Luka 20

Ni̱bu a kama dukan Yesunu

(Mat 21:23-27; Mar 11:27-33)

1Wuka di n Yesu a le ki̱ma miyaku n ti di̱mwar we yifi̱la Kan Kwamana Wurchalimane, wuduwe fansetiye, n ti ni̱bu yungku yili̱n Musanti̱mu, n ti seli̱bu a be ya ki̱n. 2N chi a yi ki̱n ko, “Fwa ni̱mi̱n ka mun ma ti̱chitu wu ki̱ni dukan wurene?”

3N ki̱n a yi chi ko, “Mang bi̱u ti̱chinu, ti̱fwa mi. 4Batisma Yowana ki̱madu ki̱ni dukan Kwamana ka dukan ni̱bi̱na?”

5N chi a twaiyan we tibe chi ko, “Ka ni yi ko a be a di̱Kwama, ka yidu ko ‘A mayire niyang kebe?’ 6Aya ka ni yi ko, ‘A be a ni̱be,’ ni̱bi kwang ka kwela nidi kali, di̱ne n chi ki̱da̱du ko n Yowana fa̱ku Kwama.”

7N chi a yi Yesu ko, “Nang yimbu bwana bemi̱nege.”

8N Yesu a yi ko, “Mi̱n ti̱n ne ma fwa chimi̱nu ka mi̱n ma ti̱chitu wu ki̱ni dukan wurene.”

Baltaku a Bwesi̱m bi̱ka̱li̱li̱m

(Mat 21:33-46; Mar 12:1-12)

9Yinu n Yesu a fwa ni̱bu mi̱n ki̱ku baltaku, “Wuka nii a fi ku Yinabe, a dub a fa̱li bi̱kam ni̱bu bi̱bu ki̱suti̱m ka̱mbi̱ri̱m, a yikati̱n bi̱kam ti̱m, a da̱u ki̱swi.”#20:9 Yic 5:1. 10Yo chuwangu a lame, a tum bwe wu ka̱li̱le ko, ko a ya yi ni̱bu ki̱su ku yinabimu, a ni ki̱ne ti̱kulan yinabitu. Aya ni̱bu ki̱su kumu a ngau ki̱n a ki̱lte nii wu kwako. 11Yinu a tume wu robe nii, ni̱bu ki̱su kumu a ngauti̱ wuko, a ni riye, a ki̱late fa̱li kwako. 12A tum ti̱wutare, n chi a nwe wuko mi̱ne burang, a maiye ki̱na tame.

13Yinu Tewuduwe kuu yinabe a yi ko, Kano mang ma wureni? Ma tum bwe ni̱re mi, ka n chi we ku ki̱siyang kange.

14“Yo ni̱bu ki̱su kumu a ku bwe ni̱re konge, n chi a twaiyan we tibe chi ko, wu nang bwe kulako. Ni chi̱u ki̱n, ke ni chau kulako.” 15N chi a mau a kuteng ku yinabe a chi̱u ki̱n. Kanodu Tewuduwe kuu yinabe ka ma chimi̱n wureni? 16Ka bedu ka chi̱be ni̱bu ki̱su ku yinabe mu ka ni bi̱kam ni̱bu ku. Yo ni̱bu bi̱bu a nwenge, chi a yi ko, “Ti̱chitu wu a ne fweenduwe.”

17N Yesu a da̱ng chi a bi̱u ko, “Yinu ya̱m Kwamamu ki̱fwadu ko wule?” Kale ni̱bu muki̱mu a konge, nang kale la chi ki̱ni nangange. #20:17 Sa̱b 118:22. 18“Nii ka yaru we kwame, ka yaradi yiii, aya nii wu kwam ka yara dur ki̱ne ka kau buktem.”

19Ni̱bu yungku yili̱n Musanti̱mu, n ti wuduwe fansetiye a bau ka tau Yesu ki̱dang kangu, di̱ne n chi a swaan ko a fwa ya̱m baltakumu a dur chiin. Aya n chi ki̱nwe tayi ni̱biyu.

Feku sangkal a di̱ Kaisare

(Mat 22:15-22; Mar 12:13-17)

20N chi a le ki̱del ki̱nu, yinu a tum ni̱bu ki̱yolami burau yinang ni̱bu bi̱yili̱m. N chi a ke Yesu ka kwaba ya̱m ke chi tami̱n chi nii wuduwe kwabna Roma ki̱ma mati̱n ne. 21Ni̱bu ki̱yolamu a bi̱u ki̱n fal ko, “Naba yungke, ni̱n yim mun fwadu, mun yungti̱ bi̱yili̱mu, aya mwang kobu wukani, mun miya bi̱yili̱mu yinang ka Kwama ki̱baddu ni̱bu ka ya yayuwangu. 22A da yiko nang ni Kaisar sangkala ka daba?”

23Aya n Yesu a swaan kassan chiitu, yinu a yi chi ko, 24“Yungi ka̱mbi̱r suren. Wule wure, n ti di̱n wuren we ka̱mbi̱ru?”

25N chi a ke ko, “N Kaisar.”

N ki̱n a yi chi ko, “Ti̱tu n ti̱u Kaisaritu ti̱ ni Kaisar. Ti̱tu n ti̱u Kwamatu ti̱ni Kwama.”

26We fi n chi a kwala kangu ka tau ki̱nu we ya̱m bi̱bu a fwayi kwa̱rikwa̱rimu. N chi a ya̱r yi we di̱ki̱li̱n di̱du, a lengi si̱ng.

Di̱bi̱du a kunku Yesung we furu

(Mat 22:23-33; Mar 12:18-27)

27Bi̱kamu ni̱bu Sadukiyamu, bi̱bu ki̱fwadu ko a ne kunki̱ we kute bwangu, a be bwa di̱Yesuwe, a bi̱u ki̱n ko, #20:27 Nfa 23:8. 28“Naba Yungke, Musa a mwal ni̱mi̱n ko, ka ni a bwa a du naye ko a ne bwesi̱m wenge, a dakan ke kwarta ka nadu ke n chi a ya bwesi̱m. 29Kang ki̱dang bi̱kam kebu we chi bi̱dibiin. Wusele a yiu naye a bwa a bi̱bu bwe. 30Wu robe a na nabune, a bwa a neti̱ bwe we. 31Wu tare a fwe ti̱ni yi ko. A kau n chi ki̱ni kwang a na nabune, a bwarati̱n a ne bwesi̱m we. 32A kuteng ki̱ku nabune a bwa ti̱n. 33We di swang kute, naye wu kanodu wu wure yo n chi ki̱ni bi̱dibiin a na ki̱ne?”

34Yesu a yi chi ko, “Ki̱na a ti̱ti̱ni. 35Aya ni̱bu ka dakadu ka kunu we kuteng bwamu, chi ka swedu we di̱kalanu ki̱bedi̱nu, kwartabu a ne yiu nati̱bu, a ne naye ka ma ki̱na we. 36N chi a ne bwati̱du we ki̱da. We yiko chi kanodu yinang bwesi̱m ti̱tumbi̱rim. Ka kau bwesi̱m Kwamamu di̱ne n chi a kun we bwa. 37We ya̱mu a twiku be di̱ki di̱lukenemu, m Musa a laibulaiye a yi ko, ni̱bu a bwarani̱mu ka kunti̱duwe. N ki̱n a yi ko Tewuduwe nang Kwama Yibrayim n ti Kwama Yichaku, n ti Kwama Yakubu a siye, #20:37 Chi̱ 3:5. 38N Kwama, wu a ni̱bu ti̱kurime, n ke wu a ni̱bu a bi̱bwari̱m. We a di̱ki̱ne ni̱bu kwang ki̱ni ti̱kuri.”

39Bi̱kam ni̱bu yungku yili̱n Musati̱mu a yi ki̱n ko, “Naba yungke, m fwa der!” 40A ne nii a ru ni̱ru ka ma di̱kan di̱bi̱de we.

M Masiya bwe wure

(Mat 22:41-46; Mar 12:35-37)

41M Masiya a bi̱u chitu ko, “A mayire ni̱bu ki̱yidu ko n Yesu bwe Daudange? 42Dauda ki̱n ki̱fwan a yi we Taki̱da Sa̱bura ko,

Tewuduwe a yi Tewuduwe mi ko,

Swe a kang ki̱yilang mang.”#20:42-43 Sa̱b 110:1.

43Ka lami̱nti̱ yo mwang

fau fakwarbu mumu a nani mwiye.

44Dauda a yal Masiya ko Tewuduwe, ka madi yire m Masiya ka kau bwe Daudange?

Yesu n ti ni̱bu yungku yili̱ni̱mu

(Mat 23:1-36; Mar 12:38-40)

45Yo ni̱bu kwang a swe ki̱nwe ki̱ne, a yi miyari̱m ki̱mu ko, 46“Ti̱ma dandan n ti ni̱bu yungku yili̱ni̱mu, n chi ki̱mi̱la chirku ki̱ni kuli̱n di̱du, a mi̱lan ni̱bu kani̱n sii chidu we fantiya kwa̱ma̱riyu. N chi ki̱bau ka fanti yiyili we fi murake n ti fantiya mabwi. 47N chi ki̱sul nati̱m buni̱mu we loni chiyu. Ki̱twa̱ba̱ bunitu swa̱n ko ke ni̱bu a yim chi. Ni̱bu bi̱ki̱mu ka nwe riye ka la bi̱kamu.”

Currently Selected:

Luka 20: Tula

Highlight

Copy