Luka 18
18
Baltaku a naye wu a tau ki̱bau makake
1Yinu Yesu a fwa miyari̱m ki̱mu mi̱n kaang baltaku, di̱ne ke a yung chi ko a dakan n chi kani̱n twa̱ba̱ buniti kwadu, a bwaraduwe. 2“N ki̱n a yi ko, wuka naba mwatake we di̱kan bi̱n di̱du a nwebu tayi Kwamaye. N ki̱n a ne lwangang kang we ti ni̱bu. 3We bi̱n di̱ki̱nu, wuka nabune we, ki̱bwaladi kwadu a naba mwatake ki̱wana ki̱nu ko, ‘Chaki we keme ni̱bu a mar, a dur mi̱ne.’
4“N ki̱n a mwang a ko, ki̱ni kuteng ki̱ku a fwa we ni̱r ki̱no ko, ‘Kasi no ki̱ku mang nwebu tayi Kwamangu, a neti̱ lwangang mang we ti ni̱bangu. 5Aya di̱ne naye wu a ta̱li ki̱ni ya̱me, mang funtu bwi mang chaki̱ ki̱nu, di̱ne ke a dwi n fi̱kami̱n.’ ”
6Yinu Tewuduwe a yi ko, “Ti̱nwe chitu naba mwatake a tumbu bi̱yili̱me a fwaatu. 7Yinu n Kwama a ne chaku bi̱suti̱ri̱m ki̱mu, bi̱bu ki̱twa̱ba̱ du a di̱ki̱ne kum ti kukoma? We ka ni̱n kaka chidi chika? 8Mi̱n fwa chimi̱nu ka maka chidi daatudaatu. Yinu yo Bwe Nii ka ki̱lade, ka ya ni̱bu biile ki̱ni bi̱yili̱me?”
Baltaku a naba Farisa n ti ni ki̱yiu sangkale
9N Yesu a fwa ki̱ku baltaku a dur ni̱bu bi̱bu ki̱kudu ko chi tum yilem bi̱bu ki̱swa̱ba bi̱kamu ni̱bi̱m. 10A yi ko, bi̱kam ni̱bi burau, a ya le Kan Kwama Wurchalimanu ka twa̱ba̱ buni. Wiin we tibe chi naba Farisa, wuka nii ki̱yiu sangkale. 11Yinu naba Farisa a kun a titiye, a mwe ki̱twa̱ba̱ bunitu ko, Kwama, mwang mabe di̱ne mi̱n n newe yinang bi̱kamu ni̱bu, bi̱bu ki̱ma kuti̱m n ti bi̱bu ki̱sul ni̱bi̱m n ti ki̱kulbu. Mi̱n n newe nang nii wu ki̱yiu sangkale. 12Mi̱n da̱u dimwen ki̱da yurau we difi̱kare, mi̱n chaki̱ti̱ ki̱ti̱me Kwama wiin we wu kube we chi mang yaatu.
13“Aya nii wu ki̱yiu sangkale a ti kutan, a kukubu nuyi kiyu we dii. Di̱ne kaiyan ni̱re, a ngau kwiye ki yidu ko, Kwama nwe ki̱bune mi, mi̱n naba ki̱letiye.”
14N Yesu a yi ko, “Mi̱n fwa chimi̱nu, nii wu ki̱yiu sangkale a ki̱la loko a ne ki̱le we kakku Kwamangu, a newe yinang naba Farisa. Wu ka ri̱ka yikiye, ka ya swa̱baku, wu ka swa̱ba yikiye, ka ya ri̱kaku.”#18:14 Mat 23:12; Luk 14:11.
Yesu a yo bwesi̱mu mi̱n delaku
(Mat 19:13-15; Mar 10:13-16)
15Ni̱bu ki̱bedu ki̱ni bwesi̱m chimu di̱ne ke n Yesu a yo chimi̱n delaku. Yo miyari̱m ki̱mu a kuwe, yinu a mwe ki̱ki̱l chidu. 16Yinu Yesu a yale bwesi̱mu, a yi ko, “Ti̱du bwesi̱m bi̱ti̱ri̱mu a be di̱mi̱ne. Ti̱da̱ngdu chiwe. Aya yaa Kwama n wu chi. 17Bi̱yili̱m mi̱n fwa chimi̱nu, ni wu a ne yiu Yaa Kwama yinang bwe wuti̱re, a ne ya leku Yaa Kwamangu.”
Tikake naba kuli
(Mat 19:16-30; Mar 10:17-31)
18Wuka tikake naba kuli ni̱bu Yafudam a bi̱u Yesu ko, “Naba yungke wuyile, kano mang ma wule ke n ya ti̱kuri ki̱diya kwadite?”
19N Yesu a yi ki̱n ko, “Di̱ne wule mun yaliyu mwi naba wuyilenge? Aya a ne naba wuyile we, ka n ke Kwama n ki̱kune.” 20N yim yili̱ntu, “Madu ti̱kulituwe, chidu nii we, madu kutu we, fwadu chi mwang yim be we. Ni temun n ti ne mun dwiyentu.”
21Nii wu a yi ko, “N tau mi̱n madu yo mi̱n no we bwesi̱ne.”
22Yo a nwenge, n Yesu a yi ki̱n ko, “A dutu ti̱kan chi we wiin wu mwang made. Ya mi kwali̱n chi̱n munu ki̱ni kwang, kera babumbu mi̱n. Yamwang ya kuli mwitu we bwadi. Yinu be, mwang kau miyare mi.” 23Yo a nwe ya̱m bi̱be, ni̱r ki̱nu a kaiyan, di̱ne n ki̱n naba kuli wuduwe.
24N Yesu a da̱ng nii wu a yi ko, “Ka ma bwar yinangu naba kuli ka le Yaa Kwamangu! 25Ka la chi ta̱li̱m ka le bwang li̱brang, n ti ki̱ku naba kuli ka le Yaa Kwamangu.”
26Ni̱bu a nwe ya̱m bi̱bi̱mu a bi̱u ki̱n ko, “Yinu n wure ka swidu?”
27N Yesu a ke ko, “Chitu a la dukan niintu, a labu dukan Kwama.”
28Yinu m Biti̱r a yi ki̱n ko, “Ni̱n duba chitu ni̱ni ki̱niti kwang ni̱n bumi̱nti̱nu!”
29N Yesu a ki̱nta chi ko, mi̱n fwa chimi̱nu, a ne ni ka du lo, ka naye ko, ka kebu ki̱me, ka Tebu ki̱me, ka bwesi̱m ki̱me di̱ne Yaa Kwama, 30Wu ka kwala yaki̱ kwa̱li̱n chi̱nu nabwennabwen we ki̱ka̱ngu yinu ti̱nti̱ne ka yati̱ ti̱kuri ki̱diya kwaditu ki̱dangu ki̱bedangu.
N Yesu a fwa dum bwamu ka madi̱mu
(Mat 20:17-19; Mar 10:32-34)
31Yinu Yesu a yal miyari̱m ki̱mu a ki̱swi, a yi chi ko, “Ni yika Wurchalima, finu ya̱mu fa̱kubu Kwamam a mwal a dur Bwe Nii ka riingde. 32Ka ni ki̱nu a fa̱li kuuti ni̱bu bi̱bu n ke ni̱bu Yafudame. Ka mang ti̱kali ki̱ni ki̱n, ka ni ki̱n riye, ka ti̱bu ki̱nu ki̱ni ki̱tuum, n chi ka twala ki̱nu, ka chitu ki̱nu. 33Yinu we wutare di, ka kunu.”
34Aya miyari̱m ki̱mu a swaanbu ya̱m bi̱bu n Yesu a fwamu. N Kwama a nibu chi swaan ki̱ku. N chi a kwalan yinangu ka swaan ki̱kwi ya̱mengu.
N Yesu a be ki̱du ki̱ka̱la̱ chiye
(Mat 20:29-34; Mar 10:46-52)
35Yo n Yesu a mwata Yeriko, wuka ki̱du a swe a ki̱ti̱ku waren ki̱ka̱la̱ chi. 36Yo a nwe ni̱bu nabwen ki̱sude, n ki̱n a bi̱u chi ki̱fweditu. 37Chi a yi ki̱n ko, “N Yesu naba Nasa̱ret ki̱sudu.” 38Yinu a kuki̱ keru, ki̱ni dukan a yi ko, “Yesu bwe Dauda! Nwe ki̱bune mi.”
39Ni̱bu a ti kaki̱mu a wela ki̱n ko, a lemi̱n. Aya n ki̱n a kuku keru dukan ko, “Bwe Dauda, nwe ki̱bune mi!”
40Yesu a ti a yi chi ko a be ki̱ni nii wu a di̱ki̱ne. Yo a be ki̱dwange, Yesu a bi̱u ki̱n ko, 41“Mun baddu mang ma mi̱n wule?” Yinu a ke ki̱mi̱n ko “Tewuduwe, mi̱n baddu ma ku di.”
42Yesu a yi ki̱n ko, “A le, n ya kuku diyangu, bi̱yili̱m mumu nang chi a bene.”
43Bi̱nabi̱na ki̱duwu a ya kuku diyangu, a buntu Yesu, ki̱ri̱ka Kwama. Nangu ni̱bu a ku ti̱chitu wuwangu, n chi ti̱n a dela Kwama.
Currently Selected:
Luka 18: Tula
Highlight
Share
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
