Luka 14

N Yesu a be nii a difi̱kare ni̱bu Yafudam

1Wuka difi̱kare ni̱bu Yafudam, n Yesu a le lo wuka tikake ni̱bu Farisamu ka chau chabtu. Ni̱bu a kur ki̱mi̱nti̱ nuiyuwe. 2Wuka nii wu naniyu n ti kani kiyu a mubamubane we fiko. 3N Yesu a bi̱u ni̱bu Farisamu n ti ni̱bu yungku yili̱n Musati̱mu ko, “A le we yilangu ni be nii we difi̱kare Yafudam ka a leba?”

4Aya n chi a nibu di̱ki̱li̱n yiin. N Yesu a tau fa̱la̱ng nii wangu, a be nii wu, a yi ko, yikan.

5Yesu a chakakku a bi̱u chi ko, “Ka wuka nii ki̱ni bwe ka kurenge, ka tanka a yara bwir we difi̱kare ni̱bu Yafudame. Ta kurti̱bu tiko dii wu difi̱kare ni̱bu Yafudam, tafunti bwi, ti̱chaki̱du we a bwiru!” #14:5 Mat 12:11. 6N chi a fwabu chi di̱ne a yim ko n Yesu a la chi ki̱ni bi̱yili̱mu.

Da̱u dur munu n ke ti̱kan chi

7N Yesu a ku tiyangu ni̱bu bi̱bu a be mabwi ki̱sutu fanti yiyiliyu chi fwanangu. N ki̱n a fwa ka nang wuwule mi̱n ya̱m bi̱bu: 8“Ka wuka nii a yal chi̱n a Yiye ti̱kali ki̱naye, yang suti̱du fi wuyile we muni̱n mun fwan. Ka ledi yiko di̱ne mwang yimbu ka naba ti̱kali ki̱naye a yale wuka nii wu a la mun ki̱ni dwiyene. #14:8-10 Ba̱l 25:6-7. 9Ka fwe yiko, naba lo wu a yal chi̱ni burako, kanodu ki̱ki̱lu ki̱ya̱nu ko, ‘Ma bwanu, ni wu fiswemo’, di̱ne yiko, kano mun ki̱ladu mun swedu a fi wuti̱re wu mwang nwen dibwiye. 10Aya chi a la chiye, ka ni a yali̱n a ti̱kali ki̱naye, ya, yang bau fiswe wuti̱re swe we. Yo ni wu a yali̱ne ka bede, ka ri̱kanu ko, ‘M be fi, fatemi, swe a fi ni̱bu bi̱duum wemi̱ne.’ We fiko nui ni̱biyi kwang ka kudu ka yinti̱nu ko nii wu a yali̱ne, a ri̱ka mun. 11Wu ka ri̱ka dur ki̱ne, ka kadu n ke ti̱kan chi. Wu a yung ko n ki̱n n ke ti̱kan chiye, ka ya ri̱kaku.” #14:11 Mat 23:12; Luk 18:14.

12Yinu Yesu a yi naba di̱yale ko, “Ka n yale ni̱bu mwi a be chau chabtu a mabwiye, yalu ka fati̱bu mum we n ti kebu mum, n ti naman mwangu n ti kuli̱mu ki̱dwan n ti muni̱mu, di̱ne ki̱dum ni̱bi̱m bi̱bu kano ki̱ni niin te kwa̱se we wuka di. 13Aya ka mwang yal ni̱bu a mabwiye, yal ki̱dum ni̱bi̱m bi̱bu. Babumbi̱bu n ti bi̱bu ki̱ni deer we bwiti chimu, yal ki̱kubtiyu n ti ki̱dububu. 14Ni̱bu bi̱bu a ne tum mi̱ne kwa̱se, nang fi mwang yan delaku Kwamange, n ti delaki̱ku kanodu di swan kute yo n Kwama ka nika ki̱ti̱ntiye.”

Baltaku a Yiye wuduwe

(Mat 22:1-10)

15Wuka nii wu a swe ki̱chau chabtu ki̱dwan n ti Yesuwe a nwe chi Yesu a fwaatu, n ki̱n a yiko, “Naba delake wu ka chau chabtu we Yaa Kwama.”

16N Yesu a yi ki̱n ko, wuka nii a sii Yiye wuduwe, a yalte ni̱bu nabwen. 17Yo ki̱swi wu a Yiye a lame, n ki̱n a tum ka̱be ko, ko a ya, a yi bi̱bu ni̱bu a yalemu ko, ti̱be, chabtu a bi.

18Aya n chi ki̱ni kwang a ko beku. N kawure a yati̱ fi̱li wuka swabi̱ndi̱nu. Wuka nii ko, aya n ta̱n kuu wu fwiye, a kabi ki̱ng ma yadu ma da̱ngedu, mami bwanu.

19Wuka nii ko, “N ta̱n tanti̱kai wa̱ra̱ku ti̱miyangi kubu, mi̱n yadu yamang swe chidu, mi̱n wananu, ma bwanu.”

20Wuka a yi ti̱n ko, “M ma ki̱na wu fwiye, a ne ledu mang chiru ma ya Yiye.”

21“Ka̱be a ki̱la we a fwa Tewuduwe ko mi̱n chi ni̱bu a yi ki̱niti kwang.” Tewuduwe ko a ma ki̱fwini yinu a yi ka̱be ko, kaiyu ki̱swi we, ki̱lan n le neti̱loyu n ti beti̱wa̱ri yiyu a bi̱niyu, mure babumbi̱bu n ti ki̱kubti, n ti ki̱dubi̱bu, n ti bi̱ngi̱rmani̱mu be ki̱ni chi a fi.

22Bi̱nabi̱na, ka̱be a yi ko, Tewuduwe, m ma chitu mwang fwaatu aya ni̱bu a bemu bayim we chabti̱tu niyang siitu.

23“Tewuduwe a yi ka̱be wu ko, ‘Ki̱latuwe neti̱loyu ti wa̱riyu, yal miye ni̱bu ke a be ri lomi. 24M fwa chimi̱n a ne ni ka twai chabtu ti̱te we ni̱bu no mang yalemu ko wiin.’ ”

Riye bunti̱ku Yesunge

(Mat 10:7-38)

25Wuka di ni̱bu nabwen ki̱bungadu n ti Yesu, n ki̱na sabran a yi chi ko, 26“Nii wu a ke ka bumiti̱ne, ka a kobu Te ki̱n, n ti ne ki̱n n ti naye ko, n ti Bwesi̱m ki̱mu n ti kebu ki̱mu bi̱bari̱mu n ti bi̱wiyemu, kasi no nang ti̱kuri kitu. Ka ko be, a ne medu ka kau miyaremi.” #14:26 Mat 10:37. 27Nii wu a ne kedu ka nwe riye we kuteng mange, ka da̱u ki̱tiyang bwa mange, a ne medu ka kau miyaremi. #14:27 Mar 8:34; Luk 9:23.

28“Ka wuka nii we tibe chi̱n ki̱baddu ka mu neti kane, a no le n ki̱n ka swedu, ka da̱ng chitu ka taditu, yinu ka yindu ka, ka lwe ki̱mi̱n muki̱ka? 29Ka n ki̱n a ru ka tame, a swanbu muki̱ke, ni̱bu ki̱kudumu a ne nura ki̱nu nurana? 30N chi ne ka yidu ko wu a no ki̱mo chiye a swan ba?”

31A fwati̱ kaang baltaku ko, “Ka wuka Mai a chir ki̱ni ni̱bu kuni̱m ka ma kun n ti wuka maiye, a ne mwedu ka da̱ng dukan ni̱bu kuni̱m ki̱mu kuniriti kubi̱mu ka we la bi̱bu kuniriti wan turabu n chi ki̱yadu ka di̱kadu ware ma? 32Ka ne mede, yo ni̱bu kuni̱mu a tibu lan fiye, n ki̱n ka tum fa̱ka̱bu ko a ya doka tibe chi. 33Ka kadi yiko ka nang wuwule niiye wu ne du chiti kwang di̱ne mi̱ne, a ne yim kau miyaremi.”

Baltaku a bumang

(Mat 5:12; Mar 9:50)

34“Bumu chi ti̱yili, aya ka ta̱ma̱ng kangu a chire, ni medi yire ni ki̱ladi ki̱ne? 35A ne le chi, ka n ke ni kura ti̱me. Wu ki̱ni ki̱teliyu ka nwede, a nwe.”

Currently Selected:

Luka 14: Tula

Highlight

Copy