Yowana 9
9
N Yesu a be nii wu ni̱ba bi̱u ki̱duwe
1Yo n Yesu a yaki̱sude, a ku nii wu ni̱bu a bi̱u ki̱duwe. 2Miyari̱m ki̱mu a bi̱u ki̱n ko, “Tete, naba yungke, naba ki̱le n wure, yo ni̱bu a bi̱u nii wu ki̱duwe? Kano nang bwenga? Kanang bi̱bu a bi̱u ki̱ni̱ma?”
3N Yesu a yi chi ko, “N ke bwe n keti̱ bi̱bu a bi̱u ki̱ni̱mu. Aya ki̱chitu wa fwe ko ke ni ku dukan Kwaman. 4A mwintuwe nang ma nangang wa twiyengu, kangu fi̱la wengu. Kum ki̱bedu. Ka a benge, nii a neka yim ma chi. 5Kweru mi̱n we ti̱ti̱ni̱nu, mi̱n nang yiiku ti̱ti̱niyangu.”#9:5 Mat 5:14; Yow 8:12.
6Yo n ki̱n a ri ya̱me, a ti̱bu ki̱tuumu a ti̱m, a lu ki̱ti̱mu ki̱ni ki̱tuumu, a wa ni wu mi̱n we nuiyu. 7A yi nii wu ko, “Ya, yang nura nuiyu a mwe wa far Si̱lwam ka nang chikiye wutumre.”
Nii wu a yikan, a nura nuiyu, a ki̱lawe ki̱kudi.
8Ni̱bu a fi̱lang chiyamu, n ti bi̱ba no yim ki̱n ki̱ka̱la̱ chimu, a bi̱u ko, “Wu n ke wu niyang yim ki̱sweda fi, ki̱ka̱la̱ chiya?”
9Bi̱kamu ko, “N nangki̱n, bi̱kamu a yi ko, a chirkachirkane.”
Aya n ki̱n, n ki̱fwan a yi ko, “Mi̱n nangki̱n.”
10N chi a yi ki̱n ko, “M ma yire, nuyu a wudene?”
11A yi chi ko, “Nii wu n chi ki̱yalu ko, Yesu we a lu ki̱ti̱m a wami we nuyu. N ki̱n a ya̱i ko n yika Si̱lwam n yang nura nuyu. N ya, n yang nurawe. N ki̱lawe mi̱n kudi.”
12N chi a bi̱u ki̱n ko, “Nii wu a fi̱re?” Nii wu a yi ko, “Mang yimbu.”
Ni̱bu Farisamu a ta̱l ya̱m bee ki̱mu
13N chi a yikan, ki̱ni nii wa no ki̱duwe, a ya ni ni̱bu Farisamu. 14N Yesu a lu ki̱ti̱mu a wude nuiyu we nii wu Difi̱kare ni̱bu Yafudamu. 15Ni̱bu Farisamu fal, a bi̱u nii wa be a ti̱duye yinangu chitu a fwengu. Nii wa yi ko, “A lu ki̱ti̱m, a wa mi we nuiyu, a yiko n yang nura nuyu. Kangu mang nuranangu, nuyi miyu a wuden, mi̱n kudi.”
16We fiko bi̱kamu ni̱bu Farisamu a yi ko, “Nii wu n ke naba Kwama, yo a ma nangangu Difi̱kare ni̱bu Yafudame.”
Aya bi̱kamu ko, “Nii ki̱ni ki̱letite ka medu ka ma chi ka̱ta̱ki ti̱ta? Ti̱kuran chitu a lakan.”
17A kuteng ki̱ku, n chi a ki̱latuwe nii wa no ki̱duwe, a bi̱u ki̱n ko, “Mun yal ki̱nu mwi n wure, yo n ki̱n a wudu mi̱n nuiye?”
Nii wa yi chi ko, “Mi̱n yalu mi fa̱ku Kwama.”
18Bi̱duum ni̱bu Yafudamu a kebu bi̱yili̱mu ko ni wa no ki̱du aya ki̱ka̱ngu ki̱kudi. Di̱ne yuko n chi a tum ni̱bu ko a yale ni̱bu bi̱bu a bi̱u ki̱ni̱mu. 19N chi a bi̱u chi ko, “Wu nang bwe chi̱na? Wu nang bwe ta bi̱u ki̱duwa? A mayire ki̱kudiye?”
20Bi̱ba bi̱bi̱mu a yi ko, “Bwe wuni̱n, ni̱n bi̱u ki̱du. 21Aya na yimbu kanga ma ki̱ku diyangu. Na yim ti̱bu ka n wure a be ki̱ne. Ti̱bi̱u ki̱n, n ke bweti̱re, a lwe ka fwa chi n ki̱n a yimitu.”
22Bi̱ba bi̱u ki̱ni̱mu a fwa yiko di̱ne, n chi ki̱wul tayi ni̱bu Yafudamu. Ni̱bu Yafudamu a tu a ki̱ka yi ko nii ka yidu ko n Yesu nang Masiya, ni̱bu ka chaki̱du we muraku ni̱bu Yafudame. 23Nang chi a yo bi̱ba bi̱u ki̱ni̱mu, a yi ko, “Ti̱bi̱u ki̱n, a wi bweti̱rengatu.”
24N chi a ki̱lan ki̱robang a yale ni wa no dwiyene, a yi ki̱n ko, “Fwa bi̱yili̱mu, ni Kwama dwiyantu, ka tiinti̱na di̱ni̱ne ni wa bene naba ki̱letiye.”
25N ki̱n a ke chi mi̱n ko, “Ka naba ki̱letiye mang yimbu, chitu mang yimitu a no mi̱n ki̱du, a ya ki̱ka̱ngu mi̱n kudi.”
26N chi a bi̱ti̱ ki̱da ko, “A ma mi̱n wureni? A wudu mi̱n nuiyu yire?”
27A ki̱nta chi ko, “A ma tu ma fwa chimi̱n ta nwebu a mayire? Ti̱badu ta nwe ti̱du ki̱da? Ka ti̱badu ta kau miyari̱m ki̱ma?”
28N chi a yi ko, “A tu ki̱du wu nuiyu a wudene ko, m mun nang miyare ko! N ni̱n, m bi̱u Musa. 29Ni̱n yim n Kwama a fwa ya̱mu n ti Musa, aya nang yimbu bwa wu nii a chirmi̱ne.”
30Nii wu a yi chi ko, “A ti̱ya̱r mi̱n yi. A yi ko, kasi ki̱ku ta yimbu bwanu a chirmi̱nengu, a mwintuwe a wudumi nuiyu. 31N ki̱n a chakakku ko, ni̱n yim n Kwama a nwebu twa̱ba̱ku naba ki̱letiyengu, aya ki̱nwe ki̱ka naba bunti̱kengu, wu ki̱ma chi n ki̱n ki̱badde. 32Feredi niyang nwengbuwe, ko nii wu ni̱bu a bi̱u ki̱duwe, a ya beku. 33Ka no nii wu, n ke wa chire a di̱Kwama, a no neka medu ka ma ki̱chitu wu.”
34N chi a kaka ki̱n ko, “Ni̱bu a bi̱u mun, a ki̱leti, be mwang fwa ni mi̱nu ko wule?”
Ti̱duyi ti̱ta kwalan swaangki
35N Yesu a nwe ya̱mu ko, n chi a kaka ni wu. Yo n chi a tekane, a bi̱u ki̱n ko, “N ke bi̱yili̱mu we Bwe Nii ya?#9:35 Bwe Nii: Tatti̱ki̱dai Yika̱riyu a mwal ko bwe ni. Ki̱yung wuka ki̱duum niim wu a lakan ti ni̱be. Nii wu a chire a di̱Kwama ki̱ni bwi niye.”
36Nii wa ke ki̱mi̱n ko, “Tewuduwe, n ki̱na wure? N fwami ke n ke bi̱yili̱mu we di̱ki̱ne.”
37N Yesu a yi ki̱n ko, “A mwang tu mwang kui, m mi̱n nang wu ki̱fwa ya̱mu ti mune.”
38Yinu ni wa yi ko, “Tewuduwe, n ke bi̱yili̱m.”
N ki̱n a sung a si Yesu.
39N Yesu a yi ko, “N lewe ti̱ti̱nitu di̱ne ke m be, m mwata ya̱mu. Di̱ne ke bi̱bu ki̱kudimu a dwiyen, aya bi̱bu a kubu diimu a kudi.”
40Tiyangu ni̱bu Farisamu we fiko, a nwe ya̱m bi̱bangu, n chi a yiko, “Mu yi ni̱nu mwiko n ni̱n ki̱duba?”
41N Yesu a yi chi ko, “Ka no ti̱n ki̱dube, a no, ne ki̱leti we. Aya yo ta yi tiko n ti̱n n ke ki̱dube, ki̱leti chiyu a kabi yiko.”
Currently Selected:
Yowana 9: Tula
Highlight
Share
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
