Luka 1
1
Ya̱m bi̱li̱m a di̱ Luka
1Nii wuduwe Tiyofi̱la, ni̱bu nabwen a funti̱bwi ko chi mwal chitu a fwe we tibe chire. 2N chi a mwal chi nang nwe we ni̱bu bi̱bu n chi a ku ki̱ni nui chiitu we tile bi̱rke, n chi nang fanseti bi̱ba fwa ni̱bu mi̱n ti̱n ya̱m ki̱mi̱mu. 3Di̱ne yiko, nii wuduwe Tiyofilu, m mi̱n m mi̱fwan, n ta̱l ya̱m Yesumi daan we tile bi̱rke, n da̱ng a le mang mwal mi̱nu kangu dakanangu. 4M ma yiko ke n yim kasi bi̱yili̱mu ya̱m we ka ti̱ti̱le yinang ka ni̱bu a miya mi̱nengu.
Ni̱bu a fwa bi̱be Yowana naba batisma
5We ki̱dangu m mai Yiridu ki̱chau mati̱n Yafudiya tangu, wuka we fansetiyu, di̱n ki̱nu n Sa̱kariya, wu a chire a ba̱la̱ng Fanse Abisa. Di̱n nelokonu n Alisabatu, n ki̱n a chirte ti̱n a ki̱kuwang bi̱u Arunang. 6N chi ki̱ni burako, a ma da wu yile yinang kangu n Kwama ki̱badangu. N chi a bunti̱ yili̱n Tewuduwe n ti datiyu a dakaniyu. 7Aya n chi a ne bwe we di̱ne Alisabatu ki̱twa̱ne, n ki̱n ti kwartako n Sa̱kariya a ka̱ra̱ni kuu.
8Wuka ki̱di n Sa̱kariya ki̱ma nanga we Kan Kwama na Wurchalimanu. 9We da wu a fansetiye, n chi a sutu Sa̱kariya ke a le mure kan Tewuduwe a twi ki̱nung ki̱ki fi̱rfi̱ra̱ng.
10We ki̱dangu n ki̱n ki̱twi ki̱nung ki̱ki fi̱rfi̱ra̱ngu, ni̱bu a mura na fi̱lang ki̱twa̱ba̱ buni.
11Naba di̱tumbi̱re Tewuduwe a fwe Sa̱kariya mi̱ntuwe, a bale kang ki̱yilange we see we fi ki̱twing ki̱nung ki̱ki fi̱rfi̱range. 12Yinangu Sa̱kariya a ku Naba di̱tumbi̱rengu, ni̱r ki̱nu a ti̱ren, tayi a tau ki̱n. 13A ya Naba di̱tumbi̱re a yi ko, “Nwedu tayi we Sa̱kariya! N Kwama a yiu twa̱ba̱ki̱ mwangu, n ne lomo Alisabatu ka bi̱u mi̱n bwe. Mwang chau ki̱mi̱n di̱nu n Yowana. 14Ka a bi̱u ki̱ne, mwang ma furi mwen n ti ti̱mi̱lantu yinang, ni̱bu nabwen ka ma ti̱mi̱lantu n ti chi̱n we bi̱beko. 15Bwe wu ka kau ni wuduwe we kakku Tewuduwe. A ne no mwe yinabiye aya ka ridu ki̱ni Fi̱ki̱m Kwamam. #1:15 Kik 1:15 mwe yinabiye, nang mwe ni̱ba a yam a ti̱kulan yinabiye. 16N ki̱n nang wu ka yo ni̱bu Yisrelamu ka ki̱la bwa Tewuduwe Kwama. 17N ki̱n ka tu Tewuduwe we beki̱ku, n ki̱n kanodi ki̱ri̱ng ki̱ni dukan Fi̱ki̱m yinang Yiliya, n ki̱n ka bedu ki̱ni fiswe li̱mange we tibe bwesi̱me n ti tebu chimu. Ka yo bi̱bu ki̱ko Kwamamu ka ki̱la wa̱re wu bi̱bu ni̱ri dini̱mu a tabe, ka do ni̱bu ke a yiu Tewuduwe.#1:17 Mal 4:5-6 .”
(Mal 4:5-6)
18N Sa̱kariya a yi naba di̱tumbi̱re ko, “Mang medu, mang yindi yire mi ti̱tu bi̱yili̱me? M mi̱n mang ka̱ra̱n, yinu nayemi a ka̱ra̱ti̱ne.”
19Naba di̱tumbi̱re a ke ko. “M mi̱n nang chibrelu wu mi̱n tidu a kakku Kwamange, n ki̱n a tuiye ko n fwami̱n ya̱m bi̱li̱mu. 20A ya mwang kebu ya̱m mi̱mu, wu ka kau bi̱yili̱me we yo ki̱swi ko a lame. Di̱ne mwang kebu bi̱yili̱me, a ne mwan yim fwa ya̱m, ka lami̱nti̱ di bwa̱ki̱ mangu ka ride.”
21We ki̱swi wuko, ni̱bu a swe ki̱yam Sa̱kariya ka chiredu, n chi ki̱kuradu ko, kano nii wu ki̱ma wule wu ki̱ti̱kadu we mure Kan Kwamane.
22Yo n ki̱n a chi̱renge, a yimbu fwa chi mi̱n ya̱m, ni̱bu a swaan ko kano ni wu a tekan n ti naba di̱tumbi̱re we mure kane, di̱ne n ki̱n ki̱swe chimi̱n ya̱mi fa̱la̱ng a yimbu fwadu.
23Yo diti nangang kangu we Kan Kwamanu a riye, a ki̱lati̱ lo. 24We kuteng ki̱ku a dami̱ni bayimangu, neeloko n Alisabatu a ma lur, a lai dur ki̱nu swarti tunu a chirebu we lo. 25Alisabatu a yi ko, “N Tewuduwe a makai, n ki̱n a twiremi ti̱mwenitu, a ne ni ka swa̱ba mi̱ne we.”
Di̱mwar a bi̱be Yesune
26We swa̱ngi turukunangu, n Kwama a tume Naba di̱tumbi̱re ko wu di̱n ki̱nu n Chibrelu a bwa Nasa̱rete, di̱du a yaa Ka̱lili. 27A tum ki̱n a di̱kan fwa̱n, di̱da bwa̱u fati̱n n ti Yusufu, wa ki̱fi̱ku Mai Daudange. Di̱n fwa̱ni̱nu m Maryamu. 28Yo naba di̱tumbi̱re Kwama a be bwa di̱ki̱ne a yiko, “Li̱me a swe ti mun, n Tewuduwe we ware n ti mun, a yo mi̱n ti̱delaku.”
29Yinangu m Maryamu a nwe di̱siir di̱dangu, chitu a bwa ki̱n, ki̱kuradu ko kanodu di̱siir wulen di̱du. 30Naba di̱tumbi̱re a yi ki̱n ko, “Nwedu taiyuwe, Maryamu, n Kwama a yo mi̱n delaku. 31Ya mwang ma lur, mwan bi̱u bwe, mwan chau ki̱mi̱n di̱nu n Yesu. 32N ki̱n ka kau ni wuduwe, ti̱nti̱ne n ki̱n Bwe wa la chi kwange. N Tewuduwe Kwama ka ni ki̱n mati̱ntu yinang kangu tuke ki̱n n Dauda a mangu. 33N ki̱n ka ma mati̱ntu we lo Yakubu we ki̱diya kwadu, ti̱m Yisrelamu ki̱diya kwadu, Yaa ko a ne riduriye!”
34M Maryamu a yi Naba di̱tumbi̱re ko, “Ka medu yire ki̱chitu wu ka fwede, ki̱ka̱ngu mang daanbuwe n ti niyangu?”
35“Naba di̱tumbi̱re a ke ki̱mi̱n ko, Fi̱ki̱m ka bedu a di̱mune, dukan Kwamanu ka sumi̱nu. Di̱ne yiko, Bwe wu mwang bi̱dde wuduwe wu wawade, ni yal ki̱nu Bwe Kwama. 36Ko no nang kemo Alisabatu, ki̱twa̱ne a ne bi̱u bwesi̱me, a ma lur swarti turukun, kasi ki̱ku a ka̱ra̱nangu. 37A ne chitu ki̱bwa Kwamatu we.”#1:37 Yikayu tatikadan ko, di̱kwa̱l ya̱m Kwamamu a ne yaru a ti̱m.
38Maryamu a yi ko, “M mi̱n ka̱be Tewuduwe, n ke chi mwang fwaatu a fwe yiko.” Yinu naba di̱tumbi̱re a du ki̱n.
M Maryamu yaka siye Alisabatu
39Yo a ri̱keti̱ni bayi̱me, m Maryamu a funti̱bwi, a ya bi̱n di̱da bangri Yafuda. 40We bwako n ki̱n a le lon Sa̱kariya, ka si Alisabatu. 41Yo Alisabatu a nwe di̱siir Maryamune, bwe a fur ki̱ne, a fa̱kta̱ bwi. Alisabatu a rii ki̱ni Fi̱ki̱m Kwamamu. 42N Alisabatu a kuki̱ keru dukan ko, “ki̱mwangu delaku a la ki̱ka nati̱bangi kwang. Delaki̱ku we bwe wu mwan bi̱dde.
43“M mi̱n, n wure, wu mang ya chi ti̱dui ti̱te, wu ne Tewuduwe ka be miye sirame? 44Yo mang nwe ker di̱siir mune, bwe wa fur mi̱ne a fa̱kta̱bwi ki̱ni ti̱mi̱lan. 45N ya delaku di̱ne mwang ke bi̱yili̱mu mwi chi n Tewuduwe a bwa̱u ka ma mi̱nditu ka fwedu ki̱kumang!”
M Maryamu a kau Te delake
46M Maryamu a yi ko, “Mi̱n dela Kwama Tewuduwe we ni̱r mi̱nu 47Ni̱r mi̱nu a rii ki̱ni ti̱mi̱lantu nabwen di̱ne n Kwama Tewuduwe naba yukemi, 48di̱ne n ki̱n ki̱kur mi̱nu, wuti̱re ka̱beko! A ne fi̱rufi̱re, we bwa kake kutiyu kwang kani̱n yidu ko Kwama a dela mi̱n.
49“A fwe ying di̱ne n Kwama naba dukane kwang, a ma chi ti̱dui di̱ne mi̱n, n ki̱n ti̱n wu wauwade. 50N ki̱n ki̱nwe ki̱bune ni̱bu ki̱nwe tayi kiyimu we ti̱kalani yinang ka saki̱mi̱nangu.
51“N ki̱n ki̱ma chitu nabwen ki̱ni dukan fa̱li kiyu. N ki̱n a yai ni̱bu ki̱kukku dutu chiti̱mu n ti bi̱bu ki̱yungdu ko n chi, chi la chiti kwangi̱mu.
52“A chaku mati̱m bi̱duum we sa̱ngka mati̱n chite. N ki̱n a ya bi̱bu ni̱bu ki̱swa̱badi̱mu a ni chi dwiyentu.
53“N ki̱n a ni bi̱bu chun ki̱budi̱mu li̱me. Aya n ki̱n, a yo kuli̱mu ki̱ni fa̱li kwako.
54“N ki̱n a maka ka̱be yisrela, yinu a tabi̱bu ki̱nwe ki̱bune chi, 55we di̱ Yibrayime n ti di̱kur lon ki̱nu ki̱diya kwadu.” 56Maryamu a swe ti Alisabatu swarti ti̱tta, yinu a ki̱la loko.
Bi̱be Yowana naba Batisma
57Yo ki̱swi bi̱be Alisabatu a lame, n ki̱n a bi̱u bwe kwarta. 58Fati̱bu ki̱mu n ti kebu ki̱mu a nwe chi ka̱ta̱ki ti̱yilitu n Tewuduwe a ma we di̱ki̱netu, n chi a ma furi mwemwen n ti ki̱n. 59We di wu nari̱be, ni̱bu a be ka bii bwe mi̱n laaru, n chi a no ki̱baddu ka chau bwe mi̱n di̱nu ko sa̱kariya, di̱n teki̱ni̱n. 60Aya n ne ki̱n, a yi ko, “Ngango! ni yal, di̱n bwenu n Yowana.”
61N chi a yi ki̱n ko, “Aya a ne ni a chau di̱n di̱de we ki̱kuwang chiyangu!”
62Yinu n chi a swe te bwemi̱n, ko a fwa chimi̱n yinang ka ni yal bwengu. 63Sa̱kariya a swe chimi̱n ko a be ki̱ni chi mwalki yinu a mwal, “Di̱n bwenu ko Yowana.” Ti̱ta ya̱r ni̱bu yii! 64Bi̱nabi̱na yii Sa̱kariya a wuden, n ki̱n a le ki̱ dela Kwama. 65Ti̱ta kau ni̱bu mi̱n chi tayi we fi̱langu, ya̱m bi̱bu we chitu a fwetu a ti̱ran we a kun di̱da yaa Yafudiya mi kwang. 66Ni̱bu bi̱bu a nwe ya̱m bi̱bu ki̱fwadu ko, “Wu ki̱dum bwem kanodu beka kau wureni?” N chi ki̱fwadi ying, di̱ne dukan Tewuduwe n we n ti ki̱n.
N Sa̱kariya a ma fakui
67Yinu n te ki̱n, n Sa̱kariya, a ri ki̱ni fi̱ki̱m Kwamamu, a ma fa̱kuitu ko:
68“Ni dela Tewuduwe,
Kwama wa Yisrela!
N ki̱n a be ka maka ni̱bu ki̱mu
ka tuti̱ chidu we ka̱bitu.
69N Ki̱n a tum ni mi̱ne
wuduwe naba Yuke,
a ki̱fi̱ku Dauda ka̱beko.
70Tiyangu n ki̱n a fwa a yiini
fa̱kubi̱bu ki̱mi wawadi̱mu.
71A yu ni we fa̱li fakwarbu chi̱remu,
n ti ni̱bi kwang bi̱bu ki̱ ko chini̱mu.
72N ki̱n a fwa ko ka nwe
ki̱bune tukebu chi̱remu
yinu ka kuru ki̱ni
di̱twa̱mbi̱r bwa̱ki̱n.
73Di̱du nang di̱twa̱mbi̱r di̱du a ma
n ti tuke chire Yibrayime.
74A yuni we fa̱li fakwarbu chi̱reme
ke ni si Kwama a ne tayi we,
75ki̱ni wauwade n ti yile
we diti chireyi kwang.
76“M mun bwemi,
mwang kau fa̱ku Kwama wuduwe.
Mwang ti Tewuduwe mi̱n kakku,
mwang do wa̱re di̱ne beki̱ kangu.
77Mwang mwa ni̱bu ki̱mu mi̱nu tiyangu
n chi ka ya yuki̱ku,
we duku ki̱leti chiyu.
78Di̱ne we ki̱bune Kwama,
wuka ni ka chiredu
yinang yo kuko ki̱fi̱lede,
a bwa diye beka yii nidu.
79N ki̱n ka yii ni̱bu bi̱bu ki̱yadu a ki̱liyemu
n ti bi̱bu a swe a yii bwamu.
N ki̱n ka yadu ki̱ni chi̱ni
a wa̱re da wa li̱mange.”
80Yo n Yowana a dwiyene, a ri ki̱ni dukan Fi̱ki̱mi̱nu. N ki̱n a swe, a di̱kir, a lami̱nti̱ di n ki̱n a chirengi kwa̱rikwa̱riye we ni̱bu Yisrelamu.
Currently Selected:
Luka 1: Tula
Highlight
Share
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
