Luka 13

Woku ki̱ti̱mang ka twiyake

1We ki̱swi wuko bi̱kam ni̱bu bi̱bu we fikomu a fwa Yesu mi̱n chibeku ni̱bu Ka̱lilimu m Bi̱latu a yo ni̱bu a chibeni̱mu a yo yaki̱ ma niku ki̱tumange. 2N Yesu a yi chi ko, “Ti̱kamadu we ti ki̱leti ni̱bu Ka̱la̱tiyamu a la yi ni̱biyu di̱ne n chi a bwa a riye we Ka̱liliye. 3A newe yiko, aya mi̱n fwa chimi̱nu, ka ta wobu ki̱ti̱mu we ki̱leti chiye, ta bwadi kwang yinang chi. 4Bi̱kami kub chiri nari̱bi̱mu nabwe kan di̱swa̱mi̱n a yar chimi̱ntuwe a Si̱lwam, n chi a twiyan, ti̱kudu n chi a la ni̱bu Wurchalimamu ki̱ni ki̱letiya? 5Mi̱n fwa chimidu a newe yiko, ka ta wobu ki̱ti̱me, ta twiyadu yinang chi.”

6Yinu n Yesu a ma chimi̱n kaang baltaku ko, “Wuka nii we, wu ki̱ni tini we lambu ku yinabe. N ki̱n a ya, a babba ti̱kulan we tiyang sinangu a yabu chi. 7A yi nii wu ki̱to lambuwe ko, duu swa̱ti̱tii ti̱ta, mi̱n bedu mi kate mang ya ti̱kulan we tiyang sinang ki̱ku mang yaangbuwe. Swi tiyang sinangu, ki̱kaiti̱ tuitu we ying a tubu chi? 8Nii ki̱to lambuwe a yi ko, Tewuduwe ko, du tiyangu didiin n doti̱ ki̱da swari diin. 9Ka a tu ti̱kulantu, a le, Ka a tube, mwang switi̱nu.”

N Yesu a be naye difi̱kare ni̱bu Yafudam

10Wuka difi̱kare ni̱bu Yafudam, n Yesu ki̱ma miyaku a kan muraku ni̱bu Yafudamn. 11Naye we fiko wu ki̱fi̱bti a kai ki̱ne. N ki̱n a ma swa̱ti̱ti kub chiri nari̱bu ki̱ni bwiyu a fwifwiye, a yimbu kunu. 12Ki̱dangu n Yesu a ku nayengu, a yal, a yi ko, “Naye, burang mwangu a dun.”

13Yinu n Yesu a kuku fa̱la̱ngu a twai naye. N ki̱n a be, a be dela Kwama.

14Wuduwe muraku ni̱bu Yafudame a ma ki̱fwini yinang kangu a ku Yesu a be naye wu we Difi̱kare Ni̱bu Yafudame. N ki̱n a kun, a yi ni̱bu a fikomu ko, “Diti nangangi yurukun yiyu ta yaan bekiyu. Ti̱be we diti yikiyu ta ya beku, aya a bwin difi̱kare ni̱bu Yafudam.”#13:14 Chi̱ 20:9-10; Mwa 5:13-14.

15Aya n Tewuduwe a yi ki̱n ko, “Ni̱bu di̱bebelin bi̱kusi̱m. Mare ka nang wuwule niye ki̱kwi tanti̱kai n ti kurunge ko, ko ke ki̱niye mwe we difi̱kare ni̱bu Yafudame? 16Naye wu, ki̱kuwang Yibrayim. N Setan a kwau swa̱ti̱ti kub chiri nari̱bu, a dakabu ka ya beku we difi̱kare ni̱bu Yafudama?”

17Ya̱m bi̱bu a yo ni̱bu ki̱ko ki̱ni̱mu a nwe dibwi, aya ni̱bu a nwe ta̱ma̱ng di̱ne we chi ka̱ta̱kitu n ki̱n a maatu.

Baltaku a dur ki̱kwi churame

(Mat 13:13-32; Mar 4:30-32)

18N Yesu a ke ko, “Ya Kwama kanodi yire, mang swedu ki̱ni wureni?” 19Yinang ki̱kwi ki̱si̱raiye, wu nii a rub ki̱yange a kuuko, yinu a dwiyen a kau tiyange, yinu ki̱ni̱btiyu a ma ki̱kuli we.

Baltaku ki̱ni yis

(Mat 13:33)

20N Yesu a bi̱u ti̱chi ki̱da ko, “Kano mang swe Yaa Kwama ki̱ni wureni? 21Tiyang yis wu wuka naye a lu ki̱ni miim cham kwa̱se yitta, a lamantin yo a furane.”

Kwar di̱ti̱ri̱n

(Mat 7:13-14)

22Yinu n Yesu a tau wa̱re ki̱yika Wurchalima, a bunti̱ bi̱ntu ti̱duitu n ti ti̱ti̱ritu ki̱miya ni̱bu mi̱nu. 23Wukane nii a bi̱u ki̱n ko, “Tewuduwe, ni̱bu bayim ka ya yuki̱ka?”

N Yesu a yi chi ko. 24“Ti̱funti̱bwi ti̱lenga kwa̱r di̱tiri̱nu. Mi̱n fwa chimi̱nu, ni̱bu nabwen ka funtubwi ko chi ledu, aya n chi a ne ya dawe.” 25Ka Tewuduwe a tu a le, a yinge kwa̱r lokone, n ti̱n ta tida tame, tani̱ng bu kwa̱ru, ti̱yidu, tiko wudu ni̱mi̱n kwa̱ru, n ki̱n ka ki̱ledu ko, “Mang yim chinbu.” 26Yinu n ti̱n ta yidu tiko, mare ni̱n chau, ni̱n no n ti mun. Ti̱nti̱ne, mare m ma miyaku we neloti niyu.

27Aya n ki̱n ka yi chidu ko, mang yim chinbu ti bwanu ta be mi̱ne, ti̱yikan mi̱na fi, n ti̱n ni̱bu bi̱bwilamu.#13:27 Sa̱b 6:8.

28Yo ta ku Yibrayim n ti Yichaku, n ti Yakubu n ti fa̱kubu Kwamamu we Yaa Kwama ta kiwii ti ki̱rti̱ku numang.#13:28 Mat 22:13; 25:30. 29Ni̱bu ka bedu we twa̱ru n ti ki̱twale n ti Twa̱r wuli̱nu n ti kir kulanu, ka swedu ka chau chabtu ti̱kali ki̱naitu we yaa Kwamatu.#13:28-29 Mat 8:11-12. 30“We fi fal, bi̱kaki̱mu, beka kau swan kuteng. Bi̱bu a no a kutemu beka chakakku.”#13:30 Mat 19:30; 20:16; Mar 10:30.

N Yesu a ma furi ki̱liki̱li we Wurchalimangu

(Mat 23:37-39)

31We ki̱swi wu, bi̱kam ni̱bu Farisamu a be yi Yesu ko, “Du fi, yika wuka fi, di̱ne m Mai Yiridu ki̱baddu ka chinnu.”

32N ki̱n a yi chi ko, “Yati̱ yi ki̱nginge wuko tiko, mi̱n chaku ki̱fi̱bti, mi̱n beti̱ ni̱bu, we wutare di mang ri ki̱kemi. 33A mwintuwe mang chakakku ki̱ni yayumi diwu n ti fi̱nenang n ti kirenang. Ki̱kumang a dakabu fa̱ku Kwama ka bwadu a wuka fi ka n ke Wurchalima.”

34“Wurchalima! N chi̱be fa̱kubu Kwamamu, ti̱kwela bi̱bu n Kwama a tum chimi̱nemu ki̱ni kali. A dati yile, mi̱n fumbwi mang mur chi̱nu yinang ka nayibe ki̱mur betiki a mure la̱bi kiyengu, aya ta keyibu! 35Ti̱da̱ng fal Kan Kwama chi̱nu a Wurchalimanu ki̱ka̱ngu a kau kanglo. Mi̱n fwa chimi̱nu a ne ta kuiti̱nu we ki̱da ka lami̱nti̱ ki̱swi wu beta yidu ko, ‘Kwama a yo delaku we di̱ki̱ne wu ki̱bedu a di̱n Tewuduwe Kwama.’ ”#13:35 Sa̱b 118:26; Yir 22:5.

Currently Selected:

Luka 13: Tula

Highlight

Copy