Yowana 10

Baltaku a naba toke N Yesu nang naba toke wu yile

1N Yesu a yi ko, “Bi̱yili̱m ka nii a fi̱la kwale, a lebu ki̱rana kwa̱re, ti̱kitu kutu n ti wurku. 2Aya nii wu a le a kwa̱re, nang naba toku kwanti wu yile. 3Nii ki̱to ki̱rane, ki̱wudu naba toku kwantiye mi̱nu. Kwantiyu ki̱nwe ker nii wu ki̱to chidi̱nu, ki̱yal kwantiyu ki̱ni di̱nbi ki̱chiri ki̱n, ki̱yikan tame. 4Ka a chaku kwantiyu a chir fi̱lange, ki̱ti kakku. Kwantiyu ki̱nabi̱ ki̱na kuteng, di̱ne a me ker ki̱nu. 5Kwantiyu a ne bunti̱ rungko, ka wul ki̱nu di̱ne a mebu ker ki̱nu. Kwantiyu ka yaradu ka du ki̱nu we.”

6N Yesu a fwa chimi̱n ki̱ku baltaku aya n chi a swanbu chi n Yesu ki̱fwaditu.

N Yesu nang naba toke wu yile

7N Yesu fal a ki̱la fwati̱ ki̱da ko, “Mi̱n fwa chimi̱n bi̱yili̱mu, m mi̱n nang kwa̱r ki̱ran kwantinu. 8Bi̱ba tuiyimi kwang kana dabi̱kuum ti bi̱wuri̱li̱m. Kwantiyu a nwebu wuka nii we tibe chi. 9Mi̱n nang kwa̱ru, nii ki̱ledu a di̱mi̱ne ka ya swiku. We di̱mi̱ne, n chi kani̱ng ledu ki̱chiru ki̱chau cham mu a nachang. 10Daaku ki̱bedu di̱ne kuutu n ti chiku n ti wurku. Aya m mi̱n m be di̱ne ke n chi a ya ti̱kuri. Ti̱kuri ti̱ta lwei.”

11“Mi̱n nang naba toke wu yile. Naba toke wu yile ki̱ni yikiyu di̱ne kwantiyu. 12Naba toke wu ki̱ma nangang surenge, a ne to kwantiyu yinang fangko kwantiye. Ka n ki̱n a ku nam wubare tiyang bawu ki̱bede, ki̱wulu ki̱ du kwantiyu we. Nam wubare beka chi̱be kwantiyu, ka yai ti̱ni yak. 13Nii wu ki̱ma nangang surenge, a wul di̱ne kwantiyu n ke yiki. Kwantiyu a bubu ki̱n ni̱r.”

14Mi̱n nang naba toke wu yile. N yim kwanti miyu, n chi a yinti̱ mi̱n. 15N yim Temi tiyangu n ki̱n a yim mi̱nangu. N ni ti̱kuri mitu di̱ne kwanti miyu.#10:15 Mat 11:27; Luk 10:22. 16Mi̱ni ki̱ni yikai kwanti we yiyu a newe ki̱ran di̱di̱nu. A mwintuwe mang bedu ki̱ni chi ti̱n. N chi ka nwe ker mi̱nu. Ki̱ranu kanodi diin, naba toke wiin.

17Te ki̱mi̱layu di̱ne mi̱n ni ti̱kuri miye, ti̱kuri ti̱tu mang yiu ti̱nuwei. 18A ne nii ka yitiye we, di̱ne mi̱n ni ti̱kuritu m mi̱fwan. Mi̱n ki̱ni dukanu ma ni ti̱kuri, mi̱ni ki̱ni dukanu ma yiti̱duwe. Te a ni mi̱n dukan di̱du.

19Bi̱duum ni̱bu Yafudamu a yara yichiyu we fiko, ki̱tuka ya̱m bi̱bu. 20Bi̱kamu a yi ko, “Naba fangmiye, naba ki̱fi̱btiye, ti̱wassa ya̱m ki̱mu a bwa.” 21Aya bi̱kamu a yi ko, “Bi̱bu ya̱m n ke bi̱bu a naba ki̱fi̱btiyem. N chi a yi ko, naba ki̱fi̱btiye ka wudu ki̱du mi̱n nuiya?”

Ni̱bu Yafudamu a ko Yesu

22We chuwang kangu n Yesu a ya Yiye wurku a Wurchalima. 23N Yesu a chir ki̱bwa̱lu we yifi̱la Kan Kwamane, a bale ki̱ni ki̱di̱ngu, n chi ki̱yalu ko, “Ki̱di̱ng Solomon.” 24Bi̱duum ni̱bu Yafudamu a chire a be mura ki̱mi̱ntuwe a yi ko, “Fwa bi̱yili̱mu, laiyu chiwe, m mun nang Masiya naba yuke a ke ni̱n kamadu chi we?”

25N Yesu a yi chi ko, “A mang fwa chimi̱n ta kebu bi̱yili̱mu. Chi ka̱ta̱kitu mang ma a dukan Teminitu ki̱yungdu ka m mi̱n n wure.” 26Aya ta kebu bi̱yili̱mu di̱ne n chi̱n ta bunti̱bu mi̱n. 27Kwantimiyu ki̱nwe ker mi̱nu, n yim chi, n chi a yinti̱ mi̱n. 28Mi̱n ni chi ti̱kuri ki̱diya kwadi, n chi a ne twiyaanduwe. A ne nii ka yitu chi we fa̱la̱ng mangu we. 29M temi wa ni mi̱n kwanti yiye, a la chiti kwang. A ne ni a lwe ka yitu kwanti yiyu we fa̱la̱ng kange we. 30Mi̱n n ti Temi a fi wine.

31“Ni̱bu Yafudam a wote kaliyu ki̱da, ko chi kwela Yesu. 32N Yesu a yi chi ko, m ma nangi̱n Temitu nabwen ka ti̱yili, ti̱kwelayu a ki̱ki̱le?”

33Bi̱duum ni̱bu Yafudam a yi ki̱n ko “Nang kwelambu di̱ne nangang ki̱yilang ki̱ku mwang mangu. Aya di̱ne mwang swa̱ba ne, m mun nii duri ki̱li, mwang yidu mwiko m mun ti Kwama a fi wiine.”

34N Yesu a yi chi ko, “Mare a mwal we yilang Musangu ko, ‘N fwami n ti̱n yinang Kwamati.’ #10:34 Sa̱b 82:6. 35Ka a yal bi̱bu a be ki̱ni ya̱m Kwamamu ko kwamatiye, ya̱m bi̱li̱m bi̱bu a ne sute duwe. 36A mayire ti̱yidu tiko, n swa̱ba Te, di̱ne ma yi mi, m mi̱n Bwe Kwama? 37Ti̱kedu bi̱yili̱mu we ka nangi̱n ti̱tu mi̱n maditu n ke ta Kwamaye. 38Aya ka mi̱n ma nangi̱n Kwamaye, kono ta kebi̱ bi̱yili̱mu we di̱mi̱ne, ti̱ke bi̱yili̱mu we nangi̱ntu ta kuutu. Di̱ne ke ti̱swaan, ti̱yim tiko Kwama a di̱mi̱ne, m mi̱n a di̱ki̱ne.”

39N chi a wituwe ko chi tau Yesu, n Yesu a chirtuwe tibe chi.

40N Yesu a ki̱la ki̱ti̱ku la wurdune, a ya swe we fi n Yowana a no ki̱mang batisma. #10:40 Yow 1:28. 41Ni̱bu nabwen a nabi̱ ki̱ne we fiko ki̱fwadu ko, “Kasi ki̱ku n Yowana a mabu chi ka̱ta̱kitangu, aya kanang ti̱ti̱le chiye, wu n ki̱n a fwa a dur nii wune, bi̱yili̱m.” 42We fiko ni̱bu nabwen a ke bi̱yili̱mu we di̱Yesu we.

Currently Selected:

Yowana 10: Tula

Highlight

Copy