kwama n ti ni̱bu ki̱mi̱la ki̱nu.#2:52 Ba̱l 3:4.

Currently Selected:

Luka 2: Tula

Highlight

Copy