Luka 19

Yesu n ti Sa̱ka

1N Yesu a le Yeriko, ki̱sudu we bi̱nu. 2Wuka nii we fiko di̱n ki̱nu n Sa̱ka. N ki̱n nang wuduwe we ni̱bu ki̱ yiu Sangkali̱mu, n ki̱n naba kuli. 3N ki̱n a ke, ka ku nii wu ni̱bu ki̱yalu ko n Yesu we aya di̱ne ki̱ni kwanti̱le a yabu dawe di̱ne ki̱tuu ni̱be.

4Di̱ne yiko, n ki̱n a wul kakku a ya fi̱l kaang tiyang sinang ko ke ki̱ku Yesu di̱ne n Yesu ki̱bunte wa̱re wuko. 5Yo n Yesu a lam fiko, a ku Sa̱ka we tiyangu a yi ko, “Sa̱ka, suwe datu! Diwu mang swedu a lomo.” 6Bi̱nabi̱na Sa̱ka a suwe, a yiu ki̱n ki̱ni furi mwewen. 7Kanang wuwule niye wu a ku chitu a fwete, a mwe kungakunga, chi ki̱yidu ko, “N ki̱n a ya ka swedu a lo naba ki̱letiye.” 8N Sa̱ka a kun a ti a yi Tewuduwe ko, “Da̱ng Tewuduwe! We fi ki̱ka̱ngu mang kera kuli̱n mi̱nu ti̱nti yurau mang ni babumbu. Ka ma ful wuka nii a ti̱kan chiye, mang fe ki̱nu ki̱dati yaana we chi mang fuli̱n ki̱nitu.”

9N Yesu a yi ki̱n ko, “Yuki̱ku a be lomo diwu, di̱ne nii wu bwe Yibrayime.” 10Nangki̱n Bwe Nii a be ki̱baddu, ka yu bi̱bu a laiyimu.#19:10 Mat 18:11.

Baltaku a fami kubu

(Mat 25:14-30)

11Yo n chi a le ki̱nwe ya̱m bi̱be, n Yesu a chakakku ki̱fwa chimi̱n kaang baltaku di̱ne n ki̱n a mwatawe Wurchalimange, ni̱bu a ki̱la ki̱kuradu ko kano Yaa Kwama a mwatawe. 12Yinu a yi chi ko, wuka nii wuduwe a yika di̱kan bi̱n kutan, ko ke ni̱bu a tau ki̱n Mai, ka ki̱latedu.

13Nii wu a yal bwesi̱m bi̱ka̱li̱li̱m ki̱mi kubu#19:13 bwe wu ka̱li̱le: Ni wu ki̱swedu a wuka lo di̱ne ka maka ni̱bu nanga. a ni ka nang wuwule niye ka̱mbi̱r ko a mang di̱be, ka lami̱nti̱ yo ka ki̱lade.

14Ni̱bu bi̱n ki̱ni̱mu a ko ki̱n, a tum ni̱bu we di̱ki̱ne ko, nang babu ni wu ka kau Mai ni̱n.

15Nii wu a ya mati̱ntu, a ki̱la lo. N ki̱n a yale bwesi̱m bi̱ka̱li̱mu n ki̱n a nika ka̱mbi̱ri̱mu, ke a da̱ng yinangu n chi a ma di̱bengu.

16Wu a tiye kake a yi ko, Tewuduwe, ka̱mbi̱ru mwang ninu a bwii a lam ki̱da kubu we chi mwang niye.

17Tewuduwe a yi ki̱n ko, “Kwele, bwe wu yile! Yo kwer mwang ma kwa̱mbi̱ru we ti̱ti bayimite, mwang tau bi̱nti̱ti kubu.”

18Wu robe a be yi ko, Tewuduwe, ka̱mbi̱ru mwang ninu a bwii a lam ki̱da yunu. 19Naba lo a yi ki̱n ko, mwang tau bi̱nti̱ti tunu. 20Wuka a be a yi ki̱n ko, Tewuduwe, kangu mwang niyangu, nang kangu mang laiyinti̱nang. 21N nwe taiyi mwi, di̱ne m mun nii wu ki̱si̱ne. Mun da̱u chi mwan yobitu, mun kau chitu mwang fibitu.

22Tewuduwe a yii ki̱n ko, mun bwe wu kuse! Ti̱kwa̱li yi mwitu a kau mi̱n la̱n. Yo mwang yim mwiko mi̱ni ki̱si̱n, mi̱n da̱u chi n ke ti̱miye, mi̱n kau chi mang fibe. 23A mayire, mwang yangbu ka̱mbi̱r mi̱nu a bi̱ne ke yo mang ki̱lade mang ya ri̱keku we dur ki̱ne? 24N ki̱n a yi bi̱bu a ti̱ya fikomu ko, yiu ka̱mbi̱r di̱du fam wiini̱nu, ni wu fam kube.

25Aya chi a yi ki̱n ko, Tewuduwe, ki̱ni fam kubu! 26N ki̱n a ke ko, ka nang wuwule niye wu ki̱ni nangang a mabu ti̱kali ki̱ne, ka ya nangi̱ntu nabwen. Aya wu a newe ki̱ni nangange, ba ki̱ku bayim n ki̱n ki̱madangu ka kwala ti̱nu.#19:26 Mat 13:12; Mar 4:25; Luk 8:18.

27Aya fakwarbu mi̱m bi̱bu n chi a kebu mang ma mati̱n chimu, ti̱be miye ki̱n, ti̱chi̱be chi a kakku mang.

N Yesu a le Wurchalima ki̱ni bele

(Mat 21:1-11; Mar 11:1-11; Yow 12:12-19)

28A kuteng ki̱ku n Yesu a ri ya̱ma̱ngu, a chakakku ki̱ni yayu ko ki̱yika Wurchalima.

29Kanga mwata Betafachi n ti Betani wu a ba̱le kun di̱du ki̱ni tini Setuniye, a tum miyari̱m ki̱mi burau ko, 30“Ti̱ya be bi̱ne a kakku change, ka ti̱le bi̱ne, ta ya le kurunge wu ni̱bu a kwakwabe, ni a fi̱li̱nbuwe. Ti̱kwi ti̱be fi ki̱n.”

31Ka wuka nii a bi̱u chi̱n ko, wule yo ti̱kwide? Ti̱yi ki̱n ko, “Tewuduwe ki̱baddu.” 32Bi̱bu ni̱ba tumi̱mu, a ya, a ya ti̱n yinangu n Yesu a fwami̱nangu. 33Kangu n chi a yaki̱ kwidangu, Tewuduwe kurunge a bi̱u chi ko, “Wule a yo ti̱kwi kurunge?”

34N chi a yi ko, “N Tewuduwe ki̱baddu.”

35N chi a be Yesu mi̱ne ki̱n, a yaba kuli̱ni chitu we kurunge, a maka Yesu, a swe we. 36Yo n ki̱n a yaki̱ yikade, ni̱bu ki̱mau lukei chiyu we wa̱re, we bwa n Yesu ki̱yade. 37Yo n ki̱n a mwata wa̱re a subi bwa Kun Setuniye, kwala miyari̱me ki̱ni kwang a mwe ki̱dela Kwama ki̱ni ti̱mi̱lan ki̱ni ker di̱dun we chi ka̱ta̱kiti kwang n chi a kuutu.

38N chi ki̱bedu ko,

“Naba delaku Mai wu ki̱bedu

a di̱n Tewuduwe

Li̱mang we bwadi

n ti dwiyen ti̱dui!” #19:38 Sa̱b 118:26.

39Bi̱kam ni̱bu Farisamu we nabwe ni̱be a yi Yesu ko, “Naba yungke, wela miyari̱m mumu a du kemiyu!”

40N Yesu a yi chi ko, “Ka a yinge yini chiye, kaliyu ka sute chidu.”

41Kanga mwata Wurchalimangu, a ku bi̱nangu, a kii wii.

42A yi ko, “Ka no ti̱n, ti̱yim we wudiye di chi ka be chimi̱nedu ki̱ni li̱mange aya ki̱ka̱ngu ti̱lairi we nui chiyu. 43Ditiyu ka be chimi̱nedu ki̱dangu fakwarbu chimu ka kang chi̱nu a ka wuwule fwiti̱ne. Ni̱bu ki̱rangmu ka di̱ku chi̱nu a tibe, ka yinge chi̱nu a ne bwin ki̱ti̱ku. 44Ka yai chi̱ni kasikasi, n ti̱n n ti Bwesi̱m chimu we mure ya kwale chi̱n. Ka tunga ti̱muban chinti kwang a ne du ti̱kan chi kiir di̱ne ta kubu ti n Kwama a be ka yu chi̱nu.”

N Yesu a Kan Kwama di̱duna Wurchalimanu

(Mat 21:12-17; Mar 11:15-19; Yow 2:13-22)

45Yinu n ki̱n a le tanti̱lange Kan Kwama di̱duna Wurchalimanu ki̱kaka ni̱bu ki̱feku naiyu a niku ki̱tumangu. 46N ki̱n a yi chi ko, “Ya̱m Kwamamu a fwa ko, Lomi ka kau lo twa̱ba̱ke. Aya n ti̱n ti̱mar a kau lo wu dabi̱kum ki̱laiyinde.” #19:46 Yic 56:7; Yir 7:11.

47Kanang wuwule diye n ki̱n ki̱miyadu we Kan Kwama di̱duna Wurchalimanu. Aya wuduwe fansetiyeye n ti ni̱bu yungku yili̱n Musati̱mu n ti seli̱bu a bau ka chi̱u ki̱nu. #19:47 Luk 21:37. 48Aya n chi a yabu wa̱re ka chi̱n ki̱ne, di̱ne ka nang wuwule niye ka baddu ka nwe ki̱nu.

Currently Selected:

Luka 19: Tula

Highlight

Copy